![](https://pppkhmer.sgp1.digitaloceanspaces.com/image/main/20247/24_7_2024_poisonous_mushroom.jpg)
ប្រភេទពុលផ្សិតមួយ។ រូបថត ក្រសួងសុខាភិបាល
ភ្នំពេញៈ ក្រសួងសុខាភិបាលអំពាវនាវដល់ប្រជាពលរដ្ឋអនុវត្តនូវវិធានការបរិភោគផ្សិតដើម្បីចៀសវាងបាននូវការពុលផ្សិត ដែលអាចធ្វើឱ្យគ្រោះថ្នាក់រហូតបាត់បង់ជីវិត។
ការចេញវិធានការនេះធ្វើឡើង បន្ទាប់ពីមានករណីពុលផ្សិតចំនួន ១៧នាក់ ដោយមានរោគសញ្ញាចុកពោះ រាក ក្អួត នៅភូមិឡុំ ឃុំប៉ក់ញៃ ស្រុកអូរយ៉ាដាវ ខេត្តរតនគិរី ក្រោយពីបរិភោគផ្សិត កាលពីថ្ងៃទី២១ ខែកក្កដា។
ក្រសួងបញ្ជាក់ក្នុងសេចក្តីប្រកាសព័ត៌មានថ្ងៃទី២៣ កក្កដា ថា អ្នកដែលពុលផ្សិតចំនួន១៧នាក់នេះត្រូវបាននិងកំពុងទទួលការព្យាបាលយ៉ាងយកចិត្តទុកដាក់ពីក្រុមគ្រូពេទ្យនៅមណ្ឌលសុខភាព និងមន្ទីរពេទ្យ។
ក្រសួងបញ្ជាក់ថា៖ «ក្រុមឆ្លើយតបបន្ទាន់របស់មន្ទីរសុខាភិបាលនៃរដ្ឋបាលខេត្ត បាននិងកំពុងសហការជាមួយក្រុមការងារនៃអាជ្ញាធរមូលដ្ឋានគ្រប់លំដាប់ថ្នាក់ និងផ្នែកពាក់ព័ន្ធដោយទទួលការផ្ដល់យោបល់បច្ចេកទេសពីនាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល ធ្វើការអង្កេតស្រាវជ្រាវយ៉ាងសកម្មលើការកើតឡើងនូវករណីពុលនេះ និងធ្វើយុទ្ធនាការអប់រំសុខភាពប្រជាពលរដ្ឋនៅក្នុងភូមិដែលកើតហេតុខាងលើ»។
ក្រសួងពន្យល់ថា ក្នុងចំណោមផ្សិតរាប់ពាន់ប្រភេទមានផ្សិតប្រហែល ១០០ប្រភេទ ដែលភាគច្រើនបណ្ដាលឱ្យពុល នៅពេលបរិភោគ និងណែនាំថា៖ «មុននឹងយកផ្សិតមកចម្អិនជាម្ហូបអាហារបរិភោគត្រូវស្គាល់ប្រាកដថា ផ្សិតនោះមិនពុល ឬសូមស្វែងរក សាកសួរចាស់ទុំ ដែលស្គាល់ច្បាស់ថា ផ្សិតនោះធ្លាប់បរិភោគដោយសុវត្ថិភាព។ ចម្អិនផ្សិតដែលមិនពុលឱ្យបានត្រឹមត្រូវ និងឆ្អិនល្អ មុនបរិភោគ»។
ក្រសួងណែនាំឱ្យប្រកាន់អនាម័យ លាងដៃឱ្យបានញឹកញាប់ជាមួយសាប៊ូ និងទឹកស្អាត មុនចាប់កាន់អាហារ និងទទួលទានចំណីអាហារដែលមានអនាម័យ និងសុវត្ថិភាពល្អ។
ក្រសួងបញ្ជាក់ថា រោគសញ្ញានៃការពុលផ្សិតអាចកើតក្រោយពីបរិភោគរយៈពេល២ម៉ោង ទៅ ៦ម៉ោង ឬច្រើនថ្ងៃ ដែលមានដូចជា ចុកពោះ រាក ក្អួត បែកញើស រីកប្រស្រីភ្នែក ដង្ហើមញាប់ ឬពិបាកដកដង្ហើមឡេះឡះ រហូតដល់អាចស្លាប់ក្នុងរយៈពេលណាមួយទៅតាមប្រភេទផ្សិតពុលដែលមានកម្រិតជាតិពុលខុសៗគ្នា។
ក្រសួងលើកឡើងថា៖ «ជាតិពុលខ្លះប៉ះពាល់ដល់ប្រព័ន្ធសរសៃប្រសាទ តម្រងនោម ឬថ្លើម ជួនកាលច្រើនថ្ងៃ ឬច្រើនសប្តាហ៍បន្ទាប់ពីបរិភោគ។ អ្នកពុលត្រូវប្រញាប់ស្វែងរកការជួយសង្គ្រោះបន្ទាន់នៅតាមមូលដ្ឋានសុខាភិបាលដែលនៅជិតលោកអ្នកបំផុត ដោយស្ថានភាពអ្នកពុលតម្រូវឱ្យស្ថិតនៅក្រោមការត្រួតពិនិត្យតាមដានពីគ្រូពេទ្យជាចាំបាច់»។
ក្រសួងបញ្ជាក់ថា៖ «ក្រសួងសុខាភិបាលសូមលើកទឹកចិត្តដល់បងប្អូនពលរដ្ឋគ្រប់រូបអនុវត្តតាមការណែនាំខាងលើ និងសូមបន្តផ្សព្វផ្សាយសារអប់រំនេះដល់ក្រុមគ្រួសារ ញាតិមិត្ត ដើម្បីចៀសផុតពីការឈឺ គ្រោះថ្នាក់ដល់ជីវិតដោយសារការបរិភោគផ្សិតពុល»។
ក្រសួងអំពាវនាវដល់មន្ត្រីសុខាភិបាល អាជ្ញាធរមូលដ្ឋានចូលរួមផ្សព្វផ្សាយ និងធ្វើការណែនាំ អប់រំការអនុវត្តវិធានការនេះដល់ប្រជាពលរដ្ឋនៅមូលដ្ឋានរបស់ខ្លួន៕