រូបភាពពីវីដេអូដែលអ្នកគ្រូ និងសិស្សានុសិស្សខ្ទប់ច្រមុះទ្រាំនឹងក្លិនស្អុយចេញពីរោងចក្រផលិតខោខូវប៊យក្នុងឃុំត្រាំកក់។ បណ្ដាញសង្គម
តាកែវ៖ កាលពីថ្ងៃទី ២៣ ខែកក្កដា លោក កៅ វគ្គសែល អភិបាលនៃគណ:អភិបាលស្រុកត្រាំកក់ រួមជាមួយមន្ត្រីជំនាញពាក់ព័ន្ធ បានចុះពិនិត្យដល់ទីតាំងសិប្បកម្មកាត់ដេរខោខូវប៊យ ក្នុងភូមិអង្គរនាប ឃុំត្រាំកក់ ស្រុកត្រាំកក់ខេត្តតាកែវ ដែលបានបង្កជាក្លិនស្អុយប៉ះពាល់ដល់សិស្សានុសិស្ស លោកគ្រូអ្នកគ្រូ និងប្រជាពលរដ្ឋរស់នៅក្បែរនោះ។
មន្ដ្រីក្រុមប្រឹក្សាឃុំត្រាំកក់ អ្នកស្រី សួត សំអុល បានឱ្យដឹងថា៖ «លោក វគ្គសែល បានឱ្យផ្អាកការដុតកម្ទេចក្រណាត់ និងត្រូវអនុវត្តតាមបច្ចេកទេសរបស់មន្ត្រីជំនាញនៃមន្ទីរបរិស្ថានដើម្បីបញ្ជៀសផលប៉ះពាល់ ដល់សុខភាពសិស្សានុសិស្ស លោកគ្រូ អ្នកគ្រូ ក៏ដូចជាប្រជាពរដ្ឋក្នុងភូមិ»។
ការចុះអន្ដរាគមន៍របស់មន្ដ្រីមូលដ្ឋានស្រុក និងមន្ដ្រីបរិស្ថាននេះ ត្រូវបានធ្វើឡើងក្រោយមានការបង្ហោះវីដេអូរបស់សិស្សានុសិស្ស ក៏ដូចជាលោកគ្រូអ្នកគ្រូខ្ទប់ច្រមុះនៅក្នុងថ្នាក់រៀន និងបរិវេណសាលា ដោយបានត្អូញត្អែរអំពីក្លិនស្អុយអាសោចភាយចេញពីរោងចក្រផលិតខោខូវប៊យ។
លោក សុខ ប៊ុនធឿន ជាគ្រូបង្រៀនម្នាក់ និងបានបង្ហោះវីដេអូនៅលើបណ្ដាញសង្គម ដោយភ្ជាប់ជាមួយសំណេរថា៖ «ស្អុយរាល់ថ្ងៃ ព្រោះសាលារៀនទាំងបឋម ទាំងវិទ្យាល័យនៅក្រោមខ្យល់ (ខ្យល់បក់មកពីលិច រោងចក្រនៅខាងលិច សាលានៅខាងកើត)។ ទាំងគ្រូទាំងសិស្ស លែងចង់មកសាលារៀនហើយ»។
វីដេអូនោះបានទាក់ទាញអ្នកប្រើប្រាស់បណ្ដាញសង្គមជាច្រើនឱ្យបញ្ចេញមតិ និងចែករំលែក ជំរុញឱ្យអាជ្ញាធរជួយអន្តរាគមន៍។
ក្លិនដែលមិនអាចទ្រាំទ្របានមិនត្រឹមតែរំខានដល់ការសិក្សារបស់ពួកគេប៉ុណ្ណោះទេ ថែមទាំងបង្កគ្រោះថ្នាក់ដល់សុខភាពដល់សហគមន៍សាលាទៀតផង។
ទិដ្ឋភាពក្នុងរោងចក្រផលិតខោខូវប៊យក្នុងឃុំត្រាំកក់ដែលបង្កបញ្ហាក្លិនស្អុយប៉ះពាល់ដល់សិស្សានុសិស្ស និងប្រជាពលរដ្ឋ។ បណ្ដាញសង្គម
ហេតុការណ៍នេះទាមទារឱ្យមានចំណាត់ការបន្ទាន់សម្រាប់បទប្បញ្ញត្តិបរិស្ថាន និងគណនេយ្យភាពឧស្សាហកម្ម ដើម្បីធានាបាននូវបរិយាកាសសិក្សាប្រកបដោយសុវត្ថិភាព និងសុខភាពល្អសម្រាប់កុមារ។
លោក ហៀក សំភី ជាមេប៉ុស្ដិ៍នគរបាល ឃុំត្រាំកក់ បានឱ្យដឹងថា អាជ្ញាធរមូលដ្ឋានបានដោះស្រាយបញ្ហារំភាយក្លិនស្អុយពីរោងចក្រ។
លោកបានប្រាប់ភ្នំពេញប៉ុស្ដិ៍ថា៖ «យើងបានឱ្យខាងរោងចក្រប្រើប្រាស់បំពង់បង្អុយផ្សែង និងសម្អាតបរិស្ថានក្នុងបរិវេណរោងចក្រ។ ឥឡូវនេះ វាលែងមានក្លិនស្អុយរំខានសិស្សនៅសាលារៀនទៀតហើយ»។
លោក ប៊ុនធឿន បានសរសេរនៅលើហ្វេសប៊ុក និងបានលប់ចោលវីដេអូនោះក្រោយអាជ្ញាធរចុះចាត់វិធានការបន្ទាន់ថា៖ «សូមអរគុណដល់អាជ្ញាធរពាក់ព័ន្ធទាំងអស់ ពិសេសលោកអភិបាលស្រុកត្រាំកក់ ដែលបានចុះជួយដោះស្រាយ»៕
ទិដ្ឋភាពក្នុងរោងចក្រផលិតខោខូវប៊យក្នុងឃុំត្រាំកក់ដែលបង្កបញ្ហាក្លិនស្អុយប៉ះពាល់ដល់សិស្សានុសិស្ស និងប្រជាពលរដ្ឋ។ បណ្ដាញសង្គម
