![](https://pppkhmer.sgp1.digitaloceanspaces.com/image/main/20247/24_7_2024_photo_2024_07_24_14_45_07.jpg)
ប្រធាននាយកដ្ឋានដំណាំស្រូវ លោក គង់ គា និងក្រុមការងារសហការជាមួយមន្ទីរកសិកម្មខេត្តកំពង់ធំ ចុះពិនិត្យផលប៉ះពាល់ដំណាំស្រូវដោយសារជំនន់ទឹកភ្លៀង នៅខេត្តកំពង់ធំ។ រូបថត ក្រសួងកសិកម្ម
កំពង់ធំៈ យ៉ាងហោចណាស់ ឃុំចំនួន១៣ ក្នុងស្រុកចំនួន៥ នៃខេត្តកំពង់ធំកំពុងតែទទួលរងផលប៉ះពាល់ដោយសារជំនន់ទឹកភ្លៀង ដែលប៉ះពាល់ដំណាំស្រូវចំនួន ៤៧៤ហិកតា។
ការចុះពិនិត្យផ្ទាល់ និង របាយការណ៍បន្ថែមពីមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បង្ហាញថា ក្នុងខេត្តកំពង់ធំមានឃុំចំនួន១៣ ក្នុងស្រុកចំនួន៥ កំពុងរងផលប៉ះពាល់ដោយសារជំនន់ទឹកភ្លៀង។ ស្រុកទាំង ៥ នោះរួមមាន ស្រុកកំពង់ស្វាយ ក្រុងស្ទឹងសែន ស្រុកប្រាសាទសំបូរ ស្រុកសណ្តាន់ និងស្រុកបារាយណ៍ ដែលមានកសិករសរុបចំនួន៣៤០គ្រួសារ។ នេះបើយោងតាមក្រសួងកសិកម្មនាថ្ងៃទី២៤ ខែកក្កដានេះ។
ក្រសួងបញ្ជាក់ថា៖ «ដំណាំស្រូវបានរងផលប៉ះពាល់ចំនួន ៤៧៤ហិកតា និង ខូចខាតទាំងស្រុងចំនួន ១២៥ហិកតា។ ផ្ទៃដីប៉ះពាល់សរុបនេះ ស្មើនឹង ១.៩៦ ភាគរយ បើធៀបនឹងផ្ទៃដីដាំដុះស្រូវវស្សាសរុបក្នុងឃុំ និងស្មើនឹង ០.២៤ភាគរយ បើធៀបនឹងផ្ទៃដីដែលបានដាំដុះស្រូវវស្សាក្នុងខេត្ត»។
ស្ថិតក្នុងស្ថានភាពនេះ ក្រុមការងារ បានសហការជាមួយអាជ្ញាធរមូលដ្ឋាន និងបញ្ជាអភិបាលខេត្ត លោក នួន ផារ័ត្ន បានអន្តរាគមន៍ស្តាប្រឡាយបណ្តោះទឹកនៅក្នុងឃុំបារាយណ៍ ដើម្បីរំដោះទឹកចេញពីវាលស្រែដែលមានផ្ទៃដីប្រមាណ២០០ហិកតា។
លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំកំពុងតែចុះពិនិត្យផលប៉ះពាល់នៃដំណាំកសិកម្មនៅតាមមូលដ្ឋាន។ ហេតុនេះ លោកមិនអាចធ្វើអត្ថាធិប្បាយទេ។
ក្រោយពីមានជំនន់ទឹកភ្លៀងក្នុងខេត្តកំពង់ធំ កាលពីសប្តាហ៍មុនមកនោះ លោក គង់ គា ប្រធាននាយកដ្ឋានដំណាំស្រូវ នៃក្រសួងកសិកម្ម និង ក្រុមការងារចុះពិនិត្យផលប៉ះពាល់ដំណាំស្រូវដោយសារជំនន់ទឹកភ្លៀង នៅភូមិអូតាសេក ឃុំកំពង់គោ ស្រុកកំពង់ស្វាយ ខេត្តកំពង់ធំ។ លោកបានសម្តែងការសោកស្តាយចំពោះគ្រោះមហន្តរាយនេះ។
លោកបានថ្លែងពេលចុះពិនិត្យស្រូវថា៖ «ស្រូវនេះរយៈពេល ៥ថ្ងៃហើយលិចទឹក ហើយទឹកដែលលិចនេះគឺទឹកល្អក់ទៀត ដែលធ្វើឱ្យស្រូវហ្នឹងវាឆាប់ខូច ហើយទោះបីជាទឹកស្រកទៅវិញ ក៏មិនអាចប្រមូលផលបានដែរ។ ស្តាយ ស្តាយមែនទែន ទិន្នផលមើលទៅបានច្រើនណាស់។ ស្រែនោះបាន ៦ ទៅ ៧តោន»។
