ព្រះកេសរបស់អសុរា ត្រូវបានស្រង់ចេញពីកសិណ។ រូបថត អាជ្ញាធរអប្សរា
សៀមរាប៖ កិច្ចខិតខំប្រឹងប្រែងជួសជុលបច្ចុប្បន្នកំពុងដំណើរការនៅខ្លោងទ្វារទន្លេអ៊ុំ ក្រុងអង្គរធំ បន្ទាប់ពីខ្យល់ព្យុះកាលពីពេលថ្មីៗនេះ ធ្វើឱ្យមានការខូចខាតដល់ចម្លាក់បុរាណមួយចំនួន។
លោក កឹម សុធិន ជាអគ្គនាយក និងជំនួយការអាជ្ញាធរជាតិអប្សរា ទទួលបន្ទុកត្រួតពិនិត្យការអភិរក្សបូជនីយដ្ឋាន និងបុរាណវិទ្យា បានឱ្យដឹងថា ការដួលរលំដើមឈើនៅខ្លោងទ្វារទន្លេអុំ ក្រុងអង្គរធំ បានធ្វើឱ្យខូចខាតដល់ចម្លាក់អសុរាចំនួន ៥ និងទេវតាចំនួន៣។
លោក សុធិន បានឱ្យដឹងថា៖ «ព្រះកេសរបស់អសុរាមួយបានខ្ទាតឆ្ងាយប្រហែល ១០ ម៉ែត្រ ហើយបំបែកជាច្រើនបានធ្លាក់ទៅក្នុងទឹកកសិណ»។
លោកបានបន្ដថា បច្ចុប្បន្ននេះ ក្រុមការងារបានជ្រមុជទឹកស្រង់បំណែកទាំងនោះបានឡើងគោកវិញអស់ហើយ នៅឡើយតែការជួសជុលតភ្ជាប់វិញទេ។
លោកបានប្រាប់ភ្នំពេញប៉ុស្ដិ៍ថា៖ «នៅសល់ ២-៣ រូបទៀត ដែលមិនទាន់បានផ្គុំវិញរួចរាល់ ដោយសារសព្វថ្ងៃនេះ មានភ្លៀងធ្លាក់ច្រើន ដែលបង្កជាការលំបាកក្នុងការបិតភ្ជាប់ចម្លាក់ឡើងវិញ»។
លោក Andy Brouwer អ្នកស្រាវជ្រាវឯករាជ្យ ដែលមានចំណាប់អារម្មណ៍យ៉ាងជ្រាលជ្រៅចំពោះវប្បធម៌ខ្មែរ ជាពិសេសប្រាសាទ និងប្រវត្តិសាស្ត្រ បានចែករំលែកព័ត៌មានថ្មីៗនៅលើប្រព័ន្ធផ្សព្វផ្សាយសង្គម។
លោកបន្តថា ក្រុមការងារអប្សរាបានស្រង់ព្រះកេសអសុរាចេញពីកសិណ ហើយកំពុងធ្វើការជួសជុលចម្លាក់ដែលរងការខូចខាតផ្សេងទៀតឱ្យបានយ៉ាងឆាប់រហ័ស។
មន្ត្រីជំនាញជួសជុលចម្លាក់ដែលបានបាក់ដួលរលំនៅខ្លោងទ្វារទន្លេអ៊ុំ។ រូបថត អាជ្ញាធរអប្សរា
លោក Brouwer ដែលតែងតែផ្សព្វផ្សាយពីការជួញដូរវត្ថុបុរាណខ្មែរខុសច្បាប់របស់បុគ្គលនានា ដូចជាលោក Douglas Latchford បាននិយាយថា៖ «យើងមើលឃើញពីឧប្បត្ដិហេតុនេះ ហើយវាបង្ហាញពីភាពផុយស្រួយនៃប្រាសាទអង្គរដែលអាចរងគ្រោះពីបញ្ហាធម្មជាតិ»។
ឆ្លើយតបនឹងឧបទ្ទវហេតុនេះ អាជ្ញាធរជាតិអប្សរាបានចាត់វិធានការយ៉ាងសកម្ម ដើម្បីទប់ស្កាត់មិនឲ្យកើតមានឡើងនៅថ្ងៃអនាគត។
កាលពីថ្ងៃទី ២៧ ខែកក្កដា អាជ្ញាធរអប្សរា បានកាត់ក្រី និងដកហូតដើមឈើមានហានិភ័យនៅរមណីយដ្ឋានអង្គរ។
យោងតាមទំព័រហ្វេសប៊ុករបស់អាជ្ញាធរអប្សរា បានឱ្យដឹងថា៖ «ក្រុមការងារនាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ នៃអាជ្ញាធរជាតិអប្សរាចុះពិនិត្យ និងអនុវត្តវិធានការបន្ទាន់ចំពោះដើមឈើមួយចំនួនដែលមានហានិភ័យនៅរមណីយដ្ឋានអង្គរ ដើម្បីធានាសុវត្តិភាពជូនភ្ញៀវទេសចរ ចៀសវាងគ្រោះថ្នាក់ផ្សេងៗ»។
វាជាផ្នែកមួយនៃអាជ្ញាធរជាតិអប្សរា (ANA) ដែលគ្រោងកាប់ និងកាត់ក្រីដើមឈើជាច្រើនដើម ដើម្បីសុវត្ថិភាពនៅឧទ្យានបុរាណវិទ្យាអង្គរ។
ក្រុមការងារអាជ្ញាធរជាតិអប្សរាចុះពិនិត្យ និងអនុវត្តវិធានការបន្ទាន់ចំពោះដើមឈើមួយចំនួនដែលមានហានិភ័យនៅរមណីយដ្ឋានអង្គរ នាពេលកន្លងមក។
នៅក្នុងខែកក្កដា ឆ្នាំ២០២២ អាជ្ញាធរអប្សរា បានប្រកាសផែនការកាប់ ឬកាត់ក្រីដើមឈើដែលមានហានិភ័យខ្ពស់ជាង ១០០ ដើមនៅតាមប្រាសាទចំនួនប្រាំពីរ និងតំបន់សំខាន់ៗនៅឧទ្យាន ដើម្បីធានាសុវត្ថិភាពភ្ញៀវទេសចរ និងសាធារណជន។
នាយកដ្ឋានគ្រប់គ្រងព្រៃឈើ ទេសភាព វប្បធម៌ និងបរិស្ថាន គ្រោងកាប់ឈើ២៣ដើម និងកាត់មែក១២៨ដើមបន្ថែមទៀត។
សកម្មភាពជាក់លាក់រួមមានការកាប់ដើមឈើចំនួន ៤ ដើម និងកាត់ចេញចំនួន ៥៣ ដើមនៅបរិវេណប្រាសាទអង្គរវត្ត ព្រមទាំងការដកដើមឈើចំនួន ១៣ ដើមនៅប្រាសាទបាយ័ន។ កិច្ចខិតខំប្រឹងប្រែងស្រដៀងគ្នានេះកំពុងដំណើរការនៅទីតាំងសំខាន់ៗផ្សេងទៀតនៅក្នុងឧទ្យាន។
វិធានការទាំងនេះ ត្រូវបានធ្វើឡើងបន្ទាប់ពីឧបទ្ទវហេតុកន្លងមក ដូចជា មែកឈើធំធ្លាក់មកលើរថយន្តក្រុងទេសចរណ៍ នៅប្រាសាទប្រែរូប ដែលជាសំណាងល្អមិនបណ្តាលឱ្យមានអ្នករងរបួស៕
