ឧបករណ៍ផលិតទឹកស្អាតពីបរិយាកាសត្រូវបានសាងសង់នៅតំបន់ដែលជួបប្រទះបញ្ហាកង្វះខាតប្រភពទឹកខ្លាំង។ រូបថត ក្រសួងអភិវឌ្ឍន៍ជនបទ
ភ្នំពេញៈ ស្ថានីយផលិតទឹកស្អាតពីបរិយាកាសសហគមន៍ចំនួន ៥ត្រូវបានសាងសង់នៅតំបន់ដែលជួបប្រទះបញ្ហាកង្វះខាតប្រភពទឹកខ្លាំង ដើម្បីចូលរួមកាត់បន្ថយភាពក្រីក្រ និង លើកកម្ពស់សុខភាពពលរដ្ឋនៅតំបន់ដាច់ស្រយាល។
កង្វះទឹកស្អាតប្រើប្រាស់នៅតំបន់ជនបទមួយចំនួនបានបង្កផលប៉ះពាល់យ៉ាងខ្លាំងដល់ ប្រជាពលរដ្ឋទាំងជីវភាពរស់នៅ សុខភាព និងសុខមាលភាព។ នៅតំបន់ជនបទមួយចំនួនពុំមានប្រភពទឹកគ្រប់គ្រាន់ទាំងប្រភពទឹកលើដី ដូចជាទន្លេ ស្ទឹង បឹងបួរ និងទឹកក្រោមដី សម្រាប់ផលិតទឹកស្អាត ជូនពលរដ្ឋប្រើប្រាស់នោះទេ។
ក្រសួងអភិវឌ្ឍន៍ជនបទ តាមរយៈគម្រោងកម្មវិធីអភិវឌ្ឍន៍ផ្នែកផ្គត់ផ្គង់ទឹកស្អាត និង អនាម័យជនបទជំហានទី ៣ ដោយមានការគាំទ្រពីធនាគារអភិវឌ្ឍន៍អាស៊ី (ADB) បានសាកល្បងបំពាក់ឧបករណ៍ផលិតទឹកស្អាតពីបរិយាកាស សម្រាប់តំបន់ជនបទ ដែលជួបប្រទះបញ្ហាកង្វះខាតប្រភពទឹកចំនួន ៥ ទីតាំង។ ក្នុងនោះរួមមាន ក្នុងខេត្ដកំពត បាត់ដំបង ព្រះវិហារ បន្ទាយមានជ័យ និងឧត្ដរមានជ័យ។
ក្រសួងអភិវឌ្ឍន៍ជនបទលើកឡើងថា៖ «ឧបករណ៍ផលិតទឹកស្អាតពីបរិយាកាស គឺជា បច្ចេកវិទ្យាទំនើបថ្មី ដែលអាចជួយឱ្យប្រជាពលរដ្ឋរស់នៅតំបន់ជនបទដាច់ស្រយាល អាចមានលទ្ធភាពទទួលបានទឹកស្អាតសម្រាប់បរិភោគ»។
ប្រធាននាយកដ្ឋានផ្គត់ផ្គង់ទឹកជនបទ នៃក្រសួងអភិវឌ្ឍន៍ជនបទ លោក ស្រ៊ិន ពុទ្ធី បានឱ្យដឹងថា គម្រោងនេះបានចាប់ផ្តើម កាលពីឆ្នាំ ២០២០ និង បញ្ចប់នៅចុងឆ្នាំ ២០២៤ នេះ។ គម្រោងនេះត្រូវបានផ្តល់ថវិកា ១លានដុល្លារអាមេរិករបស់រដ្ឋាភិបាលជប៉ុន តាមរយៈធនាគារអភិវឌ្ឍអាស៊ី ដើម្បី សាងសង់ស្ថានីយ ឧបករណ៍ផលិតទឹកពីបរិយាកាស នៅកន្លែងគ្មានប្រភពទឹក ទាំងនៅលើដី និងក្រោមដី។
លោកប្រសាសន៍ថា៖ «ការដាក់ឧបករណ៍ផលិតទឹកស្អាតពីបរិយាកាសនេះផ្តល់ទឹកស្អាតឱ្យគាត់ប្រើប្រាស់។ វាជួយកាត់បន្ថយការប្រើប្រាស់ទឹកដែលមិនស្អាតរបស់ពលរដ្ឋទៅជាការប្រើប្រាស់ទឹកស្អាតវិញ នៅតំបន់ជនបទ»។
លោកបានបន្ថែមថា ម្យ៉ាងវិញទៀត គម្រោងនេះចូលរួមចំណែកក្នុងការកាត់បន្ថយភាពក្រីក្រ ពលរដ្ឋរស់នៅប្រកបដោយសុខភាពល្អ តាមរយៈនៃការផ្តល់ ការផ្គត់ផ្គង់ទឹកស្អាត និងអនាម័យដល់ពលរដ្ឋដែលនៅតំបន់ជនបទ។
