លោក Roy M. Galido មេបញ្ជាការកងទ័ពជើងគោកហ្វីលីពីន (ឆ្វេង) និងលោកនាយករដ្ឋមន្ត្រី ហ៊ុន ម៉ាណែត ចាប់ដៃគ្នាក្នុងជំនួបនាថ្ងៃទី២៩ កក្កដា នៅវិមានសន្តិភាព រាជធានីភ្នំពេញ។ STPM
ភ្នំពេញៈ កម្ពុជា និងហ្វីលីពីនប្ដេជ្ញាពង្រីកកិច្ចសហប្រតិបត្តិការកងទ័ពជើងគោកនៃប្រទេសទាំងពីរឱ្យកាន់តែរឹងមាំតាមរយៈការហ្វឹកហ្វឺនរួមគ្នា ការបណ្ដុះបណ្ដាលធនធានមនុស្ស ការចែករំលែកព័ត៌មាន និងការផ្លាស់ប្ដូរបទពិសោធន៍រវាងកងទ័ពជើងគោកនៃប្រទេសទាំងពីរ។
ការប្តេជ្ញានេះធ្វើឡើងក្នុងជំនួបរវាងលោកនាយករដ្ឋមន្ត្រី ហ៊ុន ម៉ាណែត និងលោក Roy M. Galido មេបញ្ជាការកងទ័ពជើងគោកហ្វីលីពីន នាថ្ងៃទី២៩ កក្កដា នៅវិមានសន្តិភាព រាជធានីភ្នំពេញ។
លោក Roy M. Galido ថ្លែងថា ទំនាក់ទំនង និងកិច្ចសហប្រតិបត្តិការរវាងកងទ័ពជើងគោកហ្វីលីពីន និង កម្ពុជាមានភាពរីកចម្រើនប្រកបដោយផ្លែផ្កា និងបានបង្ហាញការប្ដេជ្ញាចិត្តបន្តពង្រឹង និងពង្រីក កិច្ចសហប្រតិបត្តិការនៃកងទ័ពជើងគោកហ្វីលីពីន-កម្ពុជាឱ្យកាន់តែរឹងមាំថែមទៀត។ នេះបើយោងតាមសេចក្ដីប្រកាសព័ត៌មានបង្ហោះក្នុងបណ្ដាញសង្គមលោកនាយករដ្ឋមន្ត្រីនាថ្ងៃទី២៩ កក្កដា។
លោក ហ៊ុន ម៉ាណែត បានកត់សម្គាល់ថា វគ្គបណ្ដុះបណ្ដាល និងការហ្វឹកហ្វឺនរួមរវាងកងទ័ពហ្វីលីពីន និងកម្ពុជាកន្លងមកបានរួមចំណែកដល់ការកសាងសមត្ថភាព និងការយល់ដឹងពីគ្នាទៅវិញទៅមកបន្ថែមទៀត ក្នុងការត្រៀមខ្លួនឆ្លើយតបចំពោះការគំរាមកំហែងមិនប្រពៃណី ជាយថាហេតុ។
ប្រកាសព័ត៌មានបញ្ជាក់ថា៖ «សម្ដេចធិបតី និងឯកឧត្ដមមេបញ្ជាការកងទ័ពជើងគោក ក៏បានពិភាក្សា និងផ្លាស់ប្ដូរយោបល់លើការពង្រឹង និងពង្រីកកិច្ចសហប្រតិបត្តិការរវាងកងទ័ពជើងគោក នៃប្រទេសទាំងពីរឱ្យកាន់តែរឹងមាំថែមទៀត តាមរយៈការបន្តការហ្វឹកហ្វឺនរួមគ្នា ការបណ្ដុះបណ្ដាលធនធានមនុស្ស ការចែករំលែកព័ត៌មាន និងការផ្លាស់ប្ដូរបទពិសោធន៍ ជាពិសេស ការប្រយុទ្ធប្រឆាំងនឹងឧក្រិដ្ឋកម្មបច្ចេកវិទ្យា ការពង្រឹងសមត្ថភាព ការត្រៀមលក្ខណ:ក្នុងការចូលរួមប្រតិបត្តិការជួយសង្គ្រោះនៅពេលមានគ្រោះមហន្តរាយ និងផ្តល់ជំនួយមនុស្សធម៌ ក៏ដូចជាការជំរុញឱ្យមាននូវកិច្ចសហប្រតិបត្តិការរវាងអង្គភាព និងអង្គភាព នៃកងទ័ពជើងគោកប្រទេសទាំងពីរ នាពេលអនាគតផងដែរ»៕
