រដ្ឋមន្រ្តីក្រសួងអភិវឌ្ឍជនបទ លោកឆាយ ឬទ្ធិសែន ប្រគល់ជ័យលាភីជាខេត្តទី៨ ដែលបញ្ចប់ការបន្ទោបង់ពាសវាលពាសកាល ដលអភិបាលខេត្តកំពង់ចាម លោក អ៊ុន ចាន់ដា កាលពីម្សិលមិញ។ រូបថត ក្រសួងអភិវឌ្ឍជនបទ
កំពង់ចាមៈ កំពង់ចាមត្រូវបានប្រកាសជាខេត្តបញ្ចប់ការបន្ទោបង់ពាសវាលពាសកាល(ODF) ដែលធ្វើឱ្យចំនួនខេត្ត ដែលបញ្ចប់ការបន្ទោបង់ពាសវាលពាសកាលនេះកើនឡើងដល់៨គិតត្រឹមថ្ងៃទី២៥ ខែកក្កដានេះ។
ខេត្ត ៧ ផ្សេងទៀតដែលសម្រេចបាន ការបញ្ចប់ការបន្ទោបង់ពាសវាលពាសកាលរួមមាន ខេត្តស្វាយរៀង ព្រៃវែង កណ្ដាល កំពង់ស្ពឺ កំពង់ឆ្នាំង កែប និងព្រះសីហនុ។ នេះបើយោងតាមរដ្ឋមន្រ្តីក្រសួងអភិវឌ្ឍជនបទ លោកឆាយ ឬទ្ធិសែនក្នុងឱកាសប្រកាសទទួលជ័យលាភី ខេត្តកំពង់ចាមជាខេត្តបញ្ចប់ការបន្ទោបង់ពាសវាលពាសកាល ដែលមានអ្នកចូលរួមជាង២ ០០០នាក់។
លោករដ្ឋមន្រ្តីមានប្រសាសន៍ថា៖ «ផ្អែកតាមផែនការឆ្នាំ២០២៤នេះ នឹងមានខេត្តចំនួន ៥ថ្មី បន្ថែមទៀត ទទួលពាន ជាខេត្តបញ្ចប់ការបន្ទោបង់ពាសវាលពាសកាល ដោយជោគជ័យ ដែលធ្វើ ឱ្យចំនួនខេត្ត ODF កើនសរុប ១៣ខេត្ត លើ ២៥រាជធានី ខេត្តនៅទូទាំងប្រទេស»។
រីឯខេត្តដែលគ្រោងប្រកាសបញ្ចប់ការបន្ទោរបង់ពាសវាលពាសកាលនាពេលខាងមុខរួមមាន ខេត្តត្បូងឃ្មុំ បន្ទាយមានជ័យ សៀមរាប និង ខេត្តរតនគិរី ជាដើម។
អភិបាលខេត្តកំពង់ចាម លោក អ៊ុន ចាន់ដា បានលើកឡើងថា ស្ថានភាពអនាម័យ នៅក្នុងខេត្តកំពង់ចាម មានខ្នងផ្ទះប្រើប្រាស់បង្គន់អនាម័យ១០០ភាគរយ។ ក្នុងនោះ ខ្នងផ្ទះមានបង្គន់ប្រើប្រាស់ផ្ទាល់ខ្លួនចំនួន ៩២,៦១ ភាគរយ និងប្រើប្រាស់រួម ៧,៣៩ ភាគរយ។ ហេតុនេះ ស្ថានភាពក្រុង ស្រុក ឃុំ សង្កាត់ និងភូមិ ដែលសម្រេចបានការបន្ទោបង់ពាសវាលពាសកាល សរុប ១០០ភាគរយ។
លោកបញ្ជាក់ថា៖ «ការបញ្ចប់ការបន្ទោបង់ពាសវាលពាសកាលនេះ គឺជាមោទនភាព ធំធេងណាស់ សម្រាប់រដ្ឋបាលខេត្តកំពង់ចាម ក៏ដូចពលរដ្ឋខេត្តកំពង់ចាមទាំងមូល»។
លោកបានលើកឡើងថា ការសម្រេចបានសមិទ្ធផលនេះ គឺពិតជា កើតឡើងដោយសារការតាំងចិត្ត ការប្តេជ្ញាចិត្តរួមគ្នារបស់ថ្នាក់ដឹកនាំ និងមន្ត្រីពាក់ព័ន្ធក្នុងការខិតខំប្រឹងប្រែង ជំរុញឱ្យសម្រេចបាននូវការបញ្ចប់ការបន្ទោបង់ពាសវាលពាសកាល នៅត្រឹមឆ្នាំ២០២៤ ដែលស្របតាមគោលដៅដែលក្រសួងអភិវឌ្ឍន៍ជនបទ បានកំណត់ តាមផែនការដាក់ចេញដោយជោគជ័យ។
ក្រៅពីនោះ វិស័យផ្គត់ផ្គង់ទឹកស្អាត និងអនាម័យក្នុងខេត្ត ក៏មានការកើនឡើងជាលំដាប់ផងដែរ ដោយសារតែជីវភាពប្រជាពលរដ្ឋ មានការរីកចំរើន។ ជាក់ស្ដែងក្នុងឆ្នាំ២០២៤ បណ្ដាញប្រព័ន្ធទុយោទឹកមានចំនួន៦១កន្លែង ដែលសរុបមានអ្នកប្រើប្រាស់ទឹកស្អាត៩៥,២៥ភាគរយ ។
អង្គការភ្លែនអន្តរជាតិកម្ពុជា ក៏បានអបអរសាទរដល់ខេត្តកំពង់ចាម ដែលទទួលបានជ័យលាភីជាខេត្តទី៨ បានបញ្ចប់ការបន្ទោបង់ពាសវាលពាសកាល។
អង្គការបានកត់សម្គាល់ថា នេះជាសមិទ្ធិផលដ៏ត្រចះត្រចង់មួយ ក្រោមការដឹកនាំរបស់ក្រសួងអភិវឌ្ឍជនបទ សហការជាមួយរដ្ឋបាលខេត្តកំពង់ចាម ក្រោមការគាំទ្ររបស់អង្គការភ្លែនអន្តរជាតិកម្ពុជា និងអង្គការដៃគូអភិវឌ្ឍផ្សេងៗទៀត។
លោករដ្ឋមន្ត្រីក៏បានលើកឡើងក្នុងឱកាសនោះដែរថា ជាមួយនឹងសមិទ្ធផល រីកចម្រើនលើគ្រប់វិស័យ របស់ខេត្តកំពង់ចាម ធ្វើឱ្យកម្រិតជីវភាពរបស់ពលរដ្ឋ កាន់តែប្រសើរឡើង។ ជាពិសេស ការកែលម្អលក្ខខណ្ឌនៃការរស់នៅតាមរយៈការលើកកម្ពស់ការផ្គត់ផ្គង់សេវាទឹកស្អាត និងអនាម័យ។ ទាំងនោះ បានផ្លាស់ប្ដូរឥរិយាបថប្រជាពលរដ្ឋ ឱ្យប្ដូរទម្លាប់ពីការផឹកទឹកគ្មានសុវត្ថិភាព មកផឹកទឹកស្អាត ដែលជួយទ្រទ្រង់សុខភាព និងពីការបន្ទោបង់ពាសវាលពាសកាល ទៅជាប្រើប្រាស់បង្គន់អនាម័យ និងរស់នៅ បែបស៊ីវិល័យ ។
លោករដ្ឋមន្ត្រីបានឱ្យដឹងថា នាពេលបច្ចុប្បន្ន ក្រសួងកំពុងបន្តអនុវត្តផែនការសកម្មភាពជាតិ ស្ដីពីការផ្គត់ផ្គង់ទឹកស្អាត ការសម្អាត និងអនាម័យជនបទ។ មកដល់ពេលនេះ អត្រាគ្របដណ្ដប់ ទឹកស្អាត និងអនាម័យជនបទ ទូទាំងប្រទេស សម្រេចបានប្រមាណជា ៨១ភាគរយ និងឆ្នាំ២០៣០ ត្រូវសម្រេច ឱ្យបាននូវអត្រាគ្រប់ដណ្ដប់១០០ភាគរយ។
ចាប់តាំងឆ្នាំ ២០២៣ ដល់ពេលបច្ចុប្បន្ននេះ ក្រសួងបានផ្តល់បង្គន់អនាម័យតាមខ្នងផ្ទះជាង២៨ ០០០ ហើយបង្គន់អនាម័យប្រើប្រាស់រួម ៧៣កន្លែង និងកន្លែងលាងសម្អាតដៃបានចំនួន ២ ៤០០កន្លែង៕
