![](https://pppkhmer.sgp1.digitaloceanspaces.com/image/main/20247/25_7_2024_wat_bo_school_in_siem_reap1.jpg)
សិស្សានុសិស្សជួបប្រជុំជាមួយនាយកសាលា នាយិកាសាលា នាយករង គ្រូបន្ទុកថ្នាក់ គ្រូជំនួយការ និង សមាជិកក្រុមនៃសាលាបឋមសិក្សាវត្តបូព៌ក្នុងខេត្តសៀមរាប ធ្វើការផ្លាស់ប្តូរវប្បធម៌តាមរយៈបច្ចេកវិទ្យា AI ជាមួយសិស្សានុសិស្សម៉ាឡេស៊ីតាមរយៈ ZOOM ជាលើកដំបូង។ រូបថត សហការី
សៀមរាប៖ សាលាបឋមសិក្សាវត្តបូព៌ក្នុងខេត្តសៀមរាប ដឹកនាំដោយលោកនាយកសាលា អន គុណរ័ត្ន បានអនុវត្ដគំនិតផ្តួចផ្តើមរួមគ្នាអប់រំជាមួយប្រទេស ម៉ាឡេស៊ី ដោយប្រើប្រាស់បច្ចេកវិទ្យាបញ្ញាសិប្បនិមិត្ត (AI) ដើម្បីលើកកម្ពស់ការផ្លាស់ប្តូរវប្បធម៌រវាងសិស្សានុសិស្សមកពីបណ្តាប្រទេសអាស៊ាន។
លោក គុណរ័ត្ន បានថ្លែងថា៖ «គម្រោងនេះលើកទឹកចិត្តសិស្សានុសិស្សក្នុងការចែករំលែក និងផ្លាស់ប្តូរបទពិសោធន៍វប្បធម៌តាមរយៈការធ្វើបទបង្ហាញ ដូចជា អត្ថបទសរសេរ រូបថត ប៉ុសិ៍ស្ទ័រ វីដេអូផ្សេងៗ ដើម្បីឱ្យការបង្ហាញវប្បធម៌នេះកាន់តែមានភាពទាក់ទាញ និងទាន់សម័យកាល ដោយឱ្យសិស្សចេះប្រើបច្ចេកវិទ្យា AI»។
បច្ចេកវិទ្យា AI ដើរតួនាទីយ៉ាងសំខាន់ក្នុងគម្រោងនេះ ដោយការប្រើប្រាស់ដូចជា ChatGPT, Gemini, VN, CapCut, Renderforest និង Canva ត្រូវបានប្រើដើម្បីជួយសិស្សក្នុងការចែករំលែកវប្បធម៌របស់ពួកគេ។
តាំងពីដំណាក់កាលទី១ ដល់ទី ៣ នេះ សិស្សានុសិស្សបានអភិវឌ្ឍសមត្ថភាពជាច្រើន។ ពួកគេបានបង្កើតប្រវត្តិរូបសង្ខេបជាអត្ថបទចំនួន ៧០ពាក្យ ដោយប្រើបច្ចេកវិទ្យា AI ChartGPT កាត់ត ឬកែលម្អរូបថតរបស់ក្រុមខ្លួនចូលទៅក្នុង Facebook Group ដោយ CAPCUT បង្កើតប្រវត្តិរូបសង្ខេបជាវីដេអូចំនួនមួយនាទីដោយ CAPCUT ក៏ដូចជាសរសេរព័ត៌មានម្នាក់ ៣ ចំណុចពីប្រទេសម៉ាឡេស៊ី ដោយប្រើ Google, CHART GPT GEMINI ចូលកម្មវិធី Microsoft 365 Note។
លោកនាយកសាលាវត្ដបូព៌ បានប្រាប់ភ្នំពេញប៉ុស្ដិ៍ថា៖ «សិស្សានុសិស្សបានជួបប្រជុំជាមួយនាយកសាលា នាយិកាសាលា នាយករង គ្រូបន្ទុកថ្នាក់ គ្រូជំនួយការ និង សមាជិកក្រុម ទាំងពីរប្រទេសតាមរយៈ ZOOM ជាលើកដំបូង ហើយនិយាយណែនាំខ្លួន និងក្រុមដែលពួកគេធ្វើគម្រោង (Project D, From D01 to D10)»។
ការផ្លាស់ប្តូរវប្បធម៌តាមរយៈបច្ចេកវិទ្យា AI ជាមួយសិស្សានុសិស្សម៉ាឡេស៊ីនេះ ផ្តោតលើប្រធានបទចំនួនដប់ ដែលអនុញ្ញាតឱ្យក្រុមសិស្សានុសិស្សទាំងពីរប្រទេសស្វែងយល់ និងបង្ហាញទិដ្ឋភាពវប្បធម៌ផ្សេងៗ។
ប្រធានបទទាំងនេះរួមមាន អាហារប្រពៃណី ហ្គេម សិប្បកម្ម សម្លៀកបំពាក់ តន្ត្រី និងរបាំ ឧបករណ៍ភ្លេងបុរាណ ចម្រៀងប្រពៃណីរបស់កុមារ រឿងនិទានប្រជាប្រិយ ពាក្យវប្បធម៌ប្រចាំថ្ងៃ និងទីតាំងប្រវត្តិសាស្ត្រ។
![](https://pppkhmer.sgp1.cdn.digitaloceanspaces.com/image/main/20247/25_7_2024_wat_bo_school_in_siem_reap2.jpg)
