![](https://pppkhmer.sgp1.digitaloceanspaces.com/image/main/20247/18_7_2024_digital_books_3d.jpg)
រូបភាព 3D មានចលនា ជាមួយសម្លេងអត្ថាធិប្បាយពីខ្លឹមសារមេរៀន បន្ទាប់ពីស្កេន QR Code នៅលើមេរៀនមួយនោះ។ រូបថត សហការី
ភ្នំពេញៈ ដោយគ្រាន់តែស្កេន QR Code នៅលើមេរៀននីមួយៗនោះព័ត៌មានទាំងអស់នឹងផុសចេញលើសៀវភៅ«ដូចជប់» ដែលសិស្ស មើលឃើញផ្ទាល់នូវរូបភាព 3D មានចលនា ជាមួយសម្លេងអត្ថាធិប្បាយពីខ្លឹមសារមេរៀន ដែលជួយឱ្យសិស្សឆាប់ចេះ និងឆាប់ចាំមេរៀនក្នុងរយៈពេលខ្លី។
នៅឆ្នាំ២០២៥ ខាងមុខ សិស្សកម្រិតវិទ្យាល័យនៅតាមសាលារដ្ឋមួយចំនួននឹងទទួលបានការសិក្សាតាមបែបថ្មីជាលើកដំបូងក្នុងប្រព័ន្ធអប់រំនៅកម្ពុជា ដែលហៅថា «សៀវភៅឌីជីថល»។
ក្រសួងអប់រំ យុវជន និងកីឡា និងក្រុមហ៊ុន E-School Cambodia បាននឹងកំពុងតែធ្វើការបង្កើតសៀវភៅឌីជីថលនេះបន្ទាប់ពីស្ថាប័នទាំងពីរបានចុះអនុស្សរណៈនៃការយោគយល់ (MoU) ជាមួយគ្នា កាលពីដើមខែកក្កដា ដើម្បីលើកកម្ពស់សមត្ថភាពឌីជីថលរបស់សិស្សានុសិស្ស និង គ្រូបង្រៀន។
សៀវភៅឌីជីថល ដែលប្រើប្រាស់បច្ចេកវិទ្យាពិភពនិមិត្តនេះ អាចឱ្យសិស្សានុសិស្សប្រើប្រាស់ទូរស័ព្ទដៃ ឬកុំព្យទ័របន្ទះ ដើម្បីស្កេន QR Code នៅលើមេរៀននីមួយៗ ហើយព័ត៌មានទាំងអស់នឹងផុសចេញលើសៀវភៅ។ បច្ចេកវិទ្យាថ្មីនេះ នឹងផ្តល់ជាជំនួយដល់ការសិក្សារបស់សិស្សឱ្យឆាប់យល់មេរៀន តាមរយៈការមើលឃើញផ្ទាល់នូវរូបភាព 3D មានចលនាជាមួយសម្លេងអត្ថាធិប្បាយផងដែរ។
លើសពីនោះ ការសិក្សាតាមរយៈសៀវភៅឌីជីថលក៏អាចជួយសិស្សានុសិស្សមួយចំនួនធំរកឃើញ ជំនាញពីកំណើតរបស់ពួកគេ ដែលនេះជាកត្តាសំខាន់ចាំបាច់ក្នុងការសម្រួចទិសដៅជីវិតរបស់សិស្សទៅលើអ្វីដែលពួកគេចូលចិត្ត ហើយផ្តោតទៅលើមុខវិទ្យានោះ។ នេះបើយោងតាមក្រសួងអប់រំ និងក្រុមហ៊ុន E-School Cambodia។
ប្រធានអភិវឌ្ឍន៍បច្ចេកវិទ្យានិម្មិតនៃក្រុមហ៊ុន E-School Cambodia លោក ហេង ជលសា បានថ្លែងថា សៀវភៅឌីជីថលនេះនឹងផ្តល់ចំណេះដឹងថ្មីមួយផ្នែកទៀតតាមបែបបច្ចេកវិទ្យាទំនើប ដែលប្រទេសផ្សេងក្នុងពិភពលោកបានប្រើប្រាស់រួចទៅហើយ។
លោកបានសង្កេតឃើញថា ចាប់តាំងពីឆ្នាំ ១៩៧៩មក ការសិក្សារបស់សិក្សានុសិស្សកម្ពុជា គឺរៀនដោយអាន ទន្ទេញ និងមើលរូបនៅលើសៀវភៅ។ ដើម្បីឱ្យសិស្សឆាប់ចាំ ជួនកាលលោកគ្រូអ្នកគ្រូឱ្យសិស្សគូរចម្លងតាមរូបភាពនៅលើសៀវភៅ។ ហេតុនេះ រូបភាពពិតប្រាកដដូចជាខួរក្បាល បេះដូង សរសៃឈាម ផែនដី ទីតាំងប្រវត្តិសាស្រ្តមួយចំនួន ឬមុខវិទ្យាពិបាកៗដូចជា អាតូម និងសារធាតុគីមីផ្សេងៗទៀតជាដើម គឺសិស្សមិនធ្លាប់បានឃើញផ្ទាល់ភ្នែក ឬមិនមានផ្ទាល់ជាក់ស្តែងឱ្យសិស្សអនុវត្តនោះទេ។
