![](https://pppkhmer.sgp1.digitaloceanspaces.com/image/main/20247/2_7_2024_a_team_of_technical_officers_from_the_tonle_sap_authority_install_a_border_post_in_the_tonle_sap_area_on_june_16_tonle_sap_authority.jpg)
មន្ត្រីបច្ចេកទេសចុះពិនិត្យទីតាំងនិយាមកាបោះបង្គោលព្រំ និងស្ថានភាពព្រៃលិចទឹកក្នុងតំបន់៣ ស្ថិតក្នុងភូមិសាស្រ្តខេត្តបាត់ដំបង កាលពីខែមុន។ អាជ្ញាធរទន្លេសាប
ភ្នំពេញៈ អាជ្ញាធរទន្លេសាបគ្រោងនឹងបញ្ចប់ការបោះបង្គោលព្រំតំបន់៣ក្នុងភូមិសាស្រ្តខេត្តទាំង៦ ជុំវិញបឹងទន្លេសាបនៅចុងខែកញ្ញាខាងមុខនេះ ខណៈពេលដែលបច្ចុប្បន្នការងារបោះបង្គោលនេះសម្រេចបានចំនួន ៤០ភាគរយ នៃចំនួនបង្គោលសរុបចំនួន១ ២២៤បង្គោល។ នេះបើយោងតាមអនុប្រធានក្តាប់រួមនៃអាជ្ញាធរទន្លេសាប លោក ហ៊ែល តូនី។
ការបោះបង្គោលព្រំនេះធ្វើឡើងទៅតាមអនុសាសន៍ណែនាំរបស់លោកនាយករដ្ឋមន្រ្តី ហ៊ុន ម៉ាណែត លើការរៀបចំធ្វើបច្ចុប្បន្នភាពផែនទី និង បោះបង្គោលតំបន់១ តំបន់២ និងតំបន់៣ នៃតំបន់ទន្លេសាប ឱ្យបានត្រឹមត្រូវ និងសុក្រឹតភាពឡើងវិញ ក្នុងការគិតគូរយកចិត្តទុកដាក់ដល់ការថែរក្សា ការពារ និងគ្រប់គ្រងតំបន់ទន្លេសាបប្រកបដោយចីរភាព និងនិរន្តរភាពសម្រាប់បន្តដល់កូនចៅជំនាន់ក្រោយ។
លោក ហ៊ែល តូនី បានបញ្ជាក់ថា៖ «ការបោះបង្គោលមកដល់ពេលនេះបាន ៤០ភាគរយហើយ។ តាមផែនការរបស់យើងគឺចុងខែ ៩ ឱ្យចប់ ១០០ភាគរយតែម្តង។ ចំពោះទំហំតំបន់ ៣ យើងមិនទាន់កំណត់ប៉ុន្មានឱ្យបានច្បាស់លាស់ទេ ព្រោះនៅមានការប្រែប្រួល។ ពេលដែលបោះបង្គោលហើយបានដឹងថា ច្បាស់យ៉ាងម៉េច។ តួលេខពិតប្រាកដមិនទាន់ជាផ្លូវការនៅឡើយទេ ព្រោះអ្វីៗមិនទាន់ចប់»។
លោកបានបន្ថែមថា ចំពោះផែនទីព្រាងក៏ត្រូវបានគូសរួចរាល់ហើយដែរ។
ក្នុងពិធីប្រារព្ធទិវាមច្ឆជាតិលើកទី១៩ នៅខេត្តកំពង់ចាម នាថ្ងៃទី១ កក្កដា លោកនាយករដ្ឋមន្ត្រី ហ៊ុន ម៉ាណែត បានណែនាំឱ្យក្រសួងរៀបចំដែនដី នគរូបនីយកម្ម និងសំណង់ត្រូវដឹកនាំនិងជំរុញការគាំទ្រការចុះបញ្ជីដីរដ្ឋ ឱ្យបានឆាប់រហ័ស ដើម្បីទប់ស្កាត់ និងបង្រ្កាបចលនាទន្រ្ទានកាន់កាប់ដីរដ្ឋ ជាពិសេស តំបន់ជុំវិញបឹងទន្លសាបដែលជាជម្រកត្រីពងកូន ជម្រកត្រី និងជាប្រភពចំណីត្រី។
