លោកនាយករដ្ឋមន្ត្រី ហ៊ុន ម៉ាណែត ថ្លែងក្នុងពិធីបញ្ចុះបឋមសិលាសាងសង់សារមន្ទីរសម្ដេចព្រះព្រហ្មរតនមុនី ពិន សែម នៅខេត្តសៀមរាប នាថ្ងៃទី១៨ កក្កដា។ STPM
សៀមរាបៈ លោកនាយករដ្ឋមន្ត្រី ហ៊ុន ម៉ាណែត ថ្លែងថា ក្នុងឆមាសទី១ ឆ្នាំ២០២៤ ភ្ញៀវទេសចរអន្តរជាតិដែលបានធ្វើដំណើរទៅកាន់ខេត្តសៀមរាបតាមច្រកព្រលានយន្តហោះអន្តរជាតិមានចំនួន៣១ម៉ឺននាក់ កើនឡើងជាង៣៦ភាគរយ បើប្រៀបធៀបរយៈពេលដូចគ្នាក្នុងឆ្នាំ២០២៣។
លោកថ្លែងថា៖ «ទេសចរដែលចូលតាមព្រលានយន្តហោះអន្តរជាតិ បើតាមទិន្នន័យ ក្នុងឆ្នាំ២០២៣ មានជាង៤៨ម៉ឺននាក់។ បើសរុបទាំងក្នុងប្រទេសគឺមាន២,៥លាននាក់។ ក្នុងឆមាសទី១ [ឆ្នាំ២០២៤] បើគិតពីទេសចរដែលចូលមកតាមច្រកព្រលានយន្តហោះអន្តរជាតិ យើងអត់គិតតាមផ្លូវគោកទេ មាន៣១ម៉ឺននាក់ បើប្រៀបធៀបឆមាសទី១ ពេលដូចគ្នានៅឆ្នាំ២០២៣ គឺកើន [ជាង] ៣៦ភាគរយ»។
ឆ្លើយតបនឹងមតិដែលបង្ហោះក្នុងបណ្តាញសង្គមដែលថាខេត្តសៀមរាប «ស្ងាត់» ភ្ញៀវទេសចរ លោក ហ៊ុន ម៉ាណែត ពន្យល់ថា ទេសចរណ៍បែងចែកទៅតាមរដូវកាល មានរដូវភ្ញៀវទេសចរច្រើន រដូវភ្ញៀវទេសចរធម្យម និងរដូវភ្ញៀវទេសចរតិច ដែលមិនខុសពីរដូវប្រាំងមិនមានទឹកភ្លៀង និងរដូវវស្សាមានទឹកភ្លៀងនោះទេ។ លោកថា៖ «កត្តាដែលចាំបាច់យើងត្រូវទទួលស្គាល់ថាវិស័យទេសចរណ៍ វាដូចវិស័យកសិកម្មអ៊ីចឹង។ វាមានរដូវរបស់វា ព្រោះប្រទេសគេ គេមានរដូវពេលគេសម្រាក ខែប៉ុន្មានអ៊ីចឹងទៅ! ហើយខែគេធ្វើការ!»។
ក្នុងពិធីបញ្ចុះបឋមសិលាសាងសង់សារមន្ទីរសម្ដេចព្រះព្រហ្មរតនមុនី ពិន សែម នៅខេត្តសៀមរាប នាថ្ងៃទី១៨ កក្កដា លោកថ្លែងថា ក្នុងអំឡុងពេលរដូវភ្លៀវទេសចរច្រើន គិតចាប់ពីខែតុលា ឆ្នាំ២០២៣ ដល់ខែមីនា ឆ្នាំ២០២៤ ក្នុង១ថ្ងៃ កម្ពុជាមានភ្ញៀវទេសចរអន្តរជាតិជាង៣ ០០០នាក់ ប៉ុន្តែក្នុងខែកុម្ភៈ ឆ្នាំ២០២៤ ក្នុង១ថ្ងៃ មានទេសចរជាង៥ ០០០នាក់ ដែលបានមកដល់កម្ពុជា។
ក្នុងអំឡុងពេលរដូវភ្លៀវទេសចរតិច លោកពន្យល់ថា ចាប់ផ្តើមពីខែមិថុនា ឆ្នាំនេះ ក្នុង១ថ្ងៃ មានទេសចរប្រមាណ១ ៣០០នាក់ ប៉ុន្តែបច្ចុប្បន្នកើនឡើងដល់១ ៩០០ នាក់ ខណៈថ្ងៃទី១៧ កក្កដា កើនឡើងជិត២ ០០០នាក់ក្នុង១ថ្ងៃ។
លោក ហ៊ុន ម៉ាណែត បញ្ជាក់ថា៖ «នេះជាតួលេខដែលយើងទទួលបាន។ សួរថា យើងនិយាយតួលេខនេះដើម្បីអី? ដើម្បីឱ្យបងប្អូនបានជ្រាប។ រឿងការវាយតម្លៃទាប ច្រើនគឺជាទស្សនៈ និងការគិតគូររបស់យើងផ្សេង តែផ្អែកលើមូលដ្ឋានវិទ្យាសាស្ត្រ យើងមានប៉ុណ្ណេះ!»។
លោកបន្ថែមថា៖ «អ៊ីចឹង របាយការណ៍បែបនេះ ខ្ញុំបានទទួល ហើយខ្ញុំបានទទួលតាមរយៈការរាយការណ៍របស់ឯកឧត្តម [អភិបាលខេត្តសៀមរាប] ជាប្រចាំ ពីក្រសួងទេសចរណ៍ ពីវិស័យឯកជនខ្លួនឯងតាមរយៈការជួបផ្ទាល់។ ខ្ញុំឧស្សាហ៍ជួបជាមួយថ្នាក់ដឹកនាំវិស័យឯកជន។ ប៉ុន្តែរបាយការណ៍វានៅតែរបាយការណ៍ វាជាមូលដ្ឋាន ប៉ុន្តែយើងក៏ត្រូវការស្វែងយល់។ ខ្ញុំក៏មានក្រុមចុះមកធ្វើដែរ»។
លោក ប្រាក់ សោភ័ណ អភិបាលខេត្តសៀមរាប ថ្លែងក្នុងពិធីនេះថា ទេសចរណ៍ក្នុងខេត្តសៀមរាប បាននិងកំពុងចាប់ផ្ដើមមានវឌ្ឍនភាពឡើងវិញជាបណ្តើរៗ ដោយក្នុងឆ្នាំ២០២៣ ខេត្តសៀមរាបទទួលបានភ្ញៀវទេសចរជាតិ និងអន្តរជាតិចំនួនជាង២,៥ លាននាក់ កើនឡើងជាង៣២ភាគរយ បើធៀបនឹងរយៈពេលដូចគ្នាក្នុងឆ្នាំ២០២២។
លោកបន្ថែមថា ក្នុងរយៈពេល៦ខែក្នុងឆ្នាំ២០២៤ ខេត្តសៀមរាបទទួលបានភ្ញៀវទេសចរសរុបចំនួនជាង១,៩លាននាក់កើនឡើងចំនួនជាង៤៤ភាគរយ បើធៀបរយៈពេលដូចគ្នាក្នុងឆ្នាំ២០២៣ ក្នុងនោះភ្ញៀវអន្តរជាតិមានចំនួនជាង៥២ម៉ឺននាក់ និងភ្ញៀវជាតិមានចំនួនជាង៣៨ម៉ឺននាក់។
លោក ប្រាក់ សោភ័ណ ថ្លែងថា៖ «នាពេលបច្ចុប្បន្ននេះ ក្នុង១ថ្ងៃ មានជើងហោះហើរចូលមកកាន់ខេត្តសៀមរាបចន្លោះពី១៤ ទៅ១៩ជើងហោះហើរ និងមានអ្នកដំណើរចន្លោះចំនួន១ ០០០នាក់ទៅ១ ៥០០នាក់»។
ក្រសួងទេសចរណ៍បានលើកឡើងក្នុងបណ្តាញសង្គមនាថ្ងៃទី១៦ កក្កដា ថា ក្នុងរយៈពេល១សប្ដាហ៍ ចាប់ពីថ្ងៃទី៨ ដល់ថ្ងៃទី១៤ ខែកក្កដា កម្ពុជាមានភ្ញៀវទេសចរជាតិប្រមាណជាង២៩ម៉ឺននាក់ និងភ្ញៀវទេសចរបរទេសប្រមាណជាង ៥ម៉ឺននាក់។
ក្រសួងបញ្ជាក់ថា ក្នុងរយៈពេល១សប្ដាហ៍នេះ បណ្ណចូលទស្សនាតំបន់រមណីយដ្ឋានអង្គរត្រូវបានលក់ជូនភ្ញៀវទេសចរបរទេសសរុបជិត១៣ ០០០បណ្ណ កើនឡើងជាង៦ភាគរយ និងចំណូលសរុបជាង៥៨ម៉ឺនដុល្លារអាមេរិក កើនឡើងជាង៨ភាគរយ។
ក្រសួងបន្តថា ក្នុងរយៈពេលដូចគ្នានេះ ជើងហោះហើរអន្តរជាតិចូលមកកាន់ប្រទេសកម្ពុជាសរុបចំនួន៤៥៦ ជើងហោះហើរ ក្នុងនោះអាកាសយានដ្ឋានអន្តរជាតិភ្នំពេញមានចំនួន ៣៣៧ ជើងហោះហើរ, អាកាសយានដ្ឋានអន្តរជាតិសៀមរាបអង្គរមានចំនួន១០២ជើងហោះហើរ, និង អាកាសយានដ្ឋានអន្តរជាតិព្រះសីហនុមានចំនួន១៧ ជើងហោះហើរ៕
