ក្រសួងសុខាភិបាលនាថ្ងៃទី៦ ខែកក្កដាបានក្រើនរំលឹកពលរដ្ឋសាជាថ្មីម្តងទៀតទាក់ទងទៅនឹងការពុលត្រីក្រពត ដោយបានបង្ហាញពីភិនភាគត្រីផងដែរ ក្រោយពីមានករណីពុលចុងក្រោយនេះ។ រូបថត ក្រសួងសុខាភិបាល
កំពង់ឆ្នាំងៈ ការពុលត្រីក្រពតនៅតែបន្តកើតមាន ដោយសារតែប្រជាពលរដ្ឋនៅមិនទាន់ស្គាល់ប្រភេទត្រីទាំងនោះឱ្យបានច្បាស់លាស់ បើទោះបីជាមានការអប់រំផ្សព្វផ្សាយជាហូរហែយ៉ាងណាក៏ដោយ។
ករណីពុលចុងក្រោយបានកើតមាននៅក្នុងភូមិដំបូកកកោះ ឃុំភ្នំក្រាំងដីមាស ស្រុករលាប្អៀរ ដែលមានមនុស្សចំនួន ៧នាក់រួមទាំងកុមារ ៣នាក់ផង។ ប្រជាពលរដ្ឋ ៤គ្រួសារមានគ្នា ១០នាក់ ដែលរស់នៅក្នុងផ្ទះតែមួយបានហូបត្រីក្រពត ដែលបានទិញមកពីផ្សារលើកំពង់ឆ្នាំង។ ក្នុងនោះសមាជិកគ្រួសារចំនួន ៧នាក់បានពុល ហើយត្រូវបានបញ្ជូនទៅកាន់មន្ទីរពេទ្យបង្អែកខេត្តកំពង់ឆ្នាំង កាលពីថ្ងៃទី៤ ខែកក្កដានេះ។ នេះបើយោងតាមលោក ឆន សេងលីន នាយប៉ុស្តិ៍ភ្នំក្រាំងដីមាស។
លោកនាយប៉ុស្តិ៍បានអះអាងថា ប្រជាពលរដ្ឋនៅមិនទាន់ស្គាល់ប្រភេទត្រីក្រពតច្បាស់លាស់ ទើបនៅតែបន្តទិញយកមកបរិភោគ និងបណ្តាលឱ្យពុលបែបនេះ។
លោកបញ្ជាក់ថា៖ «និយាយទៅយើងនៅតែមានហូបត្រីហ្នឹង។ ជាទូទៅតែយើងមិនដឹងថាប្រភេទត្រីហ្នឹងមួយណាពុល ប្រភេទណាមិនពុលនោះទេ។ យើងវាអត់ដឹង។ តែលូវបានគ្រូពេទ្យគាត់បានណែនាំពីប្រភេទត្រីហ្នឹងទៅ ហើយយើងក៏បានយកទៅផ្សព្វផ្សាយជូនពលរដ្ឋផ្សេងទៀត ដើម្បីបានយល់ដឹងការពារកុំឱ្យលើកក្រោយពុលទៀតអញ្ជឹង»។
ទោះយ៉ាងណា មិនមានអ្នកពុលណាម្នាក់បានស្លាប់នោះទេ ហើយពួកគាត់បានធូរស្បើយ និងត្រូវបានអនុញ្ញាតឱ្យត្រឡប់មកផ្ទះវិញជិតអស់ហើយ។
លោកបានឱ្យដឹងថា នៅសល់តែអ្នកពុលជាបុរសម្នាក់ទៀតប៉ុណ្ណោះ ដែលពេទ្យមិនទាន់ឱ្យចេញរហូតមកដល់នឹងព្រឹកថ្ងៃចន្ទ ទី៨ កក្កដានេះ។
កាលពីខែឧសភា ឆ្នាំ ២០២៣កន្លងមក បុរសអាយុ៤៣ឆ្នាំម្នាក់បានស្លាប់ បន្ទាប់ពីគាត់បានទទួលទានត្រីក្រពតរួចប្រមាណជាង ២ម៉ោងឃុំព្រះធាតុ ស្រុកអូររាំងឪ ខេត្តត្បូងឃ្មុំ។
