គោ និងក្របីជាង ២ ៥០០ក្បាលរបស់អ្នកភូមិ ដែលមានទីតាំងនៅក្នុង និងជុំវិញដែនជម្រកសត្វព្រៃសៀមប៉ាងត្រូវបានចាក់វ៉ាក់សាំងដើម្បីការពារការចម្លងជម្ងឺទៅសត្វព្រៃផងដែរតាមរយៈគម្រោង USAID មរតកបៃតង។ Rising Phoenix
ស្ទឹងត្រែងៈ សត្វគោក្របីប្រជាពលរដ្ឋក្នុងខេត្តស្ទឹងត្រែងប្រមាណជា ៣០ភាគរយក្នុងចំណោមជិត ៥ម៉ឺនក្បាលត្រូវបានចាក់វ៉ាក់សាំងការពារជំងឺឆ្លងផ្សេងៗដូចជា សារទឹក និង អ៊ុតក្តាម គិតមកដល់ថ្ងៃទី១៦ ខែកក្កដានេះ។
លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែងបានឱ្យដឹងថា ក្នុងខេត្តមានគោប្រមាណជា ៣៣ ០០០ក្បាល និងក្របីប្រមាណជា ១៦ ០០០ក្បាល។ ក្នុងនោះ មន្ទីរកសិកម្មខេត្តបានចុះចាក់វ៉ាក់សាំងការពារជំងឺឆ្លងផ្សេងៗបានប្រមាណជា ៣០ភាគរយហើយគិតត្រឹមថ្ងៃទី១៦ ខែកក្កដា ក្នុងឆ្នាំ ២០២៤នេះ។
លោកបានអះអាងថា រហូតមកដល់នឹងពេលនេះ ជំងឺសារទឹក នៅក្នុងខេត្ត ស្ទឹងត្រែង អត់មានការផ្ទុះឡើង ឬកើតមានច្រើនគួរឱ្យកត់សម្គាល់នោះទេ ដោយសារតែមន្ទីរកសិកម្ម បានចាត់វិធានការចាក់វ៉ាក់សាំងការពារនៅមុនពេលរដូវវស្សាចូលមកដល់។
លោកបញ្ជាក់ថា៖ «គិតត្រឹមថ្ងៃទី១៦ ខែកក្កដានេះ យើងចាក់បានជិត ២ម៉ឺនក្បាលហើយ។ យើងបានចាត់វិធានការមុនពេល និងទាន់ពេល។ ចឹងអត់មានកើតមានជំងឺជាដុំកំភួននោះទេ។ រដូវវស្សាមកដល់ យើងបានចាក់ការពាររួចស្រេចហើយលើគោក្របីរបស់ពលរដ្ឋតាមមូលដ្ឋាន។ យើងនៅបន្តចាក់រាល់ថ្ងៃអញ្ជឹងដែរ»។
ទោះយ៉ាងណាលោកថា កាលពីប៉ុន្មានខែមុន ក៏មានគោជាង ១០ក្បាលដែរបានងាប់ដោយសារតែជំងឺនៅក្នុងឃុំក្បាលរមាស ស្រុកសេសាន។ ប៉ុន្តែមិនមានការឆ្លងបន្តទៀតនោះទេ។
ទាក់ទងទៅនឹងការចាក់វ៉ាក់សាំងនេះដែរ គោ និងក្របីជាង ២ ៥០០ក្បាលរបស់អ្នកភូមិ ដែលមានទីតាំងនៅក្នុង និងជុំវិញដែនជម្រកសត្វព្រៃសៀមប៉ាងត្រូវបានចាក់វ៉ាក់សាំងដើម្បីការពារការចម្លងជម្ងឺទៅសត្វព្រៃផងដែរតាមរយៈគម្រោង USAID មរតកបៃតង។
USAID មរតកបៃតង គាំទ្រកិច្ចខិតខំប្រឹងប្រែងចាក់វ៉ាក់សាំងសម្រាប់សត្វគោ និងក្របីស្រុក ដើម្បីការពារ ការរីករាលដាលជំងឺ និងការពារសត្វព្រៃនៅក្នុងដែនជម្រកសត្វព្រៃ សៀមប៉ាង។
