![](https://pppkhmer.sgp1.digitaloceanspaces.com/image/main/20247/24_7_2024_20230228_art12_research_report_measures_plastic_pollution_mpas_cambodia_18.jpg)
កាកសំណល់ប្លាស្ទិក អណ្តែតមុខផ្ទះប្រជាពលរដ្ឋនៅកោះស្តេច ខេត្តកោះកុងកាលពីឆ្នាំ ២០២២។ រូបថត Majel Kong / FFI
ព្រះសីហនុៈ យុទ្ធនាការ២របស់ក្រសួងបរិស្ថានបានជួយកាត់បន្ថយការប្រើប្រាស់ប្លាស្ទិកបានជាង ៧៤ភាគរយ ក្នុងរយៈពេល ១១ខែកន្លងមកនេះ ដែលចូលរួមទប់ស្កាត់ការបំផ្លាញបរិស្ថាន ដោយសំណល់ប្លាស្ទិកទាំងនោះ ពិសេសការបំពុលទន្លេ និង សមុទ្រ។
នេះជាការលើកឡើងរបស់រដ្ឋមន្រ្តីក្រសួងបរិស្ថាន លោក អ៊ាង សុផល្លែត ក្នុងពិធីបើកវេទិកាពិភាក្សាលើកដំបូង ស្តីពីការការពារមហាសមុទ្រ និងជីវៈចម្រុះក្នុងសមុទ្ររបស់កម្ពុជា «កិច្ចសន្ទនាពណ៌ខៀវ» (Blue Talks) ដែលរៀបចំឡើងដោយស្ថានទូតបារាំងនាថ្ងៃទី២៣ ខែកក្កដានៅខេត្តព្រះសីហនុ។
លោករដ្ឋមន្រ្តីបានថ្លែងថា ក្នុងរយៈពេល ១១ ខែកន្លងមកនេះ ក្រសួងបរិស្ថានបានចាប់ផ្តើមយុទ្ធនាការកាត់បន្ថយការប្រើប្រាស់ប្លាស្ទិកតាមរយៈយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ» ដែលមានមនុស្សចូលរួមជាង ៨លាននាក់។
ក្រៅពីនោះ ក្រសួងក៏បានចាប់ផ្តើមយុទ្ធនាការមួយផ្សេងទៀត ដែលមានឈ្មោះថា «កម្ពុជាស្អាត ខ្មែរធ្វើបាន» ដែលរហូតដល់ពេលនេះ មានឃុំ/សង្កាត់ជាង៦០០ ក្នុងចំណោមឃុំ/សង្កាត់ចំនួន១ ៦៥២ បានចូលរួមត្រឹមតែរយៈពេល២ខែតែប៉ុណ្ណោះ។
លោករដ្ឋមន្រ្តីមានប្រសាសន៍ថា៖ «ក្រឡេកទៅមើលស្ថិតិវិញ ប្រទេសកម្ពុជាបានកាត់បន្ថយការប្រើប្រាស់ប្លាស្ទិក បានចំនួន ៧៤,១ភាគរយក្នុងរយៈពេល ១១ខែកន្លងមកនេះ បើធៀបនឹងឆ្នាំមុន។ ប្រសិនជាបើគ្មានការកាត់បន្ថយទេ ចំនួនប្លាស្ទិកនេះ ប្រមាណពាក់កណ្ដាលអាចនឹងប៉ះពាល់ដល់បរិស្ថាន អាចធ្លាក់ចូលទៅសមុទ្រ ឬអាចចូលទៅទន្លេ។ នេះគ្រាន់តែជាការរួមចំណែកពីកម្ពុជា»។
