លោកស្រីពេជ ចន្ទមុនី (ឆ្វេង) និងកូនប្រុស ហ៊ុន ពេជមុនីរិទ្ធិសិទ្ធិ ដែលទទួលបានមេដាយប្រាក់ចំណាត់ថ្នាក់លេខ១ ក្នុងសាលានិងប្រចាំប្រទេស និងទី១៧ ទូទាំងពិភពលោក និងលោកស្រីជា សំរេច (ស្តាំ)និងកូនស្រីសេងសំរេច សិរីរ័ត្ន ដែលទទួលបានមេដាយចំនួន២ ផងដែរ។ រូបថតសហការី
ភ្នំពេញ៖ សិស្សានុសិស្សកម្ពុជាបានបង្ហាញសមត្ថភាពផ្នែកគណិតវិទ្យាដោយដណ្តើមបានមេដាយសរុបចំនួន ៧៩ លើការប្រកួតគណិតវិទ្យាអូឡាំព្យាដ សិង្ហបុរី-អាស៊ី អន្តរជាតិ (SIMOC) ២០២៤ ដែលបានប្រព្រឹត្តទៅចាប់ពីថ្ងៃទី ២០ ដល់ថ្ងៃទី ២៤ ខែកក្កដា។
ការទទួលបានដ៏គួរឱ្យចាប់អារម្មណ៍របស់ពួកគេរួមមាន មេដាយមាសចំនួន ១១ ប្រាក់ ២១ និងមេដាយសំរឹទ្ធចំនួន ៣៣ រួមជាមួយមេដាយកិត្តិយសចំនួន ១៤ ដែលបង្ហាញពីទេពកោសល្យ និងភាពឆ្លាតវៃដ៏ពិសេសរបស់ពួកគេ។
ក្នុងវិញ្ញាសារ Math Olympiad សិស្សានុសិស្សកម្ពុជាទទួលបានមេដាយមាសចំនួន ៣ ប្រាក់ ៨ មេដាយសំរឹទ្ធ ១៧ និងមេដាយកិត្តិយសចំនួន ១៤ ពីថ្នាក់ទី១ ដល់ទី ១២។
នៅក្នុងការប្រកួត Math Warriors & Math Master Mind ពួកគេបន្តធ្វើបានល្អដោយឈ្នះមេដាយមាស ៤ ប្រាក់ ៨ និងសំរឹទ្ធ ៤ លើផ្នែក Lower Division មាស ២ ប្រាក់ ៣ និងសំរឹទ្ធ ៧ លើផ្នែក Middle Division និងមេដាយមាស ២ មេដាយប្រាក់ ២ និងមេដាយសំរឹទ្ធ៥គ្រឿង នៅផ្នែក Upper Division។
ការប្រកួតប្រជែងសមត្ថភាពផ្នែកគណិតវិទ្យានេះមានការចូលរួមពីបេក្ខភាពចំនួន ៣០ ប្រទេស រួមមាន អាស៊ែបៃហ្សង់ តួកគី ឥណ្ឌូនេស៊ី ឥណ្ឌា ឡាវ ម៉ិកស៊ិក ម៉ុងហ្គោលី នូវែលសេឡង់ ប៉ាគីស្ថាន ម៉ាឡេស៊ី ហ្ស៊កដានី នូវែលសេឡង់ មីយ៉ាន់ម៉ា កាហ្សាក់ស្ថាន នីហ្សេរីយ៉ា ហ្វីលីពីន ហ្គាណា ថៃ អ៊ូសបេគីស្ថាន ប្រេស៊ីល អ៊ីរ៉ង់ ជប៉ុន អារ៉ាប់រួម ឌូបៃ កៀហ្ស៊ីស៊ីស្ថាន ចិន កាណាដា វៀតណាម កម្ពុជា ម៉ូរីស និងស្រីលង្កា។
ក្នុងចំណោមបេក្ខជនទាំង ២៣០០នាក់ មានបេក្ខជនកម្ពុជាចំនួន ១១៩នាក់ មកពីគ្រឹះស្ថានសិក្សាចំនួន ៤១ គឺគ្រឹះស្ថានសិក្សារដ្ឋចំនួន ៣ និងឯកជនចំនួន ៣៨ សាលា មកពីរាជធានីភ្នំពេញ និងបណ្តាខេត្តនានា។