លោកថ្លែងដូច្នេះថា៖ «ទឹកហ្នឹង យើងមិនចេះតែបណ្តោយឱ្យពលរដ្ឋប្រើទេ។ យើងសុទ្ធតែយកទៅធ្វើតេស្តមើលគុណភាពទឹកនៅមន្ទីរពិសោធន៍។ អញ្ជឹងទឹកហ្នឹងល្អទាំងអស់ អត់មានប៉ះពាល់អីទេ»។
លោកបានឱ្យដឹងផងដែរថា ម៉ាស៊ីនសម្រាប់ស្រូបទឹកពីបរិយាកាសនេះត្រូវបានទិញពីប្រទេស អ៊ីតាលី មក។
លោក ខៀវ តេង មេឃុំ តាកែន ស្ថិតក្នុងស្រុក ឈូក ខេត្តកំពត បានឱ្យដឹងថា ស្ថានីយផលិតទឹកស្អាតពីបរិយាកាសត្រូវបានសាងសង់ និង ដាក់ឱ្យដំណើរក្នុងឃុំ តាកែន ជិតមួយឆ្នាំមកហើយ។ ស្ថានីយនេះផលិតទឹកបានចន្លោះពី ១០០លីត្រ ទៅ ២០០លីត្រក្នុងមួយថ្ងៃ ដែលអាចផ្តង់ផ្គត់ទឹកស្អាតដល់ពលរដ្ឋរាប់រយគ្រួសារនៅក្នុងភូមិ ចំនួន ៤ ក្នុងឃុំ តាកែន។
លោកមេឃុំបញ្ជាក់ថា៖ «តំបន់ខ្ញុំខ្វះទឹកស្អាត ពិសេសរដូវប្រាំង។ ទោះបីមិនបានពលរដ្ឋប្រើប្រាស់គ្រប់គ្នា ក៏វាបានខ្លះដែរ។ បងប្អូនហូបទឹកហ្នឹងទៅមានសុខភាពល្អដែរហ្នឹង។ ទឹកត្រពាំង អណ្តូងមិនល្អ អត់មានសុវត្ថិភាពទេ»។
ទោះយ៉ាងណា ដើម្បីទទួលបានទឹកពីស្ថានីយនេះយកទៅបរិភោគ ពលរដ្ឋតម្រូវឱ្យជួយបង់កម្រៃសេវាចំនួន២ពាន់រៀលក្នុងទឹក១ប៊ីដុងចំណុះ ២០លីត្រ។
ការផ្តល់ទឹកដោយគិតកម្រៃសេវានេះ គឺដើម្បីធានានិរន្តរភាពនៃដំណើរការស្ថានីយផលិតទឹកនេះ។ នេះ មិនមែនជាកម្រៃលក់ទឹកទេ តែជាកម្រៃយកទៅដើម្បីប្រតិបត្តិការ និងថែទាំស្ថានីយ។ ក្នុងនោះរួមមាន ការសន្សំប្រាក់ទុក សម្រាប់ប្រើប្រាស់ ពេលម៉ាស៊ីន ឬឧបករណ៍ខូចខាត សម្រាប់ទិញម៉ូតូ ឬគោយន្តសម្រាប់ដឹកជញ្ជូន និងរៀបចំបរិស្ថានបន្ថែមទៀតនៅជុំវិញទីធ្លាស្ថានីយជាដើម ព្រោះទឹកត្រូវបានស្រូបពីបរិយាកាស។ នេះបើយោងតាមវីដេអូមួយ ដែលបង្ហោះលើបណ្តាញសង្គមរបស់ក្រសួងអភិវឌ្ឍន៍ជនបទ។
ក្រសួងបញ្ជាក់ថា៖ «យើងក៏គិតពីបញ្ហាប្រឈមដែរ ដែលទាមទារឱ្យមានការគ្រប់គ្រង ភាពជាម្ចាស់របស់សហគមន៍ ត្រូវប្រគល់ស្ថានីយហ្នឹងឱ្យសហគមន៍។ ចឹងមានសហគមន៍សម្រាប់គ្រប់គ្រង ប្រសិនបើអត់មានការគ្រប់គ្រង ថែទាំមិនបានល្អទេ វាធ្វើឱ្យស្ថានីយនេះមិនដំណើរការទេ»។
នាពេលបច្ចុប្បន្ន ក្រសួងអភិវឌ្ឍន៍ជនបទកំពុងបន្តអនុវត្តផែនការសកម្មភាពជាតិ ស្ដីពីការផ្គត់ផ្គង់ទឹកស្អាត ការសម្អាត និងអនាម័យជនបទ។ មកដល់ពេលនេះ អត្រាគ្របដណ្ដប់ ទឹកស្អាត និងអនាម័យជនបទ ទូទាំងប្រទេស សម្រេចបានប្រមាណជា ៨១ភាគរយ និងឆ្នាំ២០៣០ ត្រូវសម្រេច ឱ្យបាននូវអត្រាគ្រប់ដណ្ដប់១០០ភាគរយ៕
