រដ្ឋមន្ត្រីការបរទេសជប៉ុន លោកស្រី ខាមីខាវ៉ា យ៉ូកុ (Kamikawa Yoko)។ បណ្តាញសង្គម X (អតីតTwitter) លោកស្រី ខាមីខាវ៉ា
ភ្នំពេញៈ រដ្ឋមន្ត្រីការបរទេសជប៉ុន លោកស្រី ខាមីខាវ៉ា យ៉ូកុ (Kamikawa Yoko) នឹងមកបំពេញទស្សនកិច្ចផ្លូវការលើកដំបូងនៅកម្ពុជាចាប់ពីថ្ងៃទី៥ ដល់ថ្ងៃទី ៦ ខែកក្កដា តបតាមការអញ្ជើញរបស់លោក សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិ។
សេចក្តីប្រកាសព័ត៌មានក្រសួងការបរទេសកម្ពុជាបញ្ជាក់ថា ក្នុងអំឡុងទស្សនកិច្ចនេះ លោកស្រី Kamikawa នឹងជួបដាច់ដោយឡែកជាមួយលោក ហ៊ុន សែន ប្រធានព្រឹទ្ធសភា និងលោកនាយករដ្ឋមន្ត្រី ហ៊ុន ម៉ាណែត ព្រមទាំងមានជំនួបទ្វេភាគីជាមួយលោក សុខ ចិន្តាសោភា។
សេចក្តីប្រកាសព័ត៌មានបញ្ជាក់នាថ្ងៃទី១ កក្កដា ថា៖ «ទស្សនកិច្ចរបស់ លោកជំទាវ ខាមីខាវ៉ា យ៉ូកុ នឹងរក្សាសន្ទុះនៃការផ្លាស់ប្ដូរកម្រិតខ្ពស់ជាញឹកញាប់ និងធ្វើឱ្យកាន់តែស៊ីជម្រៅថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា និងជប៉ុន»។
ដំណើរទស្សនកិច្ចលើកទី១របស់លោកស្រី ខាមីខាវ៉ា ធ្វើឡើងបន្ទាប់ពីប្រទេសទាំងពីរបានដំឡើងទំនាក់ទំនងរបស់ខ្លួនទៅជាភាពជាដៃគូយុទ្ធសាស្ត្រគ្រប់ជ្រុងជ្រោយកាលពីឆ្នាំ២០២៣។
លោក ឯក ប៊ុនលី អ្នកស្រាវជ្រាវនៃមជ្ឈមណ្ឌលខ្មែរសិក្សាកិច្ចការតំបន់ ថ្លែងថា ដំណើរទស្សនកិច្ចនេះនឹងបង្ហាញពីទំនាក់ទំនង «ដ៏រឹងមាំ» ដែលមានស្រាប់រវាងកម្ពុជា-ជប៉ុន។
លោកថា ទោះបីទំនាក់ទំនងនៃប្រទេសទាំងពីរមានភាពរឹងមាំរួចទៅហើយក៏ដោយ ក៏ដំណើរទស្សនកិច្ចនេះបង្ហាញថា ប្រទេសទាំងពីរចង់ពង្រឹងទំនាក់ទំនងទ្វេភាគីឱ្យកាន់តែប្រសើរឡើងថែមមួយកម្រិតទៀត។
លោកប្រាប់ភ្នំពេញប៉ុស្តិ៍នាថ្ងៃទី១ កក្កដា ថា៖ ដំណើរទស្សនកិច្ចនេះអាចបង្ហាញពីមហិច្ឆតានៃប្រទេសទាំងពីរក្នុងការពង្រឹងកិច្ចសហប្រតិបត្តិការរវាងប្រជាជន និងប្រជាជន ដែលមានស្រាប់ សេដ្ឋកិច្ច និងការពារជាតិ ខណៈដែលកម្ពុជា និងជប៉ុនមានអនុស្សរណៈនៃការយោគយល់គ្នារួចហើយសម្រាប់លំហាត់ហ្វឹកហ្វឺននៃប្រទេសទាំងពីរ។
លោកថា កិច្ចសហប្រតិបត្តិការទាំងអស់នេះ មិនត្រឹមតែអាចធ្វើទៅបានប៉ុណ្ណោះទេ ប៉ុន្តែប្រសិនបើអនុវត្ត វានឹងមានភាពរឹងមាំនិងមានសន្ទុះខ្លាំងផងដែរ ដោយសារតែហេតុផលជាច្រើន។
លោក ឯក ប៊ុនលី ថ្លែងថា៖ «ទីមួយ ជប៉ុនជាដៃគូដ៏ល្អ និងយូរអង្វែងសម្រាប់កម្ពុជា ដោយសារទីក្រុងតូក្យូប្រកាន់ខ្ជាប់នូវគោលការណ៍សេរីនិយមអន្តរជាតិ ដែលស្របតាមគោលការណ៍របស់ប្រទេសកម្ពុជា។ លើសពីនេះ ជប៉ុនក៏ជាដៃគូដែលកម្ពុជាអាចពឹងពាក់បានទៅលើស្ថិរភាពក្នុងការប្រកួតប្រជែងភូមិសាស្ត្រនយោបាយរវាងសហរដ្ឋអាមេរិក និងចិន និងសម្ពាធពីមហាអំណាចធំៗក្នុងការជ្រើសរើសភាគីជាដៃគូសហការ»។
