ភ្នំពេញ៖ ក្រុមមន្ត្រីយុត្តិធម៌ជំនាន់ថ្មីដែលត្រូវបានជ្រើសរើសតាមនីតិវិធីប្រកបដោយតម្លាភាព យុត្តិធម៌ ដោយផ្អែកលើសមត្ថភាព គឺជាធនធានដ៏សំខាន់មួយនៅក្នុងប្រព័ន្ធយុត្តិធម៌របស់កម្ពុជា។
ក្នុងដំណើរឆ្ពោះទៅការពង្រឹងប្រព័ន្ធយុត្តិធម៌នៅកម្ពុជា លោក កើត រិទ្ធ រដ្ឋមន្ត្រីក្រសួងយុត្តិធម៌ ដែលបានប្រកាស «ពិធីបើកវគ្គបណ្តុះបណ្តាលសិស្សចៅក្រម និងសិស្សព្រះរាជអាជ្ញា ជំនាន់ទី១២ និងសិស្សក្រឡាបញ្ជី ជំនាន់ទី៩» នៅរាជបណ្ឌិត្យសភាយុត្តិធម៌កម្ពុជា ថ្ងៃទី២៥ ខែមិថុនានេះ បានសង្កត់ធ្ងន់លើសមត្ថភាពដ៏ពិតប្រាកដរបស់សិស្សគ្រប់ផ្នែកក្នុងវិស័យយុត្តិធម៌។
លោករដ្ឋមន្ដ្រីបានថ្លែងថា៖ «ខ្ញុំសូមបញ្ជាក់ជូនប្អូនៗទាំងអស់ថា កម្មវិធីនាពេលនេះ គឺជាការចាប់ផ្តើមនៃរបត់ថ្មីក្នុងជីវិតប្អូនៗ ក្នុងការបោះជំហានជាបណ្តើរៗ ដើម្បីក្លាយខ្លួនជាចៅក្រម ព្រះរាជអាជ្ញា និងក្រឡាបញ្ជី ដែលជាវិជ្ជាជីវៈដ៏មានកិត្តិយសនៅក្នុងវិស័យយុត្តិធម៌ ក៏ដូចជានៅក្នុងសង្គមជាតិរបស់យើង»។
លោកក៏បានសង្កត់ធ្ងន់ថា សមត្ថភាពគឺជាយ័ន្តសម្រាប់ការពារខ្លួនផង និងជាកត្តាជំរុញឱ្យសិស្សទាំងអស់ទទួលបានជោគជ័យក្នុងជីវិត។
លោកបានលើកឡើងពីយុទ្ធសាស្ត្រកំណែទម្រង់របស់រាជរដ្ឋាភិបាលក្នុងគោលបំណងពង្រឹងធនធានមនុស្សលើផ្នែកបច្ចេកទេស វិន័យ ក្រមសីលធម៌ និងសុខភាព។ លោក រិទ្ធ បញ្ជាក់ថា៖ «ប្រទេសមួយខ្លាំងទាល់តែប្រជាជននៃប្រទេសនោះខ្លាំង»។
លោក រិទ្ធ កត់សម្គាល់ថា ការពង្រឹងសមត្ថភាពធនធានមនុស្សក្នុងវិស័យយុត្តិធម៌គឺជាផ្នែកមួយយ៉ាងសំខាន់នៃយុទ្ធសាស្ត្របញ្ចកោណរបស់រាជរដ្ឋាភិបាលអាណត្តិថ្មីនេះ។ វិធីសាស្ត្រនេះផ្តោតលើទាំងបរិមាណ និងគុណភាពនៃបុគ្គលិកក្នុងវិស័យយុត្តិធម៌។ ទន្ទឹមនឹងនេះ មន្ត្រីយុត្តិធម៌ទាំងអស់ត្រូវមានទាំងសមត្ថភាពវិជ្ជាជីវៈ និងសីលធម៌ខ្ពស់។
លោកបានឱ្យដឹងថា វិធានការគន្លឹះទីមួយរបស់លោកនាយករដ្ឋមន្ត្រី ក៏ផ្តោតសំខាន់លើ «ការពង្រឹងសមត្ថភាព របស់រដ្ឋបាលសាធារណៈ ដោយផ្តោតសំខាន់លើការពង្រឹងគុណភាព ប្រសិទ្ធភាព និងសមិទ្ធកម្ម របស់មន្ត្រី និងស្ថាប័ន» ដែលនេះក៏ផ្តោតសំខាន់លើការពង្រឹងសមត្ថភាពរបស់រាជការទាំងមូល ក៏ដូចជា សមត្ថភាពរបស់មន្ត្រីដែលបម្រើការនៅក្នុងរាជការរបស់យើងផងដែរ។ រដ្ឋាភិបាលបានសម្រេចយកគោលការណ៍គុណាធិបតេយ្យជាមូលដ្ឋានក្នុងការជ្រើសរើសមន្ត្រីគ្រប់ផ្នែក។
ដើម្បីធានាបាននូវការអនុវត្តយុទ្ធសាស្ត្រ និងវិធានការសំខាន់ៗ ប្រកបដោយប្រសិទ្ធភាព វិស័យយុត្តិធម៌បានអនុវត្តវិធីសាស្ត្រចំនួនពីរ៖ ធានាបេក្ខជនឆ្នើមឆ្លងកាត់ដំណើរការជ្រើសរើស និងប្រកាន់ខ្ជាប់នូវគោលការណ៍ «អ្នកមានសមត្ថកិច្ច ត្រូវបំពាក់នូវសមត្ថភាព! អ្នកមានសមត្ថភាព ត្រូវបំពាក់នូវសមត្ថកិច្ច»។
