លោក ហ្វ្រេដេរិក ដូម៉ាស់ (Frederic Daumas) អនុព័ន្ធយោធាបារាំងចប់អាណត្តិ (ឆ្វេង) និងលោក វង្ស ពិសេន អគ្គមេបញ្ជាការនៃកងយោធពលខេមរភូមិន្ទ (RCAF) ក្នុងជំនួបថ្ងៃទី៣១ កក្កដា នៅភ្នំពេញ។ RCAF
ភ្នំពេញៈ មន្ត្រីយោធាបារាំងសន្យាថានឹងខិតខំឱ្យមានការផ្លាស់ប្ដូរទស្សនកិច្ចរវាងថ្នាក់ដឹកនាំកងទ័ពនៃប្រទេសកម្ពុជា និងបារាំង ព្រមទាំងខិតខំក្នុងកិច្ចសហការបើកវគ្គបំប៉នផ្នែកជំនាញដោះមីនដល់កម្ពុជា។
ការសន្យានេះធ្វើឡើងក្នុងជំនួបថ្ងៃទី៣១ កក្កដា រវាងលោក វង្ស ពិសេន អគ្គមេបញ្ជាការនៃកងយោធពលខេមរភូមិន្ទ (RCAF) និងលោក ហ្វ្រេដេរិក ដូម៉ាស់ (Frederic Daumas) អនុព័ន្ធយោធាបារាំងចប់អាណត្តិ ដែលមាននិវេសនដ្ឋាននៅទីក្រុងហាណូយ (Hanoi) ប្រទេសវៀតណាម នៅ អគ្គបញ្ជាការដ្ឋានRCAF រាជធានីភ្នំពេញ។
RCAFបញ្ជាក់ក្នុងសេចក្ដីប្រកាសព័ត៌មាននាថ្ងៃទី៣១ កក្កដា ថា៖ «សម្រាប់កិច្ចសហប្រតិបត្តិការនៅពេលខាងមុខ លោកវរនាវីឯក ហ្វ្រេដេរិក ដូម៉ាស់ បានសន្យាថានឹងខិតខំក្នុងកិច្ចសហការបើកវគ្គបំប៉ន និងវគ្គបណ្ដុះបណ្ដាលផ្សេងៗផ្នែកជំនាញដោះមីន ព្រមទាំងសិក្សារកដំណោះស្រាយរាល់សំណូមពររបស់កម្ពុជា ក្នុងនោះនឹងខិតខំឱ្យមានការផ្លាស់ប្ដូរទស្សនកិច្ចរបស់ថ្នាក់ដឹកនាំកងទ័ពប្រទេសទាំងពីរផងដែរ»។
លោក ដូម៉ាស់ បានបញ្ជាក់ថា ក្នុងរយៈពេល៣ឆ្នាំ ដែលលោកបានបំពេញការងារជាអនុព័ន្ធយោធាបារាំងប្រចាំកម្ពុជា លោកមានការចាប់អារម្មណ៍អំពីសារៈសំខាន់របស់ RCAF នៅក្នុងការចូលរួមជាកម្លាំងថែរក្សាសន្តិភាពរបស់អង្គការសហប្រជាជាតិ (UN)។
កាលពីកន្លងទៅ RCAF បានរៀបចំឱ្យមានដំណើរទស្សនកិច្ចសម្រាប់អនុព័ន្ធយោធាបារាំងទាំងអស់ប្រចាំនៅកម្ពុជាទៅកាន់តំបន់មួយចំនួននៅក្នុងប្រទេសកម្ពុជា។
លោក ដូម៉ាស់ រំឭកថា ដំណើរទស្សនកិច្ចនេះបានធ្វើឱ្យបណ្ដាអនុព័ន្ធទាំងនោះបានមើលឃើញពីសកម្មភាព និងយល់ច្បាស់ពីតួនាទីរបស់ RCAF។ នេះបើយោងតាមសេចក្ដីប្រកាសព័ត៌មានដដែល។
