សញ្ញាគ្រោះរញ្ជួយដីកម្រិត ៥,១ រ៉ិចទ័រ បានវាយប្រហារតំបន់ជុំវិញនៃខេត្ដ Kon Tum ក្នុងប្រទេសវៀតណាម នៅម៉ោង ១១:៣៥នាទីព្រឹក។ រូបថត Volcanodiscovery
ខេត្ដរតនគិរី៖ ឧប្បត្ដិហេតុរញ្ជួយដីមិនធ្លាប់មានពីមុនមកដែលបានកើតឡើងក្នុងប្រទេសវៀតណាមនៅថ្ងៃនេះ បានធ្វើឱ្យរង្គើតំបន់ខ្លះនៃខេត្តរតនគិរី។
វាជាឧប្បត្ដិហេតុធម្មជាតិលើកដំបូងចាប់តាំងពីការផ្ទុះភ្នំភ្លើងដែលបានបង្កើតបឹងយក្សឡោមដែលមានអង្កត់ផ្ចិតប្រហែល ៨០០ ម៉ែត្រ និងជម្រៅរហូតដល់ ៤៨ ម៉ែត្រ កាលពីប្រមាណ ៧០ម៉ឺនឆ្នាំមុន។
គ្រោះរញ្ជួយដីកម្រិត ៥,១ រ៉ិចទ័រ បានវាយប្រហារតំបន់ជុំវិញនៃខេត្ដ Kon Tum ក្នុងប្រទេសវៀតណាម នៅម៉ោង ១១:៣៥នាទីព្រឹក ម៉ោងក្នុងស្រុក ដោយបង្កជាការរញ្ជួយដីនៅទូទាំងតំបន់។
ផលប៉ះពាល់នៃការរញ្ជួយដីនេះបានធ្វើឱ្យប្រជាជនក្នុងប្រទេសកម្ពុជាមានអារម្មណ៍ព្រឺព្រួច ជាពិសេសនៅឃុំឡាបានសៀក ក្នុងក្រុងបានលុង និងឃុំប៉ក់ញ៉ៃ ស្រុកអូរយ៉ាដាវ។
លោក ឆាយ ធី មេឃុំប៉ាតេ ស្ថិតក្នុងស្រុកអូរយ៉ាដាវ ខេត្តរតនគិរី បានឱ្យដឹងថា ហេតុការណ៍រញ្ជួញដីនេះកើតឡើងដោយអន្លើរនៅសង្កាត់ឡាបានសៀក ក្រុងបានលុង ឃុំប៉ក់ញ៉ៃ ស្រុកអូរយ៉ាដាវជាដើម។
លោកបានបន្ដថា៖ «វារង្គើដី និងញ័រផ្ទះ តែមួយភ្លែតនៅស្រុកអូរយ៉ាដាវ បរកែវ អណ្ដូងមាស ក្រុងបានលុង។ ប៉ុន្ដែវាមិនបានធ្វើឱ្យខូចខាតទ្រព្យសម្បត្ដិ ឬរបួសស្នាមអ្វីឡើយ»។
លោកបានបន្ដថា ចំពោះភូមិប្លង់ នៃឃុំប៉ាតេ មានប្រជាពលរដ្ឋរាយការណ៍ពីហេតុការណ៍រង្គើផ្ទះ ៣ ខ្នង។
លោក ធី បានបញ្ជាក់ថា នេះជាហេតុការណ៍លើកដំបូងដែលហើយតាំងពីលោកមករស់នៅខេត្ដរតនគិរីអំឡុងឆ្នាំ១៩៨៦។
វីដេអូកាំមេរ៉ា ថតជាប់សកម្មភាពរង្គើនៅស្ថានីយ៍ប្រេងឥន្ធនៈមួយកន្លែងនៅក្នុងក្រុងបាលុង ខេត្តរតនគិរី។ រូបថត ឆាយ ធី
លោកបានប្រាប់ភ្នំពេញប៉ុស្ដិ៍ថា៖ «[អភូតិហេតុធម្មជាតិ] មានតែរាប់ពាន់ឆ្នាំមុន ដោយគេនិយាយថា បឹងយក្សឡោមជាបំផ្ទុះភ្នំភ្លើង»។
Volcanodiscovery បានរាយការណ៍ថា ការញ័ររញ្ជួយដីតិចតួចបានកើតឡើងនៅក្រុងបានលុង និងលំផាត់។ នៅរាជធានីភ្នំពេញ ដែលស្ថិតនៅចម្ងាយ ៥០៨ គីឡូម៉ែត្រ ភាគនិរតីនៃចំណុចកណ្តាល ការរញ្ជួយដីនេះស្ទើរតែមិនមានការកត់សម្គាល់ពីប្រជាពលរដ្ឋនោះទេ។
គ្រោះរញ្ជួយដីបានវាយប្រហារប្រទេសវៀតណាម ដែលបណ្តាលឱ្យមានការរញ្ជួយយ៉ាងខ្លាំងនៅជិតចំណុចកណ្តាល ដោយសារតែវាមានអានុភាពរញ្ជួយជម្រៅ ៤,៥ គីឡូម៉ែត្រ។
របាយការណ៍បានបង្ហាញថា ការរញ្ជួយនេះបានជះឥទ្ធិពលទៅដល់តំបន់មួយចំនួន ដូចជា ដាណាង ទីក្រុង Pleiku និងទីក្រុងហូជីមិញ។
ថ្វីត្បិតតែកម្លាំងរញ្ជួយនេះ មិនទាន់មានរបាយការណ៍ភ្លាមៗអំពីការខូចខាត ឬស្លាប់ និងរបួសធ្ងន់ធ្ងរនៅឡើយ ការត្រួតពិនិត្យ និងការវាយតម្លៃកំពុងត្រូវបានបន្ដធ្វើ។
យោងតាមសារព័ត៌មាន Nation របស់ថៃ បានឱ្យដឹងថា ការរញ្ជួយដីកម្រិត ៥,៣ រិចទ័រ នៅក្នុងប្រទេសវៀតណាម បានបង្កការរញ្ជួយនៅក្នុងខេត្តអ៊ូប៊ុន រ៉ាតឆាថានី និង សាកន ណាខនNakhon របស់ប្រទេសថៃផងដែរ។
ការរញ្ជួយដីដែលកើតឡើងនៅជម្រៅ ១០ គីឡូម៉ែត្រ និងចម្ងាយ ៣៦១ គីឡូម៉ែត្រភាគអាគ្នេយ៍នៃស្រុក មួង នៃខេត្ត អ៊ូប៊ុន រ៉ាតឆាថានី បានបណ្តាលឱ្យអគារនានាញ័រ និងធ្វើឱ្យមនុស្សវិលមុខ។
សកម្មភាពរញ្ជួយដីរបស់ប្រទេសវៀតណាមកន្លងមក រួមមាន ការរញ្ជួយដីកម្រិត ៦,២ រិចទ័រក្នុងឆ្នាំ២០១៩ នៅជិតទីក្រុង Dien Bien Phu និងការរញ្ជួយដីកម្រិត ៥,៧ រ៉ិចទ័រនៅឆ្នាំ២០២១ និងឆ្នាំ២០១៨។
ការរញ្ជួយដីនៅថ្ងៃនេះ បានផ្ដល់ជាសញ្ញាក្រើនរំឭកប្រុងប្រយ័ត្នក្នុងចំណោមសហគមន៍ និងអាជ្ញាធរមូលដ្ឋាននៃប្រជាជាតិអាស៊ីអាគ្នេយ៍៕
