ឈ្មោះ ស្រី ស៊ីណា ត្រូវបានសមត្ថកិច្ចចាប់ខ្លួន និងសួរចម្លើយ ក្រោយការបាញប្រហារ បណ្តាលឲ្យមនុស្សពីរនាក់បានស្លាប់ និង ពីរនាក់ទៀតរងរបួសកាលពីថ្ងៃទី១៧ ខែមិថុនា។ រូបថត ប៉ូលិស
ភ្នំពេញៈ ប្រមុខរដ្ឋាភិបាលនាថ្ងៃអង្គារ ទី២៥ ខែមិថុនា បានអំពាវនាវឱ្យស្ថាប័នតុលាការ និង ស្ថាប័នអយ្យការ យកចិត្តទុកដាក់ក្នុងការពិនិត្យនិងអនុវត្តច្បាប់លើឃាតកម្ម ដែលប្រព្រឹត្តដោយអតីតឧកញ៉ា ស្រី ស៊ីណា ឱ្យបានតឹងរ៉ឹងតាមច្បាប់ជាធរមាន ដើម្បីស្វែងរកយុត្តិធម៌ ជូនជនរងគ្រោះ និងក្រុមគ្រួសារ ដោយគ្មានការអន្តរាគមន៍ណាមួយជាដាច់ខាត។
ការអំពាវនាវនេះត្រូវបានធ្វើឡើង ក្រោយពីមានការជជែកវែកញែកគ្នាពាក់ព័ន្ធទៅនឹងការកាត់ទោសជនល្មើសនៅក្នុងករណីនៃការបាញ់ប្រហារនេះ ដោយមានការបង្ហាញក្តីកង្វល់ និងបារម្ភ ខ្លាចជនល្មើសពុំត្រូវបានផ្តន្ទាទោសឱ្យបានម៉ឺងម៉ាត់តាមផ្លូវច្បាប់ ឬអាចមានការធានាឱ្យនៅក្រៅឃុំដោយមិនប្រក្រតី។
លោកនាយករដ្ឋមន្រ្តី ហ៊ុន ម៉ាណែត បានបញ្ជាក់ថា៖ «បើទោះបីជារាជរដ្ឋាភិបាល មិនអាចលូកដៃចូលក្នុងកិច្ចការរបស់ស្ថាប័នតុលាការក៏ដោយ ខ្ញុំសូមអំពាវនាវឱ្យស្ថាប័នតុលាការ និងស្ថាប័នអយ្យការ យកចិត្តទុកដាក់ក្នុងការពិនិត្យនិងអនុវត្តច្បាប់លើករណីនេះឱ្យបានម៉ត់ចត់ ឱ្យបានតឹងរ៉ឹង និងម៉ឺងម៉ាត់ និងឱ្យបានត្រឹមត្រូវទៅតាមច្បាប់ជាធរមាន ដើម្បីស្វែងរកយុត្តិធម៌ ជូនជនរងគ្រោះ និងក្រុមគ្រួសារ ដោយគ្មានការអន្តរាគមន៍ណាមួយជាដាច់ខាត»។
លោក ហ៊ុន ម៉ាណែត គូសបញ្ជាក់ថា រាជរដ្ឋាភិបាល នីតិកាលទី៧ នៃរដ្ឋសភាបានយកចិត្តទុកដាក់ខ្ពស់ជាអាទិភាពមួយដ៏សំខាន់ក្នុងការពង្រឹងនីតិរដ្ឋ ពិសេស ការពង្រឹងការអនុវត្តច្បាប់ ដើម្បីធានាថែរក្សាសន្តិសុខសាធារណៈ និង សណ្តាប់ធ្នាប់សង្គម ក៏ដូចជា ការដោះស្រាយបញ្ហានានាក្នុងសង្គម ប្រកបដោយភាពត្រឹមត្រូវ និង យុត្តិធម៌ ស្របតាមច្បាប់ជាធរមាន។ ក្នុងនោះ ក៏រួមមានការពង្រឹងទំនួលខុសត្រូវចំពោះមុខច្បាប់របស់ជនល្មើស និងការអនុវត្តច្បាប់តឹងរ៉ឹង