ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ លោក ហ៊ុន ម៉ានី ក្នុងពេលធ្វើជាអធិបតីក្នុងពិធីបើកសម្ពោធពិព័រ និងចែកកូនឈើនាថ្ងៃទី១០ ខែកក្កដានៅទីស្តីការក្រសួងបរិស្ថាន។ រូបថត ក្រសួងបរិស្ថាន
ភ្នំពេញៈ ក្រសួងបរិស្ថាន អង្គការដៃគូ និងវិស័យឯកជនកំពុងតែចែកកូនឈើជាង ៤ម៉ឺនដើមដល់ពលរដ្ឋយកទៅដាំ ដោយឥតគិតថ្លៃក្នុងរយៈពេល ៣ថ្ងៃ នៅក្នុងពិធីពិព័រណ៍ផ្សព្វផ្សាយ និងចែកកូនឈើ ក្រោមមូលបទ «ពន្លកបៃតង» និងវេទិកាកេសរកូលជាតិលើកទី៤ នៅទីស្តីការក្រសួង។
ពិធីនេះមានរយៈពេល ៣ថ្ងៃ គឺចាប់ពីថ្ងៃទី១០ ដល់ថ្ងៃទី១២ ខែកក្កដា។
ក្រសួងបរិស្ថានមានកូនឈើសម្រាប់ចែកជូនសាធារណជនប្រមាណជាង ៣៣ ០០០ដើម ដែលបានមកពីមន្ទីរបរិស្ថានរាជធានីខេត្ត, អង្គការដៃគូមួយចំនួនបានចូលរួមចំណែកផ្តល់កូនឈើចំនួន ៧០០០ដើម, សហគ្រាសឯកជន ចំនួន ៣០០០ ដើម។
ជារួមនៅក្នុងឱកាសនោះ មាន ៤៤ ៦៥៤ ដើម ដែលរួមមាន ៤ប្រភេទសំខាន់ៗ ដើម្បីចែកជូនពលរដ្ឋ ដូចជាឈើប្រណិត (១១ប្រភេទ) ឈើហូបផ្លែ (១៣ប្រភេទ) កូនឈើព្រៃលិចទឹក(១ប្រភេទ) និងកូនឈើលម្អ(១៧ប្រភេទ)។
ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ លោក ហ៊ុន ម៉ានី បានថ្លែងក្នុងពេលធ្វើជាអធិបតីក្នុងពិធីបើកសម្ពោធពិព័រ និងចែកកូនឈើនាថ្ងៃទី១០ ខែកក្កដាថា ពិធីនេះគឺជាការបណ្តុះផ្នត់គំនិត ដល់ប្រជាពលរដ្ឋកម្ពុជាគ្រប់វ័យ ឱ្យស្រលាញ់ដើមឈើ តាមរយៈការយល់ដឹង អំពីអត្ថប្រយោជន៍នៃព្រៃឈើរុក្ខជាតិ និង កេសរកូលព្រៃនៅកម្ពុជា និង ការចូលរួមដោយផ្ទាល់ក្នុងការដាំដើមឈើ និង ការដាំស្តារព្រៃឈើនៅកម្ពុជា។
លោកឧបនាយករដ្ឋមន្ត្រីបានថ្លែងថា៖ «មិនថាមន្ត្រីរាជការ មិនថាកុមារា កុមារី ឬក៏សាធារណជនទូទៅសុទ្ធតែផ្សារភ្ជាប់ទៅនឹងបរិស្ថាន ហើយមានតួនាទីគ្រប់ៗគ្នាក្នុងការចូលរួមថែរក្សាបរិស្ថាន ដើម្បីចូលរួមក្នុងការថែរក្សាបរិស្ថាន និងចូលរួមបង្កើតទម្លាប់ល្អ ដើម្បីជួយដល់បរិស្ថានរបស់យើង»។
ការតាំងពិព័រណ៍នេះ មានស្តង់សរុប ចំនួន ១៦០ ក្នុងនោះរួមមានស្តង់មន្ទីរបរិស្ថានទាំង ២៥រាជធានី ខេត្ត, ស្តង់សហគមន៍ក្នុងតំបន់ការពារធម្មជាតិ, ស្តង់ដៃគូអភិវឌ្ឍន៍, វិស័យឯកជន, ក្រុមអ្នកប្រមាញ់រូបភាពជីវៈចម្រុះ និងយុវជនអ្នកស្រឡាញ់បរិស្ថានជាដើម។
ក្រសួងបរិស្ថានបានឱ្យដឹងថា ការតាំងពិព័រណ៍គឺដើម្បីផ្សព្វផ្សាយពីយុទ្ធនាការដាំដើមឈើ ជាង ១លានដើមដល់សាធារណជន លើកកម្ពស់ការយល់ដឹង និងការចូលរួមពីសាធារណជនលើការងារបណ្តុះ ការដាំដើមឈើ និងដាំស្តារព្រៃឈើឡើងវិញ។ ក្រៅពីនោះក៏ដើម្បី លើកកម្ពស់ការយល់ដឹងពីសារៈសំខាន់ និង គុណតម្លៃកេសកូលព្រៃ និង រុក្ខជាតិនៅកម្ពុជា សំដៅជំរុញឱ្យមានការចូលរួម និងថែរក្សាធនធានធម្មជាតិ និងជីវចម្រុះពីសាធារណជន និង អ្នកពាក់ព័ន្ធ។ បន្ថែមពីនោះ ក៏ដើម្បីពង្រឹងកិច្ចសហការរវាងស្ថានប័ន និងវិស័យឯកជន ពិសេសគឺកសាងបណ្តាញអ្នកស្រលាញ់រុក្ខជាតិ ដើមឈើ ពិសេសប្រភេទកេសកូលព្រៃ ដើម្បីចូលរួម និងគាំទ្រដល់ការការពារ និងការអភិរក្សកេសកូលព្រៃកម្ពុជាជាដើម។
រដ្ឋមន្រ្តីក្រសួងបរិស្ថាន លោក អ៊ាង សុផល្លែត បានលើកឡើងក្នុងពិធីបើកសម្ពោធពិព័រនោះថា ការដាំដើមឈើនៅពេលនេះ គឺការវិនិយោគទុនមួយ ដើម្បីទុកជូនមនុស្សជំនាន់ក្រោយ។ ភាពបៃតងនេះ ជាម៉ាស៊ីនបន្សុទ្ធខ្យល់បរិសុទ្ធសម្រាប់ទ្រទ្រង់ជីវិតមនុស្សគ្រប់គ្នា។ លើសពីនេះទៅទៀត ដើមឈើជាប្រភពចំណូល ដែលកម្ពុជាអាចនឹងទទួលបានច្រើននាពេលអនាគត។
លោករដ្ឋមន្រ្តីមានប្រសាសន៍៖ «ការដាំដើមឈើនៅពេលនេះ គឺការវិនិយោគទុនទុកជូនមនុស្សជំនាន់ក្រោយ ទទួលបានផលទាំងសេដ្ឋកិច្ច សុខុមាលភាព។ ពោល គឺយើងកំពុងតែរៀបចំផ្ទះ និងកំណប់ទ្រព្យ ទុកសម្រាប់កូនចៅជំនាន់ក្រោយរបស់យើង។ គ្មានខ្យល់បរិសុទ្ធសម្រាប់ដកដង្ហើម សុខភាព របស់យើងគឺមិនល្អនោះទេ»។
អ្នកចូលរួម និងទទួលបានកូនឈើក្នុងមួយនាក់ ១០ដើម ដើម្បីយកទៅដាំនៅគេហដ្ឋាន ទីសាធារណៈ វត្តអារាម សាលារៀន ដោយឥតគិតថ្លៃ ។ ដើម្បីទទួលបានដើមឈើ ពលរដ្ឋត្រូវចុះឈ្មោះស្នើសុំតាមរយៈការស្កែន QR Code ដើម្បីបង្ហាញពីអត្តសញ្ញាណអ្នកស្នើសុំ ចំនួនដើមឈើ និងទីតាំងដែលត្រូវយកទៅដាំផងដែរ។
ស្រ្តីអ្នកចូលរួមមកពីខេត្តព្រៃវែងម្នាក់បានសម្តែងក្តីរំភើប ពេលទទួលបានដើមឈើប្រណិតយកទៅដាំនៅចំការ ដូចជា ដើមបេង និង នាងនួនជាដើម។
ស្រ្តីរូបនេះបាននិយាយដូច្នេះថា៖ «កម្មវិធីនេះល្អណាស់ ព្រោះធ្វើឱ្យប្រជាជនមានចិត្តចូលរួមក្នុងការដាំដុះដើមឈើ ដែលជាចំណែកមួយក្នុងការថែរក្សាបរិស្ថានរបស់យើង។ ខ្ញុំចង់ចូលរួមចំណែករក្សានូវឈើប្រណិតខ្មែរ និងជួយបរិស្ថាន។ ខ្ញុំពិតជាសប្បាយចិត្តមែនទែនពេលឃើញកម្មវិធីអញ្ជឹង»។
លោកស្រីចង់ឱ្យមានកម្មវិធីចែកជូនកូនឈើដោយឥតគិតថ្លៃបែបនេះទៀតជារៀងរាល់ឆ្នាំ៕
