ប្លង់សាងសង់ស្ថានីយបណ្តុះកូនឈើថ្នាក់តំបន់ នៅខេត្តត្បូងឃ្មុំ។ រូបថត ក្រសួងបរិស្ថាន
ភ្នំពេញៈ ប្លង់សាងសង់ស្ថានីយបណ្តុះកូនឈើថ្នាក់តំបន់ទាំងអស់នៅក្នុង ៥ខេត្តរបស់ក្រសួងបរិស្ថានត្រូវបានបញ្ចប់ការសិក្សារួចរាល់ ហើយការបណ្តុះកូនឈើជាង ១០លានដើមក្នុង១ឆ្នាំៗ គ្រោងនឹងចាប់ផ្តើមនៅឆ្នាំក្រោយនេះ។
ក្រសួងបរិស្ថានបានឱ្យដឹងថា ការសាងសង់ស្ថានីយបណ្តុះកូនឈើថ្នាក់តំបន់ក្នុងខេត្តត្បូងឃ្មុំ សៀមរាប កំពង់ស្ពឺ កោះកុង និងមណ្ឌលគិរីនឹងចាប់ផ្តើមធ្វើឡើងនៅពេលឆាប់ៗខាងមុខនេះ ក្រោយពីការសិក្សាប្លង់សាងសង់ត្រូវបានបញ្ចប់។
អ្នកនាំពាក្យក្រសួងបរិស្ថាន លោក ខ្វៃ អាទិត្យា បានប្រាប់ភ្នំពេញប៉ុស្តិ៍នៅថ្ងៃសុក្រ ទី១៤ ខែមិថុនានេះថា៖«ចំពោះស្ថានីយទាំងអស់ហ្នឹង យើងបានបញ្ចប់គម្រោងប្លង់សាងសង់ហើយ ហើយបានប្រគល់ផែនទីសម្រាប់ការសាងសង់ហ្នឹងបានពីរទៅស្ថានីយនៅភ្នំគូលែន និង មួយទៀតនៅត្បូងឃ្មុំ។ ការបណ្តុះផលិតកូនឈើនឹងចាប់ពីឆ្នាំក្រោយទៅជាបណ្តើរៗហើយ»។
ក្រៅពីស្ថានីយថ្នាក់តំបន់ធំៗទាំង ៥ នោះ ក្រសួងបរិស្ថានបានជំរុញឱ្យមន្ទីរបរិស្ថានក្នុងរាជធានីភ្នំពេញ និងនៅខេត្តទាំង ២៤ឱ្យផលិតកូនឈើដើម្បីចែកជូនពលរដ្ឋតាមខេត្តរៀងៗខ្លួនចាប់ពីឆ្នាំ២០២៤នេះតទៅផងដែរ។
លោកបានឱ្យដឹងថា ជាលទ្ធផល ក្នុងរយៈពេលប្រមាណជា ១០ខែមកនេះ កូនឈើជាង ១លានដើមត្រូវបានបណ្តុះរួចរាល់ ហើយរដ្ឋមន្រ្តីក្រសួងបរិស្ថាន លោក អ៊ាង សុផល្លែត ក៏បានផ្តល់កូនត្នោតបន្ថែមប្រមាណជា ៣០ម៉ឺនដើមទៀតផងដែរ។
លោកបានថ្លែងដូច្នេះថា៖ «គោលបំណងសំខាន់គឺដើម្បីធានាជំរុញយុទ្ធនាការកូនដើមឈើយ៉ាងតិច ១លានចាប់ពីឆ្នាំ ២០២៤ នេះទៅ និងដើម្បីជំរុញការឆ្លើយតបទៅនឹងគោលដៅរបស់កម្ពុជាយើងជាប្រទេសអព្យាក្រឹត្យកាបូន ហើយនឹងបង្កើនគម្របព្រៃឈើឱ្យបាន ៦០ភាគរយក្នុងឆ្នាំ ២០៥០។ យើងក៏ចង់បង្កើនភាពបៃតងរបស់នៅកម្ពុជាយើង។ យើងជំរុញលើកទឹកចិត្តពលរដ្ឋឱ្យស្រលាញ់ភាពបៃតងតាមរយៈការដាំដើមឈើ»។