គម្រោងនេះបានលើកឡើងថា ក្នុងករណីអវត្តមានពពួកសត្វពាហនៈព្រៃធំៗ ដែលជិតផុតពូជនោះ គោក្របីរបស់កសិករបានដើរតួយ៉ាងសំខាន់ក្នុងការថែរក្សាតុល្យភាពប្រព័ន្ធអេកូឡូស៊ីរបស់ដែនជម្រកសត្វព្រៃសៀមប៉ាង។
ឥរិយាបទពីធម្មជាតិស្រដៀងគ្នារបស់ពួកវាដូចជា ការជាន់ឈ្លី ការស៊ីស្មៅ ការនោម ការបន្ទោបង់ និងការត្រាំននៀលដីល្បាប់ភក់របស់ពួកវា បានរួមចំណែកយ៉ាងសំខាន់ដល់ជីវៈចម្រុះក្នុងដែនជម្រកសត្វព្រៃ។ ទោះបីជាយ៉ាងក្តី ពួកវាក៏បង្កហានិភ័យក្នុងការចម្លងជំងឺទៅសត្វព្រៃផងដែរ។
ដើម្បីការពារហានិភ័យនេះកុំឱ្យកើតឡើង USAID មរតកបៃតងសហការជាមួយក្រុមហ៊ុន រ៉ាយហ្នឹង ហ្វីនិក និងការិយាល័យកសិកម្មស្រុកកំពុងធ្វើការយ៉ាងស្រស្រាក់ស្រស្រាំ ដើម្បីជួយកសិករនៅក្នុងភូមិចំនួន ១៧ ដែលមានទីតាំងនៅក្នុង និងជុំវិញដែនជម្រកសត្វព្រៃ សៀមប៉ាង ដើម្បីចាក់វ៉ាក់សាំងដល់គោ និងក្របីរបស់ពួកគេ។ ការចាក់ថ្នាំបង្ការទាំងនេះមានគោលដៅការពារលើជំងឺដូចជា ជំងឺអុតក្តាម និងជំងឺសារទឹក។ នេះបើយោងតាមព្រឹត្តិប័ត្រព័ត៌មានប្រចាំខែមិថុនារបស់គម្រោង USAID មរតកបៃតង។
គិតត្រឹមខែមិថុនា ក្រុមការងាររបស់គម្រោងនេះបានធ្វើយុទ្ធនាការផ្សព្វផ្សាយការយល់ដឹងអំពីការចាក់វ៉ាក់សាំងបញ្ចប់ទៅដោយជោគជ័យនៅទូទាំង ១៧ភូមិគោលដៅ។ បន្ទាប់ពីនោះ សកម្មភាពចាក់វ៉ាក់សាំងបង្ការក៏បានចាប់ផ្តើម និងសម្រេចបាន១៥ភូមិ ក្នុងចំណោម ១៧ភូមិ។ ក្នុងនោះមានសត្វគោ ក្របីសរុបចំនួន ២ ៥៨៦ក្បាល។
ក្រុមការងារនឹងបន្តកិច្ចខិតខំប្រឹងប្រែងចាក់វ៉ាក់សាំងរហូតដល់សត្វគោ និងក្របីទាំងអស់នៅក្នុងភូមិទាំង ១៧ ត្រូវបានចាក់ថ្នាំបង្ការ។
លោក ទុំ នីរ៉ូ ក៏បានឱ្យដឹងផងដែរថា មន្រ្តីពីមន្ទីរកសិកម្មក៏បានចុះទៅណែនាំ និងបង្ហាញពីការចាក់វ៉ាក់សាំងនៅតំបន់នោះផងដែរ។
លោកបានថ្លែងថា៖ «បើសិនជា សត្វស្រុកឈឺងាប់ក្នុងព្រៃដោយសារតែជំងឺអីមួយកើតឡើង សត្វព្រៃណាដែលស៊ីសាច់ជាអាហារស៊ីទៅឆ្លងគ្នាហើយ។ ចឹងគេហៅថាប្រព័ន្ធការពារគ្នាទៅវិញទៅមក។ បើសត្វស្រុកមានសុខភាពល្អ ក៏មិនឆ្លងទៅសត្វព្រៃដែរ»៕
