មូលនិធិគន្ធបុប្ផាកម្ពុជាបើកយុទ្ធនាការ «១ម៉ឺនរៀល ១ម៉ឺននាក់» រយៈពេល៣០ថ្ងៃក្នុង១ខែមិថុនា ដើម្បីជួយដល់ជីវិតទារក និងកុមារកម្ពុជា។ ហ្វេសប៊ុកមូលនិធិគន្ធបុប្ផាកម្ពុជា
ភ្នំពេញៈ មូលនិធិគន្ធបុប្ផាកម្ពុជាទទួលបានថវិកាបរិច្ចាគចំនួនជាង ៣,៣ លានដុល្លារអាមេរិក ពីសប្បុរសជនក្នុងយុទ្ធនាការ «១ម៉ឺនរៀល ១ម៉ឺននាក់» ក្នុងរយៈពេល៣០ថ្ងៃក្នុងខែមិថុនា ដើម្បីជួយដល់ជីវិតទារក និងកុមារកម្ពុជាតាមរយៈការទទួលបានសេវាសុខាភិបាលនៅមន្ទីរពេទ្យគន្ធបុប្ផាដោយឥតគិតថ្លៃ។
លោកស្រី ពេជ ចន្ទមុន្នី ប្រធានកិត្តិយសនៃមូលនិធិគន្ធបុប្ផាកម្ពុជា បានសរសេរនៅក្នុងបណ្ដាញសង្គមនាថ្ងៃទី១ កក្កដា ថា យុទ្ធនាការនេះទទួលបាន «លទ្ធផលគួរជាទីមោទកៈ ទាំងទិដ្ឋភាពថវិកា និងចំនួនសប្បុរសជន ពោលគឺមានការចូលរួមបរិច្ចាគគាំទ្រយុទ្ធនាការដ៏មានសារៈសំខាន់នេះ ចំនួនជាង២៤ ម៉ឺននាក់ ជាមួយនឹងការបរិច្ចាគសរុបសមមូលជាប្រាក់ដុល្លារអាមេរិកចំនួនជាង៣,៣លានដុល្លារ»។
លោកស្រីបញ្ជាក់ថា បើធៀបនឹងយុទ្ធនាការនេះចំនួន២លើកកន្លងមកគឺក្នុងឆ្នាំ២០២២ និងឆ្នាំ២០២៣ យុទ្ធនាការឆ្នាំ២០២៤ នេះ ទទួលបានការចូលរួមកាន់តែផុលផុសពីសប្បុរសជននៅតាមបណ្ដាក្រសួង ស្ថាប័ន រាជធានី-ខេត្ត ក្រុមហ៊ុន សហគ្រាសទាំងតូចទាំងធំ ទាំងនៅរាជធានីភ្នំពេញ និងនៅតាមបណ្ដាខេត្តនានា។
លោកស្រី ពេជ ចន្ទមុន្នី លើកឡើងថា៖ «នេះឆ្លុះបញ្ចាំងពីចលនាជាតិដ៏សំខាន់មួយក្នុងស្មារតីខ្មែរជួយខ្មែរ ដើម្បីរួមគ្នានាំក្តីសង្ឃឹម និងភាពញញឹមដល់ទារក និងកុមារដែលជាអនាគតដ៏ភ្លឺស្វាងរបស់កម្ពុជា»។
មូលនិធិគន្ធបុប្ផាកម្ពុជា បានរៀបចំយុទ្ធនាការនេះឡើងដើម្បីចូលរួមអបអរសាទរទិវាកុមារអន្តរជាតិ ១មិថុនា និងរំឭក និងបំផុសចលនាកៀរគរការបរិច្ចាគក្នុងស្មារតី «ខ្មែរជួយខ្មែរ» ពីសប្បុរសជនទាំងក្នុង និងក្រៅប្រទេស ដើម្បីរួមគ្នាជាមួយមូលនិធិនេះក្នុងការផ្ដល់ក្តីសង្ឃឹម និងភាពញញឹមដល់ទារក និងកុមារនៅកម្ពុជា។
លោកស្រី ពេជ ចន្ទមុន្នី លើកឡើងថា ទោះបីជាយុទ្ធនាការនេះត្រូវបានបិទបញ្ចប់ក៏ដោយ មូលនិធិនេះនៅតែបន្តបេសកកម្មកៀរគរការបរិច្ចាគជាប្រចាំ ពីព្រោះមន្ទីរពេទ្យគន្ធបុប្ផាត្រូវការថវិកាចំណាយចំនួនប្រមាណ ១២ម៉ឺនដុល្លារក្នុង១ថ្ងៃៗ ឬស្មើនឹងប្រមាណ ៤៣លានដុល្លារ ក្នុង១ឆ្នាំៗ ដើម្បីរក្សានិរន្តរភាពនៃកិច្ចដំណើរការក្នុងបេសកកម្មផ្ដល់ការពិនិត្យ និងព្យាបាលជំងឺដល់ទារក និងកុមារ ព្រមទាំងស្ត្រីមានផ្ទៃពោះរាប់លានករណីក្នុង១ឆ្នាំៗ ប្រកបដោយគុណភាព ឥតគិតថ្លៃ និងមិនមានការរើសអើង។
លោកស្រីសរសេរថា៖ «ក្នុងន័យនេះ ខ្ញុំសូមលើកទឹកចិត្តពុក ម៉ែ បងប្អូន និងជនរួមជាតិទាំងអស់ បន្តនូវទឹកចិត្តសប្បុរស និងវប្បធម៌ចែករំលែកដ៏ថ្លៃថ្លានេះ ដើម្បីក្ដីសង្ឃឹម និងភាពញញឹមរបស់ទារក និងកុមារនៅកម្ពុជា»។
របាយការណ៍មូលនិធិគន្ធបុប្ផាកម្ពុជាបានឱ្យដឹងថា នៅក្នុងឆ្នាំ២០២៣ មន្ទីរពេទ្យគន្ធបុប្ផាបានពិនិត្យ និងព្យាបាលកុមារប្រមាណជិត៩សែននាក់។
របាយការណ៍បានឱ្យដឹងទៀតថា ក្នុងរយៈពេលប្រមាណ៣១ឆ្នាំកន្លងមកនេះ ចាប់តាំងពីដំណើរការឡើងវិញក្នុងឆ្នាំ ១៩៩២ រហូតដល់ដំណាច់ឆ្នាំ២០២៣ មន្ទីរពេទ្យគន្ធបុប្ផាបានទទួលការពិនិត្យ និងព្យាបាលនៅផ្នែកពិគ្រោះជំងឺក្រៅដល់ទារក និងកុមារ ព្រមទាំងស្ត្រីមានផ្ទៃពោះចំនួនប្រមាណ ២៨ លានករណី ខណៈកុមារសម្រាកព្យាបាលដែលមានសភាពធ្ងន់ធ្ងរមានប្រមាណ ២,៦ លាននាក់ និងបានទទួលការវះកាត់ជំងឺបេះដូងចំហពីកំណើតចំនួនប្រមាណ ៨ពាន់ករណី៕
