![](https://pppkhmer.sgp1.digitaloceanspaces.com/image/main/20247/4_7_2024_eccc_meeting.jpg)
កិច្ចប្រជុំកាលពីថ្ងៃទី៣ ខែកក្កដា ដឹកនាំដោយលោក វង្សី វិស្សុត ឧបនាយករដ្ឋមន្ដ្រីប្រចាំការ រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី។ រូបថត ECCC
ក្រុមការងារសហប្រតិបត្តិការជាមួយអង្គការសហប្រជាជាតិនិងដៃគូអភិវឌ្ឍសម្រាប់ការអនុវត្តមុខងារសេសសល់នៃរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.)បានបើកកិច្ចប្រជុំដំបូងរបស់ខ្លួនដើម្បីបន្តការងារក្រោយពេលដំណើរការកាត់ក្ដីមេដឹកនាំខ្មែរក្រហមបានដល់ទីបញ្ជប់។
កិច្ចប្រជុំកាលពីថ្ងៃទី៣ ខែកក្កដា ម្សិលមិញ ដឹកនាំដោយលោក វង្សី វិស្សុត ឧបនាយករដ្ឋមន្ដ្រីប្រចាំការ រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី ដែលជាប្រធានក្រុមការងារនេះ។ លោកឧបនាយករដ្ឋមន្ត្រីបានផ្ដល់ការណែនាំមួយចំនួនពាក់ព័ន្ធទៅនឹងការងារសេសសល់ដែលតុលាការត្រូវធ្វើបន្ត។
បើតាមសេចក្ដីប្រកាសព័ត៌មានរបស់អ.វ.ត.ក. ដើម្បីរក្សាកេរដំណែលរបស់ អ.វ.ត.ក. កម្ពុជានឹងរៀបចំបង្កើតវិទ្យាស្ថានកេរដំណែលរបស់ អ.វ.ត.ក. តាមការណែនាំរបស់លោកនាយករដ្ឋមន្ត្រី ហ៊ុន ម៉ាណែត ក្នុងគោលដៅថែរក្សាសន្តិភាព យុត្តិធម៌អន្តរកាល និងការបង្ការទប់ស្កាត់អំពើប្រល័យពូជសាសន៍និងការពង្រឹងសន្តិភាពយូរអង្វែងនៅកម្ពុជា។
លោក វង្សី វិស្សុត បានលើកឡើងពីការថែរក្សាទុកឱ្យបានត្រឹមត្រូវនិងមានស្តង់ដារខ្ពស់នៃបណ្ណសារ និងការប្រើប្រាស់សមិទ្ធផល បទពិសោធ និងកេរដំណែលដ៏មានតម្លៃរបស់ អ.វ.ត.ក. ប្រកបដោយប្រសិទ្ធភាព គុណភាព និងតម្លាភាព សម្រាប់ជាអង្គចងចាំសំខាន់មួយជូនកូនខ្មែរជំនាន់ក្រោយ។
លោកឧបនាយករដ្ឋមន្រ្តីប្រចាំការបានថ្លែងថា ដំណើរការកាត់សេចក្តីរបស់អ.វ.ត.ក. បានបន្សល់ទុកនូវកេរដំណែលដ៏សំខាន់ ទាំងរូបីនិងអរូបី និងមានគុណតម្លៃខ្ពស់ក្នុងការថែរក្សាសន្តិភាព ការបង្រួបបង្រួមជាតិ និងយុត្តិធម៌ទាំងក្នុងកម្រិតជាតិ និងអន្តរជាតិ។
លោកបន្តថា លទ្ធផលរបស់អ.វ.ត.ក.បង្ហាញពីសមិទ្ធផលនៃគោលនយោបាយឈ្នះ ឈ្នះ របស់រាជរដ្ឋាភិបាល ដែលរក្សាបាននូវសុខសន្តិភាពជូនប្រជាពលរដ្ឋនៅទូទាំងប្រទេស ការផ្សះផ្សាជាតិនៅតាមមូលដ្ឋាន ការផ្តល់យុត្តិធម៌ដល់ជនរងគ្រោះនៃរបបខ្មែរក្រហម ការចងចាំនិងការទប់ស្កាត់ការវិលត្រលប់មកវិញនៃរបបប្រល័យពូជសាសន៍។
អ.វ.ត.ក. បានបញ្ចប់ដំណើរការកាត់ក្ដីកាលពីចុងឆ្នាំ២០២២ ដោយបានបន្សល់ទុកនូវឯកសារពាក់ព័ន្ធបណ្ណសារតុលាការប្រមាណ ២,៤លានទំព័រ។ តុលាការកូនកាត់រវាងរាជរដ្ឋាភិបាលនិងអង្គការសហប្រជាជាតិមួយនេះត្រូវបានគេមើលឃើញថាបានចូលរួមចំណែកដោយផ្ទាល់ដល់កំណែទម្រង់វិស័យច្បាប់និងយុត្តិធម៌របស់កម្ពុជា តាមរយៈការអភិវឌ្ឍនិងធ្វើឱ្យប្រសើរឡើងនូវសមត្ថភាពមន្រ្តីតុលាការនិងមន្រ្តីច្បាប់ដូចជាការផ្ទេរចំណេះនិងដឹងចំណេះធ្វើនិងបទពិសោធជាច្រើនទៀតទៅដល់ប្រព័ន្ធតុលាការជាតិនិងទៅដល់ស្ថាប័នពាក់ព័ន្ធផ្សេងៗទៀត។
