![](https://pppkhmer.sgp1.digitaloceanspaces.com/image/main/20247/17_7_2024_drop_down_beer_advertising_in_takeo_province.jpg)
អាជ្ញាធរធ្វើការរុះរើស្លាកសញ្ញាផ្សព្វផ្សាយពាណិជ្ជកម្មស្រាបៀរ និង គ្រឿងស្រវឹងគ្រប់ប្រភេទ ក្នុងភូមិសាស្ត្រខេត្តតាកែវ កាលពីដើមសប្តាហ៍នេះ។ រូបថត ទូរទស្សន៍មហាផ្ទៃ
ភ្នំពេញៈ ម្ចាស់អាជីវកម្ម ភោជនីយដ្ឋាន អាហារដ្ឋាន និងក្រុមហ៊ុនចែកចាយស្រាបៀរ និងគ្រឿងស្រវឹង ក្នុងខេត្តក្រចេះត្រូវបានណែនាំឱ្យរុះរើស្លាកសញ្ញាផ្សព្វផ្សាយពាណិជ្ជកម្មស្រាបៀរ និងគ្រឿងស្រវឹងចេញក្នុងរយៈពេល ១៥ថ្ងៃ ដើម្បីរក្សាសណ្តាប់ធ្នាប់ និងចូលរួមកាត់បន្ថយការសេពគ្រឿងស្រវឹង។
រដ្ឋបាលខេត្តបានណែនាំឱ្យរដ្ឋបាលក្រុង និងស្រុកទាំងអស់ទូទាំងខេត្ត ឱ្យជូនដំណឹងដល់ម្ចាស់អាជីវកម្មទាំងនោះឱ្យរុះរើស្លាកសញ្ញាផ្សព្វផ្សាយពាណិជ្ជកម្មស្រាបៀរ និងគ្រឿងស្រវឹងគ្រប់ប្រភេទក្នុងរយៈពេល ១៥ថ្ងៃ។ ប៉ុន្តែចំពោះស្លាកសញ្ញាផ្សព្វផ្សាយពាណិជ្ជកម្មស្រាបៀរណាដែលមានលិខិតអនុញ្ញាត ត្រូវធ្វើការរុះរើរហូតដល់ផុតសុពលភាព។ នេះបើយោងតាមលោក ម៉ែន វណ្ណា នាយករដ្ឋបាលខេត្តក្រចេះ។
លោកបញ្ជាក់ថា៖ «អ្នកដែលអត់ច្បាប់ យើងជូនដំណឹងគាត់ហើយ យើងរុះរើ ប៉ុន្តែអ្នកដែលមានច្បាប់ឱ្យចប់សុពលភាពនៃការសុំច្បាប់សិន នឹងឱ្យរុះរើដែរ។ យើងមិនបន្តសុពលភាពឱ្យគាត់ទៀតទេ»។
លោកបានបន្តថា អ្នកដែលបានស្នើសុំតាមនិតីវិធីច្បាប់នាពេលកន្លងមកបានបង់ពន្ធទៅតាមទំហំផ្ទាំងប៉ាណូ។
រដ្ឋបាលក្រុងក្រចេះ ស្រុកឆ្លូង និងស្រុកសំបូរបានចេញសេចក្តីជូនដំណឹងពីការរុះរើនេះរួចហើយកាលពីថ្ងៃទី១៦ និង ១៧ ខែកក្កដានេះ។
រដ្ឋបាលក្រុងក្រចេះបានសង្កេតឃើញថា មានការដំឡើងផ្ទាំងប៉ាណូផ្សព្វផ្សាយពាណិជ្ជកម្ម ស្រាបៀរជាច្រើន និងគ្រឿងស្រវឹងគ្រប់ប្រភេទតាមបណ្តោយផ្លូវ និង ចិញ្ចើមផ្លូវសាធារណៈនានាដែលធ្វើឱ្យបាត់បង់នូវសោភ័ណភាព សេចក្តីថ្លៃថ្នូរ របៀបរៀបរយ និងសណ្តាប់ធ្នាប់សាធារណៈ។