លើជនប្រព្រឹត្តបទល្មើស ជាពិសេសជនដែលបង្កឱ្យបាត់បង់អាយុជីវិតអ្នកដទៃ។ កន្លងទៅ ក៏មានការចាត់វិធានការយ៉ាងតឹងរ៉ឹងលើជនបង្កគ្រោះថ្នាក់ចរាចរណ៍ ដែលស្ថិតក្នុងស្ថានភាពស្រវឹង និងបង្កឱ្យបាត់បង់អាយុជីវិតអ្នកដទៃ ដោយបានអនុវត្តច្បាប់ គ្មានការយោគយល់ គ្មានការលើកលែង ឬអន្តរាគមន៍ណាមួយទ្បើយ។
កាលពីថ្ងៃទី១៧ ខែមិថុនានេះ ឈ្មោះ ស្រី ស៊ីណា បានទៅផ្ទះជនរងគ្រោះឈ្មោះ ឡុង លីសុង ដើម្បីសួរនាំជម្លោះជាមួយឈ្មោះ សាន ស្រីពេជ្រ ដែលជាអ្នកជួលផ្ទះរបស់ឈ្មោះ ស្រី ស៊ីណា រឿងកាប់មែកស្វាយ, វាយកម្ទេចផើងផ្កា និងរឿងដាក់ស្នួខោអាវលយចូលបរិវេណផ្ទះឈ្មោះ ឡុង លីសុង។ ពេលទៅដល់ឈ្មោះ ស្រី ស៊ីណា បានដើរចូលទៅក្នុងផ្ទះជនរងគ្រោះ ហើយមានការជជែកគ្នា និងបានឈានដល់មានជម្លោះពាក្យសម្តី។
ពេលនោះឈ្មោះ ស្រី ស៊ីណា ក៏បានដកកាំភ្លើងខ្លីពីចង្កេះរបស់ខ្លួនបញ្ចូលគ្រាប់ ហើយបានបាញ់ប្រហារជាច្រើនគ្រាប់ទៅលើជនរងគ្រោះដែលបណ្តាលឱ្យឈ្មោះ ឡុង លីសុង ស្លាប់នៅកន្លែងកើតហេតុ និងបាញ់ឈ្មោះ ឃីន កញ្ចនា ជាគូដណ្តឹងចំនួន ៣គ្រាប់ បណ្តាលឱ្យស្លាប់ពេលបញ្ជូនទៅសង្គ្រោះនៅមន្ទីរពេទ្យ។ ក្រៅពីនោះឈ្មោះ ស្រី ស៊ីណា ក៏បានបាញ់ទៅលើមនុស្សប្រុស ២នាក់ទៀតជាច្រើនគ្រាប់ បណ្តាលឱ្យម្នាក់រងរបួសដៃ និងម្នាក់ទៀតរងរបួសជើង។
លោកនាយករដ្ឋមន្រ្តី ក៏បានចូលរួមរំលែកទុក្ខដ៏ក្រៀមក្រំបំផុតជាមួយគ្រួសារនៃសព និងអរគុណដល់ប្រជាពលរដ្ឋ ដែលបានបង្ហាញនូវសុទ្ធចិត្តវែកញែកក្នុងរឿងនេះ។ លើសពីនោះ ប្រមុខរដ្ឋាភិបាលក៏បានអំពាវនាវដល់ប្រជាពលរដ្ឋទាំងអស់ឱ្យទុកកិច្ចការនេះជូនស្ថាប័នអនុវត្តច្បាប់ ដែលមានសមត្ថកិច្ច ដើម្បីចាត់ការនិងដោះស្រាយករណីនេះ ឱ្យបានត្រឹមត្រូវ និងយុត្តិធម៌ ទៅតាមនីតិវិធីជាធរមាន។ ក្រៅពីនោះ លោកនាយករដ្ឋមន្រ្តី ក៏សូមឱ្យពលរដ្ឋមានការជឿទុកចិត្តលើប្រព័ន្ធយុត្តិធម៌កម្ពុជាក្នុងការចាត់ការ និង ដោះស្រាយផ្តល់យុត្តិធម៌ឱ្យបានត្រឹមត្រូវចំពោះករណីនេះ។
