ភ្នំពេញៈ ដើមឈើចម្រុះរាប់ម៉ឺនដើមនឹងត្រូវធ្វើពិធីដាំនៅខែកក្កដាខាងមុខនេះ នៅក្នុង «រុក្ខទិវា» និង យុទ្ធនាការ «ពន្លកបៃតង» ហើយនិង«ផ្ទះមួយខ្នង ដើមឈើមួយដើម» ដើម្បីបង្កើនភាពបៃតង និងគម្របព្រៃឈើនៅកម្ពុជា។
ដើមឈើប្រណិតសរុប ៩ ៩៩៩ដើម គ្រោងនឹងដាំនៅលើផ្ទៃដី ៣០ហិកតានៅក្នុងការប្រារព្ធពិធី «រុក្ខទិវា» ថ្ងៃទី០៩ ខែកក្កដា ដែលនឹងរៀបចំឡើងនៅស្ថានីយផ្សព្វផ្សាយ និងស្តារព្រៃឈើបន្ទាយអង្គរ ដែលស្ថិតក្នុងភូមិខ្នារ ឃុំលាយបូរ ស្រុកត្រាំកក់ ខេត្តតាកែវ ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។ នេះបើយោងតាមក្រសួង កសិកម្ម រុក្ខាប្រមាញ់ និងនេសាទ។
ពិធីនេះត្រូវបានរៀបចំឡើងដោយ ក្រសួងកសិកម្ម និងគណៈកម្មាធិការជាតិរៀបចំបុណ្យជាតិ-អន្តរជាតិ។
គណៈកម្មាធិការជាតិរៀបចំបុណ្យ ជាតិ-អន្តរជាតិបានណែនាំឱ្យស្ថាប័នពាក់ព័ន្ធត្រៀមកូនឈើ គ្រប់ប្រភេទ ដើម្បីឱ្យការរៀបចំពិធីរុក្ខទិវា ០៩ កក្កដានេះ ប្រព្រឹត្តទៅដោយជោគជ័យ ដើម្បីនាំមកនូវឧត្តមប្រយោជន៍នៃការលូតលាស់វិស័យព្រៃឈើ សត្វព្រៃ ជីវសាស្ត្រចម្រុះ និងនាំមកនូវការរីកចម្រើននៃរមណីយដ្ឋានទេសចរណ៍ជាដើម ។
«រុក្ខទិវា» គឺជាមរតកដ៏ថ្លៃថ្លារបស់ព្រះករុណាព្រះមហាវីរក្សត្រ ព្រះបរមរតនកោដ្ឋ។ កាលពីនៅមានព្រះជន្ម ព្រះអង្គតែងបានយកព្រះទ័យទុកដាក់ចំពោះការដាំដុះព្រៃឈើដ៏មានផលប្រយោជន៍សម្រាប់មនុស្ស និងសត្វនៅកម្ពុជា។
លោក ញ៉ិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវបានឱ្យដឹងថា រហូតមកដល់ពេលនេះ ការរៀបចំកន្លែងប្រារព្ធពិធី «រុក្ខទិវា» នៅស្ថានីយផ្សព្វផ្សាយ និងស្តារព្រៃឈើបន្ទាយអង្គរនោះសម្រេចបានជាង ៨០ភាគរយហើយ។
លោកថ្លែងថា៖ «ការងារដាំដើមឈើ យើងសហការណ៍គ្នារៀបចំរួចរាល់អស់ហើយ។ នៅកន្លែងហ្នឹងគឺយើងនឹងដាំដើមធ្នុងនៅដីចំការឈើរបស់រដ្ឋ»។
ក្រសួងកសិកម្មក៏បានឱ្យដឹងផងដែរថា ខេត្តតាកែវ ធ្លាប់ធ្វើជាម្ចាស់ផ្ទះរៀបចំពិធីរុក្ខទិវា ០៩ កក្កដា ថ្នាក់ជាតិ ចំនួន ៣លើករួចមកហើយ។ ក្នុងនោះ លើកទី១ រៀបចំនៅឆ្នាំ ១៩៩៣ នៅឧទ្យានសួនសត្វ ព្រៃការពារ និងសួនភូតគាម«ភ្នំតាម៉ៅ» លើកទី២ ក្នុងឆ្នាំ២០០៨ នៅស្ថានីយផ្សព្វផ្សាយ និងស្តារព្រៃឈើបន្ទាយអង្គរ និងលើកទី៣ ក្នុងឆ្នាំ ២០១៤ នៅឧទ្យានសួនសត្វ ព្រៃការពារ និងសួនភូតគាមភ្នំតាម៉ៅ។ រួមទាំងឆ្នាំ ២០២៤នេះផង ជាលើកទី៤ហើយ ដែល«រុក្ខទិវា» នេះត្រូវប្រារព្ធធ្វើក្នុងខេត្តតាកែវ។