លោកបន្ថែមថា៖ «ផ្ទុយទៅវិញ ជប៉ុនមិនបានដាក់សម្ពាធឱ្យកម្ពុជាជ្រើសរើសភាគីណានោះទេ ប៉ុន្តែជប៉ុនបានសហការជាមួយកម្ពុជាលើគ្រប់វិស័យ និងទទួលស្គាល់ជំហរអព្យាក្រឹតភាពរបស់ទីក្រុងភ្នំពេញ។ ប្រទេសជប៉ុនក៏បានគោរព និងគាំទ្រលទ្ធិប្រជាធិបតេយ្យរបស់កម្ពុជាផងដែរ ហើយលទ្ធផលនេះបានធ្វើឱ្យកម្ពុជាមានការគាំទ្រតបទៅវិញក្នុងក្របខ័ណ្ឌតំបន់សំខាន់ៗរបស់ប្រទេសជប៉ុន ដូចជាយុទ្ធសាស្ត្រឥណ្ឌូប៉ាស៊ីហ្វិករបស់ជប៉ុនជាដើម»។
លោក ឯក ប៊ុនលី យល់ឃើញថា ដើម្បីលើកកម្ពស់ទំនាក់ទំនង និងភាពជឿជាក់នេះ ឱ្យកាន់តែខ្ពស់ថែមទៀត ប្រទេសទាំងពីរគួរតែស្វែងរកផ្នែកសម្រាប់កិច្ចសហប្រតិបត្តិការបន្ថែមទៀត ក្នុងអំឡុងដំណើរទស្សនកិច្ចរបស់លោកស្រី Kamikawa នេះ ដូចជាការកែលម្អកិច្ចសហប្រតិបត្តិការទេសចរណ៍កម្ពុជា-ជប៉ុន ការអប់រំ និងកិច្ចសហប្រតិបត្តិការនវានុវត្តន៍ និងបច្ចេកវិទ្យា។
លោកបញ្ជាក់ថា៖ «ជាមួយនឹងអត្រាកំណើនជាង៦ភាគរយ ក្នុងរយៈពេលក្រោយកូវីដ ១៩ កិច្ចសហប្រតិបត្តិការទាំងអស់នោះនឹងផ្ដល់អត្ថប្រយោជន៍មិនត្រឹមតែកម្ពុជាប៉ុណ្ណោះទេ ប៉ុន្តែក៏នឹងផ្ដល់ផលប្រយោជន៍ដល់ប្រទេសជប៉ុន ដែលជាអ្នកវិនិយោគធំជាងគេមួយនៅកម្ពុជាផងដែរក្នុងរយៈពេលវែងផងដែរ»។
លោក ថុង ម៉េងដាវិត អ្នកជំនាញផ្នែកទំនាក់ទំនងអន្តរជាតិ និងជាសាស្ត្រាចារ្យបង្រៀននៅវិទ្យាស្ថានសិក្សាអន្តរជាតិ និងគោលនយោបាយសាធារណៈនៃសាកលវិទ្យាល័យភូមិន្ទភ្នំពេញថ្លែងថា ជាដៃគូយុទ្ធសាស្ត្រគ្រប់ជ្រុងជ្រោយ កម្ពុជា និងជប៉ុន មានឱកាស និងកិច្ចសហប្រតិបត្តិការជាយុទ្ធសាស្ត្រជាច្រើនទាំងកម្រិតតំបន់ និងទ្វេភាគី។ ជប៉ុនគឺជាដៃគូអភិវឌ្ឍន៍ដ៏សំខាន់សម្រាប់កម្ពុជា ដែលបានគាំទ្រការអភិវឌ្ឍកម្ពុជាចាប់តាំងពីទសវត្សរ៍ឆ្នាំ១៩៩០ មក។
លោកថ្លែងថា៖ «ជំនួបជាមួយរដ្ឋមន្ត្រីការបរទេសជប៉ុននឹងពង្រឹងទំនាក់ទំនងទ្វេភាគី ជំរុញកិច្ចសហប្រតិបត្តិការពហុភាគី និងគាំទ្រដល់កម្លាំងពលកម្មជំនាញរបស់កម្ពុជា តាមរយៈកិច្ចសហប្រតិបត្តិការបណ្ដុះបណ្ដាលជំនាញវិជ្ជាជីវៈ និងបច្ចេកទេស (TVET) និងការផ្លាស់ប្ដូររវាងប្រជាជននិងប្រជាជន ខណៈនៅកម្រិតតំបន់ ប្រទេសទាំងពីរនឹងពិភាក្សាអំពីសន្តិសុខក្នុងតំបន់ និងការអភិវឌ្ឍអំពីវិធីសាស្ត្រដែលកម្ពុជា និងជប៉ុនអាចគាំទ្រយន្តការក្នុងតំបន់ក្នុងការរក្សាសន្តិភាព និងការអភិវឌ្ឍក្នុងតំបន់»។
លោក ថុង ម៉េងដាវិត ប្រាប់ភ្នំពេញប៉ុស្តិ៍នាថ្ងៃទី១ កក្កដា ថា លក្ខណៈសំខាន់មួយនៃទំនាក់ទំនងកម្ពុជា-ជប៉ុន គឺការគាំទ្រប្រតិបត្តិការរក្សាសន្តិភាពរបស់កម្ពុជា ដូចជាការគាំទ្រជំនួយបច្ចេកទេស បរិក្ខារ និងការបណ្ដុះបណ្ដាលដល់កងកម្លាំងប្រដាប់អាវុធកម្ពុជា ដើម្បីបង្កើនសមត្ថភាពរក្សាសន្តិភាពរបស់ខ្លួន៕
