![](https://pppkhmer.sgp1.digitaloceanspaces.com/image/main/20247/25_7_2024_canbis.jpg)
កម្លាំងការិយាល័យប្រឆាំងបទល្មើសគ្រឿងញៀនខេត្ត និង កម្លាំងនគរបាលស្រុក សេសាន បានបង្ក្រាបករណីដាំដុះកញ្ឆាដោយខុសច្បាប់ស្ថិតនៅភូមិញឺន ឃុំស្តៅ ស្រុកសេសាន ក្រោយពីទទួលបានសេចក្ដីរាយការណ៍ពីពលរដ្ឋតាមរយៈApp NoDrug។ រូបថត ការិយាល័យប្រឆាំងបទល្មើសគ្រឿងញៀន
ស្ទឹងត្រែងៈ អ្នកដាំកញ្ឆាពីរនាក់ត្រូវបានតុលាការខេត្តស្ទឹងត្រែងសម្រេចឃុំខ្លួននៅពន្ធនាគារខេត្ត ពាក់ព័ន្ធទៅនឹងការដាំរុក្ខជាតិញៀនជាង ៧០០ដើម ដែលប្រឈមនឹងការជាប់ពន្ធនាគាររហូតដល់ទៅ ២ឆ្នាំ និងពិន័យជាប្រាក់ ៤លានរៀល។
តុលាការខេត្តបានធ្វើការសួរនាំ និងចោទប្រកាន់បុរសម្នាក់ និងស្រ្តីមា្នក់ពីបទដាំដោយខុសច្បាប់នូវរុក្ខជាតិញៀន តាមមាត្រា៣៨ នៃច្បាប់ច្បាប់ស្តីពី ការត្រួតពិនិត្យគ្រឿងញៀន។ នេះបើយោងតាម លោកឈុំ ស៊ាងហាក់អ្នកនាំពាក្យតុលាការខេត្ត។
លោកបានប្រាប់ភ្នំពេញប៉ុស្តិ៍នាថ្ងៃទី២៥ កក្កដាថា៖ «តុលាការបានសម្រេចឃុំខ្លួនបណ្តោះអាសន្ននៅពន្ធនាគាររួចហើយ ក្រោមការចោទប្រកាន់ពីបទដាំដោយខុសច្បាប់នូវរុក្ខជាតិញៀន»។
យោងតាមមាត្រា៣៨ បានឱ្យដឹងថា ជនណាប្រព្រឹត្តដោយចេតនាល្មើសនឹងបទប្បញ្ញត្តិនៃច្បាប់នេះ និងបទបញ្ជាទាក់ទងនឹងការដាំរុក្ខជាតិញៀន ត្រូវផ្តន្ទាទោសដាក់ពន្ធនាគារពី ៦ខែ ទៅ ២ឆ្នាំ ។ ក្រៅពីទោសដាក់ពន្ធនាគារ ជនល្មើសនឹងអាចត្រូវទទួលបន្ថែមនូវទោសពិន័យជាប្រាក់ពី ១លានរៀល ទៅ ៤លានរៀលផងដែរ។
លើសពីនោះ ក្នុងករណីដែលការប្រព្រឹត្តបទល្មើសនេះធ្វើឡើងក្នុងគោលបំណងចែកចាយ ផលិត ឬធ្វើពាណិជ្ជកម្ម ជននោះត្រូវផ្តន្ទាទោសដាក់ពន្ធនាគារពី ២ឆ្នាំ ទៅ ៥ឆ្នាំ និងអាចត្រូវទទួលបន្ថែមនូវទោសពិន័យជាប្រាក់ពី ៤លាន ទៅ ១០ លាន) រៀល។
កម្លាំងការិយាល័យប្រឆាំងបទល្មើសគ្រឿងញៀនខេត្ត និង កម្លាំងនគរបាលស្រុក សេសាន បានបង្ក្រាបករណីដាំដុះកញ្ឆាដោយខុសច្បាប់ស្ថិតនៅភូមិញឺន ឃុំស្តៅ ស្រុកសេសាន ក្រោយពីទទួលបានសេចក្ដីរាយការណ៍ពីពលរដ្ឋតាមរយៈApp NoDrug។
កម្លាំងនគរបាលបានរកកញ្ឆានៅ ២ គោលដៅផ្សេងគ្នា ដែលសរុបចំនួន ៧៦៧គុម្ព។ គោលដៅទី១ បានកាប់ និងដុតបំផ្លាញកញ្ឆាចំនួន ២៥៥គុម្ព និងបានធ្វើការឃាត់ខ្លួនជនសង្ស័យ ២នាក់។ រីឯ គោលដៅទី២ បានកាប់ និងដុតបំផ្លាញកញ្ឆាចំនួន ៥១២គុម្ព ប៉ុន្តែ ចំពោះម្ចាស់ដាំកញ្ឆាបានរត់គេចខ្លួន។ នេះបើយោងតាមអាជ្ញាធរជាតិប្រយុទ្ធប្រឆាំងគ្រឿងញៀននាថ្ងៃទី២៤ ខែកក្កដានេះ។
លោក ឈុំ ស៊ាងហាក់ក៏បានឱ្យដឹងផងដែរថា តុលាការនឹងធ្វើការពិនិត្យ និងមានចំណាត់ការបន្តទៀតចំពោះអ្នកដែលរត់គេចខ្លួន ឬពាក់ព័ន្ធផ្សេងទៀត។
ករណីដាច់ដោយឡែកមួយទៀត មន្ទីរប្រឆាំងគ្រឿងញៀនបានបង្ក្រាបករណីជួញដូរគ្រឿងញៀនឆ្លងដែនខុសច្បាប់ ដោយបានចាប់ខ្លួនបុរសជាជនជាតិចិន ២នាក់ និងរឹបអូសថ្នាំញៀនជាង ២០០គីឡូក្រាមនៅក្នុងរាជធានីភ្នំពេញ។
ជនជាតិទាំងពីរនាក់នោះមានអាយុ ៤១ឆ្នាំ និងម្នាក់ទៀតអាយុ ៤២ឆ្នាំ។ រីឯ វត្ថុតាង និងសម្ភារៈចាប់យកបានរួមមាន៖ សារធាតុញៀនប្រភេទកេតាមីន (Ketamine) សរុបចំនួន ២០០គីឡូ ៧៨៤,៩៣ក្រាម រថយន្តចំនួន ២គ្រឿង និងទូរស័ព្ទដៃចំនួន ២គ្រឿង។ នេះបើយោងតាមមន្ទីរប្រឆាំងបទល្មើសគ្រឿងញៀននាថ្ងៃទី២៤ កក្កដា។
ក្នុងរយៈពេលជាង ៦ខែ នៃឆ្នាំ ២០២៤ នេះ គ្រឿងញៀនចំនួន ៥ ៦៥៦ករណីត្រូវបានបង្រ្កាបហើយមនុស្សចំនួន១៣ ៩៥៥នាក់ត្រូវបានចាប់ខ្លួន សារធាតុញៀនចំនួន ៥តោន និង ២៥៨គីឡូក្រាមត្រូវបានរឹបអូស៕