លោកបញ្ជាក់ថា៖ «ប៉ុន្តែសៀវភៅឌីជីថលនេះ នឹងអាចឱ្យសិស្សប្រើទូរស័ព្ទដៃដាក់នៅចំទំព័រមេរៀនណាមួយ នៃមុខវិទ្យាគណិតវិទ្យា ប្រវត្តិវិទ្យា ភូមិវិទ្យា និងវិទ្យាសាស្រ្តផ្សេងៗ នោះវត្ថុនោះនឹងផុសចេញពីសៀវភៅហ្នឹងមកតែម្តង គឺដូចជប់អញ្ជឹង។ ផុសចេញមកពន្យល់ បើរៀនពីខួរក្បាល ពីបេះដូង យើងឃើញខួរក្បាល បេះដូងអណ្តែតនៅលើសៀវភៅហ្នឹងហើយមានចលនា សម្លេង ការបង្ហាញផ្សេងៗទៅតាមមេរៀនព័ត៌មានដែលមាននៅក្នុងសៀវភៅពុម្ពរបស់ក្រសួង»។
លោកក៏បានលើកជាឧទាហរណ៍បន្ថែមថា នៅពេលដែលសិក្សាពីប្រវត្តិសាស្រ្ត ដូចជា សម័យចេនឡា ឬសម័យអង្គរជាដើម នោះសិស្សនឹងអាចមើលឃើញពីការរស់នៅរបស់ប្រជាជន និងទិដ្ឋភាពជាក់ស្តែងនៅក្នុងសម័យនីមួយៗផ្សេងៗទៀតជាច្រើនដោយផ្ទាល់លើសៀវភៅឌីជីថលនោះ។
លោកថ្លែងថា៖ «អញ្ចឹងអាហ្នឹងគឺជួយឱ្យសិស្សានុសិស្សរៀនឆាប់ចេះ ឆាប់ចាំឆាប់យល់មេរៀនជាងមុន។ វាទាន់ទៅនឹងអ្វីដែលជាគោលដៅរបស់រដ្ឋាភិបាលផ្តោតទៅលើមនុស្ស បច្ចេកវិទ្យា សង្គមបច្ចេកវិទ្យា និងសេដ្ឋកិច្ចបច្ចេកវិទ្យា។
តាមរយៈការចុះ MoU នេះ ក្រុមហ៊ុន E-School Cambodia បាននឹងកំពុងតែធ្វើការបង្កើតមាតិតា (Develop contents) ដើម្បីដាក់បញ្ជូលទិន្នន័យនៅលើទំព័រសៀវភៅនីមួយៗ នៃមុខវិជ្ជាមេរៀនចាប់ពីថ្នាក់ទី១ ដល់ ទី១២ ដើម្បីឱ្យសិស្សស្កេន ហើយមើលឃើញផ្ទាល់ភ្នែក ហើយអាចយល់មេរៀនបានដោយមិនបាច់ធ្វើការស្រមើស្រមៃដូចមុនទៀតនោះទេ។ លើសពីនោះ សៀវភៅឌីជីថលនេះគឺមិនមែនជារូបភាពមេរៀនដូចជា PDF ឬក៏ជារូបភាពសៀវភៅសខ្មៅ ឬកូល័រដែលមានកន្លងមកនោះឡើយ។
បច្ចេកវិទ្យាថ្មីនេះ ក៏ជួយធ្វើឱ្យសិស្សដែលមានបញ្ហាពិបាកក្នុងការអានអក្សរ ឬក៏កំពុងតែមានសំពោធពីសិស្សអង្គុយក្បែរខ្លួន ដែលពូកែអានលឿនជាងនោះទទួលបានចំណេះដឹងស្មើៗគ្នា ចេះសហការគ្នា និងរីករាយទស្សនាមេរៀនក្នុងសៀវភៅឌីជីថលជាមួយគ្នាផងដែរ។
បើយោងតាមលោក ហេង ជលសា ដោយការព្រួយបារម្ភពីការប៉ះពាល់ទៅលើភ្នែកពីការប្រើប្រាស់ទូរស័ព្ទដៃ ពិសេសលើកុមារនោះ ក្នុងដំណាក់កាលដំបូង សៀវភៅឌីជីថលនេះគឺ អាចចាប់ផ្តើមអនុវត្តទៅលើសិស្សកម្រិតវិទ្យាល័យជាមុនសិន។ នេះក៏ដោយសារតែសិស្សកម្រិតវិទ្យាល័យត្រូវការសិក្សាស្រាវជ្រាវច្រើនផងដែរ។
