ក្រុមក្មេងទំនើងកាន់ដាវសាំម៉ូរៃ ត្រូវបានសម្ថកិច្ចឃាត់ខ្លួននាពេលកន្លងមក។ រូបថត នរគបាល
លោកនាយករដ្ឋមន្ត្រី ហ៊ុន ម៉ាណែត ស្នើឲ្យក្រសួងយុត្ថិធម៌ពិនិត្យមើលការយកដាវសាំមូរ៉ៃតាមខ្លួន និងបញ្ជាឲ្យអភិបាលខេត្តនិងសមត្ថិកិច្ចចាត់វិធានការម៉ឺងម៉ាត់ទៅលើក្រុមដាវសាំម៉ូរៃ និងក្មេងទំនើងទាំងអស់។
បទបញ្ជានេះដាក់ចេញជាថ្មីនៅពេលលោកចូលរួមការប្រកាស «ផែនទីបង្ហាញផ្លូវឆ្ពោះទៅការគ្របដណ្តប់សុខភាព ជាសកលនៅកម្ពុជា ឆ្នាំ២០២៤-២០៣៥» នៅព្រឹកថ្ងៃទី២៣ខែឧសភានេះ បន្ទាប់ពីសកម្មភាពក្មេងទំនើងបានកើតឡើងនាពេលថ្មីៗនេះទាំងនៅភ្នំពេញ និងនៅតាមខេត្តមួយចំនួន។
លោកថ្លែងដូច្នេះថា៖ «ក្នុងនាមប្រមុខរាជរដ្ឋាភិបាល ខ្ញុំសុំចេញបញ្ជាទៅអភិបាលនៃគណៈអភិបាលរាជធានីខេត្តទាំងអស់ ជាមួយនឹងសមត្ថកិច្ចពាក់ព័ន្ធត្រូវចាត់វិធានការឲ្យបានម៉ឺងម៉ាត់បំផុត ជាពិសេសក្រុមដៃសាំម៉ូរ៉ៃ។ កាប់គ្នាប៉ុន្មានថ្ងៃនេះនៅភ្នំពេញ ខ្លះដាច់ដៃ»។
លោកប្រាប់ឲ្យអភិបាលខេត្ត និង សមត្ថកិច្ច ត្រូវធ្វើឲ្យបានម៉ឺងម៉ាត់ទាំងវិធានការរដ្ឋបាលក្នុងការទប់ស្កាត់ និងវិធានការអនុវត្តច្បាប់ «ដោយគ្មានការបន្ធូរបន្ថយ ដោយគ្មានការលើកលែង» ដើម្បីការការពារសណ្ដាប់ធ្នាប់សាធារណៈ និងសន្តិសុខសង្គមត្រូវតែអនុវត្តឲ្យបានម៉ឺងម៉ាត់បំផុតទៅតាមច្បាប់ជាធរមានរបស់យើង»។
សម្រាប់ស្ថាប័នតុលាការ លោកស្នើតុលាការ និងស្ថាប័នអយ្យការអនុវត្តច្បាប់ឲ្យបានម៉ឺងម៉ាត់ក្នុងការចាត់ការរឿងពាក់ព័ន្ធករណីក្មេងទំនើង។ លោកក៏ក្រើនរំឭកទៅដល់ឪពុកម្ដាយក្នុងការបន្តការអប់រំដល់កូនៗរបស់ខ្លួន លោកក៏ក្រើនរំឭកដល់យុវជនផងដែរឲ្យចៀសវាងពីអំពើទាំងនោះ។
លោកថា៖ «បើយើងអនុវត្តទៅ សូមកុំបន្ទោសរដ្ឋាភិបាលថាចិត្តអាក្រក់ ធ្វើបាបក្មេង។ មិនមែនធ្វើបាបទេក្មួយ គឺដើម្បីតម្រង់ទិសក្មួយ និងការពារអាយុជិវីតរបស់ក្មួយៗ»។
ក្នុងប៉ុន្មានសប្ដាហ៍ចុងក្រោយនេះ មានសកម្មភាពក្មេងទំនើងជាច្រើនក្រុមចាក់កាប់គ្នាទាំងនៅទីក្រុងភ្នំពេញ និងនៅក្នុងខេត្តមួយចំនួន ដូចជានៅក្រុងប៉ោយប៉ែតកាលពីចុងខែមេសាជាដើម។
លោក ទូច សុខៈ អ្នកនាំពាក្យក្រសួងមហាផ្ទៃ បានប្រាប់ភ្នំពេញប៉ុស្តិ៍ថា បទបញ្ជា និងអនុសាសន៍នេះគឺជាការលើកទឹកចិត្តដែលបានបង្ក្រាប និងអប់រំផ្សព្វផ្សាយដើម្បីទប់ស្កាត់សកម្មភាពក្មេងទំនើង។
លោកថា៖ «បទបញ្ជានេះគឺជាការផ្ញើសារដ៏អង់អាច មោះមុតមួយ ក្នុងការបង្ហាញពីឆន្ទៈរបស់រដ្ឋាភិបាលក្នុងការទប់ស្កាត់សកម្មភាពរបស់ក្មេងទំនើងដែលជាការផ្ដាំផ្ញើទៅដល់ក្មេងទំនើងឲ្យបញ្ឈប់សកម្មភាពរបស់ខ្លួនជាបន្ទាន់។ បើមិនបញ្ឈប់ទេ ការអនុវត្តច្បាប់ម៉ឺងម៉ាត់ និងបង្កើតបទប្បញ្ញត្តិដើម្បីទប់ស្កាត់សកម្មភាពទាំងនេះ»។
