មន្ត្រីជលផលប្រើប្រាស់ឧបករណ៍ស្មាត។ រូបថត សហការី
ភ្នំពេញៈ មន្ត្រីសង្កាត់ និង ខណ្ឌរដ្ឋបាលជលផលចំនួន ៥០០នាក់ហើយ ទទួលបានការបណ្តុះបណ្តាលពីការប្រើប្រាស់ប្រព័ន្ធគ្រប់គ្រង និង ត្រួតពិនិត្យការល្បាត (SMART) រហូតមកដល់ពេលបច្ចុប្បនេះ ដើម្បីពង្រឹងការអនុវត្តច្បាប់ជលផលតាមរយៈការផ្តល់ការគាំទ្រពីអង្គការស្បៀង និង កសិកម្មនៃសហប្រជាជាតិ (FAO) ក្រោមជំនួយថវិកាពីសហភាពអឺរ៉ុប (EU)។ នេះយោងតាមអង្គការ FAO។
អង្គការ FAO បានបញ្ជាក់ថា៖ «ប្រើប្រាស់ប្រព័ន្ធ SMART ឧបករណ៍នេះនឹងជួយសម្រួលដល់ការប្រមូល ការវិភាគ ការផ្ទុក និងការវាយតម្លៃទិន្នន័យ ស្តីពីការងារចុះល្បាត ព្រមទាំងសកម្មភាពនៃការអនុវត្តច្បាប់ផ្សេងៗដែលពាក់ព័ន្ធ ស្ថានភាពនៃការគំរាមកំហែង និងលទ្ធផលនានាព្រមទាំងសកម្មភាពនៃការអនុវត្តច្បាប់ផ្សេងៗដែលពាក់ព័ន្ធ»។
លោក សុង ហុង អនុប្រធានរដ្ឋបាលជលផល នៃក្រសួងកសិកម្មរុក្ខាប្រមាញ់ និង នេសាទ បានឱ្យដឹងថា ការចុះល្បាតដោយប្រើប្រាស់ប្រព័ន្ធ SMART ក្នុងវិស័យជលផលនៅកម្ពុជា បានចាប់ផ្តើមដំណើរការតាំងពីឆ្នាំ ២០២១ មក។ ក្នុងនោះបានធ្វើការចុះល្បាតប្រមាណជាង ៤៥ ០០០ដង នៅលើដែននេសាទទឹកសាប និង សមុទ្រប្រមាណជាង ២ ៥០០ដងក្នុងមួយឆ្នាំៗ។
លោកបានបន្ថែមទៀតថា គំរូទិន្នន័យប្រព័ន្ធ SMART សម្រាប់ដែននេសាទសមុទ្រ និងទឹកសាបត្រូវបានបង្កើតឡើង។ ផ្ទាំងកម្មវិធីប្រើប្រាស់ជាភាសាខ្មែរ ដែលជាកំណែចុងក្រោយបំផុតនៃកម្មវិធី SMART ត្រូវបានដាក់ឱ្យប្រើទាំងនៅលើកុំព្យូទ័រ និង ទូរស័ព្ទដៃ។ ក្រុមការងារស្នូល SMART របស់រដ្ឋបាលជលផលក៏ត្រូវបានបង្កើតឡើង ដើម្បីផ្តល់ការគាំទ្រផ្នែកបច្ចេកទេសដល់មន្រ្តីនៅតាមទីវាល គ្រប់គ្រងនិងវិភាគទិន្នន័យ និងធ្វើបច្ចុប្បន្នភាពទិន្នន័យផ្សេងៗ។
គម្រោងការគាំទ្របច្ចេកទេស កម្មវិធីជំរុញកំណើនវិស័យជលផលប្រកបដោយចីរភាព និង បរិយាបន្ន (CAPFISH-Capture) របស់អង្គការ FAO បានជួយបង្កើនសមត្ថភាពដល់មន្រ្តីរដ្ឋបាលជលផលក្នុងការប្រើប្រាស់ប្រព័ន្ធ SMARTនេះ។ នៅក្នុងប្រព័ន្ធនេះផងដែរ ក៏មានបញ្ចូលកម្មវិធី និងមុខងារវិភាគទិន្នន័យផ្សេងៗ ដែលផ្តល់ជាអត្ថប្រយោជន៍យ៉ាងច្រើនដល់មន្ត្រីជលផល ក្នុងការគ្រប់គ្រង និង ការពារធនធានជលផល។
