![](https://pppkhmer.sgp1.digitaloceanspaces.com/image/main/20247/3_7_2024_road_accident.jpg)
គ្រោះថ្នាក់ចរាចរណ៍រថយន្តដឹកកម្មករ របួសធ្ងន់ស្រាល៦១នាក់កាលពីថ្ងៃទី២៥ ខែមិថុនា ឆ្នាំ២០២៤ លើផ្លូវជាតិលេខ៤ ឃុំត្រពាំងគង ស្រុកសំរោងទង ខេត្តកំពង់ស្ពឺ។ រូបថត FN
ភ្នំពេញៈ គ្រោះថ្នាក់ចរាចរណ៍ក្នុងរយៈពេល ៦ខែឆ្នាំ ២០២៤ នេះបានកើតឡើងចំនួន ១ ៥៣៤លើក ដែលបណ្តាលឱ្យមនុស្សស្លាប់ចំនួន ៧៩៣នាក់ (កើន ៣៧នាក់ ស្មើនឹង៥%) និងរបួសចំនួន ២ ១១៦នាក់ (កើន ៤៤ នាក់ ស្មើ២%)។ នេះបើយោងតាមរបាយការណ៍របស់អគ្គស្នងការដ្ឋាននគរបាលជាតិ។
ចំនួនគ្រោះថ្នាក់ចរាចរណ៍ក្នុងរយៈពេល ៦ខែ ឆ្នាំ ២០២៤ នេះមានការថយចុះចំនួន ១៤ករណី បើបៀបទៅនឹងរយៈពេលដូចគ្នាកាលពីឆ្នាំ ២០២៣ ដែលមានចំនួន ១ ៥៤៨លើក ដែលបណ្តាលឱ្យមនុស្សស្លាប់ ៧៥៦នាក់ និងរបួស ២ ០៧២នាក់។
របាយការណ៍បានបង្ហាញថា មូលហេតុបង្កគ្រោះថ្នាក់ចរាចរណ៍សំខាន់ៗរួមមាន ល្បឿនចំនួន ៤០% មិនគោរពសិទ្ធិ២៤% មិនប្រកាន់ស្តាំ៩% បត់គ្រោះថ្នាក់៩% ប្រជែងគ្រោះថ្នាក់៧% កត្តាយាន៤% ស្រវឹង៣% ជាដើម។
ក្រៅពីនោះ គ្រោះថ្នាក់បង្កដោយអ្នកជិះម៉ូតូ ៤៩% អ្នកបើកបររថយន្តធុនស្រាល៣១% អ្នកបើកបររថយន្តធុនធ្ងន់១១% អ្នកបើកបរយានផ្សេងៗ៧% និងថ្មើរជើង១%។
ក្នុងចំណោមអ្នកស្លាប់ រួមមាន អ្នកជិះម៉ូតូចំនួន៧៩% ក្នុងនោះមិនពាក់មួកសុវត្ថិភាពចំនួន៦៧%។ គ្រោះថ្នាក់បានកើតឡើងច្រើននៅរាជធានីភ្នំពេញចំនួន ៤៥០លើក, ខេត្តកណ្តាល ចំនួន១៣០លើក និងខេត្តព្រះសីហនុ ចំនួន ១២៩លើក។
ក្នុងកិច្ចប្រជុំដកពិសោធន៍ការងាររឹតបន្តឹងការអនុវត្តច្បាប់ចរាចរណ៍ផ្លូវគោកនាថ្ងៃទី៣ ខែកក្កដានេះ លោកនាយឧត្តមសេនីយ៍ ស ថេត អគ្គស្នងការនគរបាលជាតិបានបញ្ជាឱ្យរឹតបន្ដឹងច្បាប់ចរាចរណ៍នៅទូទាំងប្រទេស និងបង្កើនការផ្សព្វផ្សាយអប់រំ ក្រោយពីគ្រោះថ្នាក់ចរាចរណ៍ក្នុងរយៈពេល ៦ខែនេះហាក់មានការកើនឡើងគួរឱ្យព្រួយបារម្ភ និង បើធៀបឆ្នាំកន្លងទៅ។