ប្រមុខរដ្ឋាភិបាលបានលើកឡើងថា កន្លងទៅមានកាប់ទន្រ្ទានមួយចំនួននៅតំបន់ទន្លេសាបនោះ ប៉ុន្តែក៏ត្រូវបាន ចាត់វិធានការជាបន្តបន្ទាប់ផងដែរ។
លោកបានអំពាវនាវឱ្យពលរដ្ឋ អាជ្ញាធរមូលដ្ឋាន កម្លាំងសមត្ថកិច្ចពាក់ព័ន្ធទាំងអស់ចូលរួមទប់ស្កាត់ការកាប់ទន្រ្ទានព្រៃនៅទីនោះ ដែលធ្វើឱ្យប៉ះពាល់ដល់ប្រព័ន្ធអេកូឡូស៊ី និង ប្រព័ន្ធត្រីទឹកសាប។
លោកមានប្រសាសន៍ថា៖ «ការឈូសឆាយទ្រង់ទ្រាយធំ ការប្រើប្រាស់ជីគីមីហួសហេតុ មិនត្រឹមតែធ្វើឱ្យអស់ព្រៃឈើលិចទឹកទេ តែពេលទឹកឡើងជាប្រភពនៃការធ្វើឱ្យត្រីពុលស្លាប់តពូជ។ ចឹងត្រូវហ៊ានអាកាត់ ដើម្បីធ្វើការទប់ស្កាត់ផលប្រយោជន៍របស់មនុស្សមួយចំនួនតូច ដើម្បីការពារផលប្រយោជន៍រួមរបស់ប្រទេសជាតិរបស់យើង»។
រដ្ឋាភិបាលបានប្តេជ្ញាចិត្តការពារតំបន់ទន្លេសាប ហើយនាពេលខាងមុខនេះ ក៏នឹងមានដាក់ចេញវិធានការផ្សេងៗជាច្រើនទៀតផងដែរ។
លោកនាយករដ្ឋមន្រ្តីបានថ្លែងដូច្នេះថា៖«កុំស្រមើស្រម៉ៃថា រដ្ឋាភិបាលធ្វើតែពេលនេះហើយដកថយ ទុកលំហឱ្យធ្វើសកម្មភាពផ្តេសផ្តាស។ អត់ទេ។ យើងនៅតែបន្តធ្វើ បន្តថែរក្សា ដរាបណាបឹងទន្លេសាបនៅតែជាជម្រកត្រីពង នៅតែជាតំបន់ដែលត្រូវការពារ ដើម្បីប្រយោជន៍ពលរដ្ឋទូទាំងប្រទេស។ រដ្ឋាភិបាលត្រូវមានកាតព្វកិច្ចដាច់ខាតដើម្បីការពារតំបន់នេះ»។
ក្រៅពីនោះ លោកក៏បានអំពាវនាវដល់សាធារណជនបន្តចូលរួមដាំដើមឈើឡើងវិញជាប្រចាំនៅតំបន់ទន្លេសាបផងដែរ។
តំបន់បឹងទន្លេសាប ត្រូវបានបែងចែកជា ៣ តំបន់។ ក្នុងនោះរួមមានតំបន់១ ជាតំបន់លំនៅដ្ឋាន ឬភូមិករ និងជាតំបន់បង្កបង្កើនផលរបស់ប្រជាពលរដ្ឋ ដែលទទួលបានសិទ្ធិកាន់កាប់ស្របច្បាប់ (ប័ណ្ណកម្មសិទ្ធិ)។ តំបន់២ ជាតំបន់ប្រើប្រាស់អាស្រ័យផល ស្រូវឡើងទឹកនិងប្រដេញទឹក និងក៏ជាតំបន់ទ្រនាប់ការពារ និងតំបន់៣ តំបន់ព្រៃលិចទឹក ហាមប៉ះពាល់ដាច់ខាត និងត្រូវការពារឱ្យខានតែបាន៕