លោកបានបន្ថែមថា ក្នុងយុទ្ធនាការដាំដើមឈើនេះផងដែរ គឺក្រសួងមិនមែនចេះតែចែកជូនឱ្យពលរដ្ឋយកទៅដាំឱ្យរួចពីដៃនោះទេ ប៉ុន្តែក្រសួងមានផែនការគ្រប់គ្រង និង តាមដានច្បាស់លាស់ តាមរយៈការបង្កើតកម្មវិធីទូរស័ព្ទដៃមួយឈ្មោះថា«App ចក្រា»។ កម្មវិធីទូរស័ព្ទដៃនេះគ្រោងនឹងដាក់ឱ្យដំណើរការនៅចុងខែមិថុនានេះ ដើម្បីតាមដានចាប់ពីការលូតលាស់ ឬការថែទាំរបស់ដើមឈើក្រោយពីដាំរួច។
លោកបានបញ្ជាក់ថា៖ «ពលរដ្ឋទទួលបានកូនឈើហើយ ពួកគាត់នឹងចុះឈ្មោះនៅតាមអែប«App ចក្រា»នេះ ដើម្បីបង្ហាញពីសមិទ្ធផលរបស់គាត់ដែលយកកូនឈើទៅដាំហ្នឹង ទាំងពីការដាំរហូតដល់ការថែទាំ ដើម្បី តាមដានពីការលូតលាស់របស់ដើមឈើទាំងអស់នោះ»។
ក្រសួងបរិស្ថានក៏គ្រោងនឹងរៀបចំពិព័រណ៍ផ្សព្វផ្សាយ និង ចែកកូនឈើក្រោមមូលបទ «ពន្លកបៃតង» ចាប់ពីថ្ងៃទី ១០-១៦ ខែកក្កដា ខាងមុខនេះ នៅមុខទីស្តីការក្រសួងបរិស្ថានផងដែរ។ កម្មវិធីនេះធ្វើឡើងដើម្បីដាក់តាំងបង្ហាញ និងចែកកូនឈើជូនពលរដ្ឋ យកទៅដាំដុះនៅតាមគេហដ្ឋាន សាលារៀន វត្តអារាម ទីកន្លែងសាធារណៈ និងទីតាំងឯកជននានា ដោយឥតគិតថ្លៃ។
ការរៀបចំព្រឹត្តិការណ៍នេះក៏ ដើម្បីឆ្លើយតបទៅនឹងតម្រូវការស្ថានភាពជាក់ស្តែង របស់កម្ពុជា និងនិន្នាការបរិស្ថានពិភពលោក សម្រាប់ឱ្យកិច្ចការពារថែរក្សា និងអភិរក្សជីវៈចម្រុះនិងធនធានធម្មជាតិ ក្នុងតំបន់ការពារធម្មជាតិ ឱ្យទទួលបានប្រសិទ្ធភាព និងមានចីរភាព នឹងជំរុញដំណើរកម្ពុជាឆ្ពោះទៅជាប្រទេសអព្យាក្រឹតកាបូន និងមានគម្របព្រៃឈើចំនួន ៦០ភាគរយនៅឆ្នាំ ២០៥០។
លោក ខ្វៃ អាទិត្យា ក៏បានឱ្យដឹងផងដែរថា វេទិកាចែកកូនឈើនេះ នឹងត្រូវធ្វើឡើងជារៀងរាល់ឆ្នាំ នៅថ្ងៃទី ១០ខែកក្កដា ចាប់ពីឆ្នាំ ២០២៤ នេះតទៅ។
ទាក់ទងទៅនឹងការលើកកម្ពស់បរិស្ថាននេះដែរ យុទ្ធនាការទី២ ”កម្ពុជាស្អាត ខ្មែរធ្វើបាន”កំពុងតែទទួលបានការចូលរួមពីពលរដ្ឋយ៉ាងផុសផុលផងដែរ ក្រោយពីដាក់ឱ្យដំណើរការកាលពីខែឧសភាកន្លងមក។
រដ្ឋមន្រ្តីក្រសួងបរិស្ថានមានជំនឿយ៉ាងមុតមាំថា យុទ្ធនាការនេះនឹងទទួលបានជោគជ័យដូចយុទ្ធនាការទី១«ថ្ងៃនេះខ្ញុំ មិនប្រើថង់ប្លាស្ទិក» ដែលទទួលបានការគាំទ្រពីពលរដ្ឋកម្ពុជាជាង ៨លាននាក់។ រហូតមកដល់នឹងពេលនេះ ពលរដ្ឋនៅក្នុងឃុំ/សង្កាត់ចំនួន ១១៤ហើយ បានចូលរួមក្នុងយុទ្ធនាការនេះ។ នេះបើយោងតាមក្រសួងបរិស្ថានកាលពីថ្ងៃទី១៣ ខែមិថុនានេះ៕
