សមាជិកព្រឹទ្ធសភាជប៉ុន លោក Natsuo Yamaguchi (ឆ្វេង) និងលោកនាយករដ្ឋមន្ត្រី ហ៊ុន ម៉ាណែត ចាប់ដៃគ្នាក្នុងជំនួបថ្ងៃទី១៥ ខែកក្កដា នៅរាជធានី ភ្នំពេញ។ STPM
ភ្នំពេញៈ សមាជិកព្រឹទ្ធសភាជប៉ុន លោក Natsuo Yamaguchi សន្យាជំរុញកិច្ចសហប្រតិបត្តិការបោសសម្អាតមីននៅកម្ពុជា ខណៈលោកនាយករដ្ឋមន្ត្រី ហ៊ុន ម៉ាណែត ស្នើជាថ្មីឱ្យភាគីជប៉ុនបន្តពង្រីកកិច្ចសហប្រតិបត្តិការលើវិស័យនេះបន្ថែមទៀត។
លោក Natsuo Yamaguchi ដែលជាប្រធានគណបក្ស Komeito ជប៉ុន សន្យាដូច្នេះក្នុងជំនួបជាមួយលោក ហ៊ុន ម៉ាណែត នាថ្ងៃទី១៥ កក្កដា នៅរាជធានីភ្នំពេញ។
សេចក្ដីប្រកាសព័ត៌មានដែលបង្ហោះក្នុងបណ្ដាញសង្គមលោក ហ៊ុន ម៉ាណែត នាថ្ងៃទី១៥ កក្កដា បញ្ជាក់ថា៖ «ឯកឧត្ដម Natsuo Yamaguchi នឹងជំរុញកិច្ចសហប្រតិបត្តិការលើការប្រែប្រួលអាកាសធាតុ សន្តិសុខសាយប័រ [សន្តិសុខអ៊ីនធឺណិត] និងជាពិសេស លើវិស័យបោសសម្អាតមីន»។
សេចក្ដីប្រកាសព័ត៌មាន បានដកស្រង់សំដីលោក Natsuo Yamaguchi ថា កន្លងមក ជប៉ុនមានកិច្ចសហការដ៏ល្អ និងជិតស្និទ្ធជាមួយមជ្ឈមណ្ឌលសកម្មភាពកម្ចាត់មីនកម្ពុជា (CMAC) ហើយ CMAC គឺជាកងកម្លាំងដែលមានជំនាញ និងបទពិសោធន៍ល្អបំផុតក្នុងការបោសសម្អាតមីន។
លោក ហ៊ុន ម៉ាណែត បញ្ជាក់ថា រាជរដ្ឋាភិបាលកម្ពុជានៅតែបន្តការយកចិត្តទុកដាក់លើការបោសសម្អាតមីន និងយុទ្ធភណ្ឌមិនទាន់ផ្ទុះ ព្រោះនេះគឺជាគោលដៅអាទិភាពរបស់ខ្លួន។
លោកបន្តថា គិតមកដល់ពេលបច្ចុប្បន្ន កម្ពុជាបានបោសសម្អាតមីន និងសំណល់ជាតិផ្ទុះពីសង្គ្រាមលើផ្ទៃដីជាង ៣ ០០០ គីឡូម៉ែត្រការ៉េ។ កម្ពុជានឹងខិតខំបន្តការបោសសម្អាតមីនប្រមាណជាង ១ ៧០០ គីឡូម៉ែត្រការ៉េបន្ថែមទៀត ដើម្បីកាត់បន្ថយហានិភ័យពីគ្រោះថ្នាក់ ដែលបង្កឡើងដោយយុទ្ធភណ្ឌមិនទាន់ផ្ទុះ និងរួមចំណែកលើកកម្ពស់ជីវភាពរបស់ប្រជាពលរដ្ឋ។
សេចក្ដីប្រកាសព័ត៌មានដដែលបញ្ជាក់ថា៖ «ក្នុងន័យនេះ សម្ដេចធិបតី បានលើកទឹកចិត្តដល់ភាគីជប៉ុនក្នុងការបន្តនូវការពង្រឹង និងពង្រីកកិច្ចសហប្រតិបត្តិការលើវិស័យបោសសម្អាតមីនបន្ថែមទៀត»។
