![](https://pppkhmer.sgp1.digitaloceanspaces.com/image/main/20247/16_7_2024_topic_22_the_locusts_of_lobsters_who_export_to_china_in_the_pastby.jpg)
បង្កងប៉ាកវេចខ្ចប់សម្រាប់នាំចេញទៅប្រទេសចិន។ រូបថត ក្រសួងកសិកម្ម
ភ្នំពេញ៖ រំឭកដល់ការដឹកនាំក្រុមអ្នកសារព័ត៌មានទៅទស្សនកិច្ចសិក្សា និងផ្សព្វផ្សាយអំពីសហគ្រាសជលផលគម្រោង CAPFish កាលពីខែកញ្ញា ឆ្នាំ២០២៣ កញ្ញា អ៊ីម រចនា បាននិយាយក្នុងកម្មវិធីទស្សនកិច្ចឆ្នាំ២០២៤ នេះថា កញ្ញារងនូវការរិះគន់ចំពោះការបង្ហាញសមិទ្ធផលនាំចេញបង្កកប៉ាក ឬបង្កងកណ្ដូប ៤៥ គីឡូក្រាមទៅកាន់ប្រទេសចិន។
កញ្ញា រចនា ជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា៖ «វាជាជំហានដំបូងសម្រាប់កម្ពុជាក្នុងការនាំចេញបង្កងកណ្ដូបទាំងរស់តាមធម្មជាតិ។ វាជាការថ្លឹងថ្លែងរក្សាតុល្យភាព ស្របពេលបង្កងប្រភេទនេះមានតម្លៃថ្លៃ»។
កញ្ញាបានថ្លែងថា៖ «ជាលទ្ធផល នៅក្នុងឆ្នាំ២០២៣ កម្ពុជានាំចេញទីផ្សារជាង ១ តោន និងដើមឆ្នាំ ២០២៤ កម្ពុជានាំចេញបង្កងប៉ាកជាង ២តោនកន្លះ»។
យ៉ាងណាមិញ អ្នកនាំពាក្យក្រសួងកសិកម្មរូបនេះ បានទទួលស្គាល់ថា ដោយសារបង្កងប៉ាកមានចំនួនតិចនៅក្នុងធម្មជាតិ ដែលជំរុញឱ្យតម្លៃកើនខ្ពស់ ក្រសួងមានបំណងលើកទឹកចិត្ដឱ្យប្រជាពលរដ្ឋចិញ្ចឹមបង្កងប៉ាកនេះដើម្បីរក្សាតុល្យភាពតម្លៃសម្រាប់ផ្គត់ផ្គង់ក្នុងស្រុកផង និងនាំចេញទៅចិន ជាទីផ្សាររបស់កម្ពុជាតែមួយគត់។
កញ្ញា រចនា បានបន្ដថា៖ «យើងចង់ធានានូវសន្តិសុខស្បៀងសម្រាប់ប្រទេសយើង។ ដូច្នេះ ការចិញ្ចឹមបង្កងប៉ាក គឺជារឿងមួយដែលយើងកំពុងតែសិក្សាពីលទ្ធភាព។ យើងសង្ឃឹមថា ប្រសិនបើយើងអាចធ្វើបាន យើងនឹងមានបង្កងប៉ាកគ្រប់គ្រាន់សម្រាប់បម្រើឱ្យការនាំចេញ និងផ្គត់ផ្គង់ក្នុងស្រុក ហើយធ្វើយ៉ាងណាឱ្យប្រជាជនយើង អាចទទួលទានបង្កងប៉ាកបានក្នុងមួយតម្លៃសមរម្យ»។
![](https://pppkhmer.sgp1.cdn.digitaloceanspaces.com/image/main/20247/16_7_2024_tochina.jpg)
កាលពីអំឡុងខែឧសភា ឆ្នាំ២០២៣ ផលិតផលជលផលធម្មជាតិរបស់កម្ពុជាចំនួន ១១ប្រភេទ ទទួលបានការអនុញ្ញាតឲ្យនាំចេញទៅកាន់ទីផ្សារប្រទេសចិន រួមមាន កំពឹសទឹកសាប ត្រីប្រាធំ ត្រីប្រាខ្ចៅ ខ្យងទឹកសាប អន្ទង់ទឹកសាប បង្កងកណ្តូប ឬបង្កងប៉ាក បង្គាខ្លឹង និងបង្គាស ជាដើម ក្រោមកិច្ចព្រមព្រៀងពាណិជ្ជកម្មសេរីនានារវាងកម្ពុជា-ចិននាពេលកន្លងមក៕