ប្រជាពលរដ្ឋនាំកូនតូចទៅពិនិត្យជំងឺនៅមន្ទីរពេទ្យគន្ធបុប្ផាក្នុងឆ្នាំនាពេលកន្លងមក។ Post Staff
ភ្នំពេញៈ ក្នុងខែមិថុនា កុមារឈឺចំនួន ៧២ ៥៤៩នាក់ ត្រូវបានពិនិត្យព្យាបាលនៅក្នុងផ្នែកពិគ្រោះជំងឺក្រៅនៅក្នុងមន្ទីរពេទ្យគន្ធបុប្ផា ខណៈកុមារមានជំងឺធ្ងន់ៗចំនួន ១៤ ៦២០នាក់ ត្រូវបានដាក់ឱ្យសម្រាកព្យាបាល។ នេះបើយោងតាមរបាយការណ៍មូលនិធិគន្ធបុប្ផា។
របាយការណ៍បានឱ្យដឹងនៅថ្ងៃទី៣ កក្កដា ថា កុមារមានជំងឺគ្រុនឈាមចំនួន៨៩នាក់ ត្រូវបានព្យាបាលនៅក្នុងមន្ទីរពេទ្យនេះ ថយចុះ៧ដងបើធៀបនឹងខែមិថុនាក្នុងឆ្នាំ២០២៣។ កុមារចំនួន ២ ៩០២បានទទួលការវះកាត់ ខណៈកុមារចំនួន១០៣នាក់បានទទួលការវះកាត់បេះដូង និងភ្ជិតប្រហោងបេះដូងតាមសរសៃឈាម។
របាយការណ៍បន្តថា នៅផ្នែកសម្ភពនៃមន្ទីរពេទ្យជ័យវរ្ម័នទី៧ ឬគន្ធបុប្ផាទី៣ ស្ថិតនៅខេត្តសៀមរាប ស្ត្រីមានផ្ទៃពោះចំនួន៩ ១៨០នាក់ បានមកពិនិត្យតាមដានផ្ទៃពោះ និងព្យាបាលនៅក្នុងផ្នែកពិគ្រោះជំងឺក្រៅ និងសម្រាលកូនបានចំនួន១ ៧៨៨នាក់។
កាលពីថ្ងៃទី២៨ មិថុនា ទំព័រហ្វេសប៊ុក Dr. Beat Richner បានឱ្យដឹងថា រដូវភ្លៀងធ្លាក់ដើមឆ្នាំនេះ មានករណីគ្រុនឈាមសម្រាកពេទ្យនៅមន្ទីរពេទ្យគន្ធបុប្ផាតិចជាង៥ដង បើធៀបនឹងរយៈពេលដូចគ្នាក្នុងឆ្នាំ ២០២៣ ប៉ុន្តែបានអំពាវនាវឱ្យរួមគ្នាកម្ចាត់ជម្រកមូសខ្លា និងការពារកុមារកុំឱ្យមូសខ្លាខាំ ដែលបណ្ដាលឱ្យកើតជំងឺគ្រុនឈាមដែលអាចសម្លាប់កុមារបាន។
ទំព័រហ្វេសប៊ុកដដែលបន្តថា កុមារីអាយុ៥ឆ្នាំម្នាក់មកពីខេត្តកំពង់ឆ្នាំងមានជំងឺគ្រុនឈាមធ្ងន់ធ្ងរបំផុត អស់ជីពចរ៧ដងក្នុងរយ:ពេល២៤ម៉ោង បានធូរស្រាល និងរួចផុតពីគ្រោះថ្នាក់ បន្ទាប់ពីត្រូវបានសង្រ្គោះបន្ទាន់ និងដាក់ឈាមប្លាស្មា (Plasma ) អស់៧ប្លោក។
ដោយឡែក ហ្វេសប៊ុកដដែលបានបញ្ជាក់កាលពីថ្ងៃទី២៦ មិថុនា ថា កុមារាអាយុ៩ឆ្នាំម្នាក់មានជំងឺដុំមហារីកកោសិកាដើមនៃថ្លើម ហៅថាមហារីកថ្លើមកុមារដែលជាជំងឺមហារីកកាចរីកធំលឿន ត្រូវបានក្រុមគ្រូពេទ្យជួយសង្គ្រោះដោយចាក់ថ្នាំគីមីជា៦ដំណាក់កាល ក្នុងរយៈពេល៨ខែនៅក្នុងមន្ទីរពេទ្យគន្ធបុប្ផា និងធ្វើការវះកាត់យកដុំមហារីកថ្លើមនេះចេញ។
ហ្វេសប៊ុកដដែលបញ្ជាក់ កាលពីថ្ងៃទី២០ មិថុនា ថា កុមារាម្នាក់ដែលមានអាយុទើបបាន១៨ខែមានជំងឺដុំគីសសរសៃទឹករងៃថ្លើម ដែលមានដ៏កម្រណាស់លើកុមារ។ ក្រុមគ្រូពេទ្យបានធ្វើការព្យាបាលដោយវះកាត់យកដុំគីសទាំងមូលដែលជាជម្រើសតែ១គត់។
ហ្វេសប៊ុកដដែលបន្តថា៖ «កុមារាម្នាក់នេះអាយុទើបបាន ១៨ខែប៉ុណ្ណោះ ចូលមកមន្ទីរពេទ្យដោយតឹងពោះខ្លាំង និងចុកពោះផងត្រូវបានរកឃើញមានដុំគីសទឹករងៃជាប់នឹងថ្លើមទម្ងន់ ៤០០ក្រាម។ គាត់ត្រូវបានថែទាំព្យាបាលដោយការវះកាត់យកដុំគីសយក្សនេះ បានដោយជោគជ័យ»។
ហ្វេសប៊ុកដដែលបញ្ជាក់នាថ្ងៃទី១៣ មិថុនា ថា កុមារាតូច២នាក់ផ្សេងទៀតមានជំងឺបេះដូងពីកំណើត មានច្រើនប្រភេទ និងទាមទារការព្យាបាលដោយការវះកាត់កម្រិតឯកទេសខ្ពស់។ ការវះកាត់គឺស្មុគស្មាញច្រើន។
ហ្វេសប៊ុកដដែលបន្តថា៖ «កុមារាតូចៗ២នាក់នេះ ម្នាក់អាយុ១ខែ ម្នាក់ទៀតអាយុ៣ខែត្រូវបានរកឃើញមានជំងឺបេះដូងពីកំណើតប្រភេទដូចគ្នា គឺសរសៃឈាមសួតទៅបេះដូងទាំងបួនសរសៃ ដុះខុសប្រក្រតីមិនវិលចូលក្នុងបេះដូងឆ្វេង តែបែរជាចូលទៅក្នុងសរសៃវ៉ែនរបស់ថ្លើម រួចចូលទៅបេះដូងស្ដាំវិញបណ្ដាលឱ្យរីកបេះដូងស្ដាំធ្ងន់ធ្ងរ។ គាត់ទាំង២នាក់ត្រូវបានថែទាំព្យាបាលដោយការវះកាត់កែតម្រូវសរសៃឈាមផង និងភ្ជិតប្រហោងបេះដូងចំហផង»៕
