ផ្លូវជនបទ ១ខ្សែ ប្រវែង ១៧០០ម៉ែត្រ ទទឹង ៥ម៉ែត្រ ត្រូវបានសាកល្បងប្រើប្រាស់បច្ចេកវិទ្យាថ្មី (stabilizer) ស្ថិតនៅភូមិ ត្បែងខ្ពស់ ឃុំតាំងក្រសាំង ស្រុកទឹកផុស។ រូបថត ក្រសួងអភិវឌ្ឍជនបទ
កំពង់ឆ្នាំងៈ ក្រសួងអភិវឌ្ឍន៍ជនបទកំពុងតែសាកល្បងអនុវត្តគម្រោងប្រើប្រាស់ប្រភេទទឹកថ្នាំស្ទឺប៊ីឡៃហ្សឺ (Stabilizer) លាយជាមួយដីល្បាយក្រួស ដែលប្រទេសដទៃកំពុងតែប្រើ ដើម្បីកែលម្អផ្លូវជាង ១គីឡូម៉ែត្រមួយខ្សែនៅក្នុងភូមិត្បែងខ្ពស់ ឃុំតាំងក្រសាំង ស្រុកទឹកផុស។
ការជ្រើសរើសយកបច្ចេកវិទ្យាថ្មីនេះ គឺជាការខិតខំប្រឹងប្រែងក្នុងការពង្រឹង និងបង្កើនគុណភាពផ្លូវឱ្យកាន់តែរឹងមាំ និងមានភាពធន់ ដែលជាការចូលរួមចំណែកអនុវត្តតាមគោលការណ៍របស់រាជរដ្ឋាភិបាលកម្ពុជា ដែលបានដាក់ចេញជាយុទ្ធសាស្រ្តពង្រឹងគុណភាពផ្លូវ ៧០ភាគរយ និង ពង្រីកបន្ថែម ៣០ភាគរយ។
រដ្ឋមន្ត្រីក្រសួងអភិវឌ្ឍន៍ជនបទ លោក ឆាយ ឫទ្ធិសែន មានប្រសាសន៍ថា៖ «ការកែលម្អផ្លូវល្បាយក្រួស ដោយប្រើប្រាស់សាកល្បងនូវបច្ចេកវិទ្យាពង្រឹងគុណភាពដីល្បាយក្រួស (Stabilizer) នេះ គឺជាគម្រោងសាកល្បងប្រើប្រាស់ទឹកថ្នាំលាយជាមួយដីល្បាយក្រួស ដើម្បីបង្កើនភាពធន់ ជំនួសឱ្យវត្ថុធាតុដើមក្នុងស្រុក ដែលកាន់តែក្រខ្សត់ទៅៗ និងមានតម្លៃថ្លៃផងដែរ»។
នាពេលបច្ចុប្បន្ននេះ កម្ពុជាមានផ្លូវជនបទចំនួន ១៦ ៦៧៤ខ្សែ ដែលស្មើនឹងប្រមាណជា ៥ម៉ឺនគីឡូម៉ែត្រ។ ផ្លូវដែលកំពុងតែកែលម្អែដោយសាកល្បងប្រើប្រាស់បច្ចេកវិទ្យាថ្មីនេះមានប្រវែង១ ៧០០ម៉ែត្រ និងទទឹង ៥ម៉ែត្រ។
រដ្ឋមន្ត្រីក្រសួងអភិវឌ្ឍន៍ជនបទ លោក ឆាយ ឫទ្ធិសែន អញ្ជើញបើកការដ្ឋានកែលម្អផ្លូវនៅក្នុងភូមិត្បែងខ្ពស់ ឃុំតាំងក្រសាំង ស្រុកទឹកផុស កាលពីថ្ងៃទី ២ កក្កដា។ រូបថត ក្រសួងអភិវឌ្ឍន៍ជនបទ
លោករដ្ឋមន្រ្តីក៏បានលើកឡើងផងដែរថា ក្នុងការពង្រឹងគុណភាពផ្លូវជនបទទាំងនោះ គឺក្រសួងបាន ស្វែងរកនូវវត្ថុធាតុដើមថ្មី ក៏ដូចជាបច្ចេកទេសថ្មី ដែលអាចមានតម្លៃថោកជាងមុន ឬក្នុងទំហំទឹកប្រាក់ដដែល តែវាអាចបានបរិមាណផ្លូវច្រើនជាងមុន។ ក្នុងនោះបច្ចេកទេសប្រើទឹកថ្នាំ stabilizer ក៏កំពុងតែត្រូវបានប្រទេសផ្សេងប្រើប្រាស់ផងដែរ។
លោកបានបញ្ជាក់ថា៖ «ប៉ុន្តែប្រទេសយើងកំពុងតែចាប់ផ្តើមសាកល្បងនេះ។ ចាំមើល មើលថាតើ យើងអាចបានភាពរឹងមាំប៉ុណ្ណា។ Stabilizer មានច្រើនប្រភេទ តែ Stabilizer មួយនេះគ្រាន់តែជាទឹករាវមួយ ដែលយកទៅអាចថា សូម្បីផ្លូវក្រាលក្រួសក្រហមក៏ដោយ យើងចាក់អាហ្នឹងវាមានភាពរឹងមាំដូចផ្លូវ ក្រាលកៅស៊ូ។ គ្រាន់តែវាអន់ជាងបេតុងបន្តិច»។
លោករដ្ឋមន្រ្តីបានពន្យល់ថា៖ «ប៉ុន្តែកាត់បន្ថយ ការសឹករិចរិលនេះបានច្រើន។ បានន័យថា វាមានទទួលបានការទ្រទំងន់ហើយពង្រឹងកន្លែងណាដែលគ្រឹះមិនល្អ។ ពោលគឺ stabilizer នេះអាចជួយដល់ពង្រឹងគ្រឹះរបស់ផ្លូវតែម្តង។ ជាបច្ចេកទេសផ្លូវ ទោះក្រាលកៅស៊ូល្អយ៉ាងម៉េចក៏ដោយ ប្រាកដហើយខូចកៅស៊ូមុន..តែកៅស៊ូនេះខូច ក៏ដោយសារតែគ្រឹះខាងក្រោមវាទេ ដែលវាជ្រាយ»។
លោករដ្ឋមន្ដ្រី បានណែនាំឱ្យមានការយកចិត្តទុកដាក់អនុវត្ត ឱ្យបានត្រឹមត្រូវ តាមបទដ្ឋានបច្ចេកទេសក្នុងការស្ថាបនាផ្លូវ ដើម្បីធានាគុណភាពផ្លូវជាប់ និង ប្រើប្រាស់បានយូរអង្វែង។
អ្នកនាំពាក្យក្រសួងអភិវឌ្ឍន៍ជនបទ លោក ពិត ករុណ មិនទាន់អាចជំរាបបានពីរយៈពេលនេះនៃគម្រោងនេះ និងទំហំទឹកប្រាក់ដែលត្រូវចំណាយនោះទេ។ ទោះយ៉ាងណា លោកថ្លែងថានៅក្នុងអាណត្តិថ្មីនេះ ក្រសួងយកចិត្តទុកដាក់ក្នុងការពង្រឹងគុណភាពការស្ថាបនាផ្លូវជនបទ។
លោកបានបញ្ជាក់ថា៖ «ចំពោះការប្រើវិធីស្ទឺប៊ីឡៃហ្សឺstabilizer method នេះគឺជាការសាកល្បងរបស់យើងក្នុងការរកបច្ចេកវិទ្យាថ្មី ដើម្បីធ្វើយ៉ាងណា ធ្វើឱ្យផ្លូវជនបទរបស់យើងកាន់តែមានភាពរឹងមាំហើយនឹងជាប់ធន់បានយូរ»៕