សេចក្តីជូនដំណឹងសរសេរថា៖ «ដើម្បីមានសណ្តាប់ធ្នាប់របៀបរៀបរយល្អ និងចូលរួមកាត់បន្ថយការសេពគ្រឿងស្រវឹង ការកាត់បន្ថយអំពើហិង្សាព្រមទាំងការកាត់បន្ថយគ្រោះថ្នាក់ផ្សេងៗបណ្តាលមកពីគ្រឿងស្រវឹង ជាពិសេសដើម្បីរួមចំណែកលើកកម្ពស់ កិត្យានុភាព សេចក្តីថ្លៃថ្នូរ និងរក្សាបានសោភ័ណភាព រដ្ឋបាលក្រុងក្រចេះស្នើសុំម្ចាស់អាជីវកម្ម ក្រុមហ៊ុនចែកចាយស្រាបៀរ និង គ្រឿងស្រវឹងទាំងអស់ដែលបានដាក់តាំងប៉ាណូផ្សព្វផ្សាយនៅតាមផ្លូវសាធារណៈ ត្រូវធ្វើការរុះរើចេញជាបន្ទាន់ក្នុងរយៈពេល ១៥ថ្ងៃ គិតចាប់ពីថ្ងៃជូនដំណឹងនេះតទៅ»។
ចំពោះក្រុមហ៊ុនស្រាបៀរ ដែលមានលិខិតអនុញ្ញាតត្រូវរុះរើចេញពេលផុតសុពលភាព។ ក្នុងករណីផុតកាលបរិច្ឆេទកំណត់ គ្រប់ម្ចាស់អាជីវកម្មក្រុមហ៊ុនចែកចាយស្រាបៀរ និងគ្រឿងស្រវឹងទាំងអស់ពុំព្រមធ្វើការរុះរើតាមសេចក្តីជូនដំណឹងនេះ រដ្ឋបាលក្រុងក្រចេះនឹងចាត់វិធានការតាមនីតិវិធីរដ្ឋបាលធ្វើការរុះរើដោយមិនទទួលខុសឱ្យត្រូវរាល់ការខូចខាត និងបាត់បង់សម្ភារៈទាំងនោះឡើយ។ រីឯការចំណាយផ្សេងៗជាបន្ទុក របស់ម្ចាស់អាជីវកម្ម ឬក្រុមហ៊ុន។
លោក មុំ គង់ ប្រធានអង្គការចលនាដើម្បីសុខភាពកម្ពុជាបានយល់ឃើញថា ការផ្តួចផ្តើមឱ្យមានការរុះរើផ្ទាំងប៉ាណូផ្សាយពាណិជ្ជកម្មស្រាបៀរនេះគឺជាការមួយល្អណាស់។ វិធានការនេះជួយកាត់បន្ថយនូវភាពទាក់ទាញឱ្យប្រើប្រាស់គ្រឿងស្រវឹងនៅក្នុងចំណោមយុវជន ក៏ដូចជា កុមារ ហើយការប្រើប្រាស់នេះ នាំឱ្យផលប៉ះពាល់យ៉ាងច្រើនទៅដល់សង្គមជាតិទាំងមូល។
លោកក៏បានសង្កេតឃើញផងដែរថា ការផ្សព្វផ្សាយគ្រឿងស្រវឹងក៏មានផងដែរនៅតាមវិទ្យុ ទូរទស្សន៍ ការប្រគុំតន្រ្តី និងតាមបណ្តាញសង្គមជាដើម។
លោកមានប្រសសន៍ថា៖ «ដើម្បីឱ្យលទ្ធផលកាន់តែល្អទៀត ខ្ញុំគិតថា ការហាមឃាត់ការផ្សាយពាណិជ្ជកម្មហ្នឹងគួរតែធ្វើព្រមគ្នាតាមគ្រប់មធ្យោបាយតែម្តង ដោយហាមទាំងលើផ្ទាំងប៉ាណូ ការផ្សាយតាមវិទ្យុ ទូរទស្សន៍ជាដើម»។
