លោកនាយករដ្ឋមន្ត្រី ហ៊ុន ម៉ាណែត និងលោក តូ ឡឹម (To Lam) ប្រធានាធិបតីវៀតណាម បានប្ដេជ្ញាពង្រឹង និងពង្រីកកិច្ចសហប្រតិបត្តិការរវាងកម្ពុជា
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត និងលោក តូ ឡឹម (To Lam) ប្រធានាធិបតីវៀតណាម បានប្ដេជ្ញាពង្រឹង និងពង្រីកកិច្ចសហប្រតិបត្តិការរវាងកម្ពុជា និងវៀតណាមដើម្បីផ្ដល់ផលប្រយោជន៍នៃប្រទេសទាំងពីរ។ មន្ត្រីរាជរដ្ឋាភិបាលបញ្ជាក់ថា មេដឹកនាំទាំងពីរមិនបានពិភាក្សាអំពីគម្រោងព្រែកជីក ហ្វូណន តេជោ នោះទេក្នុងអំឡុងពេលជំនួបទ្វេភាគី។
ក្នុងជំនួបជាមួយលោក ហ៊ុន ម៉ាណែត នៅរាជធានីភ្នំពេញ កាលពីថ្ងៃទី១៣ ខែកក្កដា លោក តូ ឡឹម បានបញ្ជាក់ថា៖ «វៀតណាម និងកម្ពុជានឹងបន្តទំនាក់ទំនង និងកិច្ចសហប្រតិបត្តិការទៅមុខឱ្យបានកាន់តែរឹងមាំបន្ថែមទៀត ដោយឈរលើស្មារតីភាពជាអ្នកជិតខាងល្អ និងវប្បធម៌ប្រហាក់ប្រហែលគ្នា ព្រមទាំងប្ដេជ្ញាពង្រឹង និងពង្រីកកិច្ចសហប្រតិបត្តិការរវាងវៀតណាម-កម្ពុជា ដើម្បីឧត្ដមប្រយោជន៍សម្រាប់ប្រជាជន និងប្រទេសទាំងពីរ»។ នេះបើយោងតាមសេចក្ដីប្រកាសព័ត៌មានដែលបង្ហោះក្នុងបណ្ដាញសង្គមលោកនាយករដ្ឋមន្ត្រីនាថ្ងៃទី១៣ កក្កដា។
លោក ប៉ែន បូណា អ្នកនាំពាក្យរាជរដ្ឋាភិបាលប្រាប់ភ្នំពេញប៉ុស្តិ៍នាថ្ងៃទី១៥ កក្កដា ថា នៅក្នុងជំនួបនេះ លោក ហ៊ុន ម៉ាណែត និងលោក តូ ឡឹម មិនបានពិភាក្សាអំពីគម្រោងព្រែកជីក ហ្វូណន តេជោ ដែលគ្រោងបើកការដ្ឋាននៅខែក្រោយនោះទេ។
លោក តូ ឡឹម មកបំពេញទស្សនកិច្ចនៅរាជធានីភ្នំពេញរយៈពេល២ថ្ងៃ ចាប់ពីថ្ងៃទី១២ ដល់ថ្ងៃទី១៣ កក្កដា។
សេចក្ដីប្រកាសព័ត៌មានដដែល បានដកស្រង់សំដីលោក ហ៊ុន ម៉ាណែត ថា ក្នុងទំនាក់ទំនងការទូតរវាងប្រទេសទាំងពីរក្នុងកំឡុងពេល ៥៧ ឆ្នាំកន្លងមកនេះ ប្រទេសទាំងពីរបានបន្តនូវទំនាក់ទំនង និងកិច្ចសហប្រតិបត្តិការ ដែលមានការរីកចម្រើនលើគ្រប់វិស័យ។ លោកបានបញ្ជាក់អំពីការបន្តពង្រឹង និងពង្រីកកិច្ចសហប្រតិបត្តិការរវាងកម្ពុជា និងវៀតណាម។
សេចក្ដីប្រកាសព័ត៌មានបញ្ជាក់ថា៖ «ភាគីទាំងពីរនឹងបង្កើននូវការផ្លាស់ប្ដូរទស្សនកិច្ច និងការប្រាស្រ័យទាក់ទងគ្នាកម្រិតជាន់ខ្ពស់បន្ថែមទៀត និង [បង្កើន] កិច្ចសហប្រតិបត្តិការពាណិជ្ជកម្ម វិនិយោគ និងថាមពល តាមរយៈការពង្រឹងភាពជាដៃគូសេដ្ឋកិច្ច និងពាណិជ្ជកម្ម ដើម្បីជំរុញទំហំពាណិជ្ជកម្មនៃប្រទេសទាំងពីរឱ្យអស់សក្ដានុពល និងខិតខំជំរុញបន្ថែមទៀតនូវសកម្មភាពសេដ្ឋកិច្ច ក្នុងក្របខ័ណ្ឌរដ្ឋាភិបាល និងវិស័យឯកជន»។