បេក្ខជនកម្ពុជាទាំង១១៩នាក់នេះ ត្រូវបានដឹកនាំទៅប្រកួតនៅប្រទេសសិង្ហបុរី ដោយមជ្ឈមណ្ឌលដឺប្រ៊េននីអេកហ្វេកធើរី (The Brainiac Factory) រួមជាមួយនឹងលោកគ្រូអ្នកគ្រូតំណាងសាលាចំនួន ១១នាក់។
លោក យ៉ែម សុភ័ណ្ឌ ប្រធានមជ្ឈមណ្ឌល ដឺ ប្រ៊េននីអេក ហ្វេកធើរី បានឱ្យដឹងថា៖ «បេក្ខជនដែលអាចចូលរួមប្រកួតនេះបានគឺត្រូវជាបេក្ខជនជយលាភីមេដាយមាស ឬប្រាក់ ឬសំរឹទ្ធ លើការប្រកួតក្នុងស្រុកសិនដែលរួមមានការប្រកួតគណិតវិទ្យាសិង្ហបុរីអាស៊ីអន្តរជាតិ(SASMO) និងការប្រកួតគណិតវិទ្យាអាមេរិកាំង (AMO)»។
កុមារា ហ៊ុន ពេជមុនីរិទ្ធិសិទ្ធិ ថតជាមួយបេក្ខជនចូលរួមប្រកួតមកពីប្រទេសចិន។ រូបថត SHS
ការប្រកួតគណិតវិទ្យាអូឡាំព្យាដ សិង្ហបុរី-អាស៊ី អន្តរជាតិ (SIMOC) គឺជាការប្រកួតប្រជែងប្រចាំឆ្នាំដ៏ល្បីល្បាញមួយដែលប្រមូលផ្តុំអ្នកចូលចិត្តគណិតវិទ្យាវ័យក្មេងមកពីជុំវិញពិភពលោក។
គោលបំណងដើម្បីបណ្តុះ និងលើកកម្ពស់ទេពកោសល្យគណិតវិទ្យា SIMOC ផ្តល់នូវវេទិកាសកលសម្រាប់សិស្សានុសិស្សដើម្បីបង្ហាញពីជំនាញរបស់ពួកគេ និងចូលរួមជាមួយមិត្តភក្តិក្នុងស្មារតីនៃការប្រកួតប្រជែងមិត្តភាព។
លោក សុភ័ណ្ឌ បាននិយាយថា៖ «ការប្រកួតជាក្រុមតម្រូវឱ្យបេក្ខជនកម្ពុជាដោះស្រាយវិញ្ញាសារជាក្រុមដែលមានសមាជិក ៥ នាក់មកពីបណ្តាប្រទេសខុសៗគ្នា។ បេក្ខជនអាចប្រើប្រាស់និងអភិវឌ្ឍ ជំនាញប្រាស្រ័យទាក់ទងគ្នា ជំនាញធ្វើការជាក្រុម កិច្ចសហប្រតិបត្តិការ និងជំនាញភាពជាអ្នកដឹកនាំ ក្នុងការប្រកួតជាក្រុមបែបនេះ ដែលសុទ្ធសឹងជាជំនាញសតវត្សរ៍ទី២១»។
លោកបានឱ្យដឹងថា ការប្រកួត SIMOC មាន ៣ វិញ្ញាសារ រួមមាន វិញ្ញាសារគណិតវិទ្យា ប្រកួតជាឯកទត្តជន Math Olympiad (MO) វិញ្ញាសារល្បែងគិតលេខ ប្រកួតជាក្រុម Math Warrior (MW) and Math Master Mind (MMM) និងវិញ្ញាសារល្បែងប្រាជ្ញា ប្រកួតជាក្រុម Mind Sport (MS)។
