គម្រោងសាងសង់ផ្លូវបេតុងភូមិអូរចំណារក្រោមមូលនិធិឃុំអូរឧកញ៉ាហេង ស្រុកព្រៃនប់ខេត្តព្រះសីហនុ ដែលសម្រេចបាន ៧០% ហើយ។ រូបថតហ្វេសប៊ុក កៅ ឡេង មេឃុំអូរឧកញ៉ាហេង
ក្រសួងមហាផ្ទៃព្រមានចាត់វិធានការតាមផ្លូវច្បាប់ទៅលើមន្ត្រីនៃទីចាត់ការផែនការនិងវិនិយោគខេត្តមួយចំនួននិងមន្ត្រីឃុំសង្កាត់ពាក់ព័ន្ធនឹងភាពមិនប្រក្រតី និងភាពរញ៉េរញ៉ៃក្នុងការដេញថ្លៃគម្រោងអភិវឌ្ឍឃុំសង្កាត់។
លោក ស សុខា រដ្ឋមន្ត្រីក្រសួងមហាផ្ទៃបានថ្លែងនៅក្នុងលិខិតចុះថ្ងៃទី១៦ ខែកក្កដានេះថា ក្រសួងមហាផ្ទៃបានកាត់សម្គាល់ឃើញមានភាពមិនប្រក្រតីកំពុងកើតមានឡើងពាក់ព័ន្ធនឹងការអនុវត្តគម្រោងមូលនិធិឃុំសង្កាត់។ ភាពមិនប្រក្រតដីនេះបណ្តាលមកពីការមិនយកចិត្តទុកដាក់ និងភាពទន់ខ្សោយនៃការគ្រប់គ្រង ចាត់ចែងក្នុងកិច្ចដំណើរការអនុវត្តគម្រោងមិន ដោយសារតែមិនបានអនុវត្តតាមគោលការណ៍ណែនាំ បែបបទ និងនីតិវិធីនានាដែលបានកំណត់។
លោកថា ក្រសួងមហាផ្ទៃ បានទទួលពាក្យបណ្តឹង ឬពាក្យស្នើសុំជួយអន្តរាគមន៍ជាញឹកញាប់ពាក់ព័ន្ធនឹងមន្ត្រីនៃទីចាត់ការផែនការនិងវិនិយោគរាជធានីឬខេត្តមួយចំនួនចំពោះការអនុវត្តគម្រោងមូលនិធិឃុំសង្កាត់ ដូចជា ការរៀបចំបញ្ជីឈ្មោះអ្នកទទួលការ (អ្នកដេញថ្លៃបាន) ប្រចាំឆ្នាំមិនមានតម្លាភាព ការដេញថ្លៃមិនបានប្រកាសជូនដំណឹងជាសាធារណៈ ការចុះអនុវត្តគម្រោងមុនការដេញថ្លៃ ការពន្យារការដេញថ្លៃដោយមិនបានកំណត់នូវកាលបរិច្ឆេទនិងពេលវេលាច្បាស់លាស់នៃការដេញថ្លៃបន្ទាប់ និងការអនុវត្តគម្រោងរបស់អ្នកទទួលការមិនស្របតាមបទដ្ឋានបច្ចេកទេសជាដើម។
ក្រៅពីភាពមិនប្រក្រតី ការដេញថ្លៃនៅឃុំសង្កាត់មួយចំនួនក៏មានភាពរញ៉េរញ៉ៃ ច្រងេងច្រងាង គ្មានសណ្តាប់ធ្នាប់នៅក្នុងកិច្ចប្រជុំដេញថ្លៃផងដែរ។ នេះបើតាមលិខិតដដែល។
ដើម្បីលុបបំបាត់ភាពមិនប្រក្រតី លោក ស សុខា ណែនាំឲ្យអភិបាលរាជធានីខេត្តធ្វើការណែនាំបន្តដល់ទីចាត់ការផែនការវិនិយោគនិងរដ្ឋបាលឃុំសង្កាត់ឱ្យប្រកាសជូនដំណឹងស្តីពីការដេញថ្លៃគម្រោងមូលនិធិឃុំសង្កាត់ជាសាធារណៈ នៅលើក្តារព័ត៌មានរបស់សាលាឃុំសង្កាត់ សាលាក្រុង សាលាខេត្ត និងនៅលើគេហទំព័ររបស់លេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.)។
លើសពីនេះទៀត មន្ត្រីទីចាត់ការផែនការវិនិយោគនិងរដ្ឋបាលឃុំសង្កាត់ត្រូវអនុវត្តតាមសៀវភៅណែនាំស្តីពីការអនុវត្តគម្រោងមូលនិធិឃុំសង្កាត់ ត្រូវពង្រឹងការរៀបចំទុកដាក់ឯកសារសំណើគម្រោង និងឯកសារកិច្ចសន្យាគម្រោងឱ្យបាន ត្រឹមត្រូវ។
លោក ស សុខា បញ្ជាក់ថា៖ «ត្រូវពង្រឹងការតាមដាននិងការត្រួតពិនិត្យគុណភាពគម្រោងមូលនិធិឃុំសង្កាត់ឲ្យបានជាប់ជាប្រចាំ ដើម្បីធានាថាការអនុវត្តគម្រោងមូលនិធិឃុំសង្កាត់ត្រូវបានអនុវត្តស្របតាមបទដ្ឋានបច្ចេកទេសជាធរមាន»។
លោកព្រមានថានឹងចាត់វិធានការផ្លូវច្បាប់ចំពោះមន្ត្រីរាជការ សមាជិកក្រុមប្រឹក្សា ឬស្មៀនឃុំ ក៏ដូចជាអ្នកទទួលការដែលមិនគោរពតាមតួនាទី ឬជាប់ពាក់ព័ន្ធនឹងភាពមិនប្រក្រតី ការគប់គិត ក្លែងបន្លំ បង្ខិតបង្ខំ ឬប្រព្រឹត្តអំពើពុករលួយក្នុងគម្រោងទាំងនោះ។
កាលពីខែមិថុនាកន្លងទៅ មានភាពរញ៉េរញ៉ៃមួយកើតឡើងនៅឃុំខ្នា ស ស្រុកស្រីសន្ធ ខេត្តកំពង់ចាម ដោយក្រុមអ្នកដេញថ្លៃជាង២០នាក់បានប្រជ្រៀតគ្នាដណ្ដើមដាក់ឯកសារដេញថ្លៃគម្រោងអភិវឌ្ឍឃុំ។
សារព័ត៌មានមួយចំនួនក៏បានចុះផ្សាយដែរថា នៅឃុំឈូកខ្សាច់ ស្រុកបារាយណ៍ ខេត្តកំពង់ធំក៏កើតមានភាពមិនប្រក្រតីដោយសារតែផ្លូវមួយខ្សែនៅក្នុងឃុំ ត្រូវបានសាងសង់មុនពេលដាក់ដេញថ្លៃសាងសង់។
កាលពីឆ្នាំ ២០២៣ ក៏មានការបង្ហោះលើហ្វេសប៊ុកអំពីភាពមិនប្រក្រតីនៃការដេញថ្លៃគម្រោងសាងសង់ផ្លូវនៅឃុំស្វាយយា ស្រុកស្វាយជ្រុំ ខេត្តស្វាយរៀង។ បើតាមការការចុះផ្សាយ ការដេញថ្លៃមិនត្រូវបានធ្វើឡើងនៅក្នុងសាលាឃុំទេ ប៉ុន្តែមានការចរចាគ្នានៅខាងក្រោយសាលាឃុំ។
ថវិការសម្រាប់អភិវឌ្ឍឃុំសង្កាត់ឆ្នាំ២០៤ មានទំហំ ៤១០លានរៀល ឬ ១០១.០០០ដុល្លារអាមេរិក កើនឡើង ១៤,៥ភាគរយធៀបនឹងឆ្នាំ២០២៣។ ប៉ុន្តែ បើបូកទាំងការឧត្ថម្ភមូលនិធិអភិវឌ្ឍឃុំសង្កាត់នោះ ឃុំសង្កាត់នីមួយៗទទួលបានថវិកាសរុប ៧៦៣លានរៀល ឬ ១៨៨.៣០០ដុល្លារ។
លោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាពថ្លែងថា ការដេញថ្លៃខ្លះនៅឃុំសង្កាត់មួយចំនួនមានពាក់ព័ន្ធនឹងខ្សែស្រឡាយរវាងមន្ត្រី និងអ្នកដេញថ្លៃ ដែលធ្វើឲ្យបាត់បង់តម្លាភាព។
លោកថា ការពង្រឹងការគ្រប់គ្រងលើគម្រោងអភិវឌ្ឍឃុំសង្កាត់ពិតជាសំខាន់ណាស់ ព្រោះការអនុវត្តគម្រោងប្រកបដោយតម្លាភាព អាចឆ្លើយតបទៅនឹងសេចក្ដីត្រូវការរបស់ប្រជាពលរដ្ឋ។
លោកថា ការអភិវឌ្ឍគម្រោងនៅឃុំសង្កាត់គួរចៀសវាការអភិវឌ្ឍតែកន្លែងណាដែលចាំបាច់សម្រាប់អ្នកលុយឬមានអំណាច ខណៈដែលតំបន់ដែលពលរដ្ឋត្រូវការជាក់ស្ដែងបែរជាមិនមានការអភិវឌ្ឍ។
លោកនិយាយថា៖ «ដូច្នេះការពង្រឹងរបស់ក្រសួងមហាផ្ទៃនេះជារឿងមួយល្អ ប៉ុន្តែ ក្រសួងមិនត្រូវពង្រឹងតែគម្រោងនៅក្រោមមូលនិធិឃុំទេ គឺត្រូវពង្រឹងទាំងគម្រោងរបស់ស្រុក ខេត្ត ធ្វើម៉េចឲ្យមានតម្លាភាព និងប្រសិទ្ធភាពដូចគ្នាដែរ។ មិនអាចពង្រឹងតែនៅថ្នាក់ឃុំទេ»៕
