«សត្វរុយស» កំពុងតែបង្កផលប៉ះពាល់ស្រូវប្រមាណជា ១០ភាគរយក្នុងខេត្តព្រៃវែងចាប់ពីចុងខែមិថុនាកន្លងមក។ រូបថត ក្រសួងកសិកម្ម
ព្រៃវែងៈ ស្រូវជាង ២ម៉ឺន ក្នុងចំណោមជាង ២១ម៉ឺនហិកតាក្នុងខេត្តព្រៃវែងកំពុងតែទទួលរងផលប៉ះពាល់ពីការបំផ្លាញដោយសត្វរុយសចាប់ពីចុងខែមិថុនាកន្លងមក ដែលក្នុងនោះស្រូវប្រមាណជា ១០ភាគរយអាចនឹងខូចខាត។
លោក សំ សារុន អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង បានឱ្យដឹងថា ការផ្ទុះសត្វរុយសនេះបានចាប់ផ្តើមកើតឡើងខ្លាំង កាលពីថ្ងៃទី៣០ ខែមិថុនាកន្លងមក។ រហូតមកដល់នឹងពេលនេះ មានស្រូវចំនួន ២៣ ០០០ហិកតាក្នុងចំណោម ២១៦ ០០០ ហិកតាក្នុង ១១ក្រុង-ស្រុកលើ១៣ ដែលបង្កបង្កើនផលក្នុងរដូវវស្សានេះបានកំពុងតែទទួលរងផលប៉ះពាល់។
ប៉ុន្តែក្នុងចំណោមស្រូវដែលបង្កបង្កើនផលជាង ២១ម៉ឺនហិកតានោះ ក៏មានស្រូវស្រាលខ្លះ ដែលកសិករកំពុងតែប្រមូលផលផងដែរ។
លោកបញ្ជាក់ថា៖ «ស្រូវមួយចំនួនដែលប៉ះពាល់ពីការផ្ទុះរុយសលើកដំបូង កាលពីថ្ងៃទី៣០ ខែមិថុនាមកនោះ មានការខូចខ្លះហើយ។ ស្រូវដែលប៉ះពាល់មានជាង ២ ម៉ឺនហិកតា។ ក្នុងនោះប្រហែល ១០ភាគរយអាចខូច តែយើងរងចាំមើលការវាយតម្លៃបន្តទៀត»។
លោកបានឱ្យដឹងថា រុយសនេះមានប្រភពដើមមកពីប្រទេសវៀតណាម ដែលមានការផ្ទុះនិងខូចខាតស្រូវច្រើនដែរ។ ក្រោយពេលដែលរុយសចុះលើស្រូវរួចហើយ វាបានពង ដែល ១ក្បាលអាចពង និងកើតកូនបានរហូតដល់ទៅ ២០០ក្បាលឯនោះ។ ក្រោយពេលរុយសចុះទំបានក្នុងរង្វង់ ១សប្តាហ៍រួចមក ស្រូវនឹងប្រែពណ៌ទៅជាលឿង-ក្រហម ប្រសិនបើគ្មានការទប់ស្កាត់ទាន់ពេលនោះទេ។
លោកលើកឡើងថា៖ «បើកសិករឃើញភ្លាម មានវិធានការភ្លាម នោះមិនប៉ះពាល់ធ្ងន់ធ្ងរទេ។ កសិករខ្លះអត់បានមើលស្រែផង ទាល់តែស្រូវឡើងក្រហមបានចុះទៅ អាហ្នឹងវាខ្លាំងទៅហើយ។ ស្រូវឡើងខ្លោចហើយ យើងមិនអាចជួយបានទេ។ ដូចអ្នកជំងឺកើតមហារីកហើយទៅពេទ្យចឹង មិនដឹងធ្វើម៉េចទេ។ ពេលវាទំតិចតួច ឬមិនទាន់កើត ទើបអាចទប់បាន»។
អាជ្ញាធរមូលដ្ឋាន និងក្រុមការងារថ្នាក់ជាតិក៏បានសហការជាមួយនឹងក្រុមហ៊ុនឯកជនមួយ ដើម្បីប្រើប្រាស់បច្ចេកទេសដ្រូនបាញ់ថ្នាំសម្លាប់សត្វរុយសជាច្រើន ដោយឥតគិតថ្លៃជូនកសិករកាលពីថ្ងៃទី៣ ខែកក្កដាផងដែរ។ ប៉ុន្តែក្រោយពីថ្ងៃនោះមក បើមានកសិករណាត្រូវការបាញ់លើផ្ទៃដីស្រែធំៗនោះ ក្រុមហ៊ុនគិតថ្លៃបាញ់ពី៤ទៅ៥ម៉ឺនក្នុង១ហិកតា។ តម្លៃនេះ វាប្រហាក់ប្រហែលទៅនឹងការជួលគេបាញ់ថ្នាំដោយប្រើធុងដែរ។
អាជ្ញាធរមូលដ្ឋាន និងក្រុមការងារថ្នាក់ជាតិក៏បានសហការជាមួយនឹងក្រុមហ៊ុនឯកជនមួយ ដើម្បីប្រើប្រាស់បច្ចេកទេសដ្រូនបាញ់ថ្នាំសម្លាប់សត្វរុយសជាច្រើន ដោយឥតគិតថ្លៃជូនកសិករកាលពីថ្ងៃទី៣ ខែកក្កដាផងដែរ។
លោកថា ការបាញ់ដោយដ្រូនមានភាពលឿន និងមិនប៉ះពាល់ដល់សុខភាពច្រើននោះទេ។ ប៉ុន្តែការបាញ់ថ្នាំដោយប្រើធុងបាញ់ វាយឺត ហើយប៉ះពាល់សុខភាពអ្នកបាញ់ខ្លាំងណាស់។
លោកថ្លែងដូច្នេះថា៖ «បើយើងប្រើធុងថ្នាំបាញ់ក៏មិនអាចអន្តរាគមន៍ទាន់ដែរ។ ប្រើដ្រូនបាញ់លឿន ហើយមិនប៉ះពាល់សុខភាពខ្លាំងនោះទេ។ ដ្រូនមានវិធីសាស្រ្តត្រឹមត្រូវ បាញ់សព្វគ្រប់បានមកវិញ ហើយបើប្រភេទដ្រូនធំៗបាញ់រហូតដល់ទឹកក្នុងស្រែទៀត។ តែបើបាញ់ស្រែមួយ អត់ស្រែមួយ នោះរុយក៏កើតឡើងវិញដែរ»។
លោកបន្ថែមថា តាមរយៈការបាញ់កន្លងមកនេះ ឃើញថាវាមានប្រសិទ្ធភាពបណ្តើរៗហើយ។ ហេតុនេះ លោកគិតថា ការផ្ទុះរីករាលដាលរុយសនោះនឹងអាចគ្រប់គ្រងបានភាគច្រើន។
លោកស្រី ស៊ឹម ហែន អាយុ ៤៧ឆ្នាំ រស់នៅក្នុងស្រុកព្រះស្តេចបានឱ្យដឹងថា ស្រូវអ្នកស្រី ៧ហិកតា ក្នុងចំណោម ១០ហិកតាបានកំពុងតែត្រូវរុយសបំផ្លាញ បើទោះបីជាប្តីអ្នកស្រីខិតខំបាញ់ថ្នាំយ៉ាងណាក៏ដោយ។
អ្នកស្រីអះអាងថា៖ «ប្តីខ្ញុំកំពុងតែបាញ់រាល់ថ្ងៃហ្នឹង។ បាញ់មិនសូវបាត់ទេ។ ស្រូវចេញមិនរួចទេ ស្រូវអត់មានដង្ហើម អាហ្នឹង [រុយស] វានៅរឹបយកតែម្តង។ ស្រូវកន្លែងខ្លះចេញរួចតិចៗ។ តែខូចសឹងតែទាំងអស់។ វាឡើងក្រហមងាប់ទៅតែម្តង។ ខ្ញុំទៅមើលស្រូវ ឃើញស្រូវអញ្ជឹងលែងទៅហើយ»។
អ្នកស្រីបានអះអាងថា ក្នុងមួយហិកតា អ្នកស្រីចំណាយប្រាក់អស់ប្រមាណជាង ៣លានរៀលក្នុងការបង្កបង្កើនផលស្រូវនោះ ដែលនេះមិនទាន់គិតទាំងថ្លៃចំណាយលើថ្នាំបាញ់នាពេលនេះផង។
លោក គង់ គា ប្រធាននាយកដ្ឋានដំណាំស្រូវ នៃក្រសួងកសិកម្ម បានលើកឡើងថា ឆ្នាំនេះសត្វរុយសមានការកកើតខ្លាំង ហើយបង្កការប៉ះពាល់ធ្ងន់ធ្ងរដល់ដំណាំស្រូវ ដោយសារតែឆ្នាំ២០២៤ នេះមានអាកាសធាតុក្តៅ ហើយភាពរាំងស្ងួតអូសបន្លាយ ដែលធ្វើឱ្យវដ្ដជីវិតរបស់រុយសមានការកើនឡើង។
រដ្ឋបាលខេត្តព្រៃវែងក៏បានបើកកិច្ចប្រជុំបន្ទាន់មួយជាមួយនឹងអាជ្ញាធរពាក់ព័ន្ធ ដើម្បីដោះស្រាយបញ្ហាការបំផ្លាញស្រូវដោយសត្វរុយសនេះកាលពីថ្ងៃទី៤ ខែកក្កដានេះផងដែរ៕