មេដឹកនាំទាំងពីរប្ដេជ្ញាពង្រីកកិច្ចសហប្រតិបត្តិការការពារជាតិ និងសន្តិសុខ ដោយបន្តពង្រឹងកិច្ចសហប្រតិបត្តិការយ៉ាងជិតស្និទ្ធ ដើម្បីរួមចំណែករក្សាបាននូវសន្តិភាព ស្ថិរភាព និងការអភិវឌ្ឍបណ្ដាខេត្តជាប់ព្រំដែនកម្ពុជា-វៀតណាម ព្រមទាំងកិច្ចសហការក្នុងការចែករំលែកព័ត៌មានគ្នា ក្នុងការទប់ស្កាត់បទល្មើសតាមព្រំដែន ដូចជាការជួញដូរមនុស្ស គ្រឿងញៀន និងការឆបោកតាមប្រព័ន្ធអនឡាញ។
មេដឹកនាំទាំងពីរសន្យាពង្រីកការផ្លាស់ប្ដូរប្រជាជន និងប្រជាជន និងការតភ្ជាប់ ដោយផ្ដោតលើការបន្តផ្ដល់អាហារូបករណ៍ និងវគ្គបណ្ដុះបណ្ដាលដល់សិក្ខាកាមជានិស្សិត និងមន្ត្រីរាជការ ការជំរុញវិស័យទេសចរណ៍ និងការពង្រីកជើងហោះហើរផ្ទាល់ ក៏ដូចជាការតភ្ជាប់ផ្នែកហេដ្ឋារចនាសម្ព័ន្ធ ដូចជា ផ្លូវល្បឿនលឿនភ្នំពេញ-ក្រុងបាវិត និង ហូជីមិញ-ម៉ុកបៃ។
ពាក់ព័ន្ធកិច្ចការព្រំដែន ភាគីទាំងពីរនៅតែចាត់ទុកការបោះបង្គោលព្រំដែនគោក ជាកិច្ចការអាទិភាព និងបន្តពិភាក្សាដើម្បីឈានទៅសម្រេចបាននូវការបោះបង្គោលព្រំដែនគោក។
លោក ថុង ម៉េងដាវិត អ្នកជំនាញផ្នែកទំនាក់ទំនងអន្តរជាតិ និងជាសាស្ត្រាចារ្យបង្រៀននៅវិទ្យាស្ថានសិក្សាអន្តរជាតិ និងគោលនយោបាយសាធារណៈនៃសាកលវិទ្យាល័យភូមិន្ទភ្នំពេញថ្លែងថា កម្ពុជា និងវៀតណាម នៅតែបន្តលើកកម្ពស់គោលនយោបាយប្រទេសជិតខាងល្អ និងគាំទ្រគ្នាទៅវិញទៅមកក្នុងកិច្ចសហប្រតិបត្តិការសន្តិសុខ សង្គម-សេដ្ឋកិច្ច និងវប្បធម៌។
លោកថ្លែងថា ដំណើរទស្សនកិច្ចរបស់លោក តូ ឡឹម មកកម្ពុជា ឆ្លុះបញ្ចាំងពីភាពរឹងមាំនៃទំនាក់ទំនងទ្វេភាគី និងពង្រីកកិច្ចសហប្រតិបត្តិការបន្ថែមទៀត ដោយវៀតណាមនឹងបន្តជំរុញការផ្លាស់ប្ដូរប្រជាជន និងនិស្សិតនៃប្រទេសទាំងពីរ ជំរុញការវិនិយោគ និងសកម្មភាពពាណិជ្ជកម្ម និងទេសចរណ៍ផងដែរ។
លោក ថុង ម៉េងដាវិត ប្រាប់ភ្នំពេញប៉ុស្តិ៍នាថ្ងៃទី១៥ កក្កដា ថា៖ «កម្ពុជា និងវៀតណាមក៏ត្រូវរួមគ្នាដោះស្រាយបញ្ហាមួយចំនួនដូចជាបញ្ហាព្រំដែន និងសន្តិសុខតំបន់ និងសហការគ្នាក្នុងកិច្ចការអាស៊ាន ដើម្បីធានាបានសន្តិភាព ស្ថិរភាព និងវិបុលភាពតំបន់ ដើម្បីជាប្រយោជន៍រួម និងប្រជាជន»៕