លោករដ្ឋមន្រ្តីក៏បានធ្វើការកត់សម្គាល់ថា ប្រទេសទាំងអស់កំពុងប្រឈមមុខនឹងការប្រែប្រួលអាកាសធាតុ ហើយកម្ពុជាក៏មិនចង់ឃើញសមុទ្រកម្ពុជាទទួលរងពីការប្រែប្រួលអាកាសធាតុនោះដែរ។ កម្ពុជានឹងចូលរួមយ៉ាងសកម្មក្នុងការធានា ការទាញយកធនធានធម្មជាតិសមុទ្រ ប្រកបដោយនិរន្តរភាព។ ដើម្បីធ្វើកិច្ចការនេះ កម្ពុជាត្រូវមានការចូលរួមពីអ្នកពាក់ព័ន្ធក្នុងការថែទាំសុខភាពសមុទ្រ។
ការបំពុលដោយសំណល់សំរាមប្លាស្ទិក គឺកើតឡើងដោយការមិនទាន់បានទុកដាក់សំរាមឱ្យបានល្អ ដែលបណ្តាលឱ្យមានការកើនឡើង និងផលប៉ះពាល់អវិជ្ជមាន លើសុខភាពមនុស្ស សង្គម សេដ្ឋកិច្ច បរិស្ថាន រួមទាំងការបំពុលសមុទ្រ និងសត្វព្រៃផងដែរ។
លោក អ៊ាង សុផល្លែត បានបន្ថែមថា៖ «យើងដឹងហើយថា ការចោលសំរាមក្នុងសមុទ្រជាបញ្ហាមិនមែនតែនៅកម្ពុជាទេ ប៉ុន្តែនៅទូទាំងពិភពលោក។ យើងធ្វើការឆ្ពោះទៅរកការកាត់បន្ថយ ឬបើអាចលុបបំបាត់ការចោលសំរាមតាមសមុទ្រនៅកម្ពុជា។ វាគឺជាតួនាទីរួមរបស់យើងរបស់ប្រទេសទាំងអស់ ដើម្បីអភិរក្ស និងប្រើប្រាស់ប្រកបដោយនិរន្តរភាពនៃមហាសមុទ្រ និងធនធានសមុទ្រសម្រាប់ការអភិវឌ្ឍប្រកបដោយចីរភាព»។
បច្ចុប្បន្ននេះ ថង់ប្លាស្ទិកប្រមាណ ១០លានថង់ ត្រូវបានប្រើប្រាស់ជារៀងរាល់ថ្ងៃក្នុងរាជធានីភ្នំពេញ ខណៈពលរដ្ឋកម្ពុជាម្នាក់ៗ ដែលរស់នៅក្នុងទីក្រុងនានានៃប្រទេសកម្ពុជា ប្រើប្រាស់ថង់ប្លាស្ទិកជាង ២ ០០០ ថង់ក្នុងមួយឆ្នាំ។
ប្រជាពលរដ្ឋរស់នៅតាមតំបន់ឆ្នេរក្នុងមួយខ្នងផ្ទះប្រើប្រាស់ថង់ប្លាស្ទិកជាមធ្យមចំនួន ១២ថង់ ក្នុងមួយថ្ងៃ ហើយបរិមាណសំណល់ប្លាស្ទិកប្រមាណជា ៤៨ភាគរយ ត្រូវបានបោះចោលចូលទៅក្នុងសមុទ្រ។ នេះបើយោងតាមរបាយការណ៍របស់អង្គការសត្វព្រៃ និងរុក្ខជាតិប្រចាំកម្ពុជា កាលពីឆ្នាំ ២០១៩។
កំណើនបរិមាណសំណល់ប្លាស្ទិក បានបង្កការគំរាមកំហែងយ៉ាងធ្ងន់ធ្ងរដល់បរិស្ថាន ជីវជម្រុះ សុខភាពមនុស្ស និងសេដ្ឋកិច្ចជាតិ។ ស្ថិតិរបស់អង្គការសហប្រជាជាតិបានចេញផ្សាយកន្លងមក បានបង្ហាញថា នៅឆ្នាំ២០៥០ ចំនួនប្លាស្ទិក នឹងមានច្រើនជាងចំនួនត្រីក្នុងមហាសមុទ្រ។
