កូនក្រពើភ្នំភ្ញាស់ចេញពីពងក្នុងសំបុក ដែលប្រទះឃើញនៅឧទ្យានជាតិជួរភ្នំក្រវាញកាលពីពាក់កណ្តាលខែឧសភាកន្លងមក។ រូបថត Fauna & Flora - Cambodia Programme
ភ្នំពេញៈ សំបុកក្រពើភ្នំសរុបចំនួន ៥សំបុក មានពងសរុបចំនួន ១០៦គ្រាប់ ដែលជាចំនួនសំបុកពងកូនច្រើនបំផុតមិនធ្លាប់មាន ក្នុងរយៈពេលជាង ២០ឆ្នាំកន្លងមកនេះ ត្រូវបានរកឃើញនៅឧទ្យានជាតិជួរភ្នំក្រវាញកាលពីពាក់កណ្តាលខែឧសភាកន្លងមក។
ការរកឃើញនេះ គឺនៅក្នុងគម្រោងអភិរក្សរបស់ក្រសួងបរិស្ថាន រដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទ អង្គការសត្វព្រៃ និងរុក្ខជាតិ និងសហគមន៍មូលដ្ឋាន។
សេចក្តីប្រកាសព័ត៌មានរួមចុះថ្ងៃទី១៨ ខែកក្កដានេះបានសរសេរថា៖ «សំបុកទាំង ៥នោះ មានពងសរុបចំនួន ១០៦គ្រាប់។ ក្នុងនោះពងដែលមានលទ្ធភាពបង្កកំណើតមានចំនួន ៦៦គ្រាប់។ សំបុកទាំងនោះ ត្រូវបានយាមការយ៉ាងម៉ត់ចត់ពីមន្ត្រីឧទ្យានុរក្ស និងសំណាក់សហគមន៍មូលដ្ឋាន។ ជាលទ្ធផល កូនក្រពើភ្នំសរុបចំនួន ៦០ក្បាល ត្រូវញាស់ចេញពីសំបុកដោយជោគជ័យក្នុងចន្លោះថ្ងៃទី២៧ ដល់ថ្ងៃទី៣០ ខែមិថុនា ឆ្នាំ២០២៤»។
ការរកឃើញនេះបានបង្ហាញថា តំបន់នេះគឺជាជម្រក ដ៏សំខាន់សម្រាប់សត្វក្រពើធម្មជាតិ និងបានផ្តល់ជាក្តីសង្ឃឹមដល់ការកើនឡើងនៃប្រភេទសត្វនេះនៅក្នុងធម្មជាតិ។
សត្វក្រពើភ្នំ គឺជាប្រភេទសត្វជិតផុតពូជបំផុតនៅក្នុងធម្មជាតិ ហើយមានចំនួនប្រមាណជាង ១០០០ក្បាលប៉ុណ្ណោះនៅលើពិភពលោក។ ក្នុងនោះកម្ពុជា មានប្រមាណជាង ៣០០ក្បាល ដែលត្រូវបានចាត់ទុកថាជាប្រទេសមានវត្តមានសត្វក្រពើភ្នំច្រើនជាងនៅលើពិភពលោក។
រដ្ឋមន្ត្រីក្រសួងបរិស្ថានលោក អ៊ាង សុផល្លែត មានប្រសាសន៍ថា ក្រសួងបរិស្ថានបានដាក់ចេញយុទ្ធសាស្រ្តចក្រាវិស័យបរិស្ថាន ដែលផ្តោតលើការការពារ និងអភិរក្សជីវចម្រុះ។ ក្រសួងបរិស្ថានបាននិងកំពុងធ្វើការអភិរក្សនិងស្តារទីជម្រក របស់ក្រពើភ្នំដែលជាប្រភេទជិតផុតពូជបំផុតក្នុងធម្មជាតិនេះ។
ក្រុមអភិរក្សរកឃើញសំបុកក្រពើភ្នំសរុបចំនួន៥ នៅឧទ្យានជាតិជួរភ្នំក្រវាញកាលពីពាក់កណ្តាលខែឧសភាកន្លងមក។ រូបថត Fauna & Flora - Cambodia Programme
គួរបញ្ជាក់ផងដែរថា ក្រពើភ្នំបានដើរតួយ៉ាងសំខាន់ក្នុងប្រព័ន្ធអេកូឡូស៊ី ហើយការរកឃើញសំបុកពងកូនចំនួន ៥សំបុក និងញាស់ជោគជ័យបាន ៦០កូន បានឆ្លុះបញ្ចាំងឱ្យឃើញថា ឧទ្យានជាតិជួរភ្នំក្រវាញជាទីជម្រកធម្មជាតិដ៏មានសុវត្ថិភាព និងសមស្របសម្រាប់ប្រភេទសត្វដ៏កម្រនេះរស់នៅ។
រដ្ឋមន្ត្រីក្រសួង កសិកម្ម រុក្ខាប្រមាញ់ និងនេសាទ លោក ឌិត ទីណា មានប្រសាសន៍ថា នេះជាជោគជ័យមួយថ្មីទៀតយ៉ាងសំខាន់នៃកម្មវិធីគាំពារសត្វកម្រជិតផុតពូជ ដែលក្រសួងកសិកម្ម បានសហការជាមួយដៃគូអង្គការក្រៅរដ្ឋាភិបាល ក្រសួងបរិស្ថាន និងរដ្ឋបាលថ្នាក់ក្រោមជាតិ ក្នុងការជំរុញកំណើនសត្វកម្រដូចជា ក្រពើភ្នំ ផ្សោត និងសត្វអណ្តើកហ្លួងជាដើម។ ចំពោះសត្វក្រពើភ្នំនេះ រដ្ឋបាលព្រៃឈើ នៃក្រសួងកសិកម្មសហការជាមួយអង្គការសត្វព្រៃនិងរុក្ខជាតិកម្ពុជា បានខិតខំជ្រើសរើស ពូជក្រពើភ្នំសុទ្ធមកបង្កាត់ហើយដាក់ចូលទៅក្នុងជម្រកធម្មជាតិវិញក្នុងដែនអភិរក្សបរិស្ថាន។
លោក ឌិត ទីណា បានញ្ជាក់ថា៖ «កិច្ចខិតខំប្រឹងប្រែងនេះ បានលេចចេញជាផ្លែផ្កាគួរជាទីមោទនៈ ដោយសត្វក្រពើភ្នំអាចបន្តពូជដោយខ្លួនឯង ហើយបង្កើតជាសំបុក និងកូនជំនាន់ថ្មីក្នុងធម្មជាតិ។ ជោគជ័យនេះបានផ្តល់កម្លាំងចិត្ត ព្រមទាំងពង្រឹងការតាំងចិត្តរបស់យើងក្នុងការបន្ត ការពារជីវចម្រុះដ៏សម្បូរបែបរបស់កម្ពុជាឱ្យបានគង់វង្សសម្រាប់មនុស្សជំនាន់ក្រោយ»។
ចំណែកឯលោក Pablo Sinovas នាយកប្រចាំប្រទេសនៃអង្គការសត្វព្រៃនិងរុក្ខជាតិកម្ពុជាបានលើកឡើងថា អស់រយៈពេលជាងមួយទស្សវត្សរ៍មកហើយ ដែលអង្គការសត្វព្រៃ និងរុក្ខជាតិកម្ពុជា និងដៃគូបានខិតខំប្រឹងប្រែងក្នុងបេសកកម្មក្នុងការជំរុញការកើនឡើងនៃចំនួនសត្វក្រពើភ្នំនៅតំបន់ជួរភ្នំក្រវាញក្នុងប្រទេសកម្ពុជា។
សំបុកក្រពើភ្នំនៅឧទ្យានជាតិជួរភ្នំក្រវាញ ត្រូវបានរកឃើញកាលពីពាក់កណ្តាលខែឧសភាកន្លងមក។ រូបថត Fauna & Flora - Cambodia Programme
លោកថ្លែងថា៖ «ការងាររបស់យើងនេះមិនត្រឹមតែទាក់ទងនឹងការបង្កាត់ពូជក្រពើភ្នំសុទ្ធប៉ុណ្ណោះទេ ប៉ុន្តែយើង ធ្វើការដើម្បីធានាឱ្យបានថាពួកវាមានទីជម្រកសមរម្យដែលត្រូវលែងទៅក្នុងធម្មជាតិវិញ»។ នេះបើយោងតាមសេចក្តីប្រកាសរួមដដែលនេះ។
ការពង្រឹងការការពារទីតាំងសំខាន់ៗនៅក្នុងឧទ្យានជាតិជួរភ្នំក្រវាញ មានសារៈសំខាន់ណាស់ក្នុងការការពារ ជម្រកទាំងនេះពីការគំរាមកំហែង ដូចជា ការកាប់បំផ្លាញព្រៃឈើ និងការបរបាញ់ជាដើម។ ការរកឃើញសំបុកថ្មីៗនេះ បង្ហាញពីសារៈសំខាន់នៃការការពារតំបន់ដែលមានចំនួនក្រពើភ្នំតិចជាងពីរបីរយក្បាលនៅក្នុងធម្មជាតិនេះ។
ក្រពើថ្មីចំនួន ៦០ក្បាលដែលបានញាស់នេះ គឺជាកត្តាជំរុញយ៉ាងខ្លាំងនៃការកើនឡើងនៃចំនួនប្រភេទនេះ។ ខណៈពេលដែលជីវចម្រុះនៅតំបន់ដីសើមកំពុងបាត់បង់យ៉ាងឆាប់រហ័សនៅទូទាំងតំបន់ ការរកឃើញនេះក៏បង្ហាញពីសក្តានុពល សម្រាប់ការស្តារឡើងវិញនូវធម្មជាតិតាមរយៈកិច្ចខិតខំប្រឹងប្រែង អភិរក្សរួមគ្នាប្រកបដោយនិរន្តរភាព។
កូនក្រពើភ្នំភ្ញាស់ចេញពីពងក្នុងសំបុក ដែលប្រទះឃើញនៅឧទ្យានជាតិជួរភ្នំក្រវាញកាលពីពាក់កណ្តាលខែឧសភាកន្លងមក។ រូបថត Fauna & Flora - Cambodia Programme
លោក ថយ ឈាន អ្នកល្បាតក្រពើភ្នំបានឱ្យដឹងថា ពួកគេបានធ្វើការយ៉ាងជិតស្និទ្ធជាមួយអង្គការសត្វព្រៃនិងរុក្ខជាតិកម្ពុជា ដើម្បីការពារប្រភេទសត្វជិតផុតពូជនេះជាច្រើនឆ្នាំមកហើយ។
លោកបានបង្ហាញចំណាប់អារម្មរណ៍ដូច្នេះថា៖«យើងពិតជារំភើបណាស់ដែលបានរកឃើញសំបុកក្រពើទាំងនេះ។ ការរកឃើញនេះបង្ហាញថា កិច្ចខិតខំប្រឹងប្រែងអភិរក្សរបស់យើងទទួលបានជោគជ័យ ហើយខ្ញុំជឿជាក់ថាជាមួយនឹងកិច្ចខិតខំប្រឹងប្រែងអភិរក្សជាបន្តបន្ទាប់របស់យើង ចំនួនក្រពើភ្នំនឹងបន្តកើនឡើងនាពេលអនាគត»៕
