ពលរដ្ឋធ្វើដំណើរតាមដងផ្លូវក្នុងរាជធានីភ្នំពេញ។ ហុង មិនា
ភ្នំពេញៈ សេចក្តីព្រាងច្បាប់ស្តីពីចរាចរណ៍ផ្លូវគោកថ្មីនឹងត្រូវបញ្ជូនទៅទីស្តីការគណៈរដ្ឋមន្រ្តីនាសប្តាហ៍ក្រោយនេះ ដើម្បីក្រុមអ្នកច្បាប់ធ្វើការពិនិត្យ ក្រោយពីអន្តរក្រសួងបានប្រជុំឆ្លងសេចក្តីព្រាងច្បាប់នេះកាលពីអង្គារ ទី១៦ ខែកក្កដានេះ ក្នុងទិសដៅទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោក។
លោកស្រី មឹន មាណវី រដ្ឋលេខាធិការ ក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋាន គណៈកម្មាធិការជាតិសុវត្ថិភាពចរាចរណ៍ផ្លូវគោក(គ.ស.ច.គ)បានមានប្រសាសន៍នាថ្ងៃទី១៩ ខែកក្កដាថា សេចក្តីព្រាងច្បាប់ស្តីពីចរាចរណ៍ផ្លូវគោកថ្មីនឹងត្រូវបញ្ជូនទៅទីស្តីការគណៈរដ្ឋមន្រ្តីនាសប្តាហ៍ក្រោយនេះ ដើម្បីឱ្យក្រុមប្រឹក្សាអ្នកច្បាប់នៃទីស្តីការគណៈរដ្ឋមន្រ្តីធ្វើការពិនិត្យ និងផ្ទៀងផ្ទាត់។
លោកស្រីបានបញ្ជាក់ថា៖«អាទិត្យក្រោយនឹងបញ្ជូលសេចក្តីព្រាងច្បាប់ហ្នឹងនៅទៅទីស្តីការគណៈរដ្ឋមន្រ្តី។ សេចក្តីព្រាងច្បាប់ហ្នឹងទាំងពីអាណត្តិមុនមកម៉្លេះ បានធ្វើទៅរួចហើយ ចឹងយើងកែសម្រួលតែបន្តិចបន្តួចទេ ព្រោះបានសម្តេចក្រឡាហោម [ស ខេង]គាត់មើលរួច និងឆ្លងគណៈកម្មការជាតិរួចអស់ហើយហ្នឹង»។
សេចក្តីព្រាងច្បាប់ថ្មី ស្តីពីចរាចរណ៍ផ្លូវគោកនេះ ត្រូវបានបន្ថែមថ្មី និងកែសម្រួលចំនួន ៥២មាត្រាលើ ៩២មាត្រា។ ក្នុងនោះ ផ្តើមស្នើដោយក្រសួងសាធារណការ និងដឹកជញ្ជូនចំនួន៤០មាត្រា ផ្តើមស្នើដោយក្រសួងមហាផ្ទៃចំនួន៥មាត្រា និងផ្តើមស្នើដោយក្រសួងមហាផ្ទៃ និងក្រសួងយុត្តិធម៌ ចំនួន៧មាត្រាផងដែរ។
ទាក់ទងទៅនឹងការកែសម្រួលមាត្រាទាំងនេះដែរ លោកស្រីបានលើកឡើងដូច្នេះថា៖«យើងអត់បានដាក់ទឹកលុយផាកពិន័យអីច្រើនពេកទេ តែពិន័យមានទោសរឿងប្រើប្រាស់ភ្លើងសញ្ញា និងសូរស័ព្ទ សញ្ញាខុស ដែលអត់មានចែងសម្រាប់ប្រើប្រាស់ទូទៅហ្នឹង។ ចា៎ មានតែប៉ុណ្ណឹងទេ ផុតពីហ្នឹងសុទ្ធតែដដែលដែរទេ។ កែ[សម្រួល]៥២មាត្រាហ្នឹង កែ តែ អក្ខរាវិរុទ្ធ ឬពាក្យ ឃ្លាអីដែលមើលទៅមិនសូវច្បាស់ហ្នឹងយើងកែសម្រួលឡើងវិញតែប៉ុណ្ណឹង»។
ដោយឡែក ពាក់ព័ន្ធទៅនឹងការផាកពិន័យ និងទោសទណ្ឌដែលបង្កឡើងដោយការបើកបរក្នុងស្ថានភាព ស្រវឹងគឺត្រូវបានរក្សានៅដដែល។
ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណ:កម្មាធិការជាតិសុវត្ថិភាពចរាចរណ៏ផ្លូវគោក ស សុខា បានដឹកនាំកិច្ចប្រជុំឆ្លងសេចក្តីព្រាងច្បាប់ស្តីពីចរាចរណ៍ផ្លូវគោកថ្មីនេះកាលពីថ្ងៃអង្គារទី១៦ ខែកក្កដានេះ។
លោកឧបនាយករដ្ឋមន្រ្តីបានមានប្រសាសន៍ក្នុងឱកាសនោះថា ការរៀបចំកែសម្រួលសេចក្តីព្រាងច្បាប់ស្តីពីចរាចរណ៍ផ្លូវគោកថ្មី គឺដើម្បីឱ្យស្របតាមស្ថានភាពជាក់ស្តែងនៃការរីកចម្រើនរបស់ប្រទេសកម្ពុជា និងចូលរួមទប់ស្កាត់ កាត់បន្ថយគ្រោះ ថ្នាក់ចរាចរណ៍ផ្លូវគោកឱ្យមកនៅកម្រិតទាបបំផុត។ លើសពីនោះ គឺដើម្បីចូលរួមអនុវត្តនូវផែនការសកលស្តីពីសុវត្ថិភាពចរាចរណ៍ របស់អង្គការសហប្រជាជាតិក្នុងការកាត់បន្ថយចំនួនអ្នកស្លាប់ និងអ្នករបួសដោយសារគ្រោះថ្នាក់ចរាចរណ៍ផ្លូវគោក ឱ្យបាន៥០ភាគរយ នៅឆ្នាំ២០៣០។
ក្រៅពីនោះ លោកឧបនាយករដ្ឋមន្រ្តីក៏បានស្នើក្រុមការងាររបស់ គ.ស.ច.គ. បន្តធ្វើការយ៉ាងជិតស្និទ្ធជាមួយនឹងក្រុមការងារ នៃទីស្តីការគណៈរដ្ឋមន្រ្តី ដើម្បីបន្តឆ្លងក្រុមការងារបច្ចេកទេសតាមនីតិវិធី ឱ្យបានឆាប់រហ័ស និងឈានដល់ការស្នើសុំដាក់ជូនឆ្លងកិច្ចប្រជុំពេញអង្គគណៈរដ្ឋមន្រ្តី ដើម្បីទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោក។
ក្នុងឆមាសទី១ឆ្នាំ២០២៤នេះ ករណីគ្រោះថ្នាក់ចរាចរណ៍បានកើតឡើងចំនួន១ ៥២០លើក ដែលបណ្តាលឱ្យមានអ្នកស្លាប់ចំនួន ៧៩៣នាក់ កើនឡើង ៣៧នាក់ ស្មើនឹង ៥ភាគរយ និងអ្នករបួសចំនួន២ ០៧២នាក់ កើនឡើង ៤៤នាក់ ស្មើនឹង ២ភាគរយ បើធៀបទៅនឹងរយៈពេលដូចគ្នាកាលពីឆ្នាំ២០២៣។ ក្នុងចំណោម អ្នកស្លាប់ទាំងនោះមាន ៧៥ភាគរយ ជាអ្នកជិះម៉ូតូ។
ចំនួនយានយន្តដែលបានចុះបញ្ជី គិតមកដល់ ខែកុម្ភៈ ឆ្នាំ២០២៤ នេះមាន សរុបចំនួន ៧ ៣៥១ ៩០៦គ្រឿង។ ក្នុងនោះម៉ូតូចំនួន៦ ២៤៤ ០៩៦គ្រឿង។ នេះបើយោងតាមក្រសួងមហាផ្ទៃ។
លោកស្រីមឹន មាណវីសង្ឃឹមថា ក្រោយពេលសេចក្តីព្រាងច្បាប់នេះត្រូវបានអនុម័តឱ្យប្រើប្រាស់រួចហើយ វានឹងអាចជួយកាត់បន្ថយគ្រោះថ្នាក់ចរាចរណ៍បានច្រើនជាងមុន។
ក្នុងពិធីសំណេះសំណាលជាមួយមន្ត្រីនគរបាលចរាចរណ៍ ដែលមានមន្រ្តីកិច្ចសន្យាចំនួន៣០០នាក់ នាថ្ងៃទី១៨ ខែកក្កដានេះ លោកឧបនាយករដ្ឋមន្រ្តីស សុខាក៏បានលើកឡើងផងដែរថា ចាប់ពីឆ្នាំ២០២៥ រហូតដល់ឆ្នាំ២០២៨ ខាងមុខនេះ រាជរដ្ឋាភិបាលឯកភាពជាគោលការណ៍ក្នុងការផ្តល់ក្របខណ្ឌមន្ត្រីនគរបាលចរាចរណ៍៣០នាក់ក្នុងមួយឆ្នាំ។ ការវាយតម្លៃជ្រើសរើសគឺយកពីមន្ត្រីជាប់កិច្ចសន្យាដោយផ្អែកលើកម្ពស់បុរស១ម៉ែត្រ៧០សង់ទីម៉ែត្រឡើង និងនារី១ម៉ែត្រ៦៥សង់ទីម៉ែត្រឡើង និងមានអតីតភាពកិច្ចសន្យាការងារយូរជាងគេ៕
