កំណាត់ផ្លូវជាតិលេខ១០ ពីឃុំប្រម៉ោយ ទៅឃុំអូរសោម ក្នុងស្រុកវាលវែង ខេត្តពោធិ៍សាត់បានប្រេះស្រុត។ រូបថត កោះកុង ស្រុកកំណើតខ្ញុំ
ពោធិ៍សាត់ៈ កំណាត់ផ្លូវជាតិលេខ១០ ពីឃុំប្រម៉ោយ ទៅឃុំអូរសោម ក្នុងស្រុកវាលវែង ខេត្តពោធិ៍សាត់បានប្រេះស្រុត ហើយចរាចរណ៍ត្រូវបានផ្អាកជាបណ្តោះអាសន្ន ដោយសារតែមានភ្លៀងធ្លាក់ជាច្រើនថ្ងៃមកនេះ។
លោកធាង ឡេង អភិបាលស្រុកវាលវែងបានឱ្យដឹងថា នៅក្នុងដើមខែវស្សានេះ ភ្លៀងបានចាប់ផ្តើមធ្លាក់ប្រមាណកន្លះខែមកហើយ ដែលបណ្តាលឱ្យកំណាត់ផ្លូវជាតិលេខ១០ ដែលក្រុមហ៊ុនវិនិយោគចិនមួយកំពុងតែសាងសង់នោះបានប្រេះស្រុត។ ឧប្បត្តិហេតុប្រេះស្រុតនេះបានធ្វើឱ្យ ចរាចរណ៍ត្រូវបានផ្អាកចាប់ពីល្ងាច ថ្ងៃទី២៥ កក្កដាមក។
លោកបញ្ជាក់ថា៖«កំណាត់ផ្លូវហ្នឹង វាប្រេះស្រុត។ កន្លែងបាក់ហ្នឹងចូលប្រហែលជាជាង១០០ម៉ែត្រអីហើយកន្លែងហ្នឹង ដោយសារតែភ្លៀងច្រើន។ ឥលូវលែងឆ្លងកាត់បានហើយចាប់ទាំងពីល្ងាចមិញ (ថ្ងៃទី២៥ កក្កដា)។ ផ្លូវហ្នឹងក្រុមហ៊ុនវិនិយោគចិនមួយកំពុងតែធ្វើ មិនទាន់រួចទេ តែក៏ជួបបញ្ហាហ្នឹងឡើង»។
លោកបានឱ្យដឹងថា រហូតមកដល់នឹងថ្ងៃទី២៦ កក្កដានេះ ភ្លៀងនៅតែបន្តធ្លាក់ ដែលជួនកាលធ្លាក់ខ្លាំង និងជួនកាលធ្លាក់តិចតួច។ ទោះយ៉ាងណា ដោយសារតែនៅទីនោះជាតំបន់ភ្នំ ទើបការធ្លាក់ភ្លៀងនេះ មិនបណ្តាលឱ្យប៉ះពាល់ដល់ ផលដំណាំ និងផ្ទះសម្បែងរបស់ពលរដ្ឋនោះទេ។
លោកក៏បានលើកឡើងផងដែរថា ដើម្បីធ្វើចរាចរណ៍បណ្តោះអាសន្ន មានតែមធ្យោបាយធ្វើផ្លូវវាងមួយទេ នៅពេលដែលភ្លៀងរាំង។
គម្រោងស្ថាបនាផ្លូវជាតិលេខ១០ ដែលមានប្រវែងជាង១៩៨គ.ម និងទទឹង៩ម៉ែត្រ សម្រេចបាន៨៨,៣៨ភាគរយ គិតត្រឹមដំណាច់ខែមិថុនាកន្លងមក។ គម្រោងសាងសង់ផ្លូវនេះមានរយៈពេល ៦៦ខែ ដែលបានចាប់ផ្ដើមសាងសង់ពីថ្ងៃទី១៨ ខែធ្នូ ឆ្នាំ២០១៩ មកហើយគ្រោងនឹងបញ្ចប់នាខែមិថុនា ឆ្នាំ២០២៥ខាងមុខនេះ។ នេះបើយោងតាមក្រសួងសាធារណការ។
គម្រោងនេះចាប់ផ្តើមនៅភូមិកញ្ចាំង ឃុំស៊ុង ស្រុកសំឡូត ខេត្តបាត់ដំបង ឆ្លងកាត់ឃុំប្រម៉ោយ ស្រុកវាលវែង ខេត្តពោធិ៍សាត់ រហូតដល់ផ្លូវជាតិលេខ៤៨ ក្នុងសង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។
ទោះបីជាស្ថិតក្នុងកំពុងតែសាងសង់យ៉ាងណាក៏ដោយ ក៏នៅរដូវវស្សានេះផ្លូវជាតិលេខ១០ ប្រជាពលរដ្ឋអាចធ្វើដំណើរបានឆ្លងកាត់បានដែរ។
ទាក់ទងទៅនឹងបញ្ហាទឹកភ្លៀងនេះផងដែរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោកចាន់ សុវុឌ្ឍ និងក្រុមការងារបានចុះពិនិត្យស្ថានភាពទឹកជំនន់ នៅស្រុកចំនួន២ក្នុងខេត្តបាត់ដំបងកាលពីថ្ងៃទី២៤ ខែកក្កដានេះ។
ការចុះពិនិត្យជាក់ស្តែងនេះបង្ហាញថា មានផ្ទៃដីទំហំ ៣២៣ហិកតា នៅឃុំព្រែកនរិន្ទ ស្រុកឯកភ្នំ និងឃុំភ្នំសំពៅ ស្រុកបាណន់បានទទួលរងការជន់លិច។ យ៉ាងណា ស្ថានភាពស្ថានភាពទឹកជំនន់កំពុងស្រកទៅវិញជាបណ្តើរៗហើយ។ នេះបើយោងតាមក្រសួងកសិកម្ម។
លោករដ្ឋលេខាធិការ បានចាត់តាំងឱ្យមន្ទីរកសិកម្ម រុក្ខាប្រមាញ់ និងនេសាទខេត្តសហការជាមួយអាជ្ញាធរមូលដ្ឋាន រិះរកវិធី និងមធ្យោបាយផ្សេងៗ ដើម្បីបង្ហូរទឹកនេះឱ្យស្រកបានលឿន ចៀសវាងការខូចខាតដំណាំស្រូវធ្ងន់ធ្ងរ។
លោកអ៊ិន សុវណ្ណមុន្នី អនុប្រធានមន្ទីរកសិកម្មខេត្តបានឱ្យដឹងថា មន្ទីរកសិកម្ម បានសហការជាមួយនឹងមន្ទីរធនធានទឹក និងឧតុនិយមខេត្ត ដើម្បីធ្វើការរំដោះទឹកចេញចាប់ទាំងពីថ្ងៃទី២៤ កក្កដាមកម៉្លេះ ខណៈពេលដែលទឹកក៏បានចាប់ផ្តើមស្រកទៅវិញផងដែរ។
លោកបានអះអាងថា ទោះបីជាមានការលិចយ៉ាងណាក៏ដោយ ក៏វាមិនបណ្តាលឱ្យមានការខូចខាតស្រូវនោះដែរ៕