វិញ្ញាសារទាំង ៣ មានមេដាយរៀងៗខ្លួន ដែលបេក្ខជនអាចទទួលបានមេដាយចំនួន ៣ក្នុងការប្រកួតទាំង៣ វិញ្ញាសារនេះ។ បេក្ខជនដែលទទួលបានលទ្ធផលល្អទាំងបីវិញ្ញាសារ អាចនឹងទទួលបានរង្វាន់ជាពាន បន្ថែមទៀត ដែលរួមមាន Overall Champion, 1st Runner-up និង 2nd Runner-up។
លោក សុភ័ណ្ឌ បានបន្ដថា៖ «ក្នុងចំណោមបេក្ខជនកម្ពុជាទាំង ១១៩នាក់ ក៏មានកូនប្រុសរបស់សម្ដេចមហាបវរធិបតី ហ៊ុន ម៉ាណែត ចូលរួមប្រកួតផងដែរ គឺប្អូនប្រុស ហ៊ុន ពេជមុនីរិទ្ធិសិទ្ធិ ដែលប្អូនធ្លាប់ទទួលបានមេដាយមាសក្នុងការប្រកួតគណិតវិទ្យាសិង្ហបុរីអាស៊ីអន្តរជាតិ (SASMO) ២០២៤ កម្រិតថ្នាក់ទី១»។
កុមារា ហ៊ុន ពេជមុនីរិទ្ធិសិទ្ធិ ជាសិស្សថ្នាក់ទី ១ នៃសាលាអន្តរជាតិភ្នំពេញ ទទួលបានមេដាយប្រាក់ ចំណាត់ថ្នាក់លេខ១ ក្នុងសាលា និងប្រចាំប្រទេស និងទី ១៧ ទូទាំងពិភពលោក។
កុមារា ហ៊ុន ពេជមុនីរិទ្ធិសិទ្ធិ ជាសិស្សថ្នាក់ទី ១ នៃសាលាអន្តរជាតិភ្នំពេញ ទទួលបានមេដាយប្រាក់ ចំណាត់ថ្នាក់លេខ១ ក្នុងសាលា និងប្រចាំប្រទេស និងទី ១៧ ទូទាំងពិភពលោក។ រូបថត SHS
លោក ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានសរសេរនៅលើបណ្ដាញសង្គមថា «ចៅ រិទ្ធិសិទ្ធិ ប្រឡងនៅសិង្ហបុរីបានមេដាយប្រាក់មួយ និងសំរឹទ្ធមួយ។ ខុសពីនៅឌូបៃដែលចៅសិទ្ធិរៀននៅមតេយ្យតែត្រូវប្រឡង ជាមួយសិស្សថ្នាក់ទី១។ លើកនេះ ចៅសិទ្ធិ ត្រូវប្រឡងជាមួយសិស្សដែលមានកម្រិតខ្ពស់ជាង»។
កុមារី សេងសំរេច សិរីរ័ត្ន សិស្សថ្នាក់ទី ២ នៃសាលាអន្តរជាតិ អាយ.ស៊ី.អេស ក៏ទទួលបានមេដាយចំនួន ២ ផងដែរ ដែលបង្ហាញពីទេពកោសល្យកំពុងរីកចម្រើនរបស់កម្ពុជាក្នុងផ្នែកគណិតវិទ្យា។
លោក Henry Ong ប្រធាន SIMCC បានលើកឡើងពីអត្ថប្រយោជន៍នៃការចូលរួមក្នុង SIMOC ដោយលើកឡើងថា៖ «វាផ្តល់ឱកាសសម្រាប់សិស្សានុសិស្សក្នុងការប្រាស្រ័យទាក់ទងជាមួយមិត្តភក្តិដែលមានទេពកោសល្យមកពីជុំវិញពិភពលោក ផ្លាស់ប្តូរចំណេះដឹង និងពង្រីកទស្សនៈរបស់ពួកគេ»។
លោក Ong បានសរសេរនៅក្នុងលិខិតអញ្ជើញថា៖ «លើសពីនេះ វាជួយពង្រឹងជំនាញដោះស្រាយបញ្ហា សមត្ថភាពគិតប្រកបដោយការរិះគន់ និងចំណេះដឹងគណិតវិទ្យា ជាទ្រព្យសម្បត្តិដ៏មានតម្លៃក្នុងដំណើរសិក្សារបស់ពួកគេ»។
លោកស្រី ជា សំរេច ដែលអមដំណើរកូនស្រីទៅចូលរួមប្រកួតប្រជែងគណិតវិទ្យានៅប្រទេសសិង្ហបុរី បានឱ្យដឹងថា កុមារី សេងសំរេច សិរីរ័ត្ន អាយុ៨ឆ្នាំ រៀនថ្នាក់ទី២ ទទួលបានមេដាយប្រាក់ចំនួន ២ លើវិញ្ញាសារ (Maths Warriors & Mind Sports Challenge) និងបានវិញ្ញាបនប័ត្រកិត្ដិយសមួយ (Math Olympia)។
កុមារី សេងសំរេច សិរីរ័ត្ន សិស្សថ្នាក់ទី ២ នៃសាលាអន្តរជាតិ អាយ.ស៊ី.អេស ក៏ទទួលបានមេដាយចំនួន២ ផងដែរ ដែលបង្ហាញពីទេពកោសល្យកំពុងរីកចម្រើនរបស់កម្ពុជាក្នុងផ្នែកគណិតវិទ្យា។ រូបថត សហការី
លោកស្រី បានឱ្យដឹងថា៖ «មុនពេលចូលរួមប្រកួតប្រជែង ដំបូងគាត់ទទួលបានមេដាយជាសិស្សពូកែក្នុងក្របខ័ណ្ឌក្នុងប្រទេស ដើម្បីមានសិទ្ធិអាចចុះឈ្មោះប្រឡងកម្រិតអន្តរជាតិនៅប្រទេសសិង្ហបូរី»។
លោកស្រី សំរេច បានប្រាប់ភ្នំពេញប៉ុស្ដិ៍ថា៖ «ឪពុកម្តាយមានសេចក្តីរីករាយដោយបានឃើញកូនៗមានសេចក្តីក្លាហាន ខិតខំប្រឹងប្រែងរៀនសូត្រ ហ៊ានចូលរួមប្រឡងកម្រិតអន្តរជាតិ។ បើទោះជាបានមេដាយ ឬមិនបាន ក៏ជាបទពិសោធន៍ដ៏ល្អសម្រាប់ការសិក្សារបស់ពួកគេ»។
អ្នកទទួលជយលាភីពីការប្រកួតគណិតវិទ្យា SIMOC នឹងទទួលបានមេដាយ និងពិន្ទុអាហារូបករណ៍ ដើម្បីចូលរួមក្នុងជំរុំភាពជាអ្នកដឹកនាំវ័យក្មេង (YALA) នៅប្រទេសចិននៅចុងឆ្នាំនេះ។
លោក សោភ័ណ្ឌ បានបន្ថែមថា៖ «ពួកគេក៏នឹងទទួលបានបទពិសោធន៍ និងទំនាក់ទំនងដ៏មានតម្លៃ ដែលនឹងគាំទ្រដល់ការខិតខំប្រឹងប្រែងសិក្សា និងវិជ្ជាជីវៈនាពេលអនាគតរបស់ពួកគេ។ ភាពជោគជ័យរបស់និស្សិតកម្ពុជានៅ SIMOC 2024 គឺជាសក្ខីភាពមួយចំពោះការខិតខំប្រឹងប្រែង ការលះបង់ និងការជួយជ្រោមជ្រែងពីសាលា និងគ្រួសាររបស់ពួកគេ»។
ជាមួយនឹងការចូលរួមកើនឡើង និងសមិទ្ធផលនានា កម្ពុជានៅតែបន្តបោះជំហានទៅមុខក្នុងវិស័យគណិតវិទ្យានៅលើឆាកអន្តរជាតិ៕
