![](https://pppkhmer.sgp1.digitaloceanspaces.com/image/main/20247/15_7_2024_tree_distribution.jpg)
ប្រជាពលរដ្ឋមកយកកូនឈើក្នុងពិព័រណ៍«ពន្លកបៃតង» លើកទីមួយ រយៈពេល៣ថ្ងៃចាប់ពីថ្ងៃទី១០ ដល់ទី១២ ខែកក្កដានៅក្រសួងបរិស្ថាន។ រូបថត ក្រសួងបរិស្ថាន
ភ្នំពេញៈ ក្រសួងបរិស្ថានគ្រោងនឹងប្រារព្ធពិព័រណ៍«ពន្លកបៃតង» ដើម្បីចែកកូនឈើដល់ពលរដ្ឋយកទៅដាំបន្តទៀតនៅឆ្នាំក្រោយ បន្ទាប់ពីកូនឈើចម្រុះជាង៩២ម៉ឺនដើមត្រូវបានចែកជូនពលរដ្ឋនៅក្នុងការសាកល្បងធ្វើលើកទី១ ទទួលបានការគាំទ្រយ៉ាងច្រើនកុះកររួចមក។
ក្រសួងបរិស្ថានបានលើកឡើងថា ពិព័រណ៍«ពន្លកបៃតង» លើកទីមួយ រយៈពេល៣ថ្ងៃចាប់ពីថ្ងៃទី១០ ដល់ទី១២ ខែកក្កដានៅក្រសួងបរិស្ថានបានបញ្ចប់ដោយទទួលបានលទ្ធផលជាទីមោទនៈ។ ក្នុងនោះ កូនឈើចម្រុះជាង៩២ម៉ឺនដើម លើ១លាន៣សែនដើមត្រូវបានចែកជូនសាធារណជនយកទៅដាំ។
រដ្ឋមន្រ្តីក្រសួងបរិស្ថាន លោកអ៊ាង សុផល្លែតមានប្រសាសន៍ថា៖«ពិព័រណ៍នេះមានលទ្ធផលជាទីមោទនជាទីបំផុត។ យើងមានប្រជាជនគ្រប់ស្រទាប់វណ្ណៈទាំងអស់យ៉ាងច្រើនកុះករមកទទួលយកដើមឈើជាង៩២ម៉ឺនដើម លើ១លាន៣សែនដើមដែលយើងមាន។ ការងារនេះគឺមិនទាន់ចប់ទេ ពេលនេះមន្ទីរបរិស្ថានទាំង២៥ខេត្តក្រុងកំពុងតែចែកកូនឈើ ដែលនៅសេសសល់ជាង៥០ម៉ឺនដើមទៀតជូនពលរដ្ឋ»។
លោករដ្ឋមន្រ្តីបានបន្ថែមថា ការរៀបចំពិព័រណ៍នោះ ជាការងារសាកល្បងលើកទី១។ ការសាកល្បង ដែលមានលទ្ធផលជាទីគប់ចិត្តនេះ គីជាការ លើកទឹកចិត្តសម្រាប់ក្រសួងបរិស្ថាន ដែលធ្វើឱ្យក្រសួងមានសុទិដ្ឋិនិយមយ៉ាងខ្លាំង ក្នុងការប្រឹងប្រែងបណ្តុះកូនឈើថែមទៀតដើម្បីចែកជូនពលរដ្ឋយកទៅដាំ សំដៅទទួលបានជោគជ័យស្របតាមយុទ្ធសាស្រ្តបញ្ចកោដរបស់រដ្ឋាភិបាល ដែលបានដាក់ចេញ។
លោករដ្ឋមន្រ្តីមានប្រសាសន៍ថា៖«ឆ្នាំក្រោយយើងនឹងធ្វើទៀត។ ការធ្វើសាកល្បងលើកទី១នៅភ្នំពេញ លើកទី២ធ្វើនៅភ្នំពេញទៀត និងធ្វើនៅលើកទី៣គឺជូនខេត្តមន្ទីរបរិស្ថាន២៥ខេត្តក្រុងអស់ធ្វើនៅតាមខេត្តតែម្តង។ យើងធ្វើសាកល្បងនៅនេះរួមគ្នាឱ្យបានល្អឥតខ្ចោះ ហើយចាំយើងបញ្ជូនទៅធ្វើតាមខេត្តតែម្តង»។
លោករដ្ឋមន្រ្តីបញ្ជាក់ដូច្នេះថា៖«ទីបំផុតរាល់ខេត្តទាំងអស់នឹងធ្វើពិព័រណ៍ចែកកូនឈើជាប្រចាំជារៀងរាល់ឆ្នាំ យើងមិនត្រឹមតែប៉ុណ្ណឹង ជំហានបន្ទាប់ទៀតនោះគឺចែកកូនឈើចម្រុះ ហើយរួមគ្នាដាំតែម្តង»។
លោកក៏បានឱ្យដឹងផងដែរថា នៅឆ្នាំក្រោយក្រសួងបរិស្ថាន អាចបណ្តុះបានកូនឈើយ៉ាងតិច៥លានដើម សម្រាប់ទុកចែកជូនពលរដ្ឋ ដោយមិនគិតថ្លៃ ។ លើសពីនោះ នឹងមានថ្នាលសម្រាប់បណ្តុះកូនឈើលក្ខណៈតំបន់ ដែលអាចផលិតកូនឈើ បានចំនួន១០លានដើមក្នុងមួយឆ្នាំផងដែរ។
លោករដ្ឋមន្រ្តីបានលើកឡើងថា ការចែកជូនកូនឈើនេះបានកំពុងតែបណ្ដុះគំនិតរបស់ពលរដ្ឋ ឱ្យស្រឡាញ់ដើមឈើ ស្រឡាញ់ភាពបៃតង និងស្រឡាញ់បរិស្ថានបន្ថែមទៀតផងដែរ។
ទោះបីជាពិធីចែកដើមឈើនេះត្រូវបានបញ្ចប់នៅក្រសួងបរិស្ថានយ៉ាងណាក៏ដោយ ក៏មន្ទីរបរិស្ថានរាជធានី និងខេត្តនានានៅតែបន្តធ្វើការចែកជូនដើមកូនឈើរហូតដល់ថ្ងៃទី១៦ ខែកក្កដានេះ៕