![](https://pppkhmer.sgp1.digitaloceanspaces.com/image/main/20247/17_7_2024_photo_2024_07_17_13_38_27.jpg)
លោក Zhang Ruijin ភេទប្រុស ជនជាតិចិន កាន់លិខិតឆ្លងដែនប្រទេស Saint Kitts and Nenis ត្រូវបានបណ្ដេញចេញពីកម្ពុជានៅថ្ងៃទី ១៦ ខែកក្កដា។ រូបសហការី
ភ្នំពេញ៖ អគ្គនាយកដ្ឋានអន្តោប្រវេសន៍ ក្រសួងមហាផ្ទៃ បានបណ្ដេញជនជាតិចិនម្នាក់ ចេញពីប្រទេសកម្ពុជាក្រោយបុរសរូបនេះ ត្រូវបានកាត់ទោសជាប់ពន្ធនាគារដោយតុលាការប្រទេសសិង្ហបុរីពីបទលាងលុយកខ្វក់ និងបានចូលមកកាន់ប្រទេសកម្ពុជា។
យោងតាមអគ្គនាយកដ្ឋានអន្តោប្រវេសន៍ ក្រសួងមហាផ្ទៃបានឱ្យដឹងថា៖ «ថ្ងៃទី១៦ ខែកក្កដា ឆ្នាំ២០២៤ អគ្គនាយកដ្ឋានអន្តោប្រវេសន៍ ក្រសួងមហាផ្ទៃ នៃប្រទេសកម្ពុជា បានធ្វើការស្រាវជ្រាវ បន្ទាប់ពីបានទទួលដំណឹងអំពីជនជាតិចិនម្នាក់ ដែលត្រូវបានតុលាការប្រទេសសិង្ហបុរីផ្តន្ទាទោសដាក់ពន្ធនាគារពីបទសម្អាតប្រាក់ និងបានចូលមកប្រទេសកម្ពុជា»។
អគ្គនាយកដ្ឋានបានបន្ដថា ដោយកម្ពុជាក៏ជាសមាជិកនៃ អង្គការឃ្លាំងមើលការលាងលុយ និងឧក្រិដ្ឋកម្មហិរញ្ញាវត្ថុអន្តរជាតិ ហៅកាត់ថា FATF លោក ស សុខា រដ្ឋមន្ដ្រីក្រសួងមហាផ្ទៃ បានណែនាំមកអគ្គនាយកដ្ឋានអន្តោប្រវេសន៍ ធ្វើការស្រាវជ្រាវ ស្វែងរក ជនជាតិចិន នោះឲ្យបានឆាប់រហ័ស ដើម្បីអនុវត្តនីតិវិធី ធ្វើការបណ្ដេញចេញពីព្រះរាជាណាចក្រកម្ពុជា។
លោក Zhang Ruijin ភេទប្រុស ជនជាតិចិន កាន់លិខិតឆ្លងដែនប្រទេស Saint Kitts and Nenis ត្រូវបានឃាត់ខ្លួន ក្រោយពេលបុរសរូបនេះបានចូលមកកាន់ប្រទេសកម្ពុជានៅថ្ងៃទី ១៥ ខែមិថុនា។
អគ្គនាយកដ្ឋានអន្តោប្រវេសន៍បានឱ្យដឹងថា៖ «អគ្គនាយកដ្ឋានបានរៀបចំនីតិវីធី រួចក៏បានធ្វើការបណ្តេញចេញពីព្រះរាជាណាចក្រកម្ពុជា នៅថ្ងៃទី១៦ ខែកក្កដា ឆ្នាំ២០២៤ តាមប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញ»។
គួរបញ្ជាក់ថា លោក Zhang Ruijin ស្ថិតក្នុងចំណោមបុគ្គលបីនាក់ដែលត្រូវបាននិរទេសមកប្រទេសកម្ពុជាពីប្រទេសសិង្ហបុរីពាក់ព័ន្ធនឹងករណីលាងលុយកខ្វក់ចំនួន ៣ ពាន់លានដុល្លារ។
រួមជាមួយនឹង Chen Qingyuan និង Lin Baoying លោក Zhang Ruijin ត្រូវបាននិរទេសនៅថ្ងៃទី១៥ ខែមិថុនា ឆ្នាំ២០២៤ បន្ទាប់ពីបានកាត់ទោសដាក់ពន្ធនាគារពីបទជាប់ពាក់ព័ន្ធក្នុងសកម្មភាពលាងលុយកខ្វក់។
លោក Zhang ត្រូវបានរឹបអូសទ្រព្យសម្បត្តិប្រហែល ១១៨ លានដុល្លារជាផ្នែកនៃសំណុំរឿងខាងលើ៕