លោកបានបន្ថែមថា ការហាមឃាត់ការផ្សាយទាំងនោះ នឹងជួយកាត់បន្ថយគ្រោះថ្នាក់ចរាចរណ៍ ដែលបង្កពីផឹកគ្រឿងស្រវឹងថយចុះ ហើយយុវជនដែលជាមូលធនមនុស្សសម្រាប់កសាងប្រទេសជាតិនឹងមានសុខភាពល្អ និងសតិបញ្ញាល្អប្រសើរជាងមុន។
ក្រចេះជាខេត្តទី ២ ហើយ បន្ទាប់ពីខេត្តតាកែវ ដែលបានកំពុងតែធ្វើការរុះស្លាកសញ្ញាផ្សព្វផ្សាយពាណិជ្ជកម្មស្រាបៀរ និងគ្រឿងស្រវឹងចេញ។ ក្រៅពីនោះ ខេត្តបាត់ដំបងក៏កំពុងតែដាក់ឱ្យដំណើរការគម្រោងសាកល្បង មិនដាក់លក់គ្រឿងស្រវឹង និងបារីដល់សិស្សានុសិស្ស ឬមនុស្សក្រោមអាយុ ១៨ឆ្នាំផងដែរ នៅក្នុងក្រុងបាត់ដំបង និងស្រុកបរវេល។ គម្រោងនេះនឹងធ្វើឱ្យខេត្តបាត់ដំបង ក្លាយជាខេត្តដំបូងគេ មិនលក់គ្រឿងស្រវឹង និងបារីដល់មនុស្ស អាយុក្រោម ១៨ឆ្នាំ។
គម្រោងសាកល្បងនេះត្រូវបានផ្តួចផ្តើមដោយអង្គការ Great Peace Cambodia ដែលមានការគាំទ្រពីមន្ទីរអប់រំ យុវជន និងកីឡាខេត្តបាត់ដំបង។ គម្រោងនេះ កំពុងតែដាក់ឱ្យដំណើរការសាកល្បងនៅតាមសាលាមធ្យមសិក្សា ៥ក្នុងក្រុងបាត់ដំបង និងនៅស្រុកបវេល ដោយហាងលក់ដូរនៅក្បែរសាលារៀន បានស្ម័គ្រមិនលក់គ្រឿងស្រវឹង និងបារី ដល់សិស្សានុសិស្ស ឬមនុស្សដែលមានអាយុក្រោម ១៨ឆ្នាំ។
រដ្ឋបាលខេត្តបានលើកឡើងថា៖ «ការឆាប់ប្រឡូកផឹកគ្រឿងស្រវឹង ដោយសារតែពួកគាត់គិតថា ការផឹកគ្រឿងស្រវឹងគឺជារឿងធម្មតា ទាំងក្នុងកម្មវិធីទទួលបានជោគជ័យពេលសប្បាយចិត្ត និងពេលពិបាកចិត្តផងដែរ»។
ក្រៅពីនោះ ក៏នៅមានកត្តាផ្សេងៗទៀតដែរ ដូចជា ការផឹកស៊ីមិនលាក់បាំង ជាចំហនៅមុខកុមារ និងការប្រើប្រាស់កុមារឱ្យទៅទិញសុរា កត្តាសង្គម ដូចជា ការផ្សព្វផ្សាយយ៉ាងទូលំទូលាយ នៅគ្រប់ទីកន្លែង និងការចង់សាកចង់ដឹងរបស់យុវជនផ្ទាល់ ស្របពេលដែលកម្ពុជាមិនទាន់មានច្បាប់កំណត់អាយុនៃការទទួលទានគ្រឿងស្រវឹងនៅឡើយ។ ការឆាប់ផឹកស្រានៅអាយុក្មេងពេកអាចបណ្តាលឱ្យខូចថ្លើម ប៉ះពាល់ដល់ខួរក្បាល និង សរសៃប្រសាទជាដើម ដែលបញ្ហាទាំងអស់នេះមិនអាចជួសជុលបានសម្រាប់មនុស្សក្មេងៗ៕