ក្នុងឱកាសនោះលោកបានដាក់បទបញ្ជាយ៉ាងម៉ឺងមាត់ដល់ស្នងការនគរបាលរាជធានី-ខេត្ត ត្រូវតែចាត់វិធានការបន្ទាន់ក្នុងការរឹតបន្ដឹងច្បាប់ចរាចរណ៍ផ្លូវគោក ព្រោះថា មានតែការរឹតបន្ដឹងច្បាប់ចរាចរណ៍នោះទេ ទើបអាចកាត់បន្ថយគ្រោះថ្នាក់ចរាចរណ៍បាន។ បើពឹងផ្អែកតែយន្ដការផ្សព្វផ្សាយ អប់រំ គឺថា ច្បាស់ណាស់មិនអាចកាត់បន្ថយបានឡើយ។
លោកនាយឧត្តមសេនីយ៍បានថ្លែងថា៖ «ខ្ញុំគិតថា ដើម្បីយើងកាត់បន្ថយការគ្រោះថ្នាក់នេះ កត្តាដែលសំខាន់បំផុតមិនមានអ្វីល្អជាងការរឹតបន្ដឹងច្បាប់ទេ តែយើងក៏មិនត្រូវបោះបង់ចោលការផ្សព្វផ្សាយដែរ។ ច្បាប់ចរាចរណ៍ផ្លូវគោក បានផ្សព្វផ្សាយតាំងពីពេលចូលជាធរមាន រហូតមកដល់ពេលនេះ មិនតិចឆ្នាំនោះទេ ប្រជាពលរដ្ឋនៅតែមិនទាន់យល់ជ្រួតជ្រៀប ដោយគ្រាន់តែខ្លាចសមត្ថកិច្ចប៉ុណ្ណោះ»។ នេះបើយោងតាមនគរបាលជាតិ។
លោក ស ថេត ក៏បានបញ្ជាក់ផងដែរថា ការអនុវត្តច្បាប់ចរាចរណ៍នេះ ត្រូវពិនិត្យឱ្យបានច្បាស់លាស់ ដោយត្រូវបញ្ឈប់នូវការពួនស្ទាក់ ដែលងាយនឹងមានបាតុភាពនានាកើតឡើង។ ការអនុវត្តនេះ ត្រូវធ្វើដោយបើកជំហរ ក្នុងនោះមានទាំងការត្រួតពិនិត្យការប្រើប្រាស់ល្បឿន និងការត្រួតពិនិត្យជាតិស្រវឹងជាដើម។
លោកបានបន្ថែមថា ចាប់ពីពេលនេះទៅស្នងការនគរបាលរាជធានី-ខេត្ត ត្រូវធ្វើផែនការអនុវត្តឱ្យបានច្បាស់លាស់ ទៅតាមការណែនាំ ហើយអគ្គស្នងការដ្ឋាននគរបាលជាតិនឹងធ្វើការតាមដានជាប់ជាប្រចាំ។ ប៉ុន្ដែមុននឹងអនុវត្តការរឹតបន្ដឹងច្បាប់ ត្រូវតែផ្សព្វផ្សាយដល់ប្រជាពលរដ្ឋជាមុន តាមមធ្យោបាយនានា ពិសេសតាមបណ្ដាញផ្សព្វផ្សាយសង្គម។
លោកឧត្តមសេនីយ៍ឯក ចេវ ហាក់ អគ្គស្នងការរងទទួលផែនចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានថ្លែងក្នុងសន្និសីទសារព័ត៌មាននាពេលថ្មីៗនេះថា ការរឹតបន្តឹងការអនុវត្តច្បាប់ចរាចរណ៍នៅពេលយប់នៅតែបន្តធ្វើនៅទូទាំងប្រទេស ពិសេសគឺការត្រួតពិនិត្យរកសារធាតុស្រវឹង។
លោកបានបញ្ជាក់ថា៖ «នៅពេលដែលយើងចាប់ផ្តើមរឹតបន្តឹងលើអ្នកបើកបរក្រោមឥទ្ធិពលស្រវឹងនេះ យើងសង្កេតឃើញថាតួលេខនៃគ្រោះថ្នាក់ចរាចរណ៍គឺមានការថយចុះ»។
លោក គឹម បញ្ញា នាយកអង្គការមូលនិធិបង្ការរបួសអាស៊ី (AIP) មិនអាចទាក់ទងសុំអត្ថាធិប្បាយបានទេនាថ្ងៃទី៣ ខែកក្កដា៕