![](https://pppkhmer.sgp1.digitaloceanspaces.com/image/main/20247/16_7_2024_flooding_at_stung_treng.jpg)
ទឹកភ្លៀងជន់លិចនៅភូមិជោគជ័យ ឃុំសង្កែពីរ ស្រុកឆែប ខេត្តព្រះវិហារ កាលពីថ្ងៃទី១៥ ខែកក្កដា ឆ្នាំ២០២៤ នេះ។ រូបថត Miech Mean-មៀច មាន
ព្រះវិហារ/ស្ទឹងត្រែងៈ រដ្ឋបាលស្រុកឆែប កំពុងតែធ្វើការវាយតម្លៃផលប៉ះពាល់ពីគ្រោះជំនន់ទឹកភ្លៀង ខណៈពលរដ្ឋប្រមាណ ១ ០០០នាក់ក្នុងស្រុក ថាឡាបរិវ៉ាត់ ត្រូវទឹកលិចចូលក្រោមផ្ទះ ក្រោយពីមានភ្លៀងធ្លាក់នាប៉ុន្មានថ្ងៃជាប់ៗគ្នាមកនេះ។
ការធ្លាក់ភ្លៀងជាប់ៗគ្នានាប៉ុន្មានថ្ងៃចុងក្រោយនេះ បណ្តាលឱ្យភូមិជោគជ័យ និង ភូមិសំបូរ ក្នុងឃុំសង្កែ២ និងភូមិសង្កែ ស្ថិតក្នុងឃុំសង្កែ១ ស្រុកឆែប ខេត្ត ព្រះវិហារ ទទួលរងផលប៉ះពាល់ ហើយពេលនេះអាជ្ញាធរមូលដ្ឋានកំពុងតែធ្វើការវាយតម្លៃពីការខូចខាត។ នេះបើយោងតាមលោក អ៊ុំ សុភឿន អភិបាលស្រុកស្តីទីនាថ្ងៃអង្គារ ទី១៦ កក្កដានេះ។
លោកបញ្ជាក់ថា៖ «ភ្លៀងធ្លាក់ ២ថ្ងៃជាប់គ្នា។ ពេលទឹកភ្លៀងបុកមកហ្នឹង យើងខូចខាតផ្លូវអស់ច្រើនកន្លែង ផលដំណាំស្រូវទើបស្ទូងរួចមួយចំនួន ស្រូវស្តុកទុកតាមផ្ទះ។ ផ្លូវ១ខ្សែលិចហ្នឹងប្រហែល ៧គីឡូម៉ែត្រ ស្ពានប្រមាណជា ៤កន្លែង និងមានផ្ទះមួយចំនួនដែរ។ ខាងឃុំកំពុងស្រង់ទិន្នន័យពីការខូចខាតនេះ»។
លោកបន្តថា ភូមិជោគជ័យ និងភូមិសំបូរទទួលរងផលប៉ះពាល់ធ្ងន់ធ្ងរជាងគេ ដែលក្នុងនោះសាលាបឋមសិក្សាជោគជ័យបានលិច បណ្តាលឱ្យសិស្សខកខានសិក្សា កាលពីថ្ងៃទី១៥ ខែកក្កដា។ ទោះយ៉ាងណា ទឹកបានកំពុងតែស្រកទៅវិញហើយដែរ រហូតមកដល់ព្រឹកថ្ងៃអង្គារនេះ។
លោកថា៖«ក្រៅពីបញ្ហាផ្លូវ និងស្ពានអត់មានអីផ្សេងទេ។ ទឹកស្រកទៅវិញលឿនមិនសូវបង្កបញ្ហាអីប៉ុន្មានទេ។ គ្រាន់តែធ្ងន់ធ្ងរគឺមានតែផ្លូវ ស្ពាន និងលូហ្នឹងហើយ»។
លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងថា ភ្លៀងធ្លាក់ប៉ុន្មានថ្ងៃមកនេះ បានធ្វើឱ្យមានជំនន់ទឹកភ្លៀងនៅក្នុងស្រុក ឆែប ខេត្តព្រះវិហារ និងស្រុក ថាឡាបរិវ៉ាត់ ខេត្តស្ទឹងត្រែង។ ក្នុងនោះ នៅខេត្តព្រះវិហារ ស្ថានភាពទឹកស្រកទៅវិញជិតអស់ហើយ គឺនៅសល់តិចតួចប៉ុណ្ណោះ ដោយសារតែកាលពីយប់មិញមានភ្លៀងបន្ថែមទៀត។ ប៉ុន្តែមិនបង្កបញ្ហាគួរឱ្យកត់សំគាល់នោះទេ។
លោកមានប្រសាសន៍ថា៖ «ខេត្តស្ទឹងត្រែងមកដល់ពេលនេះ ទឹកកន្លែងខ្លះបាននឹង និងខ្លះបានកំពុងតែឡើងតិចតួចនៅឡើយ ដោយសារយប់មិញមានភ្លៀងធ្លាក់ច្រើន នៅបន្តលិចនៅឡើយ»។
លោក សន សារឿន អភិបាលស្រុក ថាឡាបរិវ៉ាត់ ក៏បានឱ្យដឹងថា ផ្ទះចំនួន ២២៦ខ្នង ដែលមានពលរដ្ឋរស់នៅប្រមាណជា ១ ០០០នាក់ត្រូវបានទឹកលិចចូលក្រោមផ្ទះ ដោយសារតែទឹកអូហូរចូល។ ប៉ុន្តែមិនទាន់មានការជំលៀសចេញពីលំនៅឋាននោះទេ។
កម្ពស់ទឹកនៅស្ថានីយជលសាស្រ្តនៅទន្លេមេគង្គក៏កំពុងតែបន្តឡើងផងដែរនាថ្ងៃទី១៦ខែកក្កដានេះ។ ក្នុងនោះខេត្តស្ទឹងត្រែងកម្ពស់ទឹកមាន ៥,៦០ ម៉ែត្រ និងនៅថ្ងៃទី១៩ នឹងឡើងដល់ ៥,៨៦ម៉ែត្រ។ កម្ពស់ទឹកខេត្តក្រចេះមាន ១៣,៨៩ម៉ែត្រ និងនៅថ្ងៃទី១៩ នឹងឡើងដល់ ១៤,៣៧ម៉ែត្រ។ រីឯកម្ពស់ទឹកនៅខេត្តកំពង់ចាមមាន ៧,៣០ម៉ែត្រ និងនៅថ្ងៃទី១៩ នឹងឡើងដល់ ៧,៩៥ម៉ែត្រ។
មន្ទីរធនធានទឹក និងឧតុនិយមខេត្តស្ទឹងត្រែង បានប្រកាសថា ចាប់ពីថ្ងៃទី១៥ រហូតដល់ថ្ងៃទី១៨ ខែកក្កដានេះ សម្ពាធទាបសកម្មបាននិងកំពុងស្ថិតក្នុងសមុទ្រចិនខាងត្បូង បង្កើនឥទ្ធិពលទៅជាវិសម្ពាធ និងធ្វើដំណើរមកទិសបស្ចិមចូលទៅលើប្រទេសវៀតណាម និងប្រទេសឡាវ។ ជ្រលង វិសម្ពាធនេះ និងមានឥទ្ធិពលមកលើខេត្តស្ទឹងត្រែង ដែលស្ថានភាពបែបនេះ និងធ្វើឲ្យមានពពកច្រើនដេរដាស មាន ភ្លៀងផ្គររន្ទះពីតិចទៅច្រើនលើសកម្រិតធម្មតា ក្នុងបរិមាណជាមធ្យមពី ៥០ទៅ ៦០ភាគរយ និងមានខ្យល់ខ្លាំងបក់ក្នុងល្បឿនពី ១១ ទៅ ១៥ម៉ែត្រក្នុង ១វិនាទី។
មន្ទីរធនធានទឹកបានណែនាំឱ្យពលរដ្ឋមានការប្រុងប្រយ័ត្នខ្ពស់ អំពីស្ថានភាពធាតុអាកាសមានភ្លៀងធ្លាក់ច្រើនលើសកម្រិតធម្មតា ខ្យល់បក់បោកខ្លាំងនេះ ដើម្បីជៀសវាងពីគ្រោះថ្នាក់ផ្សេងៗ ដែលអាចកើតមានជាយថាហេតុ៕