ស្រាទាំង៣ប្រភេទ ដែលក្រសួងសុខាភិបាលអំពាវនាវដល់ប្រជាពលរដ្ឋកុំទទួលទាន។ ក្រសួងសុខាភិបាល
ភ្នំពេញៈ ក្រសួងសុខាភិបាលអំពាវនាវដល់ប្រជាពលរដ្ឋកុំទទួលទានស្រា៣ប្រភេទ រួមមាន Royal Health Wine EST:2005 ចំណុះ៥០០មីលីលីត្រ, និងRoyal Health Wine EST:2005 ចំណុះ១០០មីលីលីត្រ, និងស្រាសុខភាពធម្មជាតិ CHL ចំណុះ ១៥០មីលីលីត្រ ដើម្បីចៀសវាងគ្រោះថ្នាក់ដល់សុខភាព។
ក្រសួងសុខាភិបាលបញ្ជាក់ក្នុងសេចក្តីជូនដំណឹងនាថ្ងៃទី២៤ កក្កដា ថា ស្រាទាំង៣ប្រភេទនេះដែលផលិតដោយសិប្បកម្មផលិតស្រាថ្នាំនៃក្រុមហ៊ុនមួយកន្លែងនៅខេត្តស្វាយរៀង មានផ្ទុកសារធាតុ Sildenafil (សារធាតុបង្កើនផ្លូវភេទបុរស) កម្រិតខ្ពស់ ដែលអាចធ្វើឱ្យប៉ះពាល់ធ្ងន់ធ្ងរដល់សុខភាពរបស់អ្នកទទួលទាន និងអាចបង្កគ្រោះថ្នាក់ដល់អាយុជីវិត។
ក្រសួងបញ្ជាក់ថា បន្ទាប់ពីបានធ្វើការស្រាវជ្រាវ មន្ត្រីជំនាញនៃក្រសួងសុខាភិបាល បានសហការជាមួយអង្គភាព និងអាជ្ញាធរពាក់ព័ន្ធ ចុះធ្វើនិយ័តកម្មនៅទីតាំងចំនួន២កន្លែង គឺសិប្បកម្មផលិតស្រាថ្នាំនេះ និងទីតាំងលក់ស្រាថ្នាំស្ថិតនៅរាជធានីភ្នំពេញ ដោយបានចាត់វិធានការតាមផ្លូវច្បាប់ចំពោះ «ជនពាក់ព័ន្ធ»។
ក្រសួងបញ្ជាក់ថា៖ «ដើម្បីចៀសវាងគ្រោះថ្នាក់ដល់សុខភាពអ្នកប្រើប្រាស់ ក្រសួងសុខាភិបាលសូមអំពាវនាវដល់បងប្អូនប្រជាពលរដ្ឋទាំងអស់កុំទទួលទានស្រាទាំង៣ប្រភេទខាងលើ និងសូមបងប្អូនអាជីវករឈប់ចែកចាយ ឬលក់ស្រាទាំងនេះ»។
ក្រសួងអំពាវនាវដល់អាជ្ញាធរមានសមត្ថកិច្ចនៅតាមបណ្ដារាជធានី ខេត្ត បន្តសហការ ណែនាំ អប់រំ និងទប់ស្កាត់ការចែកចាយ ឬលក់ស្រាថ្នាំទាំង៣ប្រភេទនេះឱ្យបានម៉ឺងម៉ាត់តាមនីតិវិធីច្បាប់។
ក្រសួងបញ្ជាក់ថា៖ «ក្រសួងសុខាភិបាល សង្ឃឹមថាបងប្អូនប្រជាពលរដ្ឋ អាជីវករ និងអាជ្ញាធរមានសមត្ថកិច្ចពាក់ព័ន្ធ ចូលរួមសហការអនុវត្តតាមសេចក្ដីជូនដំណឹងនេះប្រកបដោយប្រសិទ្ធភាពខ្ពស់»៕
