![](https://pppkhmer.sgp1.digitaloceanspaces.com/image/main/20247/23_7_2024_vongsey_visoth.jpg)
លោក វង្សី វិស្សុត ឧបនាយករដ្ឋមន្ត្រីប្រចាំការ និងជារដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រីថ្លែងក្នុងសិក្ខាសាលាពិគ្រោះយោបល់ស្ដីពីសេចក្ដីព្រាងក្របខ័ណ្ឌតាមដាន ត្រួតពិនិត្យ និងវាយតម្លៃនៃការអនុវត្តយុទ្ធសាស្ត្របញ្ចកោណដំណាក់កាលទី១។ រី សុចាន់
ភ្នំពេញ៖ លោក វង្សី វិស្សុត ឧបនាយករដ្ឋមន្ត្រីប្រចាំការ និងជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីបានជំរុញដល់ក្រសួង ស្ថាប័នឱ្យបង្កើនការយកចិត្តទុកដាក់បន្ថែមលើកិច្ចការតាមដាន ត្រួតពិនិត្យ និងវាយតម្លៃ ដើម្បីធ្វើឱ្យប្រសើរឡើង និងធ្វើឱ្យមានភាពប្រាកដនិយមក្នុងការរៀបចំ និងអនុវត្ដគោលនយោបាយ យុទ្ធសាស្រ្ដ និងផែនការអភិវឌ្ឍន៍របស់រាជរដ្ឋាភិបាល។
លោកបានចាត់ទុកការតាមដាន ត្រួតពិនិត្យ និងវាយតម្លៃជាយន្តការតម្រង់ទិសក្នុងការឆ្លើយតបទាន់ពេលចំពោះតម្រូវការអភិវឌ្ឍសង្គម-សេដ្ឋកិច្ច ការប្រែប្រួលនៃពិភពលោក និងប្រទេសជាតិ និងសម្រេចសមិទ្ធផលថ្មីៗជូនប្រទេសកម្ពុជាប្រកបដោយប្រសិទ្ធភាព។
លោកថ្លែងដូច្នេះក្នុងសិក្ខាសាលាពិគ្រោះយោបល់ចុងក្រោយកម្រិតថ្នាក់ដឹកនាំស្ដីពី «សេចក្ដីព្រាងក្របខ័ណ្ឌតាមដាន ត្រួតពិនិត្យ និងវាយតម្លៃការអនុវត្តយុទ្ធសាស្ត្របញ្ចកោណ ដំណាក់កាលទី១» នាថ្ងៃទី២២ ខែកក្កដា នៅរាជធានីភ្នំពេញ។
សិក្ខាសាលានេះមានគោលបំណងពិភាក្សា ផ្លាស់ប្ដូរយោបល់ និងប្រមូលធាតុចូលចុងក្រោយពីថា្នក់ដឹកនាំក្រសួង ស្ថាប័នពាក់ព័ន្ធ និងដៃគូអភិវឌ្ឍន៍ដើម្បីធានាឱ្យសេចក្ដីព្រាងឯកសារក្របខ័ណ្ឌនេះ មានខ្លឹមសារគ្រប់ជ្រុងជ្រោយ មានគុណភាព និងអាចអនុវត្ដបាន។
លោករដ្ឋមន្ត្រីថ្លែងថា ការរៀបចំយន្តការនេះគឺជាដំណាក់កាលសំខាន់នៃវដ្ដនៃការរៀបចំគោលនយោបាយរបស់រាជរដ្ឋាភិបាល ដោយលោកបានដកស្រង់សំដីលោកនាយករដ្ឋមន្ត្រី ហ៊ុន ម៉ាណែត ថា «ធ្វើអ្វីក៏ដោយបើគ្មានការតាមដាន គឺអត់ជោគជ័យនោះទេ»។
លោក វង្សី វិស្សុត ដែលជាប្រធានគណៈកម្មាធិការតាមដាន ត្រួតពិនិត្យ និងវាយតម្លៃការអនុវត្ដយុទ្ធសាស្ត្របញ្ចកោណ ដំណាក់កាលទី១ (គ.យ.ប.) បញ្ជាក់ថា ការរៀបចំយន្តការនេះនឹងត្រូវធ្វើឡើងឱ្យមានសង្គតិភាពពីលើដល់ក្រោម រវាងយុទ្ធសាស្ត្របញ្ចកោណដំណាក់កាលទី១, ផែនការយុទ្ធសាស្ត្រអភិវឌ្ឍន៍ជាតិឆ្នាំ២០២៤-២០២៨ និងយុទ្ធសាស្ត្រអភិវឌ្ឍន៍តាមវិស័យ។
យុទ្ធសាស្ត្របញ្ចកោណមានរយៈពេលវេលា២៥ឆ្នាំ ហើយត្រូវបែងចែកជា៥ដំណាក់កាល ដោយ១ដំណាក់កាលមានរយៈពេល៥ឆ្នាំ។
កាលពីខែសីហា ឆ្នាំ២០២៣ រាជរដ្ឋាភិបាលបានដាក់ចេញយុទ្ធសាស្ត្របញ្ចកោណ ដំណាក់កាលទី១ ដែលមានរយៈពេល៥ឆ្នាំពីឆ្នាំ២០២៣ ដល់ឆ្នាំ២០២៨ ដែលមានគោលដៅរក្សាឱ្យបាននូវសុខសន្ដិភាព និងការអភិវឌ្ឍដោយមានការបែងចែកប្រយោជន៍នៃកំណើនសេដ្ឋកិច្ចជូនប្រជាពលរដ្ឋ
សេចក្តីប្រកាសព័ត៌មាន គ.យ.ប. បានបញ្ជាក់នាថ្ងៃទី២៣ កក្កដា ថា៖ «គ.យ.ប. បានទទួលមតិយោបល់ និងធាតុចូលយ៉ាងច្រើន ពីថា្នក់ដឹកនាំក្រសួង ស្ថាប័ន និងដៃគូអភិវឌ្ឍន៍ សម្រាប់កែលម្អ និងធ្វើឱ្យប្រសើរឡើងនូវសេចក្តីព្រាងក្របខ័ណ្ឌនេះ ឱ្យកាន់តែមានគុណភាព និងប្រសិទ្ធភាពនៃការអនុវត្ដ មុននឹងដាក់ឆ្លងគណៈរដ្ឋមន្ត្រីនៅពេលខាងមុខ»។
សិក្ខាសាលានេះមានការចូលរួមពីលោក ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស, លោក ប៊ិន ត្រឈៃ រដ្ឋមន្ត្រីក្រសួងផែនការ, លោក ហែម វណ្ឌឌី រដ្ឋមន្ត្រីក្រសួងឧស្សាហកម្ម សិប្បកម្ម និង នវានុវត្តន៍, រដ្ឋមន្ត្រីប្រតិភូអមនាយករដ្ឋមន្ត្រី, ថ្នាក់ដឹកនាំ និងមន្ត្រីជាន់ខ្ពស់នៃក្រសួង ស្ថាប័នពាក់ព័ន្ធ, មន្រ្ដីជាន់ខ្ពស់នៃអគ្គលេខាធិការដ្ឋាន គ.យ.ប., ដៃគូអភិវឌ្ឍន៍, និងអ្នកសារព័ត៌មាន សរុបប្រមាណជាង ៣០០នាក់៕