មន្ត្រីឧទ្យានុរក្សការិយាល័យឧទ្យានជាតិ នៃមន្ទីរបរិស្ថានខេត្តពោធិ៍សាត់ឃាត់ខ្លួនជនសង្ស័យម្នាក់ប្រើប្រាស់អាវុធខុសច្បាប់ក្នុងតំបន់ការពារ កាលពីថ្ងៃទី ០៤ កក្កដា។ រូបថត ក្រសួងបរិស្ថាន
ពោធិ៍សាត់ៈ បុរសម្នាក់ក្នុងចំណោម ៤នាក់ ត្រូវបានឃុំខ្លួនបណ្តោះអាសន្ននៅពន្ធនាគារពាក់ព័ន្ធទៅនឹងការប្រើប្រាស់អាវុធខុសច្បាប់បរបាញ់សត្វនៅក្នុងតំបន់ការពារ ក្រោយពេលដែលមន្រ្តីឧទ្យានុរក្សបរិស្ថានបានឃាត់ខ្លួនពួកគេ និងបំផ្លាញចោលវត្ថុតាងបទល្មើសជាច្រើននៅក្នុងព្រៃ ស្ថិតក្នុងស្រុកភ្នំក្រវាញ។
មន្ត្រីឧទ្យានុរក្សការិយាល័យឧទ្យានជាតិ នៃមន្ទីរបរិស្ថានខេត្តពោធិ៍សាត់ និង មន្ត្រីស័្មគ្រចិត្តដែលអនុវត្តគម្រោងរបស់អង្គការអភិរក្សអន្តរជាតិ (CI) បានចុះល្បាតទប់ស្កាត់បទល្មើសធនធានធម្មជាតិនៅចំណុចចំណោទពពេល ចំណុចអំពឹល និងចំណុចតាសៃ ស្ថិតនៅភូមិក្សេត្របូរី ឃុំសន្ត្រែ ស្រុកភ្នំក្រវាញ ខេត្តពោធិ៍សាត់រយៈពេល ២ថ្ងៃ គឺថ្ងៃទី៣ ដល់ថ្ងៃទី៤ ខែកក្កដា។
ជាលទ្ធផលពួកគេរកឃើញ និងដកហូតយករណាយន្តធំចំនួន ១គ្រឿង បំផ្លាញចោលរទេះក្របីចំនួន ៣គ្រឿង ដែលដឹកឈើអាលេខ២ ចំនួន ៩៦សន្លឹក និងបំផ្លាញគោយន្តកន្ត្រៃសណ្ដោងរម៉ក់ម៉ាកគូបូតាចំនួន១គ្រឿង ដែលបានដឹកឈើរាជចំនួន ១ដុំ។ នេះបើយោងតាមក្រសួងបរិស្ថាន កាលពីថ្ងៃទី៧ ខែកក្កដា។
ក្រៅពីនោះ ក្រុមមន្រ្តីក៏បានជួបបទល្មើសផ្សេងទៀតដែរ ដោយបានឃាត់ខ្លួនជនសង្ស័យចំនួន ៤នាក់ជាប់ពាក់ព័ន្ធនិងការបរបាញ់សត្វ ដោយប្រើប្រាស់អាវុធខុសច្បាប់នៅក្នុងតំបន់ការពារ ហើយបានដកហូតកាំភ្លើង AK47 ចំនួន ១ដើម និងគ្រាប់ចំនួន ១៩គ្រាប់ វិទ្យុទាក់ទងចំនួន ២គ្រឿង ម៉ូតូចំនួន ៤ផងដែរ។ បុរសទាំង ៤នាក់នៅភូមិក្សេត្របូរី ឃុំសន្ត្រែ ស្រុកភ្នំក្រវាញ ខេត្តពោធិ៍សាត់។
វត្ថុតាងត្រូវបានរក្សាទុកនៅស្នាក់ការតាងរ៉ាង រីឯជនសង្ស័យត្រូវបានបញ្ជូនទៅសាលាដំបូងខេត្តពោធិ៍សាត់។
លោក គង់ ពុទ្ធីរ៉ា ប្រធានមន្ទីរបរិស្ថានខេត្តពោធិ៍សាត់បានឱ្យដឹងថា បុរសម្នាក់ក្នុងចំណោម ៤នាក់ត្រូវបានចោទប្រកាន់ និងឃុំខ្លួនបណ្តោះអាសន្នពាក់ព័ន្ធទៅនឹងការកាន់កាប់ និងប្រើប្រាស់អាវុធខុសច្បាប់ក្នុងតំបន់ការពារ។ រីឯ ៣នាក់ផ្សេងទៀតត្រូវបានដោះលែងវិញ ព្រោះពួកគេគ្រាន់តែបានដើរតាមម្នាក់ដែលមានកំាំភ្លើងនោះប៉ុណ្ណោះ។
លោកបានបញ្ជាក់ថា៖ «អ្នកមានកំាភ្លើងនៅខាងខ្ញុំត្រូវបានចោទពីបទបរបាញ់សត្វព្រៃ តែបើខាងអយ្យការចោទរឿងប្រើប្រាស់អាវុធខុសច្បាប់ និង ឃុំខ្លួនកាលពីម្សិលម៉្ងៃ»។
លោកបានអះអាងថា បទល្មើសទីមួយ ក្រុមមន្រ្តីមិនមានឃើញជនសង្ស័យណាម្នាក់នោះទេ ដោយប្រទះឃើញតែវត្ថុតាងតែប៉ុណ្ណោះ។
ករណីដាច់ដោយឡែកមួយទៀត កងរាជអាវុធហត្ថ សហការជាមួយមន្ត្រីដែនជម្រកសត្វព្រៃ «ភ្នំត្នោត-ភ្នំពក» បានពួនស្ទះជនល្មើសបរបាញ់សត្វព្រៃ ក្នុងតំបន់ការពារធម្មជាតិ «ភ្នំត្នោត-ភ្នំពក» នៅភូមិម្រេច ឃុំស្រយង់ ស្រុកគូលែន ខេត្តព្រះវិហារកាលពីយប់ថ្ងៃទី៥ ខែកក្កដា។
ពួកគេបានជួបជនល្មើសចំនួន ១៧នាក់ (បើរាប់តាមរយ:កែវឆ្លុះ) ដែលប្រដាប់ដោយកាំភ្លើងកែច្នៃកាប៊ិនគ្រប់ដៃ ចូលទៅបរបាញ់សត្វព្រៃអនាធិបតេយ្យក្នុងតំបន់ការពារ។
ពេលកម្លាំងចូលមកដល់ ពួកជនល្មើសក៏នាំគ្នារត់គេចខ្លួន ហើយកងកម្លាំងបានបាញ់គំរាមទៅលើជនល្មើស ដើម្បីឱ្យជនល្មើសទម្លាក់អាវុធចុះ តែពួកគេមិនទម្លាក់ចោល ហើយបានរត់គេចខ្លួនបាត់អស់ ដោយបន្សល់ទុកនូវសត្វឈ្លូស១ក្បាល និងស្បែកជើងជាច្រើនគូរ។ នេះបើយោងតាមក្រសួងបរិស្ថាននាថ្ងៃដដែលនោះ៕
