![](https://pppkhmer.sgp1.digitaloceanspaces.com/image/main/20247/4_7_2024_hun_manet_speaking.jpg)
លោកនាយករដ្ឋមន្ត្រី ហ៊ុន ម៉ាណែត ថ្លែងក្នុងពិធីប្រគល់សញ្ញាបត្របរិញ្ញាបត្រអប់រំជូនដល់គរុនិស្សិត គរុសិស្ស នៅវិទ្យាស្ថានគរុកោសល្យរាជធានីភ្នំពេញ នាថ្ងៃទី៤ កក្កដា។ ហ្វេសប៊ុកលោក ហ៊ុន ម៉ាណែត
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត បានណែនាំឱ្យក្រសួងពាក់ព័ន្ធគិតគូរក្នុងការផ្ដល់អត្ថប្រយោជន៍ និងការឧបត្ថម្ភដល់ស្ត្រីមានផ្ទៃពោះ និងកុមារតូចដែលជាប់ក្នុងពន្ធនាគាររហូតដល់អាយុ២ឆ្នាំ។
ក្នុងពិធីប្រគល់សញ្ញាបត្របរិញ្ញាបត្រអប់រំជូនដល់គរុនិស្សិត គរុសិស្ស និងពិធីសម្ពោធដាក់ឱ្យប្រើប្រាស់នូវអន្តេវាសិកដ្ឋានគ្រូនៅវិទ្យាស្ថានគរុកោសល្យ រាជធានីភ្នំពេញ នាថ្ងៃទី៤ កក្កដា លោកបានណែនាំដល់ក្រសួងការងារ និងបណ្ដុះបណ្ដាលវិជ្ជាជីវៈ ក្រសួងសង្គមកិច្ច អតីតយុទ្ធជន និងយុវនីតិសម្បទា និងក្រសួងសេដ្ឋកិច្ច និងហិរញ្ញវត្ថុពិភាក្សាគិតគូរពីការផ្ដល់អត្ថប្រយោជន៍នេះ ដោយលោកលើកឡើងថា នេះជាការងារមនុស្សធម៌។
លោក ហ៊ុន ម៉ាណែត ថ្លែងថា៖ «ទាក់ទងកិច្ចការងារនេះ ខ្ញុំសុំឱ្យឯកឧត្ដម ហេង សួរ [រដ្ឋមន្ត្រីការងារ] ហើយជាមួយខាងសង្គមកិច្ច [ក្រសួងសង្គមកិច្ច] គិតគូរផងរឿងស្ត្រីមានផ្ទៃពោះនេះ យើងមានសម្រាប់កម្មករ កម្មការិនី មន្ត្រីរាជការ។ ឥឡូវ គិតគូរផងពីពិរុទ្ធជននៅក្នុងគុក។ ឃើញលោកជំទាវ អ៊ឹង កន្ថាផាវី [រដ្ឋមន្ត្រីកិច្ចការនារី] ថា អ្នកក្នុងគុក ក៏មានអ្នកខ្លះទម្ងន់។ អ៊ីចឹង គាត់ក៏ត្រូវការការ care [យកចិត្តទុកដាក់] ដែរ»។
លោកបន្ថែមថា៖ «ម្ដាយធ្វើខុស តែកូនអត់ខុសទេ...។ ហើយ calculate [គណនា] មិនច្រើនទេ។ គិតគូរអំពីអត្ថប្រយោជន៍ ផ្តល់ការឧបត្ថម្ភទៅដល់ស្ត្រីដែលជាប់ទោស ប៉ុន្តែសម្រាប់អ្នកដែលមានទម្ងន់ ហើយកើតកូន នៅក្នុងនោះ...។ គិតកូន ព្រោះកូននេះគ្នាអត់ដឹងអីទេ»។
លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព ប្រាប់ភ្នំពេញប៉ុស្តិ៍នាថ្ងៃទី៤ កក្កដា ថា ការយកចិត្តទុកដាក់ចំពោះស្ត្រីដែលមានផ្ទៃពោះ និងកុមារដែលនៅជាមួយម្ដាយនៅក្នុងពន្ធនាគារនេះ ជារឿងមួយប្រសើរ ដែលអាចជួយសម្រាលបន្ទុកដល់ពួកគាត់ផងដែរ។
លោកចោទជាសំណួរថា៖ «ប៉ុន្តែ ទោះយ៉ាងណាក៏ដោយ ដោយសារតែគ្នាអត់មានសិទ្ធិ អត់មានសេរីភាពថាតើការទម្លាក់លុយនោះដោយរបៀបណា? តើបានដល់ដៃរបស់ពួកគាត់ទេ? ហើយបើសិនជាថាមានការកិបកេងពីមន្ត្រីណាម្នាក់នៅពន្ធនាគារអីហ្នឹង ក៏គ្នាមិនដឹងថារាយការណ៍ មិនដឹងថានិយាយយ៉ាងម៉េចដែរ។ នេះជារឿងមួយដែលត្រូវគិតគូរពីបញ្ហារឿងអស់ហ្នឹងដែរ ដើម្បីឱ្យប្រាកដថាលុយដែលបានទម្លាក់ទៅគឺដល់ដៃពួកគាត់»។
លោក យង់ គិមអេង លើកឡើងថា កុមារតូចនៅក្នុងពន្ធនាគារគួរតែត្រូវបានផ្ដល់ការឧបត្ថម្ភ រហូតដល់ពួកគាត់ និងម្ដាយពួកគាត់ចេញពីពន្ធនាគារ ទើបរដ្ឋគួរតែផ្ដាច់ការផ្គត់ផ្គង់។
លោកថ្លែងថា៖ «កុមារនេះខ្ញុំថាគួរតែជួយទៅដល់គ្នា ពីព្រោះគ្នាអត់មានទោសទេ។ អ៊ីចឹង ដល់ពេលឪពុកម្ដាយជាប់ទោសហើយ គ្នាអត់មានទៅរកស៊ីបានទេ គឺគួរតែជួយពួកគាត់រហូតដល់ឪពុកម្ដាយហ្នឹងត្រូវបានចេញពីពន្ធនាគារដែរ។ កុំគិតរឿងអាយុរបស់គាត់។ ទោះបីគ្នាអាយុ ៧ [ឬ] ៨ឆ្នាំ គ្នាមិនដឹងរកស៊ីអីបាន គឺរស់នៅជាមួយម្ដាយក្នុងពន្ធនាគារហ្នឹង»។
លោកបន្តថា ប្រសិនបើក្នុងពន្ធនាគារមានកុមារចាប់ពីចំនួន១០នាក់ រដ្ឋគួរតែបើកថ្នាក់មត្តេយ្យសម្រាប់ពួកគាត់ឱ្យបានរៀនសូត្រដើម្បីធានាអំពីការអប់រំសម្រាប់ទាំងអស់គ្នាដែលមានចែងនៅក្នុងរដ្ឋធម្មនុញ្ញអំពីកាតព្វកិច្ចរបស់រដ្ឋនៅក្នុងការទទួលខុសត្រូវចំពោះការសិក្សា ការអប់រំរបស់ប្រជាពលរដ្ឋកម្ពុជា។
លោក យង់ គិមអេង ថ្លែងថា៖ «អ៊ីចឹង ខ្ញុំថា រឿងអស់ហ្នឹងគឺគួរតែត្រូវបានធ្វើ ហើយធ្វើនៅក្នុងកាលៈទេសៈដ៏បន្ទាន់ទៀតដើម្បីធានាថា កុមារហ្នឹងមិនមែនត្រឹមតែបានការផ្គត់ផ្គង់ទេ គឺទទួលបានការរៀនសូត្រទៀត។ បើរដ្ឋាភិបាលអាចធ្វើដូច្នេះបាន នោះគឺនឹងមានការអបអរសាទរ និងការត្រេកអរផងដែរអំពីសាច់ញាតិ អំពីឪពុកម្តាយរបស់ពួកគាត់»៕