ដោយឡែក រដ្ឋបាលខេត្តបាត់ដំបង ក៏គ្រោងនឹងបើកយុទ្ធនាការ «ផ្ទះមួយខ្នង ដើមឈើមួយដើម» ដើម្បីដាំដើមឈើចំនួន ១ម៉ឺនដើមផងដែរក្នុងខែកក្កដាខាងមុខនេះ។
អភិបាលខេត្តបាត់ដំបង លោក សុខ លូ បានថ្លែងក្នុងកិច្ចប្រជុំផ្សព្វផ្សាយត្រៀមបើកយុទ្ធនាការនេះនាថ្ងៃទី១៩ ខែមិថុនានេះថា យុទ្ធនាការ ផ្ទះមួយខ្នង ដើមឈើមួយដើមនេះ គឺធ្វើឡើងសម្រាប់ក្រុងស្រុកទាំង១៤ ក្នុងខេត្តបាត់ដំបង។ ជំហានដំបូងគឺផ្ដោតទៅលើការដាំនៅទីប្រជុំជន ក្នុងគោលបំណងសំខាន់បំផុតគឺដើម្បីកំណត់ឱ្យច្បាស់អំពីព្រំដីចំណីផ្លូវ ចៀសវាងការរំលោភបំពានដីចំណីផ្លូវ។ លើសពីនោះ គឺដើម្បីលើកកម្ពស់សម្រស់នៅតាមទីប្រជុំជននៅតាមក្រុងស្រុកទាំង ១៤ នោះតែម្តង។
លោកមានប្រសាសន៍ថា៖ «សម្រាប់យុទ្ធនាការនេះ នឹងចាប់ផ្ដើមព្រមគ្នានៅថ្ងៃទី១១ ខែកក្កដាខាងមុខនេះ។ ដូច្នេះស្នើឱ្យមានការចូលរួមពីសំណាក់មន្រ្ដីរាជការ សិស្សានុសិស្ស ប្រជាពលរដ្ឋ ចូលរួមយុទ្ធនាការនេះ នឹងចូលរួមក្នុងការថែរក្សាដើមឈើនេះឱ្យបានគង់វង្ស ដើម្បីជាម្លប់ ជាសម្រស់ និងបង្ហាញដល់កូនចៅជំនាន់ក្រោយឱ្យបានស្គាល់អំពីប្រភេទនៃដើមឈើប្រណិតសំខាន់ៗមួយចំនួននោះផងដែរ»។
លោកអភិបាលខេត្តសំដែងក្តីសង្ឃឹមថា ក្រុងបាត់ដំបងនឹងមានសម្រស់កាន់តែស្រស់ស្អាតបន្ទាប់ពីដើមឈើទាំងនោះ លួតលាស់ ដែលធ្វើឱ្យក្រុងបាត់ដំបង ក្លាយជាទីក្រុងបៃតង ទាក់ទាញភ្ញៀវទេសចរជាតិ និងអន្តរជាតិមកទស្សនា កាន់តែច្រើនឡើងថែមទៀត។
ក្រសួងបរិស្ថានក៏គ្រោងនឹងរៀបចំពិព័រណ៍ផ្សព្វផ្សាយ និងចែកកូនឈើក្រោមមូលបទ «ពន្លកបៃតង» ចាប់ពីថ្ងៃទី១០-១៦ ខែកក្កដាខាងមុខនេះ នៅមុខទីស្តីការក្រសួងបរិស្ថានផងដែរ។ ក្នុងកម្មវិធីនេះនឹងមានការតាំងបង្ហាញ និងចែកកូនឈើដោយឥតគិតថ្លៃដល់ពលរដ្ឋ យកទៅដាំដុះផងដែរ នៅតាមគេហដ្ឋាន សាលារៀន វត្តអារាម ទីកន្លែងសាធារណៈ និងទីតាំងឯកជននានា។
ការរៀបចំព្រឹត្តិការណ៍នេះក៏ដើម្បីឆ្លើយតបទៅនឹងតម្រូវការស្ថានភាពជាក់ស្តែងរបស់កម្ពុជា និងនិន្នាការបរិស្ថានពិភពលោក សម្រាប់ឱ្យកិច្ចការពារថែរក្សា និងអភិរក្សជីវៈចម្រុះនិងធនធានធម្មជាតិ ក្នុងតំបន់ការពារធម្មជាតិឱ្យទទួលបានប្រសិទ្ធភាព និងមានចីរភាព នឹងជំរុញដំណើរកម្ពុជាឆ្ពោះទៅជាប្រទេសអព្យាក្រឹតកាបូន និងមានគម្របព្រៃឈើចំនួន ៦០ភាគរយនៅឆ្នាំ២០៥០៕