មន្ត្រីដោះមីនរងរបួសពិការដៃទាំងពីរដោយសារការផ្ទុះគ្រាប់កាំភ្លើងធំនៅខេត្តនេះ កាលពីថ្ងៃទី២៩ ខែមិថុនា កំពុងសម្រាកព្យាបាល។ ហ្វេសប៊ុក ហេង រតនា
បុរសអាយុ ៦៦ ឆ្នាំម្នាក់បានស្លាប់ក្រោយពេលមីនតោនមួយបានផ្ទុះនៅភូមិត្រពាំងរំសែង ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ កាលពីព្រឹកថ្ងៃទី១ ខែកក្កដា។ ចំណែកមន្ត្រីដោះមីនមួយរូបក៏បានរងរបួសពិការដៃទាំងពីរដោយសារការផ្ទុះគ្រាប់កាំភ្លើងធំនៅខេត្តនេះ កាលពីថ្ងៃទី២៩ ខែមិថុនា។
អាជ្ញាធរមីនបានបញ្ជាក់នៅថ្ងៃនេះថា ជនរងគ្រោះមានឈ្មោះ ឡេង ថាន ភេទប្រុស អាយុ ៦៦ឆ្នាំ។ មុនពេលកើតហេតុ ជនរងគ្រោះបានប្រើប្រាស់ចបជីកដើម្បីជីកដីដាក់បង្គោលធ្វើរបងចម្ការរបស់លោកនៅម្តុំអូរតាលី ចម្ងាយប្រមាណ ១គីឡូម៉ែត្រពីភូមិ ហើយក៏ប៉ះចំមីនតោនបណ្តាលឱ្យផ្ទុះបាត់បង់ជីវិតតែម្ដង។
អាជ្ញាធរមីនបានសរសេរនៅលើបណ្ដាញសង្គមថា៖ «អាជ្ញាធរមីន សូមអំពាវនាវដល់បងប្អូនប្រជាពលរដ្ឋទាំងអស់ សូមកុំចូលទៅតំបន់ណាដែលមិនដឹងប្រវត្តិច្បាស់លាស់ និងត្រូវសាកសួរអាជ្ញាធរមូលដ្ឋានមុនចូលតំបន់នោះ និងសូមកុំប៉ះពាល់នៅពេលឃើញមីន និងគ្រាប់មិនទាន់ផ្ទុះ ហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងប្រតិបត្តិករបោសសម្អាតមីនដែលនៅជិតទីនោះដើម្បីយកគ្រាប់ទាំងនោះទៅកម្ទេចចោល»។
ខេត្តត្បូងឃ្មុំត្រូវបានប្រកាសជាខេត្តគ្មានគ្រាប់មីន តាំងពីចុងឆ្នាំ២០២២។ រហូតមកទល់ពេលនេះ ខេត្តដែលត្រូវបានប្រកាសថាគ្មានមីន មានចំនួន ១៥ បូករួមទាំងខេត្តត្បូងឃ្មុំផង។
លោក ឡាង កុសល អ្នកនាំពាក្យអាជ្ញាធរមីន បានប្រាប់ឲ្យដឹងថា ទោះបីជាខេត្តត្បូងឃ្មុំត្រូវបានប្រកាសថាជាខេត្តអស់មីនក៏ដោយ ក៏អាចនៅមានមីនសេសសល់ ព្រោះការសម្អាតធ្វើឡើងទៅលើតំបន់ដែលមានមីន ឬចម្ការមីនដែលអាជ្ញាធរបានដឹងនិងបានកំណត់ច្បាស់លាស់មុន។ សម្រាប់ខេត្តត្បូងឃ្មុំ ស្រុកមេមត់គឺជាស្រុកចុងក្រោយដែលអាជ្ញាធរដឹងថានៅមានមីនមុនការប្រកាសថាខេត្តនេះ អស់មីន។
លោកថា សម្រាប់ស្រុកពញាក្រែកដែលជាទីតាំងកើតហេតុ ការផ្ទុះកើតឡើងនៅក្នុងតំបន់មួយដែលមិនស្ថិតក្នុងទីតាំងដែលបានដឹងមុន ឬជាតំបន់ដែលមិនទាន់បានស្រាវជ្រាវឬកំណត់អត្តសញ្ញាណមុន។
លោកបន្តថា៖ «យើងមិនអាចដឹងពីគ្រាប់មីន ឬ សំណល់ជាតិផ្ទុះដែលនៅរាយប៉ាយទូទាំងប្រទេសទាំងអស់ទេ ដោយសារតែការស្រាវជ្រាវ និងការកំណត់អត្តសញ្ញាណចម្ការមីនពីមុនមក យើងទទួលបានពីប្រជាពលរដ្ឋ ហើយព័ត៌មានខ្លះដែលទទួលបានអាចបាត់បង់ ហើយយើងមិនបានកំណត់អត្តសញ្ញាណតំបន់នោះ»។