កិច្ចប្រជុំនេះត្រូវបានរៀបចំឡើងដើម្បីត្រៀមសម្រាប់សន្និសីទអង្គការសហប្រជាជាតិស្តីពីមហាសមុទ្រលើកទី៣ (UNOC3) គ្រោងធ្វើនៅទីក្រុងនីស ប្រទេសបារាំង នាខែមិថុនា ឆ្នាំ២០២៥។
ក្រៅពីរដ្ឋមន្រ្តីក្រសួងបរិស្ថាន និង លោក Jacques Pellet ឯកអគ្គរដ្ឋទូតបារាំង កម្មពិធីនេះក៏មានការចូលរួមពីលោក ឡុង ឌីម៉ង់ អភិបាលរងខេត្ត លោក Jean-Pierre Marcelli នាយកទីភ្នាក់ងារបារាំង AFD ប្រចាំភូមិភាគអាស៊ីអាគ្នេយ៍ និងតំណាងមកពីក្រសួងអង្គការក្រៅរដ្ឋាភិបាល គណៈប្រតិភូសហភាពអឺរ៉ុប ទីភ្នាក់ងារអង្គការសហប្រជាជាតិ និងវិស័យឯកជនផងដែរ។
អ្នកចូលរួមបានធ្វើការពិភាក្សាគ្នាអំពីបញ្ហាប្រឈមនៃសេដ្ឋកិច្ចពណ៌ខៀវ អេកូទេសចរណ៍ ពាណិជ្ជកម្មតាមសមុទ្រ និងកសិកម្មប្រកបដោយការទទួលខុសត្រូវ។ នេះបើយោងតាមស្ថានទូតបារាំងប្រចាំកម្ពុជា។
ទាក់ទងទៅនឹងបញ្ហាបរិស្ថាននិងការប្រែប្រួលអាកាសធាតុនេះដែរ ក្រសួងបរិស្ថាន នឹងធ្វើជាម្ចាស់ផ្ទះនៃកិច្ចប្រជុំថ្នាក់រដ្ឋមន្ត្រីបរិស្ថានមហាអនុតំបន់ទន្លេមេគង្គលើកទី៦ (EMM-6) ចាប់ពីថ្ងៃទី១០ ដល់ថ្ងៃទី១៣ ខែកញ្ញាខាងមុខនេះ។
នៅមុនពេលធ្វើជាម្ចាស់ផ្ទះនៃកិច្ចប្រជុំថ្នាក់រដ្ឋមន្ត្រីនេះ ក្រសួងបរិស្ថានបានចូលរួម ដឹកនាំកិច្ចប្រជុំពិគ្រោះយោបល់មួយកាលពីថ្ងៃទី២៣ កក្កដា ក្នុងខេត្តព្រះសីហនុ ស្តីពីក្របខ័ណ្ឌយុទ្ធសាស្ត្រឆ្នាំ ២០៣០ សម្រាប់ពន្លឿនសកម្មភាពអាកាសធាតុ និងចីរភាពបរិស្ថានក្នុងមហាអនុតំបន់ទន្លេមេគង្គ។
កិច្ចប្រជុំនេះមានគោលបំណងដើម្បីកំណត់អាទិភាពរួម តម្រូវការវិនិយោគ និងជំនួយបច្ចេកទេសសម្រាប់ដាក់បញ្ជូលទៅក្នុងសេចក្តីព្រាងក្របខ័ណ្ឌយុទ្ធសាស្ត្រឆ្នាំ ២០៣០ ដែលនឹងដាក់ជូនកិច្ចប្រជុំ EMM-6 ដើម្បីអនុម័ត នៅខែកញ្ញាខាងមុខនេះ។ នេះបើយោងតាមក្រសួងបរិស្ថាន។
កិច្ចប្រជុំនេះមានការចូលរួមពីប្រតិភូតំណាងប្រទេសជាសមាជិក នៃប្រទេសមហាអនុតំបន់ទន្លេមេគង្គ (GMS) សរុប៤៥នាក់ រួមមានប្រទេស កម្ពុជា វៀតណាម ឡាវ ថៃ ចិន មីយ៉ាន់ម៉ា ធនាគារអភិវឌ្ឍន៍អាស៊ី តំណាង JICA វិស័យឯកជន និងអង្គការសង្គមស៊ីវិលជាដើម៕