លោកមានប្រសាសន៍បន្តថា៖ «សង្វេគណាស់កសិករយើងឆ្នាំនេះ គឺឆ្នាំបញ្ហាច្រើន ទាំងពីដង្កូវ ទាំងពីមមាច ទាំងពីរុយស លូវដល់ទឹកជំនន់ទៀត។ ជាធម្មតាខែនេះ គឺជាខែស្ថិតក្នុងកូនរដូវប្រាំង តែឆ្នាំនេះទៅជាកូនរដូវភ្លៀងវិញ។ នេះគឺជារឿងចម្លែក អាហ្នឹងហើយដែលគេហៅថា ការប្រែប្រួលអាកាសធាតុ»។
![](https://pppkhmer.sgp1.cdn.digitaloceanspaces.com/image/main/20247/24_7_2024_photo_2024_07_24_14_45_07_2_.jpg)
លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងថា ស្ថានភាពជំនន់ទឹកភ្លៀងនៅតាមបណ្តាខេត្តបានស្រកបន្តិចវិញ ក្រោយពីភ្លៀងមិនមានធ្លាក់បន្តទៀត។
លោកបន្តថា ស្ថានភាពទឹកនៅខេត្តស្ទឹងត្រែង ព្រះវិហារ កំពង់ធំ ក្រចេះ កំពង់ស្ពឺ បាត់ដំបង ព្រះសីហនុ និងកោះកុងជាដើមមិនមានស្ថានភាពធ្ងន់ធ្ងរនោះទេ។
លោកបញ្ជាក់ថា៖ «ស្ថានភាពឥឡូវនេះមិនជាបញ្ហាអីទេ ដោយសារតែប៉ុន្មានថ្ងៃនេះមិនមានភ្លៀងខ្លាំង តែបើតាមការព្យាករណ៍របស់ក្រសួងធនធានទឹក នៅពេលខាងមុខនឹងមានភ្លៀងធ្លាក់ តែបើភ្លៀងគឺអាចឡើងនៅតំបន់តាមស្ទឹង។ នៅតាមទីវាលមិនទាន់មានទឹកជន់លិចនៅឡើយទេ»។
លោកបន្ថែមថា ស្ថានភាពទឹកនៅខេត្តព្រះវិហារ បានស្រកហើយ ដោយសារតែមិនមានភ្លៀងធ្លាក់បន្តទៀត។ រីឯខេត្តកំពង់ធំ ទឹកហូរមកពីខាងលើគឺខេត្តព្រះវិហារ ដែលធ្វើឱ្យទឹកស្ទឹងសែននៅមានការហក់ឡើង។ ប៉ុន្តែ ស្ថានភាពទឹកនេះ បានហក់ឡើងនៅតែនៅតាមបណ្តោយស្ទឹងសែនប៉ុណ្ណោះ ដែលធ្វើឱ្យប៉ះពាល់ដំណាំស្រូវប្រាំងមួយចំនួន។
ក្នុងស្ថានភាពទឹកជំនន់នៅនេះផងដែរ មន្ទីរកសិកម្មខេត្តមួយចំនួនបានណែនាំឱ្យកសិករចិញ្ចឹមសត្វ ពិសេសកសិករចិញ្ចឹមគោក្របី ជ្រូកត្រៀមលក្ខណៈទុកជាមុនសម្រាប់អន្តរាគមន៍ជួយសង្គ្រោះសត្វក្នុងពេលមានទឹកជំនន់ ទឹកភ្លៀង ឬទឹកទន្លេ។
មន្ទីរកសិកម្មខេត្តសៀមរាប បានធ្វើការណែនាំដល់កសិករ ឱ្យកំណត់ទីទួលសុវត្ថិភាពនៅតាមមូលដ្ឋាន ដើម្បីជម្លៀសសត្វ នៅពេលមានគ្រោះទឹកជំនន់ និងត្រូវមានជម្រកឱ្យបានត្រឹមត្រូវ, ត្រូវរៀបចំត្រៀមចំណី ដូចជា ចំបើង ស្មៅស្ងួត ចំណីស្ងួត (ចំណីការុង) និងកៅស៊ូតង់ សម្រាប់ឱ្យសត្វស៊ី និង ផ្តល់ទឹកស្អាតឱ្យសត្វផឹកបានគ្រប់គ្រាន់ និងធ្វើជម្រកសម្រាប់សត្វ។
មន្ទីរកសិកម្មបញ្ជាក់ថា៖ «មិនត្រូវប៉ះពាល់ វះកាត់ ឬបរិភោគសត្វឈឺ-ងាប់ឡើយ និងហាមជាដាច់ខាតការលក់ ទិញ ឬចរាចរណ៍សត្វឈឺ និងងាប់ដោយសារជំងឺ គឺត្រូវធ្វើការកប់ ឬដុតកម្ទេចចោល»។
លើសពីនោះ ពលរដ្ឋត្រូវគ្រប់គ្រងមើលថែសត្វឱ្យបានល្អចៀសវាងការបង្កគ្រោះថ្នាក់ជាយថាហេតុដល់មនុស្ស សត្វ ជាពិសេស ការចងសត្វនៅតាមដងផ្លូវសាធារណៈ។ ករណីមានសត្វឈឺ ត្រូវបំបែកសត្វឈឺចេញពីសត្វជា រួចហើយត្រូវទំនាក់ទំនងទៅភ្នាក់ងារសុខភាពសត្វភូមិ អាជ្ញាធរភូមិ ឃុំ និងមន្ត្រីជំនាញ ដើម្បីជួយអន្តរាគមន៍ និងមានវិធានការបន្តឲ្យបានទាន់ពេលវេលា៕