មន្រ្តីជំនាញកសិកម្មបាននឹងកំពុងតែចុះពិនិត្យស្ថានភាព នៃការផ្ទុះរាលដាលរុយស ស៊ីបំផ្លាញដំណាំស្រូវ និងបាននាំយកថ្នាំមួយចំនួន ដើម្បីជួយអន្តរាគមន៍បាញ់សម្លាប់រុយសនេះផងដែរ។ ក្រសួងកសិកម្ម
ព្រៃវែងៈ ស្រូវរាប់ពាន់ហិកតាក្នុងស្រុកមួយចំនួនក្នុងខេត្ត ព្រៃវែង ប្រឈមនឹងការខូចខាត ខណៈពេលដែលសត្វរុយស កំពុងតែស៊ីបំផ្លាញ ក្រោយពេលមានការផ្ទុះរាលដាលនៃសត្វរុយសនេះនាពេលថ្មីៗនេះ។
ការបំផ្លាញស្រូវដោយសត្វរុយស នេះបានកើតឡើងប្រមាណជា ២ សប្តាហ៍មកហើយ ប៉ុន្តែដំបូងឡើយប្រជាកសិករមិនសូវចាប់អារម្មណ៍រហូតដល់សត្វល្អិតចង្រៃនេះវាយលុកកាន់តែច្រើននៅក្នុងសប្តាហ៍នេះ។ នេះបើយោងតាមមន្រ្តីកសិកម្មឃុំ ក្នុងស្រុក ស្រុកព្រះស្តេច លោកញ៉ ឃុយ។
លោកបញ្ជាក់ថា៖ «មិនទាន់មានការថមថយទេមកដល់ពេលនេះ ដោយសារតែសត្វហ្នឹងពិបាកកម្ចាត់វា។ ក្នុងមួយឃុំសត្វនេះកំពុងតែវាយលុកចន្លោះពី ៥០០ ទៅ ៦០០ហិកតា។ បើសរុបមួយស្រុកតែម្តងប្រហែលជា ៦ពាន់ហិកតា»។
លោកបានធ្វើការប៉ាន់ស្មានថា ស្រូវដែលកំពុងតែត្រូវបានវាយលុកខ្លាំងនោះ ៥០ភាគរយអាចបណ្តាលឱ្យខូច។ លោកបានពន្យល់ថា ប្រភេទរុយសនេះ វាជញ្ជក់យកសារធាតុចិញ្ចឹមពីដើមស្រូវ ដែលធ្វើឱ្យស្រូវបាត់បង់សារធាតុចិញ្ចឹម និងធ្វើរស្មីសំយោគមិនបាន ហើយស្រូវឡើងពណ៌ក្រហម រាងស្រទាបចេក និងលឿង និងចាប់ផ្តើមក្រិន។ បើស្រូវកំពុងតែផើម វាគាបមិនឱ្យស្រូវចេញរួច ឬស្រូវចេញមកក្តៀន។ សត្វរុយប្រភេទនេះវាបំផ្លាញខ្លាំងនៅអំឡុងពេលស្រូវស្រណាប និងស្រូវកំពុងតែធ្វើខ្លួនមុននឹងផើម។ ប៉ុន្តែពេលស្រូវចេញរួចផុតហើយ វាលេងបំផ្លាញទៀតហើយ។
លោកបានឱ្យដឹងថា វិធីការពារចម្បងបឋមនាពេលបច្ចុប្បនេះ គឺមានតែបាញ់ថ្នាំប៉ុណ្ណោះ ហើយបើស្រូវក្រាសបាញ់មិនសូវមានប្រសិទ្ធភាពទេ ដោយសារតែថ្នាំមិនសូវត្រូវសត្វរុយ។ កសិករត្រូវបានណែនាំឱ្យប្រើប្រាស់ថ្នាំឆ្លាស់គ្នាពី២ ទៅ ៣ មុខបញ្ជូលគ្នា ហើយស្រែដែលនៅជាប់គ្នា ត្រូវសហការគ្នាបាញ់ក្នុងពេលតែមួយ ទើបមានប្រសិទ្ធភាពខ្ពស់ ព្រោះវាហើរទៅណាមិនរួច។
លោកនិយាយដូច្នេះថា៖«ពេលបាញ់ទៅ វារាងថយបរិមាណវាដែរ តែមិនអាចកម្ចាត់វាអស់ទេ។ បាញ់ហើយងាប់បានប្រហែលជា ២០ ទៅ ៣០ ភាគរយទេ។ លុះត្រាតែកសិករបាញ់ច្រើនដង គឺបាញ់ ៤ ទៅ ៥ ថ្ងៃម្តងទើបទប់ជាប់ រហូតស្រូវចេញ ទើបលែងអី»។ ក្រៅពីនោះ កសិករក៏ត្រូវប្រើជីបំប៉នបន្ថែម ដើម្បីឱ្យស្រូវមានកំលាំងឡើងវិញ ដែលត្រូវចំណាយថវិកាច្រើន។ ប៉ុន្តែអាចបានផលស្រូវមកវិញខ្លះ។ ក្នុងករណីមិនបាញ់ថ្នាំសោះ នោះវានឹងបាត់បង់ផលទាំងស្រុងតែម្តង។
លោកថា៖«វាជាការព្រួយបារម្ភមួយដែរ ព្រោះទំហំនៃការបំផ្លាញវាធំដែរ ហើយយើងមិនទាន់មានវិធីណាកម្ចាត់វាឱ្យបាត់ទាំងស្រុងតែម្តង។ បានត្រឹមតែមួយទប់ៗវាទេ។ កសិករទើបតែជួបបញ្ហានេះនៅឆ្នាំនេះទេ បើធ្លាប់មានសត្វរុយនេះកន្លងមក អាចទប់ទល់បាន តែនេះថ្មីសម្រាប់គាត់»។
លោកបានឱ្យដឹងថា បញ្ហាសត្វរុយសបំផ្លាញស្រូវនេះ ដំបូងឡើយកើតមាននៅប្រទេសវៀតណាម ហើយក្រោយមកក៏ឃើញមានវត្តមានសត្វប្រភេទនេះនៅកម្ពុជាផងដែរ ពិសេសគឺខេត្តជាប់ព្រំដែនជាមួយនឹងប្រទេសវៀតណាម។ ស្រុកមួយចំនួនផ្សេងទៀតក្នុងខេត្តព្រៃវែងនេះក៏កើតមានបញ្ហាសត្វរុយសបំផ្លាញនេះដែរ។
លោក អ៊ុក សំណាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែងមិនអាចទាក់ទងសុំអត្ថាធិប្បាយបានទេ។
មន្រ្តីជំនាញកសិកម្មបាននឹងកំពុងតែចុះពិនិត្យស្ថានភាព នៃការផ្ទុះរាលដាលរុយស ស៊ីបំផ្លាញដំណាំស្រូវ និងបាននាំយកថ្នាំមួយចំនួន ដើម្បីជួយអន្តរាគមន៍បាញ់សម្លាប់រុយសនេះផងដែរ។
ក្រុមការងារនៃអគ្គនាយកដ្ឋានកសិកម្ម ដឹកនាំដោយ លោក គង់ គា ប្រធាននាយកដ្ឋានដំណាំស្រូវ និងមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង បានបន្តចុះពិនិត្យស្ថានភាព នៃការផ្ទុះរាលដាលរុយស ស៊ីបំផ្លាញដំណាំស្រូវនេះ នៅឃុំល្វា ស្រុកព្រះស្តេច នៅថ្ងៃទី១ ខែកក្កដានេះ។
ក្រសួងកសិកម្មបានឱ្យដឹងថា៖«តាមរយៈការចុះពិនិត្យស្រែឃើញថា ការបំផ្លាញមានសភាពធ្ងន់ធ្ងរ និងរាលដាលកាន់តែខ្លាំងនៅតាមឃុំផ្សេងៗទៀត»។
ខណៈពេលជួបជាមួយកសិករនៅឃុំល្វានោះ លោកប្រធាននាយកដ្ឋានបានប្រាប់កសិករអំពីប្រវត្តិនៃការបំផ្លាញ លក្ខខណ្ឌនៃការកកើត និងការបំផ្លាញរបស់រុយស។ លើសពីនោះក៏បានណែនាំអំពីវិធីសាស្ត្រផ្សេងៗក្នុងការការពារ និងកម្ចាត់ រួមទាំបច្ចេកទេសនៃការប្រើប្រាស់ថ្នាំកសិកម្មឱ្យមានប្រសិទ្ធភាព និងសុវត្ថិភាពផងដែរ។ កសិករត្រូវបានណែនាំឱ្យកសិករបាញ់កម្ចាត់សត្វរុយសនៅពេលព្រឹក និងពេលល្ងាចជាដើម។
លោក គង់ គា ក៏បានណែនាំឱ្យមន្ទីរកសិកម្មខេត្ត ជាពិសេស មន្ត្រីកសិកម្មឃុំ និង អាជ្ញាធរមូលដ្ឋានចុះវាយតម្លៃផលប៉ះពាល់ និងធ្វើរបាយការណ៍បូកសរុបជូនអគ្គនាយកដ្ឋានកសិកម្ម និង ក្រសួងកសិកម្ម ដើម្បីចាត់វិធានការអន្តរាគមន៍ឱ្យបានទាន់ពេលវេលា។ ក្រុមការងារនឹងបន្តស្នាក់នៅក្នុងខេត្តព្រៃវែង ដើម្បីចូលរួមវាយតម្លៃ និងចុះអន្តរាគមន៍ជាមួយគ្នា។ នេះបើយោងតាមក្រសួងកសិកម្ម៕