លោក វង្ស ពិសេន រំឭកថា ក្នុងលើវិស័យយោធា បារាំងបានជួយឧបត្ថម្ភសម្ភារៈ និងការជួយបណ្ដុះបណ្ដាលធនធានមនុស្សក្នុង RCAF ក្នុងនោះមានវគ្គការពារជាតិ, វគ្គបញ្ជាការសេនាធិការ, កងរាជអាវុធហត្ថ, វិស្វកម្ម, និងជាពិសេសការបណ្ដុះបណ្ដាលកងកម្លាំងថែរក្សាសន្តិភាពរបស់UN។
លោកបានអរគុណដល់នាវាចម្បាំងប្រទេសបារាំង ដែលបានចូលចតនៅកំពង់ផែស្វយ័តខេត្តព្រះសីហនុកាលពីឆ្នាំ២០២៣។
លោកសង្ឃឹមថា ទៅថ្ងៃខាងមុខ កងទ័ពប្រទេសទាំងពីរនឹងបន្តកិច្ចសហប្រតិបត្តិការឱ្យកាន់តែល្អថែមទៀត ទាំងការបណ្ដុះបណ្ដាលធនធានមនុស្ស, ការផ្លាស់ប្ដូរទស្សនកិច្ចគ្រប់កម្រិត, ការផ្លាស់ប្ដូរព័ត៌មានចារកម្ម, និងការបង្ក្រាបបទឧក្រិដ្ឋកម្មផ្សេងៗ។
លោក វង្ស ពិសេន ថ្លែងថា៖ «មិត្តភាព និងកិច្ចសហប្រតិបត្តិការដ៏ល្អរវាងកម្ពុជា និងបារាំង បានបង្ហាញកាន់តែច្បាស់តាមរយៈនៃព្រះរាជដំណើរបំពេញទស្សនកិច្ចរបស់ព្រះមហាក្សត្រនៃព្រះរាជាណាចក្រកម្ពុជា ក៏ដូចជាដំណើរបំពេញទស្សនកិច្ចរបស់ប្រមុខរាជរដ្ឋាភិបាលកម្ពុជាទៅកាន់ប្រទេសបារាំងកន្លងមកនេះ»។
លោករំឭកថា កន្លងមក ប្រទេសបារាំងធ្លាប់បានជួយដល់កម្ពុជាលើច្រើនវិស័យ មានដូចជា វិស័យសេដ្ឋកិច្ច ពាណិជ្ជកម្ម អប់រំ សុខាភិបាល ថាមពល ទឹកស្អាត និងការអភិរក្សបេតិកភណ្ឌជាតិ។
កាលពីដើមខែមករា លោកនាយករដ្ឋមន្ត្រី ហ៊ុន ម៉ាណែត បានទៅបំពេញទស្សនកិច្ចផ្លូវការជាលើកដំបូងនៅប្រទេសបារាំងរយៈពេល២ថ្ងៃដើម្បីពង្រឹងចំណងមិត្តភាព និងកិច្ចសហប្រតិបត្តិការទ្វេភាគីវាងប្រទេសទាំង២លើវិស័យនានា តួយ៉ាងសេដ្ឋកិច្ច អភិវឌ្ឍន៍ យោធា បេតិកភណ្ឌ និងក្របខ័ណ្ឌហ្រ្វង់កូហ្វូនី។
កាលពីខែវិច្ឆិកា ឆ្នាំ២០២៣ ព្រះមហាក្សត្រកម្ពុជាបានយាងបំពេញព្រះរាជទស្សនកិច្ចផ្លូវការនៅប្រទេសបារាំងប្រមាណ១ សប្ដាហ៍ ក្នុងស្មារតីនៃទំនាក់ទំនងមិត្តភាពដ៏យូរអង្វែងរវាងកម្ពុជា និងបារាំង៕
