កំពង់ស្ពឺៈ អភិបាលខេត្តកំពង់ស្ពឺថ្មី លោកជាម ច័ន្ទសោភ័ណ ហាក់មានការភ្ញាក់ផ្អើលនៅពេលដែលដឹងថា ក្នុងខេត្តនេះមានក្មេងទំនើងរហូតដល់ទៅ ៦៨ក្រុម ហើយបានណែនាំឱ្យបញ្ជាការដ្ឋានអាវុធហត្ថ និងស្នងការដ្ឋាននគរបាលខេត្តដាក់ផែនការបង្រ្កាបជាបន្ទាន់។
ក្នុងវីដេអូបង្ហោះលើហ្វេសប៊ុករបស់លោកនាថ្ងៃទី១៦ ខែកក្កដានេះនៅពិធីសំណេះសំណាលជាមួយមន្ត្រីរាជការក្នុង ស្រុកសំរោងទង លោកអភិបាលខេត្តបានលើកឡើងថា ក្នុងរបាយការណ៍ ដែលរដ្ឋបាលខេត្តបានរាយការណ៍ជូនទៅប្រមុខរដ្ឋាភិបាលពីសមទ្ធិផលឆមាសទី១នោះ លោកបានមើលឃើញថា មានក្មេងទំនើងរហូតដល់ទៅ ៦៨ក្រុមក្នុងខេត្តកំពង់ស្ពឺ។
លោកថ្លែងដូច្នេះថា៖«ច្រើនណាស់។ បើយើងគិតថា ក្នុង ១ក្រុមត្រឹម ១០នាក់ ចឹងឡើងដល់ ៦៨០នាក់បាត់ហើយ... ប្រសិនយើងដឹងថានៅកន្លែងណាខ្លះ យើងត្រូវបំបែកឱ្យហើយតែម្តង។ អត់ទុកទេ។ ប្រើប្រាស់កម្លាំងប៉ុណ្ណាក៏ត្រូវតែធ្វើដែរ។ ក្មេងទំនើងនេះ យើងត្រូវតែអនុវត្តព្រោះក្មេងទំនើងងាយស្រួលណាស់»។
លោកបានបន្តថា បញ្ហាក្មេងទំនើងងាយស្រួលបង្រ្កាប ជាងរឿងគ្រឿងញៀន និងល្បែងស៊ីសង ព្រោះថា បើក្មេងទំនើងជិះបង្ហោះម៉ូតូ ឬដេញកាប់គ្នានៅកន្លែងណា គឺឃើញនៅទីនោះតែម្តង។
លោកណែនាំថា៖ «ចឹងយើងត្រូវតែធ្វើកិច្ចការងារនេះ ហើយក្នុង ៦៨ក្រុមហ្នឹង ខ្ញុំគិតថា អាចមានប៉ុន្មានក្រុមនៅក្នុងស្រុកសំរោងទងរបស់យើង។ បើមានអភិបាលស្រុកចាត់ចែង ប្រជុំបន្ទាន់ជាមួយកងកម្លាំងរបស់យើង ដើម្បី បោសសម្អាត»។
លោកអភិបាលខេត្តក៏បានណែនាំឱ្យ ស្នងការដ្ឋាននគរបាលខេត្ត និងបញ្ជាការកងរាជអាវុធហត្ថខេត្តត្រូវតែរៀបចំផែនការជូនលោក ដើម្បីចាត់វិធានការបង្រ្កាបក្រុមក្មេងទំនើងទាំង ៦៨ក្រុមនោះ ព្រោះថាអត្តសញាណរបស់ពួកគេមួយចំនួនត្រូវបានស្គាល់រួចទៅហើយ។
លោក រស់ រដ្ឋា ស្នងការរងខេត្តកំពង់ស្ពឺបានឱ្យដឹងថា ក្នុងចំណោមក្មេងទំនើងទាំង ៦៨ក្រុមនោះ ខ្លះនៅសល់តែឈ្មោះទេ ព្រោះថាពួកគេខ្លះតែងតែចេញពីក្រុមមួយទៅចូលរួមសកម្មភាពជាមួយនឹងក្រុមមួយផ្សេងទៀត។ នគរបាលក៏មិនអាចកំណត់ពីចំនួនជាក់លាស់នៃក្មេងទំនើងនោះដែរ។
លោកបន្តថា ក្រុមខ្លះមានគ្នា ២ទៅ ៣នាក់ ហើយក្រុមខ្លះក៏មានគ្នាច្រើនផងដែរ។
ពួកក្មេងទំនើងទាំងនោះក៏បានដាក់ឈ្មោះក្រុមរបស់គេដូចជា ក្រុម GM, GK ឬ VP ជាដើម។ ពួកគេ ភាគច្រើនបង្កអំពើហិង្សាធ្វើឱ្យខូចខាតដោយចេតនា បង្ហោះម៉ូតូ អូសជន្ទល់ ជិះម៉ូតូជ្រេចុះឡើងតាមផ្លូវ និងបំពាក់បំពង់ស៊ីមុំាងបំពងសម្លេងជាដើម។
លោកបញ្ជាក់ថា៖ «យើងបង្រ្កាបជាបន្តបន្ទាប់។ កិច្ចការងារហ្នឹងបានដាក់ផែនការតាំងពីមានប្រសាសន៍សម្តេចធិបតី យើងធ្វើមករហូតដូចភ្លៀងរលឹមចឹង។ ក្មេងទំនើងមានការថយចុះ ដោយសារយើងបន្តសកម្មភាពបង្រ្កាបរហូតមក មិនបង្អង់ដៃទេ»។
លោកស្នងការរងក៏បានឱ្យដឹងផងដែរថា នៅពេលឃាត់ខ្លួនបាន ក្រុមក្មេងទំនើងត្រូវបញ្ជូនទៅតុលាការនៅក្នុងករណីដែលពួកគេបង្កអំពើហិង្សា ធ្វើឱ្យខូចខាតដោយចេតនា ឬមានកាន់កាប់អាវុធជាដើម។ ប៉ុន្តែក្នុងករណីបង្កបញ្ហាមិនធ្ងន់ធ្ងរ ពួកគេនឹងត្រូវធ្វើការអប់រំ។
កាលពីខែឧសភាកន្លងមក ប្រមុខរដ្ឋាភិបាលបានបញ្ជាឱ្យអភិបាលរាជធានីខេត្តទាំងអស់ និងសមត្ថកិច្ចពាក់ព័ន្ធ ចាត់វិធានការបង្រ្កាបក្មេងទំនើងឱ្យបានម៉ឺងម៉ាត់ ដើម្បីការពារសណ្តាប់ធ្នាប់សាធារណៈ និង សន្តិសុខសង្គម។
ក្នុងរយៈពេល ៤៧ថ្ងៃ ពីថ្ងៃទី២៣ ខែឧសភា ដល់ថ្ងៃទី៩ ខែកក្កដា ឆ្នាំ២០២៤នេះ សាលាដំបូងរាជធានីខេត្តបានទទួលចាត់ការលើសំណុំរឿងពាក់ព័ន្ធនឹងករណីក្មេងទំនើងចំនួន ២៩៧ករណី ដែលមានជនសង្ស័យចំនួន ១ ៦១៦នាក់៕