លោកថា រដ្ឋមន្ត្រីក្រសួងមហាផ្ទៃ ស សុខា តែងតែក្រើនរំឭកដល់សមត្ថកិច្ច និងរដ្ឋបាលដែនដីឲ្យអនុវត្តច្បាប់ និងផ្សព្វផ្សាយទប់ស្កាត់។ លោកថា ក្មេងទំនើងភាគច្រើនត្រូវបានអប់រំ លើកលែងតែសកម្មភាពនោះធ្ងន់ធ្ងរ ដែលត្រូវកសាងសំណុំរឿងទៅតុលាការ។
លោកថា៖ «ដោយសារតែសកម្មភាពក្មេងទំនើងនៅតែបន្ត សាររបស់សម្ដេចនេះលោកចង់បង្ហាញថា នេះគឹជាសារចុងក្រោយសម្រាប់ប្អូនៗក្មួយដែលជាក្មេងទំនើងដែលបង្ករបញ្ហាអសន្តិសសុខសង្គម និងបទល្មើសផ្សេង។ បើសិនជាបទល្មើសចូលជាករណីព្រហ្មទណ្ឌហើយ ទោះតិចតួច ស្រាលឬ មធ្យម ឬធ្ងន់ គឺត្រូវបញ្ជូនទៅតុលការផ្ដន្ទាទោសដាច់ខាត»។
លោកថា សកម្មភាពក្មេងទំនើងកើតឡើងជាហូរហែង ចន្លោះពី១ទៅ៥ករណីក្នុងមួយថ្ងៃ។ តែគិតជាមធ្យមអាចមានពី ៣ ទៅ ៥ករណីក្នុងមួយសប្ដាហ៍នៅទូទាំងប្រទេស។
លោក យង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្ដិភាព យល់ឃើញថា ការលើកឡើងរបស់លោក ហ៊ុន ម៉ាណែត ចំពោះវិធានការទប់ស្កាត់សកម្មភាពក្មេងទំនើងគឺជារឿងត្រឹមត្រូវ។ លោកលើកទឹកចិត្តឲ្យរដ្ឋាភិបាលធ្វើឲ្យបានលើសពីនេះទៀតដើម្បីធានានិរន្តរភាពនៃការទប់ស្កាត់នេះ។
លោកថ្លែងថា រឿងដែលសំខាន់គឺត្រូវមើលលើបញ្ហានានាក្នុងសង្គម ក្នុងនោះគឺការគ្រប់គ្រងការផ្សាយពាណិជ្ជកម្មគ្រឿងស្រវឹង ដែលទាក់ទាញមនុស្សឲ្យប្រើប្រាស់គ្រឿងស្រវឹង។
លោកថា ការផ្សាយលើកទឹកចិត្តដែលកន្លែងខ្លះឃើញស្ទើរតែ១០ម៉ែត្រមានមួយនោះ មានឥទ្ធពលជាងការអប់រំរាប់ពាន់ដង។
លោកថា៖ «ក្រោកព្រឹកឡើងចេញតែពីផ្ទះគាត់ឃើញផ្លាកផ្សាយពាណិជ្ជកម្ម ដែលទាក់ទាញឲ្យទៅផឹក ឬភាពឡូយឆាយជាមួយគ្រឿងស្រវឹង។ នេះជាការទាក់ទាញដ៏គ្រោះថ្នាក់ឲ្យពួកគាត់ក្លាយជាបងតូចបងធំ។ ដូច្នេះការដោះស្រាយបញ្ហាគ្រឿងស្រវឹងត្រូវធ្វើមុនគេ»។
លោកថា អង្គការរបស់លោក និងវាគ្មិនជាច្រើនបានជំរុញឲ្យមានច្បាប់គ្រប់គ្រងគ្រឿងស្រវឹង និងការគ្រប់គ្រងការផ្សាយពាណិជ្ជកម្មគ្រឿងស្រវឹង។
លើសពីនេះ លោកចង់ឃើញក្រុមប្រឹក្សារឃុំសង្កាត់យកបញ្ហាទប់ស្កាត់ការប្រើប្រាស់គ្រឿងស្រវឹងនេះដាក់ចូលទៅក្នុងកញ្ចប់ថវិកាវិនិយោគរបស់ខ្លួន។
លោកថា៖ «ការលើកឡើងរបស់សម្ដេចនាយករដ្ឋមន្ត្រី អាចនឹងធ្វើឲ្យក្រុមប្រឹក្សាឃុំសង្កាត់ទាំងអស់ត្រូវពិចារណាក្នុងការដាក់បញ្ហាគ្រឿងស្រវឹងនេះទៅក្នុងផែនការវិនិយោគរបស់ខ្លួនដើម្បីផ្សព្វផ្សាយ ដូចមានចែងនៅក្នុងសៀវភៅមគ្គុទេសរបស់ណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គជអប)»។
លោកបន្តថា បញ្ហាដែលត្រូវទប់ស្កាត់ដែរនោះ គឺបញ្ហាគ្រឿងញៀនកុំឲ្យចូលទៅក្នុងសហគមន៍។ ជាមួយគ្នានេះ ត្រូវធ្វើមានការបង្ហាញភាពជាគំរូរបស់មនុស្សជំនាន់មុនដល់យុវជនដើម្បីឲ្យពួកគេធ្វើតម្រាមតាម៕