ក្រសួងសុខាភិបាលនាថ្ងៃទី៦ ខែកក្កដាបានក្រើនរំលឹកពលរដ្ឋសាជាថ្មីម្តងទៀតទាក់ទងទៅនឹងការពុលត្រីក្រពត ដោយបានបង្ហាញពីភិនភាគត្រីផងដែរ ក្រោយពីមានករណីពុលចុងក្រោយនេះ។
ក្រសួងសុខាភិបាលបានក្រើនរំលឹកថា៖ «ដើម្បីចៀសវាងបាននូវការពុលត្រីក្រពត បង្កជាបញ្ហាសុខភាពដែលអាចធ្វើឱ្យបាត់បង់ជីវិត សូមពលរដ្ឋ កុំបរិភោគត្រីក្រពតដែលមានជាតិពុល ពីព្រោះជាតិពុលនៅក្នុងខ្លួនត្រី អាចបណ្តាលឱ្យមានជំងឺធ្ងន់ធ្ងរ ឬស្លាប់។ ជាតិពុលនៅក្នុងខ្លួន ត្រីក្រពតមិនអាចកំចាត់ចោលបានទេ ទោះបីជាបានចម្អិន ឬដាក់ឱ្យកកក៏ដោយ»។
ក្រសួងបានឱ្យដឹងថា នៅប្រទេសកម្ពុជា មានត្រីក្រពតចំនួន ៩ប្រភេទ ដែលក្នុងនោះមាន ៥ប្រភេទ មានជាតិពុលខ្ពស់ នឹងអាចបណ្តាលឱ្យមានជំងឺធ្ងន់ធ្ងរ និងស្លាប់បាន។ ត្រីក្រពតដែលមានជាតិពុលរួមមាន៖ ត្រីក្រពតភ្នែកក្រហម, ត្រីក្រពតអុចធំ, ត្រីក្រពតកូសាំងស៊ីន, ត្រីក្រពតអុចបៃតង និងចុងត្រីក្រពត ហ្លូវៀធីលីស (Tetraodon Fluviatilis) ។
នៅពេលបរិភោគត្រីទាំងនេះ ជាតិពុលបានជ្រាបទៅប៉ះពាល់ប្រព័ន្ធសរសៃប្រសាទកណ្តាល និងអាចបណ្តាលឱ្យស្លាប់។ ម្យ៉ាងទៀត ត្រីក្រពតទាំង ៥ប្រភេទខាងលើនេះ មានជាតិពុលខ្ពស់បំផុតនៅរដូវពងកូនបន្តពូជ ដែលជាធម្មតាកើតឡើងនៅក្នុងខែកុម្ភៈ មីនា និងចន្លោះខែកក្កដា ទៅខែកញ្ញា។
រោគសញ្ញា កើតក្រោយពីបរិភោគត្រីបែបនេះរយៈពេល ២០នាទីទៅ ២ម៉ោង មានដូចជា រមាស់ចាក់ៗ នៅបបូរមាត់ និងមាត់ បន្ទាប់មកមានអាការៈឈឺក្បាល វិលមុខ រមាស់ចាក់ៗនៅក្នុងអវៈយវៈ មានការពិបាកនិយាយ បាត់លំនឹងដងខ្លួន ខ្សោយសាច់ដុំ ខ្វិន ស្ពឹកចុងដៃចុងជើង ក្អួត រាក ល្អិតល្ហែ រឹងថ្គាម ឬអាចបណ្តាលឱ្យស្លាប់។ នៅក្នុងករណីដែលពុលខ្លាំង ការស្លាប់អាចបណ្តាលមកពីវិបត្តិផ្លូវដង្ហើម។
ក្រសួងបានបន្ថែមថា វិធីសង្គ្រោះភ្លាមៗ ក្រោយពីពុល អាចធ្វើបានតាមរយៈធ្វើឱ្យក្អួត (ប្រសិនបើអាចធ្វើទៅបាន) ដែលអាចជួយបញ្ចេញជាតិពុលពីក្នុងខ្លួនបានមួយចំណែក ហើយអ្នកពុលនោះត្រូវប្រញាប់ស្វែងរកការជួយសង្គ្រោះបន្ទាន់នៅតាមមូលដ្ឋានសុខាភិបាលដែលនៅជិតបំផុត ដោយស្ថានភាពអ្នកពុលតម្រូវឱ្យស្ថិតនៅក្រោមការត្រួតពិនិត្យតាមដានពីគ្រូពេទ្យជាចាំបាច់៕