កម្មវិធី CAPFISH-Capture មានគោលបំណងលើកកម្ពស់អនុលោភាពនៃបទប្បញ្ញត្តិសម្រាប់ការពារធនធានជលផលរបស់កម្ពុជា។ តាមរយៈជំនួយបច្ចេកទេសរបស់អង្គការ FAO ដែលផ្តល់មូលនិធិដោយ EU និង ដោយមានកិច្ចសហការជាមួយអង្គការសមាគមអភិរក្សសត្វព្រៃ (WCS) បានជួយគាំទ្រមន្រ្តីរដ្ឋបាលជលផលក្នុងការរៀបចំប្រព័ន្ធ SMART ដែលជួយពង្រឹងការអនុវត្តច្បាប់ស្តីពីជលផលនៅកម្ពុជា។
សាវតារល្អៗ ក៏ដូចជា សមិទ្ធផលនានា ដែលទទួលបានពីការប្រើប្រាស់ប្រព័ន្ធ SMART នៅកម្ពុជា រួមទាំងការពង្រឹងយុទ្ធសាស្ត្រអនុវត្តសម្រាប់ពេលអនាគត ត្រូវបានផ្សព្វផ្សាយក្នុងសិក្ខាសាលា កាលពីថ្ងៃទី១៦ និង ១៧ ខែឧសភា ឆ្នាំ២០២៤ ក្នុងគោលបំណងធានាបាននូវនិរន្តរភាពនៃការប្រើប្រាស់ប្រព័ន្ធនេះក្នុងវិស័យជលផល។
លោក Theodorus Visser មន្រ្តីបច្ចេកទេសផ្នែកគ្រប់គ្រងជលផលទឹកសាប និងព័ត៌មាននៃអង្គការ FAO មានប្រសាសន៍ថា SMART ត្រូវបានប្រើប្រាស់ទូទាំងពិភពលោកនៅតាមតំបន់អភិរក្សជាង១ ០០០កន្លែងនៃបណ្តាប្រទេសជាង ១០០ ហើយរដ្ឋាភិបាលជាង ២៥ប្រទេស បានទទួលយកទៅអនុវត្ត និង ប្រើប្រាស់ជាស្តង់ដារសម្រាប់ការគ្រប់គ្រងព័ត៌មាន និងទិន្នន័យ។ នេះបើយោងតាមអង្គការ FAO។
SMART ត្រូវបានបង្កើតឡើងតាមរយៈភាពជាដៃគូជាមួយអង្គការសមាគមអភិរក្សសត្វព្រៃ (WCS) រួមជាមួយនឹងទីភ្នាក់ងារអភិរក្សឈានមុខចំនួនប្រាំពីរទៀត។
កម្មវិធីនេះ គឺជាប្រភេទឧបករណ៍ ដែលអាចចូលប្រើបានដោយឥតគិតថ្លៃ ដែលមានសមត្ថភាពជួយសម្រួលដល់ការងារវាស់វែង វាយតម្លៃ និងលើកកម្ពស់ប្រសិទ្ធភាពនៃការពង្រឹងសកម្មភាពការចុះល្បាតនិងការអភិរក្ស។
តាមបទពិសោធនដែលទទួលបានពីការអនុវត្តប្រព័ន្ធ SMART នៅកម្ពុជា វានឹងក្លាយជាប្រព័ន្ធកម្មវិធីគំរូសម្រាប់យកទៅអនុវត្តនៅតាមបណ្តាប្រទេសជាច្រើន នៅក្នុងតំបន់អាស៊ីអាគ្នេយ៍ និង ទូទាំងពិភពលោកដែលជាការរួមចំណែកដល់និរន្តរភាពនៃការអនុវត្តច្បាប់ស្តីពីជលផល នៅដែននេសាទទឹកសាប និង សមុទ្រ៕