នៅក្នុងគ្រប់ដំណាក់កាលនៃការប្រឡងប្រជែងជ្រើសរើសសិស្សវិជ្ជាជីវៈ ក្នុងវិស័យយុត្តិធម៌ ទាំងសិស្សចៅក្រម និងសិស្សព្រះរាជអាជ្ញា ទាំងសិស្សក្រឡាបញ្ជី ទាំងសិស្សសារការី និងសិស្សអាជ្ញាសាលា គឺមានការឃ្លាំមើលយ៉ាងល្អិតល្អន់ពីសំណាក់អង្គភាពប្រឆាំងអំពើពុករលួយ។
ការចូលរួមពីសំណាក់អង្គភាពប្រឆាំងអំពើពុករលួយ គឺដើម្បីធានាថា ការប្រឡងប្រជែងជ្រើសរើស សិស្សវិជ្ជាជីវៈក្នុងវិស័យយុត្តិធម៌ ប្រព្រឹត្តទៅដោយគម្លាភាព យុត្តិធម៌ និងគ្មានអំពើពុករលួយ។
លោក រិទ្ធ បានឱ្យដឹងថា៖ «ក្នុងការរៀបចំវិញ្ញាសាប្រឡងកន្លងមក គឺ ខ្ញុំផ្ទាល់ជាអ្នកដឹកនាំរៀបចំ ហើយនៅក្នុងការប្រឡងប្រជែង ជ្រើសរើសសិស្សក្រឡាបញ្ជី ជំនាន់ទី៩ នេះ គឺ ប្អូនៗសិស្សក្រឡាបញ្ជីនៅទីនេះ បានឃើញអក្សរផ្ទាល់ដៃរបស់ខ្ញុំហើយ គឺខ្ញុំសរសេរដោយផ្ទាល់ដៃ»។
កម្មវិធីបណ្តុះបណ្តាលវិជ្ជាជីវៈ រួមមានការបណ្តុះបណ្តាលទូលំទូលាយលើទ្រឹស្តី បច្ចេកទេស វិន័យ និងក្រមសីលធម៌នៅរាជបណ្ឌិត្យសភាយុត្តិធម៌កម្ពុជា គួបផ្សំនឹងការបណ្តុះបណ្តាលជាក់ស្តែងនៅសាលាក្តី និងការិយាល័យព្រះរាជអាជ្ញាទូទាំងប្រទេស។
រយៈពេលបណ្តុះបណ្តាលគឺ ២ ឆ្នាំ ៣ ខែសម្រាប់សិស្សចៅក្រម និងព្រះរាជអាជ្ញា និង ១ ឆ្នាំសម្រាប់សិស្សក្រឡាបញ្ជី។
លោក រិទ្ធ បានបន្ដថា បន្ថែមលើការខិតខំរៀនសូត្រ និងរៀនឱ្យពូកែនៅក្នុងអំឡុងពេលសិក្សា ពួកគេប្រកាន់ខ្ជាប់នៅក្នុងចិត្តរបស់ខ្លួននូវស្មារតីថា «ក្នុងនាមជាមន្ត្រីយុត្តិធម៌ ត្រូវធ្វើខ្លួនជាបង្អែកដ៏កក់ក្តៅសម្រាប់ប្រជាពលរដ្ឋ ជាពិសេស ប្រជាពលរដ្ឋដែលទទួលរងការរំលោភបំពានដោយអយុត្តិធម៌»។
លោកបានអបអរសាទរដល់យុវជនចំនួន ១៦០ នាក់ដែលបានប្រឡងជាប់ក្នុងនោះមានចៅក្រម ព្រះរាជអាជ្ញា ៥៥ នាក់ និងក្រឡាបញ្ជី ១០៥ នាក់។
បេក្ខភាពជ័យលាភីទាំងនោះ បានឆ្លងកាត់នូវការប្រឡងប្រជែងចំណោមបេក្ខជនសរុបចំនួន ៦២៣ នាក់ (សិស្សចៅក្រម និង សិស្សព្រះរាជអាជ្ញា) និងបេក្ខជនសរុបចំនួន ១ ៤៤៨ នាក់ (សម្រាប់ការប្រឡង ប្រជែងសិស្សក្រឡាបញ្ជី) បានឆ្លងកាត់ដំណាក់កាលវិញ្ញាសាសរសេរ និងវិញ្ញាសាផ្ទាល់មាត់ រហូតដល់បានជោគជ័យ និងបានចូលសិក្សានៅបណ្ឌិត្យសភាភូមិន្ទយុត្តិធម៌កម្ពុជា នាពេលនេះ។
លោក បានថ្លែងថា៖ «ផ្អែកតាមលទ្ធផលនេះ ខ្ញុំអាចនិយាយបានថា ប្អូនៗជាជ័យលាភីទាំង ១៦០ នាក់ នៅទីនេះ ពិតជាមាន សមត្ថភាពខ្ពស់ និងមានគុណវុឌ្ឍគ្រប់គ្រាន់ ស័ក្តសមជាសិស្សចៅក្រម សិស្សព្រះរាជអាជ្ញា និងសិស្សក្រឡាបញ្ជី នៃបណ្ឌិត្យសភាភូមិន្ទយុត្តិធម៌កម្ពុជា ប្រាកដមែន។ បន្ថែមពីនេះ ប្អូនៗនឹងក្លាយជាធនធានមនុស្សដ៏មានសក្តានុពលសម្រាប់វិស័យយុត្តិធម៌របស់យើង នាពេលអនាគត»៕