លោកថា លោកទេសរដ្ឋមន្ត្រី លី ធុជ អនុប្រធានទី១នៃអាជ្ញាធរមីន បានចាត់ក្រុមការងារនិងប្រតិបត្តិករដោះមីនទៅស្រាវជ្រាវកន្លែងកើតហេតុ។
លោកបន្តថា៖ «ការផ្ទុះមីនតោននៅតំបន់ដែលយើងមិនបានកំណត់ ក៏អាចមានគ្រាប់មីនផ្សេងៗទៀតនៅតំបន់នោះ។ ដូច្នេះហើយ ក្រុមការងារបច្ចេកទេសបានចុះទៅកំណត់អត្តសញ្ញាណទីតាំងនោះបន្តទៀត»។
ក្នុងករណីដាច់ដោយឡែកមួយទៀត មន្ត្រីដោះមីននៃមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានរងរបួសដាច់ដៃទាំងពីរ ដោយសារការផ្ទុះសំបកគ្រាប់មិនទាន់ផ្ទុះនៃគ្រាប់កាំភ្លើងធំ ៧៦មម មួយគ្រាប់ កាលពីថ្ងៃសៅរ៍ទី២៩ ខែមិថុនា។
លោក ហេង រតនា អគ្គយកស៊ីម៉ាក់ បានឲ្យដឹងថា ជនរងគ្រោះមានឈ្មោះ លឹម ទូច ដែលជាមន្ត្រីជំនាញគ្រាប់យុទ្ធភណ្ឌមិនទាន់ផ្ទុះរបស់ស៊ីម៉ាក់។ ហេតុការនេះកើតឡើងនៅឃ្លាំងសុវត្ថិភាពនៃទីបញ្ជាការដ្ឋានអង្គភាពស៊ីម៉ាក់ស្ថិតនៅខេត្តត្បូងឃ្មុំ។
លោកថា គិតត្រឹមថ្ងៃទី២ ខែកក្កដានេះ លោក លឹម ទូច ត្រូវបានក្រុមគ្រូទេព្យឯកទេសនៃមន្ទីរពេទ្យខេត្តកំពង់ចាម វះកាត់ព្យាបាលដោយយកចិត្តទុកនិងមានភាពប្រសើរឡើងវិញ ប៉ុន្តែដៃទាំងពីររបស់លោកបានពិការ។
លោក ហេង រតនា សរសេរនៅលើបណ្ដាញសង្គមនៅថ្ងៃនេះថា៖ «អង្គភាពស៊ីម៉ាក់ផ្តល់ការគាំទ្រទាំងស្រុងសម្រាប់ការព្យាបាល ការស្តារលទ្ធភាពកាយសម្បទា បំពាក់ដៃសិប្បនិមិត្ត និងរក្សាការងារសមស្របសម្រាប់លោក លឹម ទូច នៅក្នុងអង្គភាព»។
ក្នុងកិច្ចប្រឹងប្រែងបោសសម្អាតមីននេះដែរ លោកទេសរដ្ឋមន្ត្រី លី ធុជ បានទទួលជួបពិភាក្សាការងារជាមួយ លោក Ueno Atsushi ឯកអគ្គរាជទូតជប៉ុនប្រចាំកម្ពុជា ដោយលោកទាំងពីរបានពិភាក្សាគ្នាអំពីការពង្រឹងកិច្ចសហប្រតិបត្តិការក្នុងវិស័យសកម្មភាពមីន។
លោក លី ធុជ បានថ្លែងអំណរគុណដលរាជរដ្ឋាភិបាល និងប្រជាជនជប៉ុន ដែលបានចូលរួមគាំទ្រយ៉ាងសកម្ម និងផ្តល់កិច្ចសហប្រតិបត្តិការដល់វិស័យសកម្មភាពមីនមនុស្សធម៌នៅកម្ពុជា អស់រយៈពេលជាង៣០ឆ្នាំ មកហើយ ដោយកម្ពុជាបានចាត់ទុកជប៉ុន គឺជាដៃគូដ៏លេចធ្លោ និងយូរអង្វែងមួយ។
អាជ្ញាធរមីន បានបញ្ជាក់ថា៖ «ការចូលរួមរបស់ជប៉ុន ពិតជាបានរួមចំណែកក្នុងការកាត់បន្ថយភាពក្រីក្រ ផ្តល់ដីសុវត្ថិភាព កាត់បន្ថយអត្រាគ្រោះថ្នាក់ដោយសារមីន និងលើកកម្ពស់វិស័យកសិកម្ម ជាដើម»។
លោក លី ធុជ ក៏បានបញ្ជាក់ពីការគាំទ្ររបស់កម្ពុជា សម្រាប់ប្រទេសជប៉ុនក្នុងការធ្វើជាប្រធាននៃកិច្ចប្រជុំរដ្ឋភាគីអនុសញ្ញាអូតាវ៉ាលើកទី២២ នៅឆ្នាំ២០២៥ ខាងមុខ៕