សិស្សានុសិស្សជួបប្រជុំជាមួយនាយកសាលា នាយិកាសាលា នាយករង គ្រូបន្ទុកថ្នាក់ គ្រូជំនួយការ និង សមាជិកក្រុមនៃសាលាបឋមសិក្សាវត្តបូព៌ក្នុងខេត្តសៀមរាប ធ្វើការផ្លាស់ប្តូរវប្បធម៌តាមរយៈបច្ចេកវិទ្យា AI ជាមួយសិស្សានុសិស្សម៉ាឡេស៊ីតាមរយៈ ZOOM ជាលើកដំបូង។ រូបថត សហការី
លោក គុណរ័ត្ន បាននិយាយថា សាលាបឋមសិក្សាវត្តបូព៌ត្រូវបានទទួលស្គាល់សម្រាប់ស្តង់ដាអប់រំកម្រិតខ្ពស់របស់ខ្លួន ដោយផ្តល់ជូននូវកម្មវិធីសិក្សាធម្មតាដែលរំខានតិចតួចដល់ការចូលរួមរបស់សិស្សនៅក្នុងគម្រោងវប្បធម៌។ សកម្មភាពគម្រោងភាគច្រើនកើតឡើងក្រៅម៉ោងរៀនធម្មតា។
សាលាគាំទ្រកម្មវិធីសិក្សាបច្ចេកវិទ្យារបស់ខ្លួនជាមួយនឹងបន្ទប់ពិសោធន៍ពីរ។ បន្ទប់ពិសោធន៍ទីមួយដែលបំពាក់ដោយកុំព្យូទ័រ ៤០ គ្រឿង និង iPad ចំនួន ៣០ គ្រឿង សម្រាប់សិស្សក្មេងៗរៀនវាយអក្សរ Microsoft Word Excel គំនូរ និង Thinkk Thinkk។
បន្ទប់ពិសោធន៍ទីពីរដែលមានកុំព្យូទ័រ ៣៨ គ្រឿង និង iPad ចំនួន ៣៣ គ្រឿង ត្រូវបានប្រើប្រាស់ដោយសិស្សថ្នាក់ទី៥ និងទី៦ សម្រាប់ការស្រាវជ្រាវតាមគម្រោងក្នុងមុខវិជ្ជាផ្សេងៗ ដូចជា Kahoot, Quiziz និង Mentimer។ គ្រឿងបរិក្ខារទាំងនេះក៏មានសម្រាប់ការស្រាវជ្រាវបន្ថែមសម្រាប់គ្រូ និងសិស្សផងដែរ។
ដើម្បីគាំទ្រគម្រោងផ្លាស់ប្តូរវប្បធម៌បន្ថែមទៀត សាលាបឋមសិក្សាវត្តបូព៌ បានផ្តល់បន្ទប់ប្រជុំ និងជំនួយពីគ្រូ និងជំនួយការផ្នែកព័ត៌មានវិទ្យា។
លោក គុណរ័ត្ន បានលើកឡើងថា៖ «យើងនៅតែបន្តពង្រឹងលើកិច្ចការដែលមានស្រាប់និងកិច្ចការបន្ថែមទៀតជាច្រើនដើម្បីឱ្យសាលានេះនៅតែជាសាលាគំរូ»។
សាលាបឋមសិក្សាវត្តបូព៌ មានភាពលេចធ្លោ និងការអភិវឌ្ឍន៍យ៉ាងឆាប់រហ័សក្នុងទិដ្ឋភាពអប់រំរបស់កម្ពុជា។ នៅឆ្នាំ២០២៣ សាលាបានបញ្ជូនគ្រូបង្រៀនចំនួន ៤០ នាក់ទទួលការបណ្តុះបណ្តាលបច្ចេកវិទ្យាព័ត៌មានទំនើបដែលផ្តល់ដោយវិទ្យាស្ថានអប់រំកូរ៉េខាងត្បូង។
![](https://pppkhmer.sgp1.cdn.digitaloceanspaces.com/image/main/20247/25_7_2024_wat_bo_school_in_siem_reap.jpg)
គំនិតផ្តួចផ្តើមនេះដឹកនាំដោយក្រសួងអប់រំ យុវជន និងកីឡា ផ្តោតលើការរួមបញ្ចូលបញ្ញាសិប្បនិមិត្តទៅក្នុងកម្មវិធីសិក្សា ពង្រឹងវិធីសាស្ត្របង្រៀន និងការរក្សាល្បឿនជាមួយនឹងវឌ្ឍនភាពឌីជីថលជាសកល។
វគ្គបណ្តុះបណ្តាលនេះគឺជាផ្នែកមួយនៃកិច្ចខិតខំប្រឹងប្រែងយ៉ាងទូលំទូលាយក្នុងការលើកកម្ពស់ការប្រើប្រាស់ព័ត៌មានវិទ្យាក្នុងការអប់រំ ដោយធានាថា ទាំងគ្រូ និងសិស្សទទួលបានចំណេះដឹងផ្នែកបច្ចេកវិទ្យាដែលកំពុងវិវត្ត។
ក្រោមការដឹកនាំរបស់លោកនាយកសាលាចាស់ លោក ពឹន គឹមឆេន សាលាបឋមសិក្សាវត្តបូព៌ បានរួមបញ្ចូលគ្នាយ៉ាងជោគជ័យនូវវិធីសាស្ដ្រប្រពៃណីជាមួយនឹងការអនុវត្តការអប់រំបែបទំនើប ដោយទទួលបានការទទួលស្គាល់ថាជាសាលាគំរូ។
សាលាបានអនុវត្តស្តង់ដាទូលំទូលាយដែលសង្កត់ធ្ងន់លើការអនុវត្តរបស់សិស្ស ប្រសិទ្ធភាពនៃការបង្រៀន និងការចូលរួមសហគមន៍៕