សៀវភៅឌីជីថលនេះ គ្រោងនឹងដាក់ឱ្យប្រើប្រាស់នៅឆ្នាំ ២០២៥ ខាងមុខ នៅតាមសាលាមួយចំនួនក្នុងរាជធានីភ្នំពេញ និងខេត្តផងដែរ។ ក្នុងគម្រោងនេះក៏មានការបណ្តុះបណ្តាលគ្រូបង្គោលពីការប្រើប្រាស់សៀវភៅឌីជីថល ការរៀបចំកាលវិភាគសិក្សាសៀវភៅឌីជីថល ការរៀបចំប្លង់សិក្សាបែបគរុកោសល្យទៅតាមមេរៀននីមួយៗ សម្រាប់ថ្នាក់សៀវភៅឌីជីថល ការធ្វើបច្ចុប្បន្នភាព ការថែរក្សា Hardware និងទិន្ន័យផ្សេងៗទៀត។ នេះបើយោងតាមក្រសួងអប់រំ។
សមិទ្ធផលដែលកើតចេញពីកិច្ចសហការនេះនឹងក្លាយជាចំណែកមួយ នៃការកសាងសមត្ថភាពពលរដ្ឋឌីជីថល និងជួយលើកកម្ពស់ការប្រើប្រាស់បច្ចេកវិទ្យាព័ត៌មាន និងសាគមនាគមន៍ក្នុងវិស័យអប់រំ ស្របតាមទិសដៅបញ្ចកោណ និងសសរស្តម្ភរបស់រាជរដ្ឋាភិបាលកម្ពុជាអាណត្តិទី៧ ដើម្បីលើកស្ទួយការអប់រំបែបឌីជីថល ពលរដ្ឋឌីជីថល រដ្ឋាភិបាលឌីជីថល និងសេដ្ឋកិច្ចឌីជីថល។
លោក ហេង ជលសា ក៏បានលើកឡើងផងដែរថា បច្ចុប្បន្ននេះមិនទាន់មានស្ថាប័នអប់រំណាមួយបានវិនិយោគលើបច្ចេកវិទ្យាទំនើបកម្រិតនេះទេ។ អ្វីដែលស្ថាប័នអប់រំផ្សេងបានកំពុងតែធ្វើ គឺការគ្រាន់តែជាការស្កេនសៀវភៅដាក់បញ្ជូលទៅក្នុងកុំព្យូទ័រ និងវេបសាបលើអនឡាញ ដើម្បីឱ្យគេបើកមើលជារូបភាព PDF ឬក៏ជាសៀវភៅ PDF flip។
លោកលើកឡើងថា៖ «មិនទាន់មានខាងសាលាណាមួយធ្វើទេ គឺ E-school Cambodia បានចាប់ផ្តើមអនុវត្តនេះមុនគេ។ ការបង្កើតមាតិតានេះនឹងធ្វើឱ្យគាត់ឆាប់ចេះ ឆាប់ចាំ ឆាប់យល់ ដោយចំណាយពេលតិចជាងមុន។ សិស្សអាចឆាប់រកឃើញមុខវិជ្ជាដែលចូលចិត្ត ហើយផ្តោតមើលមុខវិជ្ជានោះច្រើន... វាជួយធ្វើឱ្យគាត់អាចរកឃើញខ្លួនឯង ដែលយើងហៅថាបំនិនជីវិត»។
ទោះយ៉ាងណា លោកស្រី ឃួន វិច្ឆិកា អ្នកនាំពាក្យក្រសួងអប់រំបានឱ្យដឹងថា ចំនួនសៀវភៅដែលនឹងត្រូវដាក់ចូលទៅក្នុងបណ្តាញសៀវភៅឌីជីថលនេះនៅមិនទាន់ដឹងជាក់លាក់នៅឡើយទេ ព្រោះថា ក្រុមការងារកំពុងតែបន្តការពិភាក្សា និងការសិក្សា និងថាតើត្រូវសាកល្បងលើកកម្មវិធីនេះយ៉ាងដូចម្តេចខ្លះនាពេលអនាគត។
លោក ជលសា ក៏បានសង្កេតឃើញដែរថា នៅលើពិភពលោក ក្រុមមនុស្សជំនាន់ថ្មី (Generation Z)នេះ គឺជោគជាំជាមួយនឹងបច្ចេកវិទ្យាតាំងពីតូចមកដែលធ្វើឱ្យពួកគេពិបាកក្នុងការកាត់ផ្តាច់វាណាស់។ ចរន្តពិភពលោកបានដើរមុនកម្ពុជាលើផ្នែកបច្ចេកវិទ្យាបែបនេះ ហើយប្រទេសកម្ពុជាកំពុងតែដេញតាមផងដែរ៕