កម្ពុជា និងជប៉ុនបានដំឡើងកម្រិតទំនាក់ទំនងរបស់ខ្លួនទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ កាលពីឆ្នាំ២០២៣។
លោក ហ៊ុន ម៉ាណែត ថ្លែងថា ទំនាក់ទំនង និងកិច្ចសហប្រតិបត្តិការរវាងកម្ពុជា-ជប៉ុនជាទំនាក់ទំនងស្ថិតក្នុងកម្រិតល្អប្រសើរបំផុតក្នុងប្រវត្តិនៃទំនាក់ទំនងរវាងប្រទេសទាំងពីរ បន្ទាប់ពីការដំឡើងកម្រិតទំនាក់ទំនងនេះ និងការដាក់ចេញអភិក្រមថ្មីរបស់ជប៉ុនក្នុងការពង្រឹង និងពង្រីកកិច្ចសហប្រតិបត្តិការជាមួយកម្ពុជាឱ្យកាន់តែរឹងមាំបន្ថែមទៀត។
អភិក្រមថ្មីនេះផ្ដោតលើការកសាងហេដ្ឋារចនាសម្ព័ន្ធសង្គម, ការតភ្ជាប់សមុទ្រ, និងការបោសសម្អាតមីន។
លោក លី ធុជ ទេសរដ្ឋមន្ត្រី និងជាអនុប្រធានទី១នៃអាជ្ញាធរមីន បានថ្លែងក្នុងជំនួបជាមួយលោក Natsuo Yamaguchi នាថ្ងៃទី១៥ ខែកក្កដា ថា រាជរដ្ឋាភិបាលកម្ពុជាបានត្រៀមលក្ខណៈដើម្បីសហការគាំទ្រចំពោះយុទ្ធសាស្ត្រថ្មីសម្រាប់កិច្ចសហប្រតិបត្តិការ «គំនិតផ្ដួចផ្ដើមថ្មីលើសកម្មភាពមីន ជប៉ុន-កម្ពុជា»។
លោកថ្លែងថា៖ «កម្ពុជាត្រៀមសហការ និងផ្ដល់ភាពជាដៃគូ ដើម្បីភាពជោគជ័យរបស់ជប៉ុនក្នុងការធ្វើជាប្រធានកិច្ចប្រជុំរដ្ឋភាគីលើកទី២២ ឆ្នាំ២០២៥ នៃអនុសញ្ញាស្ដីពីការហាមប្រាមការប្រើប្រាស់មីនប្រឆាំងមនុស្ស (អនុសញ្ញាអូតាវ៉ា)»។
សេចក្ដីប្រកាសព័ត៌មានអាជ្ញាធរមីននាថ្ងៃទី១៥ កក្កដា បានដកស្រង់សំដីលោក Natsuo Yamaguchi ថា ជប៉ុន បានដាក់ចេញគោលការណ៍ចំនួន៣ក្នុងការរួមចំណែកដល់វិស័យមីននៅកម្ពុជា រួមមានការបោសសម្អាតមីន និងសំណល់ជាតិផ្ទុះពីសង្គ្រាម, ការអប់រំផ្សព្វផ្សាយការយល់ដឹងអំពីមីន, និងកិច្ចសង្គ្រោះជនរងគ្រោះ រួមទាំងការស្តារសម្បទាឡើងវិញ និងការបណ្ដុះបណ្ដាលវិជ្ជាជីវៈ។
លោកត្រូវបានស្រង់សំដីថា កម្ពុជាមានជំនាញគ្រប់គ្រាន់ក្នុងការងារបោសសម្អាតមីន និងចែករំលែកបទពិសោធន៍របស់ខ្លួនទៅកាន់ពិភពលោក ដែលកំពុងជួបហានិភ័យដោយសារមីន។
លោក Natsuo Yamaguchi បានស្នើឱ្យជប៉ុន និងកម្ពុជា បន្តរួមគ្នាដោះស្រាយបញ្ហាមីននៅលើពិភពលោក៕