លោកនាយករដ្ឋមន្រ្តីក៏បានបញ្ជាក់ផងដែរថា៖ «ចាប់តាំងពីថ្ងៃកើតហេតុនោះមក ខ្ញុំបានចេញបទបញ្ជាឱ្យសមត្ថកិច្ចពាក់ព័ន្ធ ក៏ដូចជា ប្រគល់ភារកិច្ចជូនឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ បន្តតាមដានដោយយកចិត្តទុកដាក់លើការអនុវត្តច្បាប់ចំពោះករណីនេះ ដើម្បីធានាថា ច្បាប់ត្រូវបានអនុវត្តដោយតឹងរ៉ឹង ម៉ឺងម៉ាត់ និង ដោយត្រឹមត្រូវទៅតាមខ្លឹមសារនៃច្បាប់ ក្នុងការផ្តល់យុត្តិធម៌ដល់ជនរងគ្រោះ និងក្រុមគ្រួសារ។
នាថ្ងៃពុធ ស្អែកនេះ ក្រសួងយុត្តិធម៌ក៏គ្រោងនឹងធ្វើសន្និសីទសារព័ត៌មានមួយទាក់ទងទៅនឹង ឃាតកម្មដែលប្រព្រឹត្តដោយជនល្មើសឈ្មោះ ស្រី ស៊ីណានេះផងដែរ។
កាលពីថ្ងៃទី២២ ខែមិថុនា តំណាងអយ្យការសាលាដំបូងរាជធានីភ្នំពេញបានសម្រេចបំបែកសំណុំរឿងនេះជាពីរ។
សំណុំរឿងទី១ ឈ្មោះស្រី ស៊ីណា ត្រូវបានចោទប្រកាន់លើពីបទ ឃាតកម្ម និងបទប្រើប្រាស់អាវុធដោយគ្មានការអនុញ្ញាតតាមមាត្រា១៩៩ នៃក្រមព្រហ្មទណ្ឌ និងមាត្រា២០ នៃច្បាប់ស្តីពីការគ្រប់គ្រងអាវុធ គ្រឿងផ្ទុះ និងគ្រាប់រំសេវ។
សំណុំរឿងទី២ ឈ្មោះ ស្រី ស៊ីណា ត្រូវបានចោទប្រកាន់ពីបទ ប៉ុនប៉ងឃាតកម្ម និងបទប្រើប្រាស់អាវុធដោយគ្មានការអនុញ្ញាតតាមមាត្រា២៧ និងមាត្រា១៩៩ នៃក្រមព្រហ្មទណ្ឌ និងមាត្រា ២០ នៃច្បាប់ ស្តីពីការគ្រប់គ្រងអាវុធ គ្រឿងផ្ទុះ និងគ្រាប់រំសេវ ។
បទឃាតកម្មតាមមាត្រា១៩៩ នៃក្រមព្រហ្មទណ្ឌ អាចជាប់ទោសដាក់ពន្ធនាគារពី១០ ឆ្នាំទៅ១៥ ឆ្នាំ, បទប៉ុនប៉ងឃាតកម្មតាមមាត្រា២៧ និងមាត្រា១៩៩ នៃក្រមព្រហ្មទណ្ឌ អាចជាប់ទោសដាក់ពន្ធនាគារពី១០ ឆ្នាំទៅ១៥ឆ្នាំ និងបទប្រើប្រាស់អាវុធដោយខុសច្បាប់ តាមមាត្រា២០ នៃច្បាប់ស្តីពីការគ្រប់គ្រងអាវុធ គ្រឿងផ្ទុះ និង គ្រាប់រំសេវ ដែលអាចជាប់ទោសដាក់ពន្ធនាគារពី៦ខែ ទៅ២ឆ្នាំ។
ក្រសួងយុត្តិធម៌បានស្នើសុំស្ថាប័នតុលាការឱ្យមានវិធានការច្បាប់ឱ្យបាន “ម៉ឺងម៉ាត់” ចំពោះករណីអតីតឧកញ៉ាស្រី ស៊ីណាដោយស្នើសុំថា ទោសដែលចេញលើសំណុំរឿងដែលបានចោទទាំង២នឹងមិនត្រូវស្រូបបញ្ចូលគ្នាឡើយ៕