សេចក្ដីប្រកាសព័ត៌មានបានឲ្យដឹងថា លោក វង្សី វិស្សុត ចាត់ទុក អ.វ.ត.ក. ថាជាតុលាការគំរូ និងពិសេសមួយសម្រាប់តំបន់ និងសកលលោក ដែលប្រើយុត្តាធិការរបស់ប្រទេសជាម្ចាស់បញ្ហា ហើយប្រើច្បាប់ចម្រុះទាំងប្រព័ន្ធ Common Law ទាំងប្រព័ន្ធ Civil Law។
លោកថា៖ «ទាំងនេះ ឆ្លុះបញ្ចាំងអំពីសក្តានុភាពនៃនីតិវិធីតុលាការរបស់កម្ពុជាក្នុងការបង្រួបបង្រួមជាតិ ផ្សះផ្សារជាតិ សម្រេចបានយុត្តិធម៌ជូនជនរងគ្រោះ និងធានាបាននូវនិរន្តរភាពនៃសុខសន្តិភាពជូនជាតិមាតុភូមិ»។
លោកបន្តថា៖ «វប្បធម៌សន្តិភាពបង្រួមបង្រួមជាតិនិងការផ្តល់យុត្តិធម៌នឹងត្រូវបន្តតាមរយៈការខិតខំទាំងអស់គ្នាក្នុងការអប់រំនិងការផ្សព្វផ្សាយដើម្បីបង្ការនូវការត្រលប់មកវិញនូវរបបប្រល័យពូជសាសន៍ដើម្បីធានាការអភិវឌ្ឍប្រកបដោយគុណតម្លៃនិងនិរន្តរភាពសម្រាប់សង្គមជាតិនិងយុវជនជំនាន់ក្រោយ»។
កិច្ចប្រជុំលើកដំបូងរបស់ក្រុមការងារសហប្រតិបត្តិការជាមួយអង្គការសហប្រជាជាតិនិងដៃគូអភិវឌ្ឍសម្រាប់ការអនុវត្តមុខងារសេសសល់នៃអ.វ.ត.ក. ក៏មានការចូលរួមពីសំណាក់លោក កែវ រ៉េមី ទេសរដ្ឋមន្ត្រីទទួលបន្ទុកបេសកកម្មពិសេសនិងជាប្រធានគណៈកម្មាធិការសិទ្ធិមនុស្សកម្ពុជា លោក នេត្រ ភត្រ្តា រដ្ឋមន្ត្រីក្រសួងព័ត៌មានរួមទាំងថ្នាក់ដឹកនាំតំណាងក្រសួងស្ថាប័នពាក់ព័ន្ធនិងតំណាងអង្គការសហប្រជាជាតិដែលជាសមាជិកនៃក្រុមការងារនេះ។
យោងតាមមាត្រា១នៃកិច្ចព្រមព្រៀងរវាងកម្ពុជានិងអង្គការសហប្រជាជាតិ អ.វ.ត.ក. ត្រូវបន្តបំពេញមុខងារនានាសម្រាប់រយៈពេលបីឆ្នាំដំបូងបន្ទាប់ពីបញ្ចប់ដំណើរការកាត់ក្ដី ដូចជាពិនិត្យមើលទៅលើពាក្យស្នើសុំនានានិង ដំណើរការនីតិវិធីសើរើទៅលើសាលដីកាស្ថាពរ ផ្តល់ការការពារដល់ជនរងគ្រោះនិងសាក្សី ដាក់ ទណ្ឌកម្មឬបញ្ជូនទៅអាជ្ញាធរពាក់ព័ន្ធនូវការជ្រៀតជ្រែកនានាដោយចេតនាក្នុងកិច្ចការរដ្ឋបាល តុលាការឬការផ្តល់សក្ខីកម្មក្លែងក្លាយ។
អ.វ.ត.ក ក៏មានតួនាទីគ្រប់គ្រងការអនុវត្តទោស ការតាមដានការប្រព្រឹត្តចំពោះទណ្ឌិត ការថែទាំ រក្សាទុកនិងគ្រប់គ្រងបណ្ណសារ រួមទាំងការធ្វើចំណាត់ថ្នាក់ឡើងវិញ នៃឯកសារសំណុំរឿងទាំងអស់ ឆ្លើយតបទៅនឹងសំណើសុំចូលពិនិត្យមើលឯកសារ ផ្សព្វផ្សាយព័ត៌មាន ដល់សាធារណជនពាក់ព័ន្ធនឹងអង្គជំនុំជម្រះវិសាមញ្ញ និងត្រួតពិនិត្យមើលការអនុវត្តការផ្តល់សំណង ដែលបានផ្តល់ឱ្យភាគីដើមបណ្តឹងរដ្ឋប្បវេណីទៅតាមករណីចាំបាច់។
ស្របពេលជាមួយគ្នានេះ ព្រះករុណាសម្តេចព្រះបរមនាថ នរោត្តម សីហមុនី បានតែងតាំងលោកស្រី Katrien Gabriël Wittleman ជនជាតិហូឡង់ ជាចៅក្រមអន្តរជាតិ និងលោក Motoo Noguchi ជនជាតិជប៉ុន ជាចៅក្រមអន្តរជាតិបម្រុងនៃអង្គជំនុំជម្រះតុលាការកំពូល កាលពីថ្ងៃទី១ ខែកក្កដាកន្លងទៅ។ ការតែងតាំងនេះគឺដើម្បីបន្តការងារដែលនៅសេសសល់ ជំនួសឲ្យចៅក្រមមុនៗដែលបានលាឈប់។ ការបំពេញការងារនេះធ្វើឡើងពីចម្ងាយ លើកលែងតែមានភាពចាំបាច់ដែលទាក់ទងនឹងមុខងារផ្ទាល់របស